Read BORANA BIBLE – KITAABA WAAQA Huji Ergattu 12 Bible Online

Huji Ergattu 12 - BORANA BIBLE – KITAABA WAAQA bible

Huji Ergattu 12

¹Bara suni hayyuuni Herode jed'ani gumi Kristo iti kae gaargalche.

²Inni Yakobo oboleesa Yohana sheeftiini ijeese.

³Ammalle aka wonti kunini Yahudi gammachiiftu arginaani Petrole qabe. (Gaafasi guyya jila qit'a bukho inqamneti.)

⁴ Qamnaani mana hid'aansa keesa kaye, harka askarti kud'ani jaati kenne, aka afuri afuriini isa tissani. Eegi jilti Pasaka dabarte, inni biyya durati isa baasu fed'e.

⁵Tanaafi Petro hid'aansati lakisani, ammo gumiini guddo Waaqa isaa kad'atte.

⁶Halkani Herodeni sila biyya duraani isa d'ufu fed'u, Petroni jiddu askarti lama rafu jira. Haada lama ka sibiilatiini isa hid'ani, jari mana hid'aansa eegu balbala qorqorate.

⁷Malaikaani Aabbo isa bira ejite, ifsaani manati ifse, malaikaani ch'inaacha Petro d'oofte, isa kaafte waan jetteeni, Hurrisi kai! Haadi sibiila kaani harka isaa iraa jige.

⁸Malaikaani waan isaani jette, Hid'ad'u, kopele naqad'u. Inni akasi tolchinaani malaikaani waan isaani jette, Woya uyifad'u, na gula kooti.

⁹Inni mana keesaa bahe isi gula deeme, aka wonti malaikaani tolchite sunini waan d'uga imid'aafanne, ammo waan oobjate sehe.

¹⁰Eegi fulla qaraatifi ta lameeso ta nami eegu dabrani, balbalti sibiila toko ta yo keesa baani dira seenani ufumaani duraa banamte. Worri alati bahe, kara toko gula yae maro tokotu malaikaani isa bira deemte.

¹¹Petroni waan kana mid'aafannaani waan ufiini jed'e, D'uguma, amma imbeekha aka Aabbooni malaika ufi erge, aka harka Herodetiifi waan gochiti Yahudi na tolchu feete jalaa na baasu.

¹²Ufi beennaani, mana Mariamu, haad'a Yohana, ka maqaani isaa d'ibiini Mariko jed'ani d'aqe, fulla nami hedduuni wolti woldae Waaqa kad'atu.

¹³Petroni balbala harkaani d'od'oomnaani, intalti toko ta Roda jed'ani ilaalu d'ufte.

¹⁴Qonqo Petro d'ageennaani, gammadafi balbala banu dad'abde, utaalte, aka Petroni balbala dura eju himte.

¹⁵Worri, Ati ya maraate isiini jed'e. Ammo isiini D'uguma, isuma d'uguma jette. Jennaani worri, Yoosi malaika isaa jed'e.

¹⁶Ammo Petroni balbala d'ad'auma d'ad'ae. Balbala bannaani isa argani guddo mamani.

¹⁷Ammo inni harkaani akheekhe, Ch'allisa jed'eeni; duuba aka Aabbooni hid'aansa keesaa isa baase worrati hime. Ammalle waan worraani jed'e, Beena, waan kana Yakobofi oboleyaani taaniti hima. Inni duuba ufi kae gara d'ibi d'aqe.

¹⁸Lafti bariinaani askartiini guddo bakhatte, waan Petroni tahe wolgaafatte.

¹⁹Eegi Herodeni Petro barbaade d'abe inni nama isa qorqorate gaafate ijeecha iti mure. Eegi waan kana Herodeni Yudea keesaa deeme Kaisaria d'aqe tae.

²⁰Herodeni biyya Tirofi Sidoniti guddo dalane. Worri wolti bahe isati d'ufe, namicha Blasto jed'ani, ka mana hayyu keesa hojatu jaala tolfatani, duuba gara Herode d'aqani, nagaya kad'atani, waan lafti suni worra lafa Herode ira sagale argatuufi.

²¹Guyya toko ka fohatani, Herodeni miha hayyu keyate, barch'uma ira tae, worrati hasae.

²²Gumiini lalabde waan jette, Qonqooni tuni ta Waaqati, ta namatiiniti.

²³Maro tokotu waan inni Waaqa ind'ugeesinifi malaikaani Aabbo isa d'oofte. Ramoni isa nyaate, inni due.

²⁴Ammo dubbini Waaqa guddatte fulla heddu geete.

²⁵Barnabafi Sauloni huji ufi hobaafannaani Yerusalemu keesaa galani, Yohana ka Mariko jed'ani woliini yaani.