Read BORANA BIBLE – KITAABA WAAQA Huji Ergattu 17 Bible Online

Huji Ergattu 17 - BORANA BIBLE – KITAABA WAAQA bible

Huji Ergattu 17

¹Eegi worri Amfipolifi Apolinia keesa dabrani, Thesalonike d'ufani, fulla mani Waaqa iti kad'atani ka Yahudi jiru.

²Pauloni akuma aada ufi jiddu worraa seene, guyya Sabato sadii waan dubbi Waaqa worra woliini hasae.

³Inni diideese worra agarsiise, aka Yesoni gaargale duisa keesaa kau male, ammalle, Yesoni kunini ka anini isaaniti himu d'uguma Kristo worraani jed'e.

⁴Nami gari d'ugefate, Paulofi Sila woliini yae; jara Griki ka Waaqa sodaatufi nad'eeni gurra qabdu hedduleeni d'ugefatte.

⁵Ammo Yahudiini maro d'iibitifi nama hamama, ka aada dansa imbeenne wolti yaamte, nama dira ch'ufa wolti baafte mana Yasoni haate, aka akasiini yo dandaani, Paulofi Sila qabani gumi duraani d'ufani.

⁶Ammo worra d'amnaani Yasonifi oboleyaani gari qabani, gara jara gugurda hirkisani, iyani waan jed'ani, Worri lafa ch'ufa garagalche kunini yayu armaaleeni bahe,

⁷Yasoniti worra bulche. Ammalle worri kuni ch'ufti seera Kaisari ch'abse waan jed'u, Hayyu d'ibiti jira ka Yeso jed'ani.

⁸Dubbi tanaani dira garagalchani gumifi jara gugurda ch'ufa jarjarsani.

⁹Jaaroleeni Yasonifi jara kaani hori iraa fuunaani galakifte.

¹⁰Maro tokotu oboleyaani Paulofi Sila halkaniini haga Beroya ergite. Worri d'umnaani mana Waaqa iti kad'atani ka Yahudi olduude.

¹¹Worri lafa suni worra Thesalonike ira dansa. Dubbi Waaqa qalbi dansaani ch'aqasani, t'aafi guyya ch'ufa keesa barbaadani, aka wonti kunini d'uga ilaalani.

¹²Duuba nami hedduuni d'ugefate, nad'eeni gurra qabdu ta gosa Yahudileeni d'ugefate, ammalle nami d'iiraleeni, hedduuni d'ugefate.

¹³Ammo Yahudiini Thesalonike, aka Pauloni dubbi Waaqa Beroya keesati odeese d'ageennaani, achi d'ufte biyya iti kaafte.

¹⁴Maro tokotu oboleyaani Paulo gara galaana ergite, ammo Silafi Timotheoni achumati hafani.

¹⁵Worri Beroyati galisaa kae jennaani Pauloni aka Silafi Timotheoni hure gara isaa d'ufani worrati d'aame.

¹⁶Ato Pauloni Athene keesati Silafi Timotheo eegu, aka diri suni waan harkaani boch'aniini guutame arge guddo lalefate.

¹⁷Tanaafi mana Waaqa iti kad'atani keesati Yahudifi nama Waaqa sodaatu woliini hasae, dubbi mormeeni, ammalle guyya ch'ufa gabaya keesati worra gara isaa d'ufeeni hasae.

¹⁸Jari woi beekhu toko, ka Epikureofi Stoiko jed'ani, isaani dubbi morme. Nami gari waan jed'e, Namichi daallichi kunini maani jechu jira? Ammo ka gari waan jed'e, Inni nama waan waaqoota ka nami imbeenne hasau jiru fakaata. Wonti worri akana jed'eefi waan Pauloni waan Yesotiifi waan kaisa isaa worrati hasaeefi.

¹⁹Worri isa fuud'e, gara Areopago geesani waan jed'aniini, Barsiisa haraa atini nama barsiiftu tana d'agayu feena.

²⁰Atini dubbi mama nuti odeesita, tanaafi nu waan kana d'agayu feena jed'ani.

²¹Nama Athentiifi keessumaani fulla suni d'ufte ch'ufti hojja ch'ufa woma intolchitu, waan haraa hasaani yokhaani ch'aqasani male.

²²Pauloni fulla Areopago ejate waan biyyaani jed'e, Worra Athene, aka isani guddo waan Waaqa hereddani yayu arge.

²³Ato anini dedeeme aada kad'acha teesani ilaalu, anini dubbi toko ta fulla isani sorio iti qalattani gubbati t'aafani arge, ta GARA WAAQA NAMI IMBEENNE jettu. Tanaafi waan isani ato imbeenne kad'attani suni anini isaniti odeesa.

²⁴ Waaqi, ka lafafi waan keesa jira ch'ufa uume, waan inni Abba gubbafi lafa taheefi, mana harki nama ijaare keesa intau.

²⁵Yokhaani harki nama isa inyaachisu, aka waan inni wo fed'u. Wonti akanatiifi inni jireennafi hafuura nama ch'ufaa kenna.

²⁶Inni nama toko iraa gosa lafa ch'ufa keesa teetu uume, lafa ch'ufa keesa qubsise. Isumati qara bara gochiti suni teetufi seera lafale tolche.

²⁷Wonti inni akasi tolcheefi, aka Waaqa barbaadani aka sila isa argani beekhani. Ammo inni nu tokole iraa fago injiru;

²⁸akuma nami toko jed'e, Nu isa keesa yaane teteenne jireenna arganna. Akuma namichi keesani toko sirba keesa jed'e, nu ijoolle isaati.

²⁹Waan nu ijoolle isaa taaneefi, waan Waaqi aka worqi yokhaani aka saldaqa yokhaani aka d'akha nami harkaani boch'u jiru nu sehu himmalle.

³⁰Haga nami isa imbeenne kana ch'ufa Waaqi ya bira namaa dabre, ammo ammatana aka nami ch'ufti daba iraa deebiu fed'a.

³¹Inni ya guyya tolfate, aka nama lafa jiru ch'ufa d'ugaani qoru, nama inni fohateeni. Inni ya nama kana duisa keesaa kaase, waan kana kara kanaani nama ch'ufaa d'ugeese.

³²Waan duisa keesaa kaiti d'ageennaani, nami gari goyeese, ka gari, Waan kana guyya d'ibi iti deebine sira d'ageenna jed'e.

³³Duuba Pauloni jiddu worraati kae deeme.

³⁴Nami gari isati mataqe d'ugefate, toko Dionisio jed'ani, nama goli Areopago, tokoleeni niiti toko ta Damari jed'ani, ammalle nami d'ibileeni ka worra woliini jiru d'ugefate.