Read BORANA BIBLE – KITAABA WAAQA Huji Ergattu 7 Bible Online

Huji Ergattu 7 - BORANA BIBLE – KITAABA WAAQA bible

Huji Ergattu 7

¹Jennaani Qaallichi Guddaani, Dubbini tunini d'uga? jed'e gaafate.

²Stefanoni waan worraani jed'e, Oboleyaanifi abbooti tiyya, me ch'aqasa! Waaqi Guddaani abba keenna Abrahamuti mullate, gaafa inni Mesopotamia keesa tau, ato inni lafa Haraniti ingodaaniini.

³Inni waan jed'eeni, Lafa tantetiifi worra kankele keesaa godaani, lafa anini sii agarsiisuti qubad'i.

⁴Jennaani inni lafa Kaldayo keesaa bahe lafa Harani qubate. Eegi abbaani isaa due, inni lafa tana ta isani amma keesa tetaniti qubate.

⁵Waaqi lafa suni gaafasi ejata tokole isaa inkennine, ammo Anini siifi d'aloota kanke ka hegeri d'ufuu kenna jed'e iti kakhate ato inni ijoolle ind'alfatini.

⁶Waaqi waan jed'eeni, D'alooti kanke lafa nyaapaa keesa taa, achiti worra boojiani haga ganna d'ibba afuri worra gaargalchani.

⁷Ammo, anini gosa suni ta worra gaargalchitu wollaala iti mure balleesa jed'e, duuba eegi suni lafa suni keesaa bahani lafa tana keesati na guddisani jed'e.

⁸Duuba Waaqi aada wold'aqisa ta qabanqaba Abrahamuti kenne. Tanaafi eegi torbaani toko Abrahamuuni Isaaqo qabanqaba qabe; Isaaqoni Yakobo qabanqaba qabe, Yakoboleeni ilmaani isaa kud'ani lamaani qabanqaba qabe, ta gochiti teenna iraa horte.

⁹Ilmaani suni Yusufu d'iibifate, aka inni tisse tahu lafa Misiriti gurgurte. Ammo Waaqi isa woliini tae,

¹⁰gaargala isaa ch'ufa nagayaani keesaa baase. Yusufuni Farao hayyu Misiri dura d'umnaani, Waaqi adaba dansaafi qalbi kenneefi. Faraoni Yusufu lafa Misiritiifi worra isaaleti jaallaba tolche.

¹¹Eegi suni beelafi gaargali guddaani lafa Misiritiifi ta Kanaani d'ufe ababooti teennaleeni sagale d'abde.

¹²Ammo Yakoboni aka mid'aani lafa Misiri keesa jirani d'ageennaani ijoolle isa, ababoota teenna, lafa suniti erge, tuni imaltu worraa ta qarati.

¹³Imaltu lameeso keesa, Yusufuni oboleyaani ufii ufi beesise, Faraoleeni worra Yusufu fuula barate.

¹⁴Jennaani Yusufuni nama erge, abba ufi Yakobofi fiit'a ufii ch'ufa, nama haga torbaatami shani yaame.

¹⁵Jennaani Yakobofi ilmaani isaa lafa Misiri d'at'e achiti raawate.

¹⁶Haga lafa Shekemu worra baatani achiti worra awaalani, awaala Abrahamuuni jaarole Hamori ta Shekemu ira bitate keesa.

¹⁷Ammo guyyaani Waaqi Abrahamuti kakhate d'iaannaani, nami keenna lafa Misiri keesati heddate.

¹⁸Eegi suni hayyuuni d'ibiini ka Yusufu imbeenne lafa Misiri fide.

¹⁹Inni gosa teenna sobe, ababoota teenna gaargalche, ijoolle didiqo alati gata ha hobaatu jed'e.

²⁰Bara suni Musani d'alate, inni guddo mid'aaga, haga jia sadi mana abba ufi keesati d'ossaani guddate.

²¹Alati isa gannaani, intalti Farao fud'atte aka ilme ufii isa guddifte.

²²Musani barsiisa gosa Misiri ch'ufa barate, dubbifi huji keesa nama gudda tahe.

²³Ganni isaa afurtama geennaani, inni oboleyaani ufii, ta gosa Israeli, guddo argu fed'e.

²⁴Oboleesa gosa isaa toko ka d'aanani arginaani inni isa qarqaare, haalo baaseefi, nama Misiri kaani d'ae ijeese.

²⁵Wonti akanatiifi inni waan gochiti isaa aka Waaqi harka isatiini nyaapa worraa duraa baasu beetu sehe; ammo worri imbeenne.

²⁶Boriyya ato worri woldidu, inni ufi agarsiise, wolti araarsu fed'e waan jed'eeni, D'iiro, isani oboleyaani, maafi woldiddani?

²⁷Ammo namichi fulla injirre kaani waan isaani jed'e, Eenuti hayyufi jaallaba keenna si tolche?

²⁸Aka nama Misiri kaani ijeefte nale ijeesu feeta?

²⁹Dubbi tana d'ageennaani Musani baqate, lafa Midiani jed'ani keesa tae, achiti ilmaani lama d'ale.

³⁰Eegi ganna afurtama, diida gaara Sinai keesati, malaikaani Aabbo Musati mullatte, gurbi bobeetu toko keesa.

³¹Musani arginaani guddo mame. Inni iti d'iaate aka ilaalu, ammo qonqooni Aabbo isati d'ufte waan isaani jette.

³²Anini Waaqa ababoota teetiti, Waaqa Abrahamutiifi ka Isaaqoti ka Yakoboti. Jennaani Musani ilaalu sodaate holate.

³³Aabbooni waan isaani jed'e, Kopele yaafad'u, fullaani atini ejitu tunini fulla qulqullo.

³⁴Anini gaargala jara kiyya, ka lafa Misiri keesa jiru, yayu arge, aka worri nati waakhu d'agaye baasu d'ufe. Amma kooti, anini lafa Misiriti sii erga.

³⁵Namichi gumiini Israeli didde Musa. Worri waan jed'eeni, Eenuti gudda keennafi jaallaba si tolche? Nami Waaqi aka inni gudda gumi suni tahe, qarqaarsa malaika gurbi bobeetu keesa isati mullateni worraa baase isuma;

³⁶inni waan mamatiifi akheekha lafa Misiri keesati fulla galaana Shamutiifi ammalle ganna afurtama lafa gamooji keesaleti tolche, akasiini worra baase.

³⁷Namichi gumi Israelitiini, Waaqi isanuma keesa raaga aka kiyya isanii erga jed'e Musa.

³⁸Inni sunuma ka gaafa gumiini Israeli lafa alo keesa jiruti malaika woliini gumi suni keesa jiru. Inni ababoota teennale woliini jira gaafa malaikaani gaara Sinai gubbati isani dubbate, ammalle isumati dubbi Waaqa ta jireenna nu barsiise.

³⁹Ammo ababooti teenna dubbi isa ch'aqasu didde isa lakifte lafa Misiriti d'araate iti dachau feete.

⁴⁰Tanaafi worri waan Haruniini jed'e, Waaqoota nu dura yaatu nuu mid'aasi namichi Musa jed'ani ka lafa Misiri keesa nuuni d'ufe kaani gara inni jiru imbeennu.

⁴¹Duuba artuma worri korma worqi mid'aase, sorio baaseefi waan harki worraa mid'aase suni jila tolche.

⁴²Duuba akasiini Waaqi worra yaala bahe, aka worri urji gubbaa kad'atu iti lakise, akuma kitaaba raagoota keesati t'aafani, Gosa Israeli, isani ganna afurtama lafa aloo keesati sorio naa inqalle.

⁴³Waaro waaqa Moloki jed'ani baatani, ammalle fakeenna urji waaqa keesani ka Refani jed'ani; wonti isani kad'attani suni waan harkaani boch'ani. Tanaafi anini lafa Babiloni mogaani isani baasa.

⁴⁴Ababooti teenna gaafa lafa aloo keesa jirtu, Waaro Woyyuma qabdi, ta aka Waaqi Musati hime gula mid'aasani.

⁴⁵Ababooti teenna ta eegi suni d'alate gaafa Yoshua woliini yaate lafa gosa Waaqi fulla ababoota teenna duraa gusse fud'ate, Waaro sunini d'ufte. Waarooni suni haga bara Daudi achi teete.

⁴⁶Inni Waaqa durati eeba argate, ammalle Waaqa kad'ate waan jed'eeni, Aka anini Mana Waaqa Yakoboti ijaaru na tolchi jed'e.

⁴⁷Ammo nami mana isaa ijaare Solomoni.

⁴⁸Tatule Waaqi guddaani mana harkaani mid'aasani keesa intau; aka raagi toko jed'u,

⁴⁹Aabbooni waan jed'u, Gubbaani barch'uma kiyya, laftileeni fulla anini miila kiyya d'aabad'u. Isani mana akami na ijaartani? Yokhaani fulla tami ta anini boqad'u?

⁵⁰Harka kiyyati waan kana ch'ufa mid'aaseeniti?

⁵¹Isani guddo mata jabaattani, garaani keesani ind'ugefatu! Gurri keesani dubbi Waaqa ind'agayu! Guyya ch'ufa Lubbu Qulqullo diddani; aka ababooti teesani tolchite, isanileeni akasuma tolchitani.

⁵²Raaga kami ka ababooti teesani ingaargalchiini? Ammalle worri ergattu Waaqa, ta d'ufiisa Nama d'uga himu d'ufte, ijeese. Isanileeni ammatana isa gurgurtani ijeeftani.

⁵³Isani seera Waaqi malaika ufitiini isanii erge argattani, ammo guutu diddani!

⁵⁴Waan kana d'ageennaani, garaani worra gubate ch'ininnatani.

⁵⁵Ammo Stefanoni Lubbu Qulqullooni guutamnaani, gara gubba sonaani olilaale, guddinna Waaqa arge, Yeso harka mirgicha ka Waaqa oleju arge

⁵⁶waan jed'e, Me ilaala, anini gubba banamtu arga, Ilma Nama harka mirgicha Waaqa oleju arga.

⁵⁷Jennaani qonqo olfud'atani ch'aarani, gurra ch'uqaalatani, isati oriani,

⁵⁸dira keesaa baasani, d'akhaani had'ani. Worri waan kana arge woya ufi fulla namicha kaima toko ka Saulo jed'ani naqani.

⁵⁹D'akhaani Stefano had'uma had'ani, ato inni Waaqa yaamate, Aabbo Yeso, lubbu tiyya fud'ad'u jed'u.

⁶⁰Jennaani inni jilbifate qonqo olfud'ate waan jed'e, Aabbo, ch'ubbu tana worrati inheregiini. Eegi waan kana jed'e due.