Read BORANA BIBLE – KITAABA WAAQA Rumi 3 Bible Online

Rumi 3 - BORANA BIBLE – KITAABA WAAQA bible

Rumi 3

¹Yahudiini gosa d'ibi ira jirti re? Yokhaani qabanqabaani woma namaa baati?

²Kara ch'ufaani guddo wo baati! Wonti qaraa fiit'e Waaqi d'aamsa ufi Yahuditi d'aamate.

³Yo worri gari ind'ugefanne ho? Maro waan kanatifi Waaqi d'uga lakisa?

⁴ Hiyyo, akasiiniti! Yo nami ch'ufti d'ara dubbatele, Waaqi kama d'ugaa. Akuma t'aafiini jettu: Yo atini dubbattu aka d'uga dubbattu argu malani, yo si qorani d'uga argachu malte.

⁵Yo d'arti nu tolchine d'uga Waaqa agarsiifte ho? Maani jenna? Waaqi, hojja nu gaargalchu, inni nu inqajelchine jenna? (Aka namaa dubbachu jira.)

⁶Hiyyo, akasiiniti. Yo Waaqi waan d'uga intolchine inni akamiini lafa qora?

⁷Ammo yo d'arti tiyya d'uga Waaqa guddifte isi mullifte, maafi nama daba naani jed'ani re?

⁸Yo akasi, Koota, hameenna tolchina, aka d'ugaani mullattu maafi injenne? Nami gari ya waan kana jed'e dubbi d'aratiini na himate! Worra suni aka wollaala iti muru malani inuma iti murani.

⁹Yoosi, nu Yahudi worra gosa d'ibi ira goomna? Hiyyo, akasiiniti! Anini ya qara aka Yahudifi gochiti d'ibileeni jabeenna daba jala jirtu agarsiise.

¹⁰ Akuma t'aafiini jettu: Nami d'uga qabu tokoleeni injiru,

¹¹nami hubacha qabu injiru, nami Waaqa barbaadu injiru.

¹²Nami ch'ufti ya kara iraa gore, ch'ufti ya wollaale. Nami waan dansa tolchu injiru, tokoleeni injiru.

¹³ Lubbuuni worraa aka awaala qotani jirti. D'arti araba worraa iraa baati, dubbini hamtuuni, ta aka had'aa bofa jirtu, afaani worraa keesaa baati.

¹⁴ Afaani worraa ya dubbi hamtuuni guutamani.

¹⁵ Kurfo jirani aka nama madeesani ijeesani.

¹⁶Fulla deemani ch'ufati badifi gaargala ufi duubati lakisani.

¹⁷Kara nagaya imbeekhani,

¹⁸ yokhaani Waaqa sodaachu imbaranne.

¹⁹Nu imbeenna aka wonti Seeri jed'u ch'ufti waan worra Seera jala jiruuni jed'ani, aka malte nama ch'ufa d'owani lafa ch'ufaa qorsuma Waaqa duraani d'ufani.

²⁰ Nami tokoleeni maro waan Seeri fed'u tolchuufi Waaqa ira d'uga inargatu: Seeri aka nami daba tolchu ch'alla nama agarsiisa.

²¹Ammo ammatana d'ugaani Waaqa ya mullatte, Seera ira woma inqabdu. Seerafi raagooti ya d'ugeesani:

²² Waaqi maro Yeso Kristo d'ugefataniifi nama ch'ufa d'uga heregaafi. Waaqi nama Kristo d'ugefate ch'ufa waan kana intolcha woldabraani injirtu:

²³nami ch'ufti ya daba tolche guddinna Waaqa hanqate.

²⁴Ammo maro tola eeba Waaqaatiifi, kara Kristo Yeso ka nama ch'ufa baasuuni, ya d'uga hereganiifi.

²⁵Waaqi ya isa sorio namaa tolche, aka maro d'iiga isatiifi daba namaa araaramani. Araarama kana yo d'ugefatani argatani. Wonti Waaqi Kristo sorio tolcheefi, aka d'uga ufi agarsiisu. Duri Waaqi obse wollaala bira namaa dabre;

²⁶ammo ammatana inni d'uga ufi garsiisa. Kara kanaani Waaqi aka d'uga qabu ufi garsiise ammalle nama Yeso d'ugefatu ch'ufa d'uga heregaafi.

²⁷Wonti nu ufi guddimnuufi maani re? Injirtu! Maafi akana? Waan nami Seera gula deemuufi? Hiyyo, ammo waan inni d'ugefatuufi.

²⁸Nu ya agarre aka nami d'ugefacha ch'allaani d'uga Waaqa iraa argatu, Seera guutitiini woma keesa injirtu.

²⁹Waaqi ka Yahudi ch'alla? Inni Waaqa gosa d'ibitiniti? Inni Waaqa gosa ch'ufaati.

³⁰ Waaqi toko ch'alla; inni maro d'ugefacha worraatiifi worra qabanqaba qabu d'uga heregaafi, akuma suni worra qabanqaba inqabatinile maro d'ugefacha worraatiifi d'uga heregaafi.

³¹Nu d'ugefachaani Seera balleesina re? Hiyyo, akasiiniti! Seera jabeesina.