Read BORANA BIBLE – KITAABA WAAQA Rumi 8 Bible Online

Rumi 8 - BORANA BIBLE – KITAABA WAAQA bible

Rumi 8

¹Worra Kristo Yeso keesa jiru qorsumaani inhamneefi.

²Wonti akanatiifi seeri Lubbu, ka jireenna maro Kristo Yesotiifi nuu kennu, ya seera dabaatiifi ka duisa jala naa baase.

³Waan seeri maro laafinna nafatiifi tolchu dad'abe, Waaqi ya tolche. Inni daba nafa nama keesa jiru wollaala iti mure, Ilma ufi erge, ka nafa namatiini d'ufe sorio daba balleesitu tahe.

⁴Wonti Waaqi waan kana tolcheefi, aka waan d'uga ka Seeri fed'u nuu tolchani, nu ka ammatana nafa gula iyaane ammo Lubbu gula yaanu.

⁵Worri waan nafa gula yau waan nafa herega. Worri waan Lubbu gula yau waan Lubbu herega.

⁶Nami waan nafa heregu indua, ammo nami waan Lubbu heregu jireennafi nagaya argata.

⁷Tanaafi nami waan nafa heregu nyaapa Waaqaa taha; inni Seera Waaqa inguutu, guutule indandau.

⁸Worri herega nafa gula deemu Waaqa dandae ingammachiisu.

⁹Ammo isani herega nafa gula iyaatani, ammo herega Lubbu gula yaatani, yo d'uguma Lubbuuni Waaqa isani keesa jiraatte. Nami Lubbu Kristo inqamne ch'ufti ka isaatiiniti.

¹⁰Ammo yo Kristoni isani keesa jiraate, ato dabi nafa keesani ijeesele d'ugaani lubbu teesani jiraachifti.

¹¹ Yo Lubbuuni Waaqaa ta Yeso duisa keesaa kaafte isani keesa jiraatte, yoosi ka Yeso duisa keesaa kaase nafa keesanile jireenna inkenna, Lubbuuni isaa ta isani keesa jirtuuni.

¹²Tanaafi oboleyaani tiyya, nafi keenna woma nura inqabu, aka nu fed'i isaa gula yaanu.

¹³Wonti akanatiifi yo fed'i nafa keesani gula deemtani indootani; ammo yo Lubbuuni nafa keesani ijeeftani injiraattani.

¹⁴Worri Lubbu Waaqa gula yau ilmaani Waaqaati.

¹⁵ Lubbuuni Waaqi isanii kenne sunini tisse isani intolchitu ammalle isani insodaachiiftu; ammo Lubbuuni ilmaani Waaqa isani tolchiti, ammalle jabeenna Lubbutiini Waaqati boonne, Aabbo, Aabbo jenna.

¹⁶Lubbuuni Waaqa lubbu teennaani taka taateti, Worri kunini ilmaani Waaqa jette nu d'ugeesiti.

¹⁷Waan nu ijoolle isaa taaneefi eeba inni ijoolle ufiiti kennu ind'aalla, ammalle Kristo woliini waan Waaqi isaa olkaye d'aalla; wonti akanatiifi yo nu Kristo woliini gaargalle guddinna isaa eegi tana qoodanna.

¹⁸Waan anini sehu, gaargali nu amma argannu kunini guddinna nu hegeri argannuuni wolti ind'ufu.

¹⁹Uumami ch'ufti haga Waaqi ilmaani ufi mullisuuti abdi guddooni eega.

²⁰ Wonti akanatiifi uumama ch'ufa ilaallaani, Woma imbahu jed'ani. Inni maro fed'i ufitiiniti, ammo maro Waaqi akasi fed'eefi akana tahe. Ammo abdi tanati jira:

²¹uumama ch'ufaa guyya toko tissooma shama keesaa baasani, balchooma dansa ka ilmaani Waaqa qabdu argata.

²²Nu imbeenna, aka haga amma uumami ch'ufti aka nad'eeni ch'ininfattu d'ukubsatu.

²³Uumama ch'allaaniti, nu ka mid'aani qara ka Lubbu qamnu, nuleeni, ato aka Waaqi d'ufe ilmaani isaa nu tolfate nu baasu teteenne eegannu imboonayu.

²⁴Nu abdiini baafamne; ammo yo waan abdannu arganne, wonti sunini iti deebite abdi intaatu. Eentu waan ilaani argu abdata?

²⁵Ammo yo waan ingarre abdanne, obsaani eeganna.

²⁶Akasuma Lubbuleeni d'ufte nu qarqaarti, ato lalaafo taanele. Nu aka kad'achu malle imbeennu; Lubbuti Waaqa nu kad'ata, waasa nami dandae afaaniini injenneeni.

²⁷Ammalle Waaqi, ka garaa nama ch'ufa argu, herega Lubbu imbeekha. Wonti akanatiifi Lubbuuni waasaani Waaqa kad'atti maro gumi isaatiifi ammalle fed'i isaa gula.

²⁸Nu imbeenna, aka waan ch'ufa keesati Waaqi worra isaa jaalatu, ka inni fed'i ufitiini yaame, waan dansa tolchuufi.

²⁹Worra duri Waaqi fohate inni ya olkaye aka ilma isaa fakaatu aka oboleyaani hedduu ilmi angafa tahu.

³⁰Tanaafi Waaqi worra duri olkaye kaani yaame; yaamicha ch'allaaniti ammo d'uga heregeefi; d'uga ch'alla inherenneefi ammo guddinna ufile worraa qoode.

³¹Ka waan ch'ufa garru, nu maani jenna? Yo Waaqi gama keenna jiraate, eentu dandae nu dabsata?

³²Inni Ilma ufile nu ind'owanne, ammo nu ch'ufaa baase! Inni ka Ilma ufi nuu kenne, waan nu feenu ch'ufa tolaani nuu inkennu?

³³Eentu gumi Waaqi fohate himata? Waaqi, Worri wollaala inqabu ya jed'e!

³⁴Eentu dandae wollaala worrati mura? Kristo Yesoni la due, ammalle la duisa keesaa kaasani harka mirga ka Waaqa teesisani; inni Waaqa nu kad'ata.

³⁵Eentu dandae jaalala Kristo keesaa nu baasa re? Gaargalafi hameennafi d'aanichafi beelafi hiyyumafi lubbufi duisileeni indandaa?

³⁶ Akuma t'aafiini jettu, Maro kanketiifi lubbuuni guyya ch'ufa nu bira ejiti, aka hooliye qalmaa geesani nu tolchani.

³⁷Hiyyo, waan kana ch'ufa nu maro nama nu jaalatuufi dabsanna!

³⁸Anini imbeekha, aka wonti tokoleeni dandeete jaalala isaatiini gargari nu imbaamne: duisafi jireennileeni; malaikafi jabeenni gubbaa jiruleeni; waan ammatiifi ka hegerileeni;

³⁹lafa gubbatiifi lafti gadileeni — wonti tokoleeni ta jaalala Waaqaatiini gargari nu baaftu injirtu, ta maro Kristo Yeso Aabbo keennatiifi teenna taate.