Read BORANA BIBLE – KITAABA WAAQA Yoshua 4 Bible Online

Yoshua 4 - BORANA BIBLE – KITAABA WAAQA bible

Yoshua 4

¹Eegi gochiti ch'ufti galaana Yordani taakite, AABBO Waaqi waan Yoshuani jed'e,

²Gosa kud'ani lamaani keesa nama d'iira kud'ani lama, gosa ch'ufa keesa toko tokooni fuud'i;

³duuba waan jettuuni, d'akhaye kud'ani lama wod'aka Yordani, fulluma qaaloleeni qara ejaanjite guura, yaani, fulla eddantana bultani naqa.

⁴Jennaani Yoshuani worra kud'ani lama ka inni fohate kaani yaame.

⁵Waan jed'eeni, Beena Sanduqa Wold'aqisa AABBO Waaqa keesani dura galaana seena. Isani namu d'akha toko gurmuti baad'a, aka henna gosa Israeli kud'ani lamaani gula.

⁶D'akhayeeni tunini waan AABBO Waaqi tolche worra qabsiifti. Hojja taka tana ijoolleeni teesani d'akhayeeni tunini maani? jette isani gaafate.

⁷Isani waan jettanini, Bisaani Yordani yau lakisani hojja Sanduqi Wold'aqisa AABBO Waaqa galaana Yordani taake. Tanaafi d'akhayeeni tunini waan suni worra Israeli qaabsifti haga jiru jireenna.

⁸Jari kaani waan Yoshuani jed'eeni guute. Akuma AABBO Waaqi Yoshuani jed'e worri d'akhaye kud'ani lama taani wod'aka Yordaniti guure, aka henna gosa Israeli kud'ani lamaani gula, ammalle fulla qubatani geese achi naqe.

⁹Duuba Yoshuani d'akhaye kud'ani lama wod'aka Yordani keesa, fulla qaaloleeni Sanduqa Wold'aqisa baatu taani ejaanjite, old'ad'aabe. (D'akhayeeni suni haga arrale achuma jirti.)

¹⁰Haga wonti ch'ufti ka AABBO Waaqi Yoshuani biyyati himi jed'e taatu, qaaloleeni Sanduqa Wold'aqisa baatu wod'aka Yordani keesa ejaanjite, akuma Musani Yoshuani jed'e kaani. Biyyiti arifate galaana taakite.

¹¹Eegi biyyiti ch'ufti taakite, qaaloleeni ta Sanduqa Wold'aqisa baatu biyya gula taakite.

¹²D'iirti gosa Reubenitifi ta Gaditifi ammalle gochiti Manase ta gari akuma Musani jed'eeni, lolaa kurfefate biyya taani ch'ufa dura galaana taakite.

¹³AABBO Waaqa durati d'iirti haga kunki afurtama lolaa kurfefatte diida Yerikoti dabarte.

¹⁴Guyya suni AABBO Waaqi worra Israeli ch'ufa durati Yoshua guddise; akuma duri Musa d'eetani saalfatanifi Yoshuale haga inni jiru ch'ufa d'eetani saalfatanifi.

¹⁵AABBO Waaqi waan Yoshuani jed'e,

¹⁶qaalole Sanduqa Wold'aqisa baatuni galaana keesaa baha jed'i.

¹⁷Tanaafi Yoshuani qaaloleeni, galaana Yordani keesaa baha jed'e.

¹⁸Duuba akuma qaaloleeni Sanduqa Wold'aqisa AABBO Waaqa baatu galaana Yordani keesaa baate miili worraa lafa goddu ira ejatteeni, bisaani Yordani, akuma qara kaani, fulla ufi ta duriti deebiani fach'aani.

¹⁹Guyya kud'anneeso ka jia tokeeso, biyyiti galaana taakite lafa Gilgali ta seera Yerikotini ila boruti qubatte.

²⁰Achiti Yoshuani d'akhaye kud'ani lamaani taani ta Yordani keesa guurani old'ad'aabe.

²¹Duuba inni waan worra Israelitini jed'e, Hegeri yo taka tana ijoolleeni teesani isani gaafate, D'akhayeeni tunini maanifi d'ad'abani jette?

²²Isani waan jettanini, Gochiti Israeli lafa goddu ira yaate, Yordani taakite;

²³wonti akanatiifi AABBO Waaqi haga isani dabartaniti bisaani isani dura gorse lafale gossa, jed'e akuma inni duri galaana Diima gosse, nu taakine.

²⁴Akanaani nami lafa gubba jiru ch'ufti, aka AABBO Waaqi jabaa beekha; duuba haga jiru jireenna AABBO Waaqa d'eetani.