Read BORANA BIBLE – KITAABA WAAQA Yoshua 5 Bible Online

Yoshua 5 - BORANA BIBLE – KITAABA WAAQA bible

Yoshua 5

¹Hayyooti Amori ch'ufti ta lafa Yordani ila adu jirtu, ammalle hayyooti Kanaani ta galaana d'aatu teetu, aka AABBO Waaqi galaana Yordani gosse, worri Israeli taake d'ageete jennaani maro gosa Israelitiifi aka taka inargini naate lubbuuni d'ufte.

²Gaafasi AABBO Waaqi waan Yoshuani jed'e, D'akha guraacha jajaba haadu mid'aasi worra Israeli ka qabanqaba inqabatini qabiifi.

³Duuba Yoshuani akuma AABBO Waaqi jed'eeni tolche worra Israeli qabanqaba qabeefi fulla gaara qabanqaba jed'aniti.

⁴Wonti Yoshuani worra qabanqaba qabeefi tana: Nami d'iira ka lola guutu, ka lafa Misiri keesa bahe yayu karaati lafa aloo keesati hobae.

⁵Ato nama lafa Misiriti bahe qabanqaba qabanifile nama lafa aloo eegi lafa Misiri keesaa bahani karaati d'alate taka qabanqaba inqabneefi.

⁶Wonti akanatiifi worri Israeli ganna afurtama lafa aloo keesa godaane, duuba nami ch'ufti, yokhaani nami lola guutu ch'ufti, ka lafa Misiri keesa bahe, waan qonqo AABBO Waaqa inch'aqasinifi raawate. Akuma Waaqi jed'e worri suni lafa aananifi dammi aka lolaa yau ta Waaqi ababoota worraati kakhate inagarre.

⁷Ilmaani d'iira ta worra suni taka qabanqaba inqabanne, tanaafi Yoshuani worra kana qabanqaba qabeefi.

⁸Haga worri qabanqaba qabanifi kaani madaani infayyini worri Israeli ch'ufti fulluma qara qubate tae.

⁹Duuba AABBO Waaqi waan Yoshuani jed'e, Anini arra waan worri Misiri isaniini miid'u ya isani iraa balleese. Tanaafi fulla suni maqa Gilgali baasani, fulla suni arrale Gilgaluma jed'aniini.

¹⁰Ato worri Israeli Gilgali jiru, aada Pasaka jed'ani, galgala guyya kud'ani afreeso ka jia suni, diida Yerikoti tolfatani.

¹¹Eegi Pasakani dabarte, boriyyaate worri sagale lafa Kanaani keesati baatu soorate: mid'aani akhaanifi qit'a bukho inqamne.

¹²Akuma worri sagale lafa Kanaaniti baate nyaateeni sagaleeni manna jed'ani taani d'umatte. Duuba worri Israeli iti deebie manna inyaanne ammo sagale lafa Kanaaniti baate ganna suni nyaatani.

¹³Ato Yoshuani d'aatu Yeriko jiru, inni olmillate, nama toko ka goraade harka qabu arge, kae gara isaa d'aqe waan jed'eeni, Atini nama keenna mo nyaapa keenna?

¹⁴Namichi waan jed'eeni, Anini jara suni tokoleeniti, ammo anini gudda duula AABBO Waaqa. Jennaani Yoshuani durati jige kad'ate waan jed'eeni, Aabbo anini hojattu teeti, maani naani jechu feeta!

¹⁵Duuba guddaani duula AABBO Waaqa waan Yoshuani jed'e, Kobe baafad'u fullaani atini ejitu tunini fulla qulqullo. Yoshuani akuma jed'aniini tolche.