Read BORANA BIBLE – KITAABA WAAQA Yoshua 8 Bible Online

Yoshua 8 - BORANA BIBLE – KITAABA WAAQA bible

Yoshua 8

¹AABBO Waaqi waan Yoshuani jed'e, askarti ch'ufa fud'ad'i, dira Ai d'aqi. Sodaatte garaa ilaafini; anati jabeenna sii kenna, aka atini hayyu Aitifi nama isaatiifi dira isaale dabsate, lafti sunini tante taatu si tolcha.

²Akuma atini Yerikofi hayyu isaa tolchite dira Aitifi hayyu isaale tolchi, ammo maro tana loonifi waan worri qabu ch'ufa boojia. Dira duddaduubani gaadi had'i.

³Duuba Yoshuani askarti isaa ch'ufa woliini dira Ai d'aqisa kurfefate. Inni askarti isaa nama kuma sodoma dadansa halkaniini erge

⁴waan jed'eeni, Dira gama kaaniti d'okhad'a, ammo iraa infagaatina; had'iisa kurfefad'a.

⁵Anaafi jari kiyya dirati gad'umna. Duuba yo worri Ai nuti gad'ufe, nu gargalle orina, akuma qara taane kaani.

⁶Worri haga nu dira keesaa baanuti nu reeba, waan nu aka gaafa qara kaani nu worra baqannu seha.

⁷Duuba isani fulla iti d'okhatani gabaattani dira worra qabdani. AABBO Waaqi keesani dira isanii kenna.

⁸Eegi dira suni fud'attani, Akuma AABBO Waaqi jed'e kaani, guba, wonti isani tolchu maltani sunuma.

⁹Jennaani Yoshuani fulla iti d'okhataniti, ta Ai ila adu, ta jiddu Aitifi Betheli, worra erge achiti eega jed'eeni. Ammo Yoshuani halkani suni olla keesa bule.

¹⁰Boriyyaate ganama Yoshuani lafaa kae, askarti isaa ch'ufa wolti yaame, isaafi jaaroleeni Israeli haga Ai worra gussite.

¹¹Isaafi askartini isaa yaate fullo guddo diraani seenani mirgati qubate, duuba fulla worri jiru sunifi Ai baleeti jiddu jira.

¹²Inni askarti kuma shani fuud'e, fulla iti d'okhatani, ta diraani ila adu, jiddu Aifi Betheli geese.

¹³Duuba askarti fulla bulto guddo ta diraani mirga had'iisa kurfeesani, askarti haga gari diraani ila aduu lakisani. Yoshuani halkani suni balee keesa bule.

¹⁴Hayyuuni Ai askarti tana arginaani, isaafi nami isaa ch'ufti hurrisani ganama gabahani, gara bale Yordani d'aqani, aka askarti Israelitini wolhad'ani. Ammo inni aka askarti d'ibiini dudda duubani d'okhate worra isaa eegachuti jirtu quba inqabu.

¹⁵Yoshuafi askartini isaa aka waan baqatani ufi tolchani lafa gamoojiti oriani.

¹⁶Duuba nama dira Ai keesa jiru ch'ufa wolti yaamani aka worra Yoshua reebani, ammalle reebu suni keesa dira iraa guddo fagaatani.

¹⁷Nami dira keesa jiru tokoleeni inhamne dira adiyyo lakisani worra Israeli reebani.

¹⁸Jennaani AABBO Waaqi waan Yoshuani jed'e, Woraana kanke gara dira Ai qabi, anini dira suni sii kenna. Duuba Yoshuani woraana ufi gara dira Ai suni qabe,

¹⁹akuma inni harka olfud'ateeni worri qara d'okhate eegu jiru kaani orie, dira seene dabsate maro tokotu gube.

²⁰Duuba yo worri Ai kaani ufi duuba millate aara dira isaani keesa olbahu argani, ammalle worri Israeli ka gara gamooji baqate kaaleeni fuula worraa keesa deebie, worri Ai kaani gara baqatu d'abe.

²¹Yoshuafi askartini isaa aka askartini worra ta gari dira Ai fud'ate gubde arginaani, worrileeni deebie askarti Ai ch'ufa hobaase.

²²Askartini Israeli taani, ta dira dabsateleeni, iti ga d'ufte, worra Ai kaani gama ch'ufaani marsani bahu d'owani, ch'ufa fit'ani fiiga d'owani,

²³hayyu worra ch'alla jira qabani Yoshuatini d'ufani.

²⁴Worri Israeli nyaapa ufi ka haga lafa gamoojiti reebe kaani goraadeeni fit'e. Jennaani dira Aiti deebiani, nama dira suni keesati hafele ch'ufa goraadeeni hobaasani.

²⁵Nami dira Ai ka guyya suni hobae, d'iiraafi nad'eenileeni wolti nama kunki kud'ani lama.

²⁶Wonti akanatiifi Yoshuani haga nama dira suni keesa jiru ch'ufa balleesani fit'aniti, woraani inni gara dira suni qabe kaani gadi indeefanne.

²⁷Worri Israeli loonifi waan d'ibile ka dira suni keesaa boojie, akuma AABBO Waaqi Yoshuani jed'e, fud'ate.

²⁸Akanaani Yoshuani Ai gube daara tolche haga arrale oni sunini akasuma jira.

²⁹Inni hayyu Aile mukhati fannise, reefa isaa haga aduuni d'ituti achumati lakise. Aduuni d'iinaani Yoshuani, Reefa arti fuud'a jed'e, duuba arti fuud'ani fullo keesa buusani d'akha irati tuulani d'akhaani sunini haga arrale achuma jira.

³⁰Jennaani Yoshuani fulla sorio AABBO Waaqa Israeliti qalani gaara Ebali irati mid'aase,

³¹akuma hojattuuni AABBO Waaqa Musani worra Israelitini jed'e, aka kitaaba Seera Musa keesati t'aafani: fulla suni d'akha sibiilani imboch'iniini mid'aasani, irati hori gubani. Sorio AABBO Waaqa baasanifi, sorio d'ibi ta wold'ageetile irati baasani.

³²Arti ka worri Israeli ch'ufti argu, Yoshuani Seera Musani t'aafe kaani iraa d'akha d'ibiti deebise.

³³Worri Israeli, jaarole, gugurda worraati, jaallaboota worraati, keessuma, ch'ufti Sanduqa Wold'aqisa AABBO Waaqa gama gama ejaanjani fuula qaalole Lawi ta Sanduqani yaatuti deefatani. Worri hagi gari dudda gaara Gerezimuti deefate, ka garileeni gaara Ebaliti deefate ejaanje. Jennaani akuma hojattuuni AABBO Waaqa Musani tolcha jed'eeni worri worra Israeli eebise.

³⁴Yoshuani duuba Seera kana ch'ufa, eebaafi abaarsale woliini, akuma kitaaba Seera keesati t'aafani, soome.

³⁵Dubbi Musani jed'e ch'ufa Yoshuani gumi artiti wolti baate soome. Gumi suni keesa nad'eenifi ijoolleefi worra gosa d'ibi ka worra Israeli keesa godaanuti jira.