Read BORANA BIBLE – KITAABA WAAQA 2 Timotheo 1 Bible Online

2 Timotheo 1 - BORANA BIBLE – KITAABA WAAQA bible

2 Timotheo 1

¹Maqaani kiyya Paulo, anini fed'i Waaqa gula ergatta Yeso Kristoti, isati na erge, aka anini jireenna maro Yeso Kristotitiifi nuu kakhatani odeesu.

² Gara Timotheo, ilma ani jaalad'u: Waaqa Abbaafi Kristo Yesoni, Aabbooni keenna, eebafi naasufi nagaya sii kenninna.

³Anini Waaqa ka qalbi dansaani, akuma ababooti teenna tolchite hojad'uufi, galata deebisa. Anini galata isaa deebisa hojja halkani guyya kad'acha tiyya keesati si qaabad'u.

⁴Imimaani kanke inqaabad'a, waan kanaafi guddo si argu fed'a, aka guddo gammadu.

⁵ Anini d'ugefacha tante ta d'uga inqaabad'a, d'ugefacha ta aka akko tante Losifi haate Eunikeni qabani. Atileeni tami akasi qabda, imbeekha.

⁶Maro waan kanatifi anini si qaabsiisa, eeba Waaqi gaafa anini harka sira kaye sii kenne jabeesi, huji tantele owisi.

⁷Wonti akanatiifi Waaqi lubbu nu daafansiiftu nu inkennine, ammo lubbu jabeennaafi jaalalafi ufi qorqoracha nuu kenne.

⁸Aabbo Yeso d'ugeesu inch'eerfatiini; ana ka maro isaatiifi hid'anile inch'eerfatiini. Ammo, maro Odu Dansaatiifi gaargala obsi, akuma Waaqi jabeenna sii kenne.

⁹Inni nu baase, jireenna qulqullo iti nu yaame, maro nu waan dansa tolchinefiiniti, ammo maro fed'ifi eeba isaati. Inni eeba tana ato lafa inuumiini Kristo Yeso keesa nuu kenne,

¹⁰ammo amma ya d'ufiisa Qarqaarsa keenna Kristo Yesotiini nuti mullisani. Inni ya jabeenna duisa dabsate, Odu Dansaani jireenna inhobaane mullise.

¹¹ Waaqi ya na fohate, aka anini Odu Dansa odeese, ergattufi barsiiftu tahu;

¹²maro waan kanatifi anini akana gaargala. Ammo anini ammalle inch'eerfad'u, waan anini nama abdad'e beekhufi, ammalle imbeekha aka inni haga guyyaani gahuuti waan inni harka kiyyati kenne qorqoratu.

¹³Dubbi d'uga ta anini si barsiise ha akheekha sii taatuuti, jabeesi, d'ugefachaafi jaalala ta maro Kristo Yesotiifi teenna taate keesa tai.

¹⁴Waan dansa ka harka keetiti kennani jabeesi, jabeenna Lubbu Qulqullo, ta nu keesa teetuni.

¹⁵Atini imbeeta, aka nami lafa Asia keesa tau ch'ufti na biraa yae, Figelofi Hermogeneleeni.

¹⁶Waaqi worra Onesiforoti nahiinna, waan inni maro heddu garaa na jabeeseefi. Inni waan anini hid'aansa keesa jiruufi na injibine,

¹⁷ammo inni akuma dira Rumitini baheeni na barbaade na arge.

¹⁸Aabbooni aka inni Guyya suni naasu Aabbo iraa argatu tolchiinna! Atini waan inni Efeso keesati naa tolchele akuma dansa beeta.