Read BORANA BIBLE – KITAABA WAAQA 2 Timotheo 2 Bible Online

2 Timotheo 2 - BORANA BIBLE – KITAABA WAAQA bible

2 Timotheo 2

¹Atini duuba, ilma kiyya, maro eeba Kristo keesa jirtu qabduufi jabaad'u.

²Dubbi tiyya ta anini si durati nama barsiise heddu nama atini d'ugefattu, ka dandae nama d'ibile barsiisuti kenni.

³Qooda kanke ka gaargala fud'ad'u, aka askarti dansa ta Kristo Yeso.

⁴Askartiini huji hojattu gudda isii gammachiisu feeti, waan d'ibi ka huji askartii intahiini keesa seenu imfeetu.

⁵Nami utaalu, aada woldogoomsu guutu male, woma inargatu.

⁶Abbaani oobru ka aka dansa hojate, mid'aani qara ka oobru ufi argachu male.

⁷Waan anini siini jed'e kana heregi, Aabbooni waan ch'ufa keesa si hubachiisa.

⁸Yeso Kristo qaabad'u, ka duisa keesaa kaasani, ka d'aloota Daudi, akuma Odu Dansa ta anini barsiisu keesati himani.

⁹Waan anini Odu Dansa hasaeefi gaargala, ammalle aka nama wo yake na hid'ani. Ammo dubbini Waaqa hid'aansa keesa injirtu;

¹⁰maro waan kanatifi anini gumi Waaqi fohate jed'e obsa, aka worrileeni baafama Kristo Yeso keesa jiru argatu, guddinna hegeri woliini.

¹¹Jechi kunini ka d'ugaati: Yo nu isa woliini doone, nu isa woliini jiraanna;

¹² yo obsine, isa woliini lafa finna: Yo nu isa mormanne, innileeni nu mormata;

¹³yo nu d'ugefacha iraa gorrele, inni ka d'ugefatani, waan inni dandae ufi imormanneefi.

¹⁴Gumi tante waan kana qaabsiisi, Waaqa durati gorsi, aka worri maro dubbitiifi wolindinne. Wonti suni woma namaa imbaatu, ammo worra ch'aqasu ch'alla balleesiti.

¹⁵Ufi qorqorad'u, aka Waaqi huji tante quufu, aka hojattu huji ufiiti inch'eere, ammo ka d'aamsa Waaqa qajeelche himu.

¹⁶Hasaa nama Waaqa imbeenne; ka daalluma, ka Waaqa ira nama fageesu, lagad'u.

¹⁷Wonti worri barsiisu aka mada diimtu namaa nyanyaatu jirti. Nami waan akana barsiisu Himenayofi Filetofa.

¹⁸Worri kunini ya kara d'uga lakise, d'ugefacha jara d'ugefate ka gari yake, Kaisi keenna yayu dabre jed'ani.

¹⁹ Ammo yayabi Waaqi keyate dandae inchochou; ammalle dubbi tana irati t'aafani: Aabbooni worra isaa ch'ufa fuula beekha; ammalle, Nami nama Waaqa ufiini jed'u hameenna lakisu male jed'ani.

²⁰Mana gudda keesa miha gosa hedduti jira. Ka gari qarsifi worqi, ka gari faarafi mukha; ka gari gatiini guddo ka gari gatiini diqo.

²¹Yo nami waan hamtu ch'ufa iraa ufi d'owe ufi qulqulleese, nama suni waan jabdu dandaani isani tolchani, waan inni aka huji dansa ch'ufa hojatu ufi baase abba ufiiti wo bahefi.

²²D'araa kaimooma lakisi, jara garaa qulqullooni Aabbo yaamatu woliini d'ugaafi, d'ugefachaafi jaalalafi nagaya barbaadi.

²³Ammo hasaa daalluma ka nama woma imbeenne lagad'u; wonti kunini woldidiisaani d'ufti, imbeeta.

²⁴Hojattuuni Aabbo woldidu himmalle. Inni nama ch'ufaa nahu male, barsiiftu dansaafi ta obsa qabdu,

²⁵ka laanatu kara nama isaani morku garsiisu tahu male. Hegeri Waaqi daba ira worra deebise, d'uga worra barsiisa.

²⁶Duuba qalbiini worraa deebinaani t'urura Sheet'ani worraani qabe mohate keesaa baqatani.