Read BORANA BIBLE – KITAABA WAAQA Ebrania 7 Bible Online

Ebrania 7 - BORANA BIBLE – KITAABA WAAQA bible

Ebrania 7

¹ Qaallichi Melkizedekiini kunini duri hayyu Salemuti, ammalle qaallu Waaqa Guddaati. Ato Abrahamuuni duula d'aqa hayyoota fit'e galu, Melkizedekiini isa arge eebiseefi.

²Abrahamuuni qooda kud'anneeso ka waan qabu ch'ufa kenneefi. Maqaani qara ka Melkizedeki Hayyu D'ugaati. Maro inni hayyu Salemutiifi, maqaani isaa ammalle Hayyu Nagayaati.

³Melkizedekiini abbaafi haad'a inqabu, ammalle ababootale inqabu; d'alootafi dua isale nami imbeekhu. Inni aka Ilma Waaqaa jira: haga jiru qaallu.

⁴Aka inni gudda inagartaniyu? Abrahamuuni, abbaani keenna guddaani qooda kud'anneeso, ka waan inni boojie ch'ufa, kenneefi.

⁵Qaaloleeni d'aloota Lawi Seeri gula qooda kud'anneeso ijoolle Israeli iraa guurachu indandeetii worri gosuma ufi ira fud'ata ato worri d'aloota Abrahamu tahele.

⁶Melkizedekiini d'aloota Lawitiniti, ammo qooda kud'anneeso Abrahamu iraa fud'ate, nama Waaqi kakhateefi argatte eebise.

⁷Aka nami nama eebisu nama eebisanifi ira jiru nami tokoleeni mormu indandau.

⁸Qaaloti qooda kud'anneeso nama iraa guurtu indooti; ammo Melkizedekiini ka qooda kud'anneeso nama iraa guure, akuma t'aafiini jettu ammalle injira.

⁹Tanaafi gaafa Abrahamuuni qooda kud'anneeso baase, Lawileeni, ka d'alooti isaa nama iraa guuru, ufile imbaase.

¹⁰Lawini gaafasi ind'alanne, ammo gudeeda abba isaa Abrahamu keesa jira, gaafa Melkizedekiini isa arge.

¹¹Aada qaalluma Lawi gula Seera gosa Israeliti kennani. Yo sila aadaani qaalluma Lawi sunini qit'e taate, wonti qaalluuni d'ibiini, ka aada Melkizedeki, ka aada Haruni intahiini, d'ufuufi injirtu.

¹²Wonti akanatiifi yo qaalluma garagalchani, Seerale garagalchu malani.

¹³Aabbooni keenna, ka waan kana waan isaa dubbatani, gosa d'ibi; gochiti isaa taka qaallu, fulla sorio iti qalani, intaane.

¹⁴Aka inni gosa Yuda guddo beekhani; Musaleeni gosa tana maqa ind'oomne, gaafa inni waan qaalole dubbate.

¹⁵Dubbini tuni haga qarale ira qulqullofti: qaalluuni d'ibiini yayu mullate, ka aka Melkizedeki jiru.

¹⁶Seerafi aada namaa gula inni qaallu intaane; ammo jabeenna jireenna muumme inqamnetiini qaallu tahe.

¹⁷ Akuma t'aafiini jettu, Atini haga jirtu, aada qaalluma Melkizedeki gula, qaallu taata.

¹⁸Duuba akanaani aada duri ya lakisani, waan isiini laaftu ammalle woma imbaaneefi.

¹⁹Seeri Musa dandae woma tokole inqit'eesu. Amma abdi d'ibiini ya d'ufani, ta Waaqati nu d'ieesitu.

²⁰Ammalle kakhu Waaqati jira. Gaafa jara kaani qaalole tolchani, kakhuuni tunini injirtu.

²¹ Ammo Yesoni kakhuuni qaallu tahe, gaafa Waaqi, Aabbooni ya kakhate, qalbi ufi gara ingalfatu: Atini haga jirtu qaallu taata isaani jed'e kaani.

²²Maro Yesotiifi, aka wold'aqisa ch'ufa ira dansa qamnu, ufi beenna.

²³Ammalle qaaloleeni duri heddu; waan worri duufi huji ufi guutu dad'abde.

²⁴Ammo Yesoni haga hegeri jira, duuba hujiini isaa ta qaalluma nama d'ibiti indabartu.

²⁵Ammalle inni indandaa, ammafi hegerile, aka worra isa gula Waaqati d'ufu baasu, waan inni haga hegeri Waaqa worraa kad'atuufi.

²⁶Yesoni duuba Qaallu Gudda, ka fed'i teenna ch'ufa nuu guutu! Inni qulqullo, wollaalafi daba tokole inqabu; isa ya worra ch'ubbutiini gargari basaani, gubbati olgeesani.

²⁷Inni aka qaalole gugurdo taani injiru ta guyya ch'ufa sorio qaltu, qara maro daba ufitiifi, ammalle maro daba namale. Inni sorio toko baase, taka quba ch'alla, gaafa nafa ufi baase.

²⁸Seeri Musa, nama qit'e intahiini qaalole gugurdo tolcha, ammo kakhuuni Waaqa, ta eegi Seera d'ufte, Ilma fohatti, ka haga hegeri qit'e tolchani.