Read BORANA BIBLE – KITAABA WAAQA Ebrania 8 Bible Online

Ebrania 8 - BORANA BIBLE – KITAABA WAAQA bible

Ebrania 8

¹ Wonti nu jennu tana: nu qaallu gudda akana ka barch'uma Waaqa Gudda harka mirga gubbaa tau qamna.

²Inni huji qaallu gudda Fulla Qulqulloti hojata, waaro Aabbooni d'aabe keesa, ta nami d'aabeeniti.

³Qaallu gudda ch'ufa aka inni galatafi sorio Waaqaa baasu fohatani, tanaafi qaallichi keenna guddaleeni wo baasu male.

⁴Yo sila inni lafa jiraate, qaallu tahu indandau, waan, aada Seera Yahuda gula, qaaloleeni galata baaftu jirtuufi.

⁵ Hujiini worri aka qaalole hojattu gaandidufi fakeennuma waan gubba jiraati. Musaleeni akuma kana. Gaafa inni diquma waaro ind'aabiini, Waaqi waan jed'eeni, Waan ch'ufa akuma gaara gubbati argite gula tolchi.

⁶Ammo Yesoni ya huji qaalluma ta ta worra iraa jirtu argate, akuma wold'aqisi inni Waaqafi nama jidduti tolcheleeni ira dansa. Wonti akanatiifi wold'aqisi sunini kakhu waan ira dansa qaba.

⁷Yo sila wold'aqisi qara qit'e tahe, wonti ka lameeso tolchaniifi injirtu.

⁸Ammo Waaqi wollaala gumi isaa irati arge waan jed'e, Aabbooni waan jed'u, Guyyaani ind'ufa, ka anini wold'aqisa haraa gosa Israelitiifi ta Yuda woliini tolfad'u.

⁹Aka wold'aqisa anini ababoota worraa woliini tolchetiiniti, gaafa anini worra harka qabe lafa Misiri keesaa baase. Worri wold'aqisa anini worra woliini tolche injabeesine; tanaafi anini waan worraa iyaalle, Tunini dubbi Aabbo Waaqi jed'e.

¹⁰Aabbo waan jed'u, wold'aqisi taka tana gosa Israeli woliini tolchu kana: Anini Seera kiyya qalbi worra keesa kaye, garaa worra keesati t'aafa. Anini Waaqa worra taha, worrileeni gumi tiyya taha.

¹¹Nami tokoleeni gaafasi nama d'ibi imbarsiisu, yokhaani nami tokoleeni oboleesa ufitiini, Aabbo beekha injed'u. Wonti akanatiifi worri ch'ufti na beekha, diqaafi guddaani worraleeni.

¹²Anini ch'ubbu worra inaraaramaafi, iti deebie daba worra inqaabad'u.

¹³Waan wold'aqisa haraa dubbannaani Waaqi ka qara la dulloomse wonti dulloomatte ch'ich'ite ch'ufti yoosu baddi.