Read BORANA BIBLE – KITAABA WAAQA 1 Petro 1 Bible Online

1 Petro 1 - BORANA BIBLE – KITAABA WAAQA bible

1 Petro 1

¹Maqaani kiyya Petro, ergattu Yeso Kristo, Gara gumi Waaqi fohate ta baqatte gargari firfirfamte, lafa Pontofi Galatiafi Kapadokiafi Asiafi Bithinia keesa jirtu.

²Maro fed'i Aabbo Waaqatiifi isani fohatani, aka Lubbu isaatiini gumi qulqullo taatani, Yeso Kristo ee jettani guuttani, d'iiga isatiini qulqulloftani. Eebafi nagaya guddisa argad'a.

³Waaqafi Abba Aabbo keenna Yeso Kristoti galata deebimna! Maro naasu isatiifi inni Yeso Kristo duisa keesaa kaase, jireenna haraa nuu kenne. Wonti kunini abdi jirtu nuu kenniti,

⁴tanaafi nu aka eeba guddo, Waaqi gumi isaati kakhate argannu inhereganna. Inni eeba suni gubba isanii olkaya, fulla isiini dandeete inshamne, yokhaani inhamaanne, yokhaani ingogonne.

⁵Isiini teesani, worra maro d'ugefachatiifi jabeenni Waaqa qorqoratu, ato isani baafama amma kurfeesani guyya muumme mullisani eegattanu.

⁶Maro waan kanatifi gammada, ato amma tana maro gaargala heddu isani argattani lalefattanile.

⁷Wonti kunini aka d'ugefachaani teesani ta d'uga garsiifti. Worqi d'umattule bassani ibidaani laalatani; ammo d'ugefacha teesani, ta worqi ira wo baatu, laalachu malani, aka isiini haga hegeri teetu. Yoosi Guyya Yeso Kristoni mullatu saaduufi guddinnaafi ulfinna argattani.

⁸Isani, ato isa inarginile, isa jaalatani, ato amma ilaani ingarrele isa d'ugefatani tanaafi gammada gudda dubbini dandeete imullimneeni qilit'amtani.

⁹Maro isani baafama lubbu teesani, ka d'ugefachaani fohate abdatu argataniifi.

¹⁰Waan baafama kana raagooti aka jaba barbaadde; waan eeba Waaqi isani kennu fadde.

¹¹Hojja wonti kunini d'uftuufi aka isiini d'uftu barbaadani. Lubbuuni Kristo, ta worra keesa jirtu, hojja tana akheete, gaargala Yesoni argachu maleefi guddinna eegi suni d'ufu himte.

¹²Waaqi ya raagootati mullise, aka hujiini worri hojate worra inqarqaarre, ammo isani qarqaartu, ato worri d'uga isani amma d'ageetani tana dubbatu. Ergattu Odu Dansa, ta jabeenna Lubbu Qulqullo, ta gubbaa gadi erganiini dubbateti waan kana isaniti hime. D'uga tana malaikaleeni sila barachu feeti.

¹³Tanaafi qalbi teesaniini kurfefad'a. Gurra d'aaba, ch'aqasa; abdi teesani, eeba hojja Yeso Kristoni mullatu isanii kennani, ira keyad'a.

¹⁴Ijoolle Waaqa saalfattu taha, d'araa gaafa woma imbeenne qabdani taani amma gula indeemina.

¹⁵Ammo waan tolchitani ch'ufa keesa qulqullo taha, akuma Waaqi, ka isani yaame, qulqullo.

¹⁶ Wonti akanatiifi t'aafiini, akuma anini qulqullo isanileeni qulqullo tahu maltani jetti.

¹⁷Hojja Waaqa, ka nama ch'ufa waan inni tolche gula aka taka qoru kad'attani, Aabbo jettaniini; tanaafi haga lafa tana keesa jirtani isa sodaachu maltani.

¹⁸Wonti akanatiifi isani imbeetani, aka aada hamtu abbooti teesani iraa barattani keesaa isani bitani. Horiini suni waan hamaatatiiniti, aka qarsifi worqifa.

¹⁹D'iiga Kristo ka guddo gati qabuti isani bite, ka aka ilme hoola bobotolefi miid'ama tokole inqamne.

²⁰Ato lafa inuumiini Waaqi isa maro teesaniifi fohate, guyya muumme kana isa mullise.

²¹Maro isatiifi isani Waaqa d'ugefattani, ka duisa keesaa isa kaase, guddinna kenneefi; tanaafi d'ugefachaafi abdiini teesanileeni Waaqa ilaalti.

²²Eegi isani amma d'uga guuttani, suniini ufi qulqulleesitani, ammalle oboleyaani teesani aka dansa jaalattani, garaa keesani ch'ufaani aka dansa woli jaalad'a.

²³Maro dubbi Waaqa ta haga hegeri jirtuufi, ya aka ijoolle didiqo ta abbaafi haati dootuniti ammo ta indoone d'alattani.

²⁴ Akuma t'aafiini jettu, nami ch'ufti aka buuyo jira, guddinni nama ch'ufti aka daraara buuyo jira; buuyooni godde, daraaraani isii jiga,

²⁵ammo dubbini Aabbo haga hegeri teeti. Dubbini Oduuni Dansaani isani d'ufteeni tana.