Read BORANA BIBLE – KITAABA WAAQA 2 Petro 1 Bible Online

2 Petro 1 - BORANA BIBLE – KITAABA WAAQA bible

2 Petro 1

¹Maqaani kiyya Simoni Petro, anini hojattufi ergattu Yeso Kristo. Anini tatabe tana gara worra d'uga Waaqaatiifi ta Qarqaarsa Yeso Kristotiini d'ugefacha dansa aka teenna argateti t'aafa.

²Eebafi nagaya guddisa argad'a maro hubacha Waaqaatiifi ta Yeso Aabbo keenna.

³Jabeenni isaa jabeenna Waaqaati, ya waan nu argachu male ch'ufa nuu kenne, aka jireenna dansaani teennu, waan nu nama nu yaame guddinnaafi dansooma ufi nu qoode beennuufi.

⁴Kara kanaani, inni ya kakhu dansa, ta guddo wo nu baatu nuu kenne, aka eegi waan inni kakhate argattani, d'araa badi, ta lafa tana keesa jirtu, duraa baatani, Waaqa fakaattani, jireenna isaa qoodattani.

⁵Maro waan kanatifi jabaad'a aka dansooma d'ugefacha teesaniti darattani; dansooma keesaniti hubacha darad'a;

⁶hubacha teesaniti ufi qorqorti darad'a; ufi qorqorti teesaniti obsa darad'a; obsa keesaniti jireenna Waaqa darad'a;

⁷jireenna Waaqa keesaniti jaalala oboleyaani darad'a; jaalala oboleyaaniti jaalala darad'a.

⁸Waan kana ch'ufa qabaachu maltani; yo waan kana ch'ufa qit'e ufi keesa qabaattani, beekhuma Aabbo Yeso Kristo keesa jabaattani mid'aani baaftani.

⁹Nami waan kana inqamne balla, ila inqabu, aka daba isaa ka dabre iraa qulqulleesani imbeekhu.

¹⁰Tanaafi oboleyaani tiyya, jabaad'a, aka yaamicha Waaqaatiifi fohacha isaa waan guyya ch'ufa tolfattani; wonti akanatiifi yo waan kana tolchitani haga jirtani injiddani.

¹¹Kara kanaani aka Finna Aabbo keennafi Qarqaarsa keenna Yeso Kristo ka hegeri argattani isani tolchani.

¹²Duuba waan kana anini hojja ch'ufa isani qaabsiisa, ato isani beetani, d'uga qara argatani aka dansa jabeesitanile.

¹³Anini guddo qajeeltu seha, yo anini qalbi teesani tuqe qaabsiise, haga anini jiru.

¹⁴Anini imbeekha d'iotu dua, akuma Aabbo Yeso Kristoni diideese nati hime.

¹⁵Anini jabaad'e, kara isanii mid'aasa, aka isani waan kana eegi anini duele hojja ch'ufa qaabattani.

¹⁶Wonti akanatiifi nu odu duri ta woma keesa injirre gula, aka Aabbo Yeso Kristoni jabeennaani d'ufu, isaniti inhimne. Iluma teennaani guddinna isaa agarre!

¹⁷ Gaafa Aabbo Waaqi ulfinnafi guddinna isaa kenne, nu achi jirra, gaafa qonqooni gara Guddinna gubbati gadi d'ufte. Kunini Ilma kiyya, ka anini jaalad'u, ka guddo naa gammachiisu jette.

¹⁸Nu qonqo tana ta gubba gadi buutu d'ageenne, gaafa nu isa woliini gaara qulqullo gubba jirru.

¹⁹Nu d'aamsa raagooti nuti himte aka dansa beenna. Yo waan kana aka dansa ch'aqaftani, waan dansa tolchitani; wonti akanatiifi inni aka ifse dukana keesa ifsitu jira, haga lafti bariite urjiini ganama gara keesaniti ifsituuti.

²⁰Waan ch'ufa ira, waan kana qaabad'a: nami tokoleeni dandae fagiisa t'aafi qulqullo keesati t'aafani akuma fed'u inhimu.

²¹Wonti akanatiifi dubbini fagiisaa tokoleeni taka fed'i nama keesaa imbaane, ammo Lubbu Qulqulloti nama dubbachiise, ato nami dubbi fulla Waaqati d'ufte dubbatu.