Read BORANA BIBLE – KITAABA WAAQA 1 Yohona 2 Bible Online

1 Yohona 2 - BORANA BIBLE – KITAABA WAAQA bible

1 Yohona 2

¹Ijoolle tiyya, anini waan kana isanii t'aafa, aka isani daba intolchine; ammo yo nami daba tolche, nu Yeso Kristo ka d'uga qamna, ka Abba nu kad'atu.

²Maro huji isaatiifi daba keenna nu araaramani, keenna ch'allaaniti ammo ka nama lafa ch'ufale.

³Aka Waaqa beennu yo seera isaa guunne beenna.

⁴Nami, Anini isa beekha jed'e, ammo seera isaa inguunne d'articha, ammalle d'ugaani isa keesa injirtu.

⁵Ammo nami dubbi isaa guutu ch'ufti ya akuma d'uga qit'eese Waaqa jaalate. Maro waan kanatifi nu imbeenna aka nu Waaqa keesa jirru:

⁶nami, Anini Waaqa keesa jira ufiini jed'u, aka Kristoni tahe tahu male.

⁷ Jaalaani tiyya, anini seera haraa isanii t'aafuuti injiru; ammo seera dullacha ka duru jiru. Seeri dullachi suni dubbi isani duru d'ageetani.

⁸Taatule, seeri anini isani t'aafu hareesa, aka inni d'uga, isanifi Kristole keesati inargani. Wonti akanatiifi dukanti dabru jirti, ifsaani d'uga yayu ifse.

⁹Nami, Anini ifsa keesa jira jed'e ammo oboleesa ufi jibbu ammalle dukana keesa jira.

¹⁰Nami oboleesa ufi jaalatu ifsa keesa taa, wonti isa gufachiisa tokoleeni injirtu.

¹¹Ammo nami oboleesa ufi jibbu dukana keesa jira, ammalle dukana keesa dedeema; gara deemule imbeekhu, waan dukanti lafa argu isa d'owarteefi.

¹²Anini isanii t'aafa, ijoolle tiyya, waan daba keesani maro Kristotiifi isanii araaramaniifi.

¹³Anini isanii t'aafa, abbooti, waan isani nama haga duriiti jiru beetaniifi. Anini isanii t'aafa, kaima, waan isani woni hama suni dabsattaniifi.

¹⁴Anini isani t'aafa, ijoolle, waan isani Abba beetaniifi. Anini isanii t'aafa, abbooti, waan isani ka haguma qara jiru beetaniifi. Anini isanii t'aafa, kaima, waan isani jabaattani, dubbini Waaqaa isani keesa jirtuufi, ammalle waan isani Hama Kaani dabsattaniifi.

¹⁵Lafafi waan keesa jira tokole injaalatiina. Yo nami lafa jaalate, jaalalti Abba isa keesa injirtu.

¹⁶Wonti lafa keesa jira ch'ufti, d'araa nafatiifi d'araa ilaatiifi finna nami jaalatuleeni gara Abbaati ind'umne, ammo lafuma keesaa d'ufe.

¹⁷Lafafi d'araani isileeni indabarti, ammo nami fed'i Waaqa tolchu haga hegeri taa.

¹⁸Ijoolle tiyya, muummeeni ya d'iaatte! Aka nyaapi Kristo d'ufu ya isaniti himani; nyaapi Kristo hedduuni amma yayu mullate, tanaafi aka muummeeni d'iaate imbeenna.

¹⁹Worri kunini qarale gumi teennaaniti, tanaafi nu biraa yaa; yo sila gumi teenna keesa jiraatani, nu woliini taani. Ammo wonti worri nu biraa yaeefi aka tokoleeni gumi teenna intahiini agarsiifti.

²⁰Lubbu Qulqullooni ya isani muudani, tanaafi isaniini ch'ufti d'uga beetani.

²¹Anini waan kana maro isani d'uga imbeenneefi isanii int'aamne; ammo maro isani d'uga beetaniifi isanii t'aafe, ammalle isani imbeetani, aka d'arti tokoleeni d'uga keesaa imbaane.

²²Eentu d'articha, nama Yesoni Kristoniti jed'u male? Nami kunini Nyaapa Kristoti, Abbaafi Ilmale indida.

²³Nami Ilma didu Abbale ya dide, ka Ilma fud'atu ya Abbale fud'ate.

²⁴Wonti isani haguma duriiti d'ageetani ha isani keesa teetu. Yo wonti isani haguma duriiti d'ageetani isani keesa teete, isani Ilmaafi Abba keesa teetani.

²⁵Tunini waan Kristoni nuu kakhate, aka jireenna hegeri nuu kennu.

²⁶Anini waan worra isani sobu fed'u t'aafa.

²⁷Yayu muudani; haga Lubbuuni suni isani woliini jirtu, nama isani barsiisu imfeetani. Lubbuuni waan ch'ufa isani barsiifti, wonti isiini isani barsiiftu waan d'ugaati, d'araaniti. Barsiisa Lubbu ch'aqasa, Kristo keesa taa.

²⁸Ee, ijoolle tiyya, Kristo keesa taa, aka yo inni mullate, nu jabaanne, Guyya inni d'ufu inch'eere.

²⁹Yo isani aka Kristoni d'uga beetani, aka nami waan d'uga tolchu ch'ufti ijoolle Waaqa beetani.