Read BORANA BIBLE – KITAABA WAAQA Waan Yohanati Mullisani 12 Bible Online

Waan Yohanati Mullisani 12 - BORANA BIBLE – KITAABA WAAQA bible

Waan Yohanati Mullisani 12

¹Akheekhi jabaani gubba bahe. Niiti toko ta adu uyifatte, jia miila ufi jala qabduti jira, mataani isii sure hayyuma ta urji kud'ani lama qaba.

²Garaacha qabdi gaargala d'alatiini ch'iniinfatte teete boote.

³ Akheekhi d'ibileeni gubba bahe. Jawe diimtu guddo toko, ta mata torbaafi gaafa kud'ani qabdu jira, ammalle mata ch'ufa gubba sure qabdi.

⁴ Eege ufitiini qooda sadeeso ka urji ch'ufa gubba guurte lafati jissite. Jaweeni taani niiti diquma ind'aliini taani dura ejite aka ilme isii, yo d'alatte, nyaattu.

⁵ Jennaani niitiini taani ilma deete, ka gosa ch'ufa ule sibiilatiini mohatu. Ammo daima kaani duraa butani, fulla barch'uma guddinna Waaqa geesani.

⁶Niitiini gara lafa gamooji baqatte, fulla Waaqi isii mid'aase, aka achiti qorqoratani haga guyya kunki tokotiifi d'iba lamafi jaatama.

⁷ Jennaani loli gubbati bahe! Mikaelifi malaikaani isaa jawe taaniini wolhaate, jaweleeni malaika ufitiini wolhaate;

⁸ammo jawe dabsatani, isiifi malaika isii gubba tau d'owani.

⁹Jawe guddo taani gadigatani! Isiini suni bofa duri kaani, ka Sheet'ana yokhaani Jinni jed'aniini, ka lafa ch'ufa sobe. Isaafi malaika isaa ch'ufa lafati gatani.

¹⁰ Jennaani anini qonqo guddo ta akana jettu d'agaye: Amma baafami Waaqaa yayu d'ufe! Waaqi ya irre ufi aka hayyu garsiise! Kristoni isaa ya jabeenna ufi garsiise! Wonti akanatiifi nama oboleyaani teenna himatu, ka halkani guyya Waaqa dura eje worraa himatu, la gubbaa gadi gatani.

¹¹Oboleyaani teenna d'iiga Ilme Hoolatiifi d'uga worri odeesuuni isa dabsatte; worri kurfo jira aka jireenna ufi baase duu.

¹²Tanaafi gammada, gubbafi worri achi tauleeni! Ammo gaargala lafafi galaanati! Wonti akanatiifi Sheet'ani ya siti d'ufe, ya dalane, inni imbeekha aka hojjaani isaa hobau geete.

¹³Jaweeni taani aka gubba gadigatani arginaani, niiti ilma deete taani gussite.

¹⁴ Niiti taani koola risa gugurda lama kennaniifi aka isiini lafa gamoojiti baqate ganna sadifi nusa achi teete achiti qorqoratani, aka isiini had'iisa bofa suni dura baatu.

¹⁵Jennaani jaweeni bisaani aka galaana afaani ufi keesaa yaafte, niiti taani gussite, aka lollaani isi fud'atu.

¹⁶Ammo lafti niiti qarqaarte, afaani bante, bisaani afaani jawe keesaa yae kaani ch'ufa liqimsite.

¹⁷Tanaafi jaweeni niititi dalante, d'aloota isi had'u d'at'e, worra seera Waaqa gula deemuufi ka d'uga Yesoni mullise d'ugefatu ch'ufa. Duuba jaweeni taani afaani galaana ejite.