Read BORANA BIBLE – KITAABA WAAQA Ruthi 3 Bible Online

Ruthi 3 - BORANA BIBLE – KITAABA WAAQA bible

Ruthi 3

¹Eegi sunii Naomiini, haati d'iirsa isii, waan Ruthiini jette, Intala tiyya, halkuma sii barbaada, aka atini nagayaani teetu.

²Boaziini, ka atini hojattu isaa ta uwa woliini hojatte, fiit'a teennaniti? Ilaali, inni galgala kana garbu d'aane hafarfata.

³Kai, nafa d'iqad'u, d'ad'a ifsad'u, woya tante ta ch'ufa ira dansa hid'ad'i, gara oobdi d'aqi, ammo namicha ufi imbeesisiini, haga inni golola iraa deebiuti.

⁴Ammo yo inni hiribaa deebie, fulla inni rafu mid'aafad'u, woya iraa fuud'i, fulla miila isaa ch'iisi; inni waan atini taatu siti hima.

⁵Isiini waan jetteeni, Waan atini jettu ch'ufa anini intolcha.

⁶Tanaafi isiini gara oobdi d'at'e, waan haati d'iirsa isii jetteeni tolchite.

⁷Boaziini golola iraa deebinaani, ka gammachu qabu, d'aqe fulla mid'aani iti guurani hiribaa gach'iise. Isiini laanuma d'ufte woya miila iraa fuute ch'iifte.

⁸Halkani guddo namichi rifate garagale, nama uwa ka fulla miila isaa ch'iisu arge, mame waan jed'eeni,

⁹Atini eenu? Isiini waan jette, Anini Ruthi, hojattu tante; nu qara miilo aanti, na d'aalu malte.

¹⁰Inni waan jed'eeni, AABBO Waaqi si eebisinna, intala tiyya; jaalalti tunini ta qarale ira guddo, waan atini kaima, dureesafi hiyyeesale, gula indeeminiifi.

¹¹Amma intala tiyya, insodaatini. Anini waan atini feetu ch'ufa sii tolcha; nami dira kana ch'ufti aka atini niiti dansa, ta adaba qabdu, imbeekha.

¹²D'uguma anini miilo te aanti, ammo ka nara siti aanuti jira.

¹³Halkani kana buli, bori diirama, yo inni si d'aalu fed'e, ha si d'aalu; ammo yo inni dide, anini maqa AABBO Waaqatini kakhad'a, nati si d'aala. Amma haga lafti bariituti rafi.

¹⁴Duuba fulla miila isaa bulte, ammo diirama, ato lafti bolgoddu, hiribaa kaate; wonti akanatiifi Boaziini aka nami tokoleeni isi oobdi d'ufte bulte beekhu imfed'u.

¹⁵Inni waan jed'eeni, Woya uyifattu suni kootiini, asi ballisi. Isiini ballimnaani mid'aani t'aasa diddama iti naqeefi, isi ira kaye, isiini kaate dirati galte.

¹⁶Gara haad'a d'iirsa isii deebinaani, jaartiini, Intala, dubbini akami taate? jette gaafatte. Isiini waan namichi tolcheefi ch'ufa iti odeesite

¹⁷waan jetteeni, inni garbu tana t'aasa diddama naa kenne, hood'i, harka duwa haad'a d'iirsa keetiti ingaliini naani jed'e.

¹⁸Naomiini waan jetteeni, Eegi, intala tiyya, haga waan dubbini tuni taatu arginuuti; hegeri namichi intau, haga dubbi tana hobaasuuti.