Read BORANA BIBLE – KITAABA WAAQA 1 Samueli 1 Bible Online

1 Samueli 1 - BORANA BIBLE – KITAABA WAAQA bible

1 Samueli 1

¹Duri Nama tokoti jira, ka Elkana jed'ani ka gosa Efraimu, ka dira Rama lafa gareeni Efraimu keesa tau. Inni ilma Yerohamu ammalle akhaakhu Elihu; worri isaleeni worra Tohu, ka balbala Sufu.

²Elkanani nad'eeni lama qaba, Hanafi Penina. Peninani ilmaani qabdi, ammo Hanani inqabdu.

³Ganna ch'ufa Elkanani Ramaa bahe aka AABBO Waaqa gudda kad'ate Shiloti sorio baasufi; qaaloleeni AABBO Waaqa ta achi hojattu, Hofnifi Finehasi ilmaani Eli.

⁴Hojja Elkanani sorio qalu ch'ufa inni fooni suni garagari qoode haga toko Penina kenne kaani d'ibilee ilmaani isiiti garagari qooda.

⁵Ato Hana guddo jaalatele qooduma toko ch'alla kennaafi, maro AABBO Waaqi garaa isii hid'e ilmaani argachu isi d'owefi.

⁶Peninani Masanuni isii isiiti gamte qot'ifti, waan AABBO Waaqi ilme isii d'owefi.

⁷Wonti kunini ganna heddu ch'ufa akasuma tate; hojja Mana AABBO Waaqa d'aqani ch'ufa Peninani Hanati gamte, gaargalchite boochite, woma nyaachu d'owarte.

⁸D'iirsi isii Elkanani, Hana, maanifi teete boota? Maanifi sagale nyaachu dida? Garaani kanke maanifi hojja ch'ufa akana hama? Anini ilma kud'ani ira sii injiru? jed'eeni.

⁹Guyya toko, eegi worri sagale Mana AABBO Waaqa ka Shilo jiru nyaate iraa kae, Hanani ta guddo garaani hammate, olkaate laalalani AABBO Waaqati boote kad'ate. Hojja suni qaaliichi Elini fulluma ufi balbala keesa taa.

¹¹Jennaani Hanani kakhate waan Waaqaani jette, AABBO Waaqa gudda, anini Hana hojattu teeti! Na ilaali, gaargala kiyya argi, na inded'ini, na qaabad'i! Hojja atini ilma naa kennite haga inni jiru ch'ufa anini isa sii keenna; rifeensa isaale haadu itiind'aabani.

¹²Haga Hanani guddifte AABBO Waaqa kad'atu kana ch'ufa Elini afaanuma isi keesa laala.

¹³Isiini laanuma garaa isi keesati Waaqa kad'achu jirti; hid'i isi ta chochootu male waan isiini jettu woma ind'agaani. Tanaafi Elini waan isiini farso d'udde machofte sehe.

¹⁴Waan jed'eeni, Atini haguma jirtu machini farso tunini siraa ingaltu? Waan d'uddu kana lakifte aka dansaa teete ho!

¹⁵Isiini waan jetteeni, Aabbo akasiniti, anini machi inqabu, womale ind'unne, anini niiti guddo gaargala qabdu, tanaafi anini AABBO Waaqa kad'ad'e gaargala kiyya ch'ufa iti himad'e.

¹⁶Niiti seseega woma keesa injirre na insehini wonti anini haga kana ch'ufa Waaqa akasi kad'ad'eefi maro gaargala gudda qabuufi.

¹⁷Jennaani Elini waan jed'eeni, Beni nagayaani gali Waaqi Israeli waan atini kad'atu kana sii kennina.

¹⁸Isiini waan jetteeni, Hojja ch'ufa akanuma na eebisi. Akasi jette jennaani kaate biraa deemte, sagale nyaate, laalalti taani ch'ufti iraa galte.

¹⁹Boriyyaate Elkanafi worri isaa ganama lafaa kae duuba, Eegi Aabbo Waaqa kad'atani worra isani ka Ramati dachaani. Elkanani, niiti isatini woliini bulani, AABBO Waaqi kad'a isi d'agayeefi.

²⁰Akanaani isiini garaachoofte ilma d'alte maqa isaa Samueli baafteefi waan jette, Anini isaa jed'e AABBO Waaqa kad'ad'e.

²¹Hojani Elkanafi worri isaa Shilo d'aqe sorio ganna ch'ufa AABBO Waaqa baasanifi sorio d'ibi kakhu isaatini guutani geete.

²²Ammo maro tana Hanani worra gula indeemne. Isiini waan d'iirsa isiitiini jette, Hojja hegeri anini daima kana harma iraa kute, anini isa Mana AABBO Waaqati geesa, aka inni haguma jiru ch'ufa achi tau.

²³Elkanani waan jed'eeni, Hayye hataatuti, waan atini dansa seetu tolchi; haga atini harma iraa kututi worrumati hafi. AABBO Waaqi waan sii kakhate guutinna! Tanaafi Hanani worrati hafte daima isii hosifate.

²⁴Eegi harma iraa kutte isiini isa Shiloti geesite, ammalle isa woliini jibicha korma ka ganna saditifi kilo kud'ani ta dargaye daakhanitifi gorjo daad'i miju geesite. Gaafa suni ka isiini Samueli Mana AABBO Waaqatini d'ufte inni waan diqa.

²⁵Eegi jibicha suni qalani worri daima suni Eliti geese.

²⁶Jennaani Hanani waan jetteeni, Aabbo kiyya atini na qaabata? Anini niiti baranna atini agarte ta arma ejite AABBO Waaqa kad'ate taani.

²⁷Anini aka ilma argad'u AABBO Waaqa kad'ad'e jennaani inni gurba kana naa kenne.

²⁸Tanaafi anini isa amma tana AABBO Waaqaa keenna. Inni haga jiru ch'ufa ka AABBO Waaqati. Jennaani worri achiti AABBO Waaqa kad'ate.