Read BORANA BIBLE – KITAABA WAAQA 1 Samueli 13 Bible Online

1 Samueli 13 - BORANA BIBLE – KITAABA WAAQA bible

1 Samueli 13

¹Ganni Saulo sodoma gaafa inni hayyu tahe, ammalle inni lafa Israeli ganna afurtama mohate.

²Sauloni nama kuma sadi fohate nama kuma lama lafa Mikimashitifi lafa gaareeni ta Betheli keesati ufi birati lakise ammo nama kuma toko ilma isaa Yonathani woliini dira Gibea ka lafa gosa Benjamini keesati, erge. Duuba inni askarti taani ch'ufa worra isaniti galche.

³Yonathanini gudda askarti Filisti ka Geba tau ijeese, duuba worri Filisti ch'ufti qonqo suni d'agaye. Jennaani Sauloni nama erge Magalata d'ae, worra Ebrania ka lafa ch'ufa keesa jiru yaame.

⁴Worri Israeli ch'ufti, aka Sauloni gudda askarti Filisti ijeese, worri Filisti worra jibbe d'agaye. Tanaafi biyyiti yaamicha Sauloni worra yaame kaani d'ageennaani Gilgaliti wolti d'ufte.

⁵Worri Filisti wolti bahe aka worra Israeli had'u; worri gaari lola ka kuma sodomatifi farda kuma jaa ka nami yaabatufi askarti heddu muumme inqamne ta aka maansa afaani galaana qaba. Duuba Mikimashi ta Bethaveni ilaboru d'aqani achiti qubatani.

⁶Jennaani worra Israeli aka male had'ani lubbu keesaa baasani. Akasi arginaani worri Israeli goda d'akhafa boolafa d'akhayeefa ellaanifa bolbolafa ch'ufa keesati d'okhatani;

⁷nami garileeni galaana Yordani taake lafa Gaditifi ta Gileadi seene. Sauloni Gilgaliti hafe, nami isa birati hafeleeni ch'ufti nahe hollate.

⁸Inni guyya torba akuma Samuelini isaani jed'e kaani isa eege ammo hataatu Samuelini ammalle Gilgalini imbahane. Biyyiti Saulo biraa yau feete,

⁹jennaani inni waan worraani jed'e, Sorio gubani baasanifi sorio wold'ageeti natiini koota, inni sorio gubani baase.

¹⁰Jennaani akuma inni harka iraa fud'ateeni Samuelini d'ufe. Sauloni fuula keesa deeme nagaya fuud'e,

¹¹jennaani Samuelini waan jed'eeni, Atini maani tolchite? Sauloni waan jed'eeni, Biyyiti na bira yau feete, atinileeni hojja baantu taani ind'ufne, suni malele worri Filisti Mikimashiti wolti bau jira.

¹²Jennaani anini herege waan jed'e worri Filisti arma Gilgaliti na had'u fed'a anileeni Waaqa kad'ad'e, AABBO na eebisi injenneeni. Tanaafi anini herege sorio baasitini ya malte ufiini jed'e.

¹³Samuelini waan jed'eeni, Atini yayu daalloofte; atini seera AABBO Waaqi kanke sii kenne gula indeemne, ato sila gula deemte inni aka siifi d'aloota kanke worra Israeli haga jiru ch'ufa dura deeme fidu isani tolcha.

¹⁴Ammo amma tana atini dura deemte worra infiddu. Waan atini AABBO Waaqa seera isa gula deemu diddeefi, inni nama garaani isaa jaalatu barbaade, hayyu worra isaa tolcha.

¹⁵Jennaani Samuelini Gilgali kae kara ufi iti d'aabate. Biyyiti taani d'ibiini kaate, Saulo ka gara askarti isaa deemu woli yaani. Worri Gilgalini bahe, Gibea ta lafa Benjaminiti iti d'aabate. Sauloni askarti isaa ch'ufa wolti baase hede, isiini nama d'ibba jaa taate.

¹⁶Saulofi ilma isaa Yonathanifi askartini worraa Geba lafa Benjamini keesati qubate; ammo worri Filisti Mikimashiti qubate.

¹⁷Askartini Filisti olla isaaniti had'iisa yaate fulla saditi garagari baate; hagi toko Ofrati fulla deefate lafa Shualiti iti d'aabate;

¹⁸hagi toko Beth-Horaniti fuula deefate, taani d'ibiini seera bale Seboimutifi lafa aloo irani mullatuti qajeelte.

¹⁹Wonti tumtuni tokoleeni lafa Israeli keesa injirreefi maro worri Filisti gosa Ebrania woraanafi goraadee tumu d'owefi.

²⁰(Worri Israeli Filisti d'aqe maarasha, jembe, d'agaraafi haamtu qarachu male;

²¹horini huji suni baasani kana; hojja d'agaraafi sururu qarani yokhaani mid'aasani beesuma diqo baasani. Ammo hojja maarashafi jembe qarani hagasi lama baasani.)

²²Tanaafi guyya lola suni askartini Israeli, Saulofi ilma isa Yonathani male, tokoleeni ta goraadeefi woraana qabdu injirtu.

²³Worri Filisti askarti gari kaarra Mikimashiti erge, aka achiti nyaapa dabru d'owani.