Read BORANA BIBLE – KITAABA WAAQA 1 Samueli 17 Bible Online

1 Samueli 17 - BORANA BIBLE – KITAABA WAAQA bible

1 Samueli 17

¹Worri Filisti aka worra Israeli had'u dira Yuda ka Soko jed'aniti wolti bahe; lafa toko ta Efes-Damimu jed'ani ta jiddu Sokofi Azeka, qubate.

²Saulofi worri Israelileeni bale Eela qubatani, aka worra Filistitini wolhad'ani kurfefatani.

³Worri Filisti gaara toko irati wolti bahe, worri Israelileeni gaara d'ibi irati wolti bahe ka baleeni jiddu worraa jirtu.

⁴Namichi janni guddaani toko, ka Goliathi jed'ani, ka worri isa dira Gathi jiru, olla Filistiti gad'ufe. D'eerinni isaa d'und'uma jaafi taaku toko;

⁵inni kofia sibiila diimani mid'aasani matati keeyate koti sibiila diimani mid'aasani, ka ulfinni isaa kilo shantami torba, keeyate,

⁶miila isaleti inni sibiila diima keeyate woraana sibiila diimani mid'aasani gurmu ira keeyate.

⁷Soometi woraana isaa haguma utuba geeti, ulfinni mata woraana isaa kilo torba askarticha tokoti isa dura deema, ka wonte jala baatu.

⁸Goliathini achi eje lalabe waan worra Israelitini jed'e, Isani maanifi ka had'iisa kurfoftani achi ejaanjitani? Anini worra Filistiti, beekha; tissele Saulo tana, nama keesani toko gabaasa, woli haana.

⁹Yo inni na dabsate na ijeese, nu tissele teesani taana; ammo yo anini isa dabsad'e isa ijeese isani tissele teenna tatani.

¹⁰Anini amma tana askarti Israeli ch'ompifad'a. Nama toko na baasa, wolhaana.

¹¹Dubbi suni d'ageennaani Saulofi askartini isa guddo sodaatani mudamani.

¹²Daudini ilma Yeseti, ka gosa Efrathi, ka worri isaani dira Bethlehemu, ka lafa Yuda. Yeseni ilmaani saddeeti qaba, bara Sauloni nama fide suni inni waan jaare hobae.

¹³Ilmaani isaa gugurdoni nami sadi yayu Saulo woliini duula d'at'e. Angafi Eliabu, ka iti aanu Abinadabu, ka sadeesoleeni Shama.

¹⁴Daudini ilma maand'a, duuba haga oboleyaani isaa gugurdoni sadeeni taani Saulo gula yaatu,

¹⁵Daudini worra biraa deeme Bethlehemuti deebie ree abba isaa tisse ammalle keesa deebia.

¹⁶Goliathini guyya afurtama diiramafi galgala gabahe, askarti Israeli ch'ompifata.

¹⁷Guyya toko Yeseni waan Daudini jed'e, Akhaawi mid'aani tana ta subba tokotifi qit'a kud'ani fuud'i, arifad'i oboleyaani tante ta duula jirtu geesi.

¹⁸Ammalle ititu qooda kud'ani tana gudda askartiti geesi. Waan oboleyaani tante keesa jirtu hubad'u ammalle waan aka atini worra garte na garsiisa natiini kooti.

¹⁹Saulofi oboleyaani tanteetifi worra Israeli kaani ch'ufti bale Eela jed'ani keesa jirani, aka worra Filisti had'ani.

²⁰Boriyyaate Daudini diirama lafaa kae, hooliye nama d'ibiti lakise, miha kaani fae, akuma Yeseni jed'e kaani kae iti d'aabate. Hojja inni artini bahe, askartini Israeli ufuma fokorte lola yau jirti.

²¹Askartini Filistitifi ta Israeli lola kurfefatte fuula wolti deefate.

²²Daudini miha kaani namicha miha askarti qorqoratu kaani kenne, utaale, fulla askartini lola kurfo ejitu taani d'aqe oboleyaani ufi nagaya fuud'e.

²³Ato inni tae worraani woliini haasau, Goliathini namichi jabaani Filisti kaani, askarti isaani keesa gad'ufe, akuma qara kaani worra Israeli kaani ch'ompifate, ka Daudini d'agayu.

²⁴Worri Israeli isa arge jennaani nami ch'ufti isaa sodaate duraa baqate.

²⁵Jennaani waan woliini jed'ani, Nama kana laala aka inni nu ch'ompifatu; hayyichi keenna Sauloni nama isa ijeese waan guddo kennaafi intala ufile fuusise worra isaani damoosa ira imfud'ani jed'e.

²⁶Daudini waan nama isa bira ejaanjuni jed'e, Nama namicha Filisti kana ijeese ch'eera hama kana gosa Israeli dura baase maani kennanifi? Qarale namichi Filisti kunini ka qabanqaba inqabatini hojja tae askarti Waaqa jiru ch'ompifatu eenu ufi seha?

²⁷Worri waan qara woliini jed'e kaani iti hime waan jed'eeni, wonti nama Goliathi ijeesu tolchani kana.

²⁸Eliabuni, oboleesi Daudi guddaani, isa worra sunini haasau d'ageennaani aka hama dallane waan jed'eeni, Atini maani arma barbaada? Ree diqo taani atini eenuti lakifte lafa aloo keesati? Anini sii beekha, atini ch'ubbicha kiyyiba! qarale atini had'iisuma dawaachuu d'ufte.

²⁹Daudini waan jed'eeni, Anini maani yakeefi atini teete, dubbile na d'owarta?

³⁰Eege inni nama d'ibileti garagale dubbi suni gaafate, nami sunileeni ch'ufti akuma qara kaani iti hime.

³¹Nami gari dubbi Daudini jed'e taani, d'ageennaani Sauloti hime, duuba Sauloni isa yaame.

³²Daudini waan Sauloni jed'e, Aabbo, nami tokoleeni namicha Filisti kana sodaachu himmalle. Nati deeme had'e balleesa.

³³Sauloni waan jed'eeni, Laki, atini isa had'u indandeetu, atini ammalle ijoolle inni haga kaimoma isaati asi askartuma.

³⁴Daudini waan jed'eeni, Aabbo, anini tissitu ree abba kiyyati, hojja nyeench'i yokhaani gorjami d'ufe ilmoole ree fud'atu ch'ufa,

³⁵anini reebe had'e iraa buusa. Hojja nyeench'i yokhaani gorjami suni nati garagalu, lubbu qabe d'ae ijeesa.

³⁶Anini nyeench'afi gorjamale ya ijeese, namicha aada inqamne, ka Filisti kana, ka askarti Waaqa jiru tae ch'ompifatu kanale inuma ijeesa.

³⁷AABBO Waaqi ka qeench'a nyeench'atiifi ka gorjama jala na baasu harka namicha Filisti kanale jaaluma na baasa. Jennaani Sauloni waan jed'eeni, Beeni, AABBO Waaqi si qarqarina.

³⁸Duuba Sauloni miha ufi ka lola Dauditi naqe; kofia sibiilatifi koti sibiila.

³⁹Daudini goraade Saulo hid'ate, aka deemu iti game ammo indad'abe maro inni miha akasi sunini deemu imbeeneefi. Duuba inni waan Sauloni jed'e, Anini dandae miha kanaani indeemu, imbaranne, jennaani ch'ufa ufira yaase.

⁴⁰Jennaani inni ule reeni tissu fud'ate d'akha qulqullicha shani bisaani yaa keesaa fuud'e, ukha keesa naqate, gulluba ufi fud'ate, Goliathi, fuula keesa deeme.

⁴¹Jennaani namichi Filisti kaani ka nami wonte isaa isa jala baatu dura deemu, Dauditi ga d'ufe;

⁴²iti d'iaate jennaani aka Daudini gurba mid'aaga diqa arge tufate.

⁴³Waan jed'eeni, Uleeni atini harka qabdu tunini maani? Atini sare na seeta? Duuba maqa waaqa isaatini Daudi abaare,

⁴⁴waan jed'eeni, Anini fooni kanke allaatiifi bineensa nyaachisa.

⁴⁵Daudini waan jed'eeni, Atini goraadeefi woraanani nati d'ufta, ammo anini maqa AABBO Waaqa gudda, Waaqa askarti Israeli ka atini teete isa ch'ompifatuuni siti d'ufa.

⁴⁶AABBO Waaqi guyyuma kana harka kiyyati si kenne anini sii d'ae mata sira kuta. Ammalle reefa askarti Filisti allaatiifi bineensa ala nyaachisa. Duuba akasiini nami lafa keesa jiru ch'ufti, aka Israeli keesa Waaqi jiru, beekha.

⁴⁷Ammalle nami arma jiru, ka wolti bahe kunini ch'ufti aka AABBO Waaqi goraade yokhaani woraana male gumi ufi baasu arga. Lola isati dabsata, isani ch'ufale amuma harka keennati kenna.

⁴⁸Goliathini Daudi fuula keesa gadeeme jennaani Daudileni fuula keesa had'iisa utaale.

⁴⁹Inni harka ukha keesa keeyate d'akha toko gafuud'e gulluba keesa kaye Goliathini had'e adda d'ae boroose. Jennaani Goliathini lafa d'ae, fuulani lafati gombifame.

⁵⁰Duuba akanaani, ka goraade inqamne Daudini Goliathi gullubafi d'akhaani dabsate ijeese.

⁵¹Jennaani iti ch'ee ira eje, goraade Goliathi qalqala keesaa fuud'e, mata iraa kute ijeese. Worri Filisti aka jabaani worraa due arge jennaani kae baqate.

⁵²Worri Israelitiifi ka Yuda iyye kara Gathitifi ka fullo Ekroni worra reebe. Reefi worra kara Shaarimuti deemu fulla ch'ufa keesa ch'iisa, haga Gathifi Ekroni.

⁵³Worri Israeli reebu worra Filistiti dachae jennaani fulla worri keesaa baqate suni saamani.

⁵⁴Daudini mata Goliathi fuud'e Yerusalemuti geese, ammo miha isa ka lola waaro ufitini galate.

⁵⁵Sauloni hojja Daudini Goliathi had'u deemu arge jennaani waan Abineri gudda askarti isatini jed'e, Abineri, gurbaani kunini ilma eenu? Abinerini waan jed'eeni, Anini imbeekhu, aabbo.

⁵⁶Jennaani hayyichi waan jed'eeni, Yoosi beeni, odeefad'i.

⁵⁷Duuba Daudini Goliathi ijeese gale jennaani Abinerini isa gara Saulo geese, Daudini hojja sunile mata Goliathi harkumaa qaba.

⁵⁸Sauloni waan jed'eeni, Gurba, atini ilma eenu? Daudini, anini ilma hojattu kanke Yese ka Bethlehemu jed'eeni.