Read BORANA BIBLE – KITAABA WAAQA 1 Samueli 2 Bible Online

1 Samueli 2 - BORANA BIBLE – KITAABA WAAQA bible

1 Samueli 2

¹Jennaani Hanani Waaqa kad'ate waan jette: AABBO Waaqi yayu gammachuuni garaa kiyya guute; maro inni waan kana naa tolchefi amma garaani yayu na jabaate! Anini amma nyaapa kiyya kobla; anini akami gammachu qaba maro Waaqi na qarqaarefi!

²Nami tokoleeni ka aka AABBO Waaqa qulqullo injiru; isa male tokoleeni ka nama jabeese qorqoratu injiru.

³Kiyyiba ufi tolchitani lalaba yaatani kana lakisa, dubbi ufi saadu yalabaha. Wonti akanatiifi AABBOONI Waaqa inni wo beekha, waan nami tolchu ch'ufa inqora.

⁴Guube worra duula jajanna ch'ach'absani, worri lalaafani jajabaata,

⁵nami duri sagale ufi quufu amma tana beelaa jed'e huji barbaada, ammo ka qara beela qabu deebie imbeelau. Niitiini qara maseente amma ya ilmaani torba d'alte, ammo haati qara ilmaani heddu qabdu amma tokole inqabdu.

⁶AABBO Waaqi ijeese jireesa; inni nama fulla ekhera geese ammalle gadeebisa.

⁷Inni nama gari hiyyoomse ka gari duroomsa; ka gari diqeese ammo ka gari guddisa.

⁸Inni hiyyeeyi awara keesaa fuud'e, nama laafa woma inqamne fulla daara iti harani keesaa baasa. Inni worra suni worra gugurda woliini teesise barch'uma guddinna kennaafi, yayabi lafaa ka AABBO Waaqati, inni isii irati waan ch'ufa jaare.

⁹Inni nama isaa qulqullo qorqorate ammo nama ch'ubbu qabu dukana keesa balleesa; nami irre ufitini woma indabsatu.

¹⁰Nyaapa AABBO Waaqa imballeesani; inni gubba iti mandia, AABBO Waaqi lafa ch'ufa qore hayyu ufi jabeese hayyu inni fohate dabsachiisa.

¹¹Jennaani Elkanani kae Ramati gale, ammo gurbaani Samueli jed'ani, Shiloti hafe qaallu Eli jaala AABBO Waaqaa hojate.

¹²Ilmaani Eli nama hamama woma keesa injirre. Worri AABBO Waaqa insodaanne

¹³yokhaani waan seera ka qaaloleeni nama iraa feetu inguunne. Ammo fulla sila waan suni guutani hojja nami toko sorio Waaqaa baasu, hojattuuni qaallu suni ule hohookiti mata sadi fuute d'ufteeni. Ato fooni suni d'aabanuu,

¹⁴inni ule suni okote keesa kaye waan uleeni suni woraanteefu fud'ate qaallichati keenna. Naama Israeli ka Shilo d'ufe sorio baasu ch'ufa akasuma tolchani.

¹⁵Tana male, ato gabbinna iraa kutani ingubinu hojattuuni qaallicha nama sorio baasu suniti d'ufte waan jettuuni, fooni qaallichi wodu nati kenni; inni fooni d'aabani sira imfud'atu, d'eed'i male.

¹⁶Yo namichi sunini, Hiyo! Laki aada gula deemne gabbinna qara gubna, eegi suni waan feetu fud'ata jed'e, hojattuuni qaallu waan jettuuni, Hiyo! Ammuma tana naa kenni, yokhaani anini irreeni fud'ad'a!

¹⁷Dabi ilmaani Eli tolchite suni AABBO Waaqa durati daba taka inargini; wonti akanatiifi worri sorio AABBO Waaqaa baasani suni womatu indarre; guddo tufate.

¹⁸Bara suni ch'ufa gurbaani Samueli jed'ani woya qomati keeyate AABBO Waaqa hojate.

¹⁹Ganna ch'ufa haati isaa ubaara diqa toko hod'itee hojja d'iirsa woliini sorio ganna baasu d'at'u geesitifi.

²⁰Duuba Elini Elkanafi niiti isaa eebisefi waan Elkanani jed'u, AABBO Waaqi ijoolle d'ibi niiti tana ira sii kennina fulla gurba atini isaa kennite kana. Eegi suni kaani galani.

²¹AABBO Waaqi akasuma Hana eebise, eegi suni isiini ilmaani d'iira sadiifi dubra lama d'alte. Gurbaani Samueli jed'ani huji AABBO Waaqa suni keesati guddate.

²²Duuba Elini, ka jaare hobae, waan heddu ilmaani isaa worra Israeli tolchitefi ammalle aka isiini nad'eeni balbala Waaro Woyyuma hojatu woliini raftele d'agaye.

²³Duuba inni waan jed'eeni, Isani maanifi waan akana kana tolchitani? Nami ch'ufti hameenna isani tolchitani kana nati hima.

²⁴Ilmaani tiyya, waan hamtu akana kana lakisa? Wonti akana kunini waan ch'eerati, ka nami AABBO Waaqa waan keesani dubbatu!

²⁵Yo nami toko nama d'ibiti ch'ubbame Waaqati kalchafi; ammo eenuti nama AABBO Waaqati ch'ubbame kalcha. Ammo worri abba ufi ch'aqasu dide; wonti akanatiifi AABBO Waaqi aka ilmaani suni fit'u ya kutate.

²⁶Much'aani Samueli jed'ani kaani guddachuma guddate eeba namafi AABBO Waaqale iraa kutate.

²⁷Raagi toko Eliti d'ufe waan jed'eeni, AABBO Waaqi waan siini jed'u: Gaafa ababooni kanke Harunifi worri isaa lafa Misiri keesati tisse Farao tahani anini worrati imulane?

²⁸Anini gosa Israeli ch'ufa keesa worra isaa fohad'e, aka fulla sorio iti naa qalani keesa worri hojate, hit'aana aarse na durati woya qaallu qomati keeyate qaalole naa tahe naa hojatu. Ammalle anini sorio gubani naa baasani keesa jifu worraa kenne.

²⁹Atini maanifi soriofi waan na baasani ch'ufa ka anini worra kiyya iraa fed'u, d'araatafi? Ammalle atini maanifi ilmaani tante nara ulfeesite fooni dandansa sorio ka gochiti tiyya ta Israeli na baaftu iti lakifte, akanaani ilmaani tante ufi gagabbifte?

³⁰Tanaafi anini, AABBO Waaqi Israeli, waan jed'u: Anini duri aka worraafi gochiti tante haga jiru jireenna qaallu naa tatu kakhad'e. Ammo anini amma aka suni ya dide! Anini amma nama na guddisu guddise ammo nama ch'eera naa d'abu tufad'a.

³¹Duuba guyyaani ind'ufa, ka anini kaima worra keesanitifi gosa teesani fit'u, aka nami worra keesani tokoleeni guddate injaare.

³²Atini gaargalte eeba anini worra Israeli kaanii kennu d'araatafi; ammo worra kanke keesa nami tokoleeni deebie guddate injaaru.

³³Yo akasile taate, anini isani keesa nama toko hambisa, ka qaallu naa tahu. Ammo inni ilad'abe ufi jibbaata, ammalle d'alooti keesani ch'ufti woraanani hobaa.

³⁴Gaafa ilmaani tante Hofnifi Finehasini lachu guyya taka hobaatu, guyyaani sunini akheekha isanii taha, aka wonti anini jed'u ch'ufti d'ugaa tatu.

³⁵Anini nama d'uga ka waan anini jed'u ch'ufa guutu qaallu fohad'e, ilmaanile ta hojja ch'ufa hayyu anini fohad'e durati na hojatu kennaafi.

³⁶Nami worra keesani ka hafu qaallu suni d'aqe beesefi sagale kad'ate waan jed'uuni, Huji qaallu ta tateefu naa kenni, aka anini waan nyaad'e d'uga argad'e garaachaa bulu.