Read BORANA BIBLE – KITAABA WAAQA 1 Samueli 25 Bible Online

1 Samueli 25 - BORANA BIBLE – KITAABA WAAQA bible

1 Samueli 25

¹Samuelini doonaani worri Israeli ch'ufti wolti bahe boheefi, Ramati awaalani fulla worra isaa jiru. Eegi suni Daudini lafa aloo ta Paraniti godaane.

²Namicha tokoti jira, ka balbala Kalebu, ka Nabali jed'ani, ka worri isaani dira Maoni; ammalle inni dira Karmeli d'aatu, oobru qaba. Inni guddo dureesa, hooliyeeni isaa kuma sadi laleesi kuma toko. Niitiini isaa ta Abigaili jed'ani guddo mid'aadi, ammalle guddo wo beeti. Ammo d'iirsi isii nama hama, ch'ubbicha woma iraa imbanne. Namichi Nabali jed'ani kunini hooliye isaa dira Karmeliti rifeensa iraa ch'iru jira.

⁴Daudini ka lafa aloo keesa jiru waan suni d'agaye.

⁵Duuba inni kaima kud'ani erge waan jed'eeni, Nabali, ka Karmeli jiru, d'aqa nagaya iti na hima, waan jettaniini,

⁶Daudini sifi worra kanketifi waan kanke ch'ufa nagaya d'aamafi

⁷inni aka atini hooliye tante rifeensa iraa ch'irtu d'agaye, waan jed'u. Nu tissitu ree teeti gaafa isiini fulla teenna jirtu woma intolchine. Ammalle gaafa worri Karmeli jiru taka woma iraa inhanne.

⁸Worruma gaafad'i, worri siti hima. Guyyaani kunini guyya jilati, kaima kiyya kana qarqaari, waan d'aqabdu ilma kanke Daudifi hojatu isaa tana kenni.

⁹Jari Daudi d'aamsa kana maqa Dauditini Nabaliti hime. Duuba worri diqo miila d'aabate.

¹⁰Jennaani Nabalini waan jed'eeni, Daudini kunini eenu kana? Anini taka maqa isaa ind'ageenne. Bara kana tisseleeni hedduuni abbooti duraa baqatu waan lafa guute!

¹¹Anini maanifi qit'afi bisaanifi hori anini worra ree naa tissu qale, fuud'e, nama anini gara inni baheefi imbeenne keenna?

¹²Jari Daudii gara isaa dachae dubbi Nabatini jed'e taani ch'ufa iti hime.

¹³Daudini waan worraani jed'e, Goraade teesani hid'ad'a; jennaani worri hid'ate, Daudileni ta ufi hid'ate, nama haga d'ibba afuri fud'ate, nama d'ibba lama miha birati lakise kae iti d'aabate.

¹⁴Hojattuuni Nabali toko waan niiti Nabali ta Abigaili jed'aniini jette Daudini lafa aloo keesa d'aamsa gara abba keenna erge, ammo inni worra arabse.

¹⁵Ammo tatule worri kunini guddo nu qarqaare; taka waan keenna inhanne.

¹⁶Gaafa nu worra woliini jiru, ka nu hori tissinu, worri halkani guyya nu qoqorate.

¹⁷Amma dubbi tana laali, waan tolchu malani heregi; wonti akanatiifi gaargali fago injiru, amuma tana nufi abba keennale qabata. Inni nama hama, dubbi nama tokole ind'agau.

¹⁸Abigailini maro tokotu qit'a d'ibba lamaatifi daad'i gorjo lamaatifi fooni hooliye shani ka wot'alanifi ammalle kilo kud'ani torba ta mid'aani akhawanitifi dame d'unkurura ta mid'aani zabibu ta d'ibba tokotifi qit'a d'ibba lama ka mid'aani odatini mid'aasani, waan kana ch'ufa wolti guurte harreti faate.

¹⁹Jennaani isiini waan worra hojattutini jette, Isani beena, na dura yaa anini faana teesani d'ufa. Ammo isiini d'iirsa isii woma iti inhimne.

²⁰Ato isiini harre yaabate gaara toko ira maru jirtu, ka imbeekatini, Daudifi jara isaatini woli ira buani.

²¹Daudini qara waan jed'e, Anini maanifi hori namicha kana lafa aloo tana keesati qorqorti isaati ufi gaargalcha? Wonti isaa tokoleeni ka ira hatani injirtu, galati inni namaa galchu kana?

²²Yo anini worra nama kana ka d'iira ato lafti imbariini infit'ini, Waaqi na ijeesinna!

²³Abigailini Daudi argite jennaani maro tokotu harre iraa buute, Daudi durati lafaani ufi d'ofte

²⁴waan jetteeni, AABBO, na d'agayi, wollaala ch'ufa yayu fud'ad'e.

²⁵Dubbi woni raaticha Nabali jed'ani kana gula indeemini, inni maquma isaa fakaata, maqaani isaa Nabali daalle jecha, innileeni akasuma daalle! Aabbo, gaafa hojattuuni tante d'ufte anini achi injiru.

²⁶Nami haalo bafachu si d'owe, nyaapa kankele ijeesu si d'owe AABBO Waaqa. Amma anini maqa AABBO Waaqa jirutini nyaapa kanketifi nama si balleesu fed'u ch'ufa abaara, aka worri aka Nabali tahe daallau.

²⁷Aabbo kiyya, waan anini d'ufeeni kana nara fud'ad'i, jara kanke kana qoodi.

²⁸Ammalle aabbo kiyya, wollaala anini tolche ch'ufa biraa naa deemi. AABBO Waaqi siifi d'aloota kanke hayyu tolcha, waan atini maqa isaatini nyaapa isaa ch'ufa dabsatteefi, atini haga jirtu waan hamtule intolchitu.

²⁹Yo nami si had'e si ijeesu fed'u AABBO Waaqi kanke si qorqorata, akuma nami waan ufi jabeese qorqoratu. Inni akuma nami d'akha gullubaani darbu nyaapa kanke siraa darbe lafa buusa.

³⁰Ammalle hojja AABBO Waaqi waan dansa ch'ufa ka inni sii kakhate guute hayyu Israeli si tolche,

³¹atini gaafasi diqole gaabite ilaalefatu waan atini fayyuma tana d'iiga nama jissite haalo baafateefi. Ammalle gaafa AABBO Waaqi sii eebise, na inded'ini, aabbo kiyya.

³²Daudini waan isiini jed'e, AABBO Waaqa Israeli, ka arra gara kiyya si erge, ha guddisani!

³³Waaqi si eebisinna, maro atini waan dansa heredde, d'iiga nama jissitifi haalo anini harka kiyyaani bafad'u na d'owarteefi.

³⁴AABBO Waaqi yayu si wotolchu na d'owe ammo maqa Waaqa jiru ka Israelitini kakhad'a ato atini sila arifate fuula keesa na d'ufu baate, nami d'iira ka Nabali ch'ufa bori diirama lafti iti imbariitu.

³⁵Jennaani Daudini waan isiini d'ufteeni iraa fuud'e waan jed'eeni, Beeni, nagayaani gali, dubbi tante yayu d'agaye, waan atini nani jette kana ch'ufa sii guuta.

³⁶Abigailini gara Nabali, ka worrati ufuma tae jila, jila hayyu fakaatu tolfatu, galte. Inni farso d'uge machae guddo gammachu qaba, tanaafi isiini haga lafti bariituti woma iti inhimne.

³⁷Duuba boriyyaate isa machini ira gallaani isiini waan ch'ufa iti haasofte. Jennaani maruma tokotu onneeni isaa hammate, akanumati kokotae.

³⁸Eegi inni kud'ani bule AABBO Waaqi d'ukuba iti buuse ijeese.

³⁹Daudini aka Nabalini due d'agaye jennaani maqaani AABBO Waaqa ha guddatu jed'e, Inni yayu Nabali nama na arabse ijeese, haalo na baase, waan hamtu anini sila tolchu ch'ufa na d'owe. AABBO Waaqi yayu Nabali maro ch'ubbu isaatiifi waan isaa male itiini d'ufe. Jennaani Daudini qonqo Abigailiti erge, si fuud'u fed'a jed'eeni.

⁴⁰Hojattuuni isaa Karmeliti isiiti d'ufte waan jetteeni, Dauditi siti nu erge aka nu si fuune gara isaa si geesine atini niiti isaa tatu.

⁴¹Abigailini worra durati jilbifatte waan jette, Anini hojattu isaati, ammalle kurfo jira aka miila hojattu isaale d'iqu.

⁴²Jennaani isiini maro tokotu kaate harre yaabate, dubra shani ta isii hojattu fud'atte, hojattu Daudi woliini iti d'aabate, duuba Daudii niiti taate.

⁴³Ammalle Daudini Ahimaamu ta Yezreeli d'ufte qara fuud'e qaba, duuba amma tana Abigailileni niiti isaa taate.

⁴⁴ Ammo Sauloni intala isaa Mikali, ta qara Daudini fuud'e, jalaa fud'ate namicha Palti jed'ani, ka ilma Laishi, ka dira Galimuti bahe, kenneefi.