Read BORANA BIBLE – KITAABA WAAQA 1 Samueli 3 Bible Online

1 Samueli 3 - BORANA BIBLE – KITAABA WAAQA bible

1 Samueli 3

¹Bara suni gaafa gurbaani Samueli jed'ani Eli jala AABBO Waaqaa hojatu, dubbifi daayyani ta gara Waaqati d'uftu take.

²Jennaani halkani toko Elini ka jaare ilti waaroofte mana ufi keesa rafu jira;

³ammalle Samuelileni Waaro Woyyuma fulla Sanduqa Wold'aqisa AABBO Waaqa, rafu jira. Ganama, ato lafti bolgodu, ka ifseeni bobau jirtu,

⁴AABBO Waaqi Samueli yaame. Inni owaate, anini kuno jed'e,

⁵Gara Eli utaale waan jed'eeni, Aabbo, anini kunooti, siti na yaame? Ammo Elini waan jed'eeni, Anini si iyyaamne, beeni, deebii rafi. Jennaani Samuelini sireti deebie gach'iise.

⁶Jennaani ammalle AABBO Waaqi Samueli yaame. Gurbaani aka nami isa yaamu kunini AABBO Waaqa imbeenne, wonti akanatiifi AABBO Waaqi taka duraani isaani indubbanne. Tanaafi inni kae, gara Eli d'aqe waan jed'eeni, Anini kunooti, siti na yaame? Ammo Elini waan jed'eeni, gurba kiyya, anini si iyyaamne, beeni, deebii rafi.

⁸Jennaani ammalle maro sadeeso AABBO Waaqi Samueli yaame; inni kae gara Eli d'aqe waan jed'eeni, Anini kunooti, siti na yaame? Jennaani Elini aka AABBO Waaqi gurba yaamu jiru hubate.

⁹Waan jed'eeni, Beeni, sireti deebii, gach'iisi, yo inni deebie si yaame waan jettuuni, AABBO dubbad'i, anini hojattuuni tante si d'agayuu jira. Jennaani gurbaani deebie ufiraa ch'iise.

¹⁰Duuba AABBO Waaqi d'ufe arti eje, Samueli, Samueli jed'e akuma qara kaani yaame Samuelini waan jed'eeni, Dubbad'i, anini hojattuuni tante si ch'aqasu jira.

¹¹AABBO Waaqi waan jed'eeni, Guyya toko anini worra Israeli kana waan guddo hamtu tolcha, aka nami d'agayu ch'ufti rifate gurra qaabatu.

¹²Guyya suni anini waan worra Eli intolcha jed'e kaani ch'ufa intolcha, haga qara iti keeyad'e haga muumme isi gahuti.

¹³Anini qara iti hime, aka anini worra isaa haga jiru jireenna gaargalchu, maro ilmaani isaa waan hamtu taate na ch'eersiteefi, Elini waan worri tau jiru ch'ufa imbeekha, ammo ind'owarre.

¹⁴Tanaafi anini inkakhad'a, aka worri Eli ato sorio yokhaani waan d'ibi na baasele wonti sunini tokoleeni gati ch'ubbu worraa imbaafne.

¹⁵Samuelini haga lafti bariituti rafe, lafti bariinaani kae balbala Mana AABBO Waaqaa bane. Inni waan daayya keesa arge suni Eliti himu sodaate.

¹⁶Ammo Elini isa yaame waan jed'eeni, Samueli gurba kiyya, jennaani Samuelini owaate.

¹⁷Elini waan jed'eeni, AABBO Waaqi maani sini jed'e? Woma tokole na ind'ossini. Yo atini d'ossite nati himu dide, Waaqi aka taka inargini si gaargalcha.

¹⁸Jennaani Samuelini waan ch'ufa tokole inhambimne iti hime. Elini waan jed'e, Inni AABBO Waaqa, waan fed'u ch'ufa ha tolchu.

¹⁹Akuma Samuelini guddatuni, AABBO Waaqi isa woliini jiraate, dubbi isa ch'ufa lafa buu d'owe guutefi.

²⁰Duuba worri Israeli ch'ufti, ka haga Dani eje Beershebati eju ch'ufti, aka AABBO Waaqi Samueli raaga d'uga tolche, beekhe.

²¹AABBO Waaqi fulla Shilo jed'ani, ta qara Samueliti mullate dubbateeni, bara ch'ufa namati mullate. Duuba hojja Samuelini dubbate ch'ufa gochiti Israeli ch'ufti inch'aqafte.