Read BORANA BIBLE – KITAABA WAAQA 1 Samueli 7 Bible Online

1 Samueli 7 - BORANA BIBLE – KITAABA WAAQA bible

1 Samueli 7

¹Jennaani worri Kiriath-Yearimu Sanduqa Wold'aqisa AABBO Waaqa fuud'e mana namicha Abinadabu jed'ani, ka gaara gubati galu, geese ilma isaa Eleazari fohate, aka inni Sanduqa suni qorqoratu harka, isati kenne.

²Sanduqi Wold'aqisa AABBO Waaqa guddo lafa Kiriath-Yearimu suni keesa ture haga ganna diddama tae. Haga ganna kana ch'ufa worri Israeli guddo AABBO Waaqati bohe qarqaarsa kad'ate.

³Samueli waan worra Israelitini jed'e, Hojja isani AABBO Waaqati garaa keesani ch'ufaani ka deebitani tatani, isani waaqa worra gosa d'ibitifi akheekha waaqa Ashtorethi ufiraa balleesu maltani. AABBO Waaqati ufi kenna, isuma ch'alla kad'ad'a, duuba inni harka worra Filisti keesaa isani baasa.

⁴Jennaani worri Israeli akheekha Baalitifi ka Ashtorethi ka kad'atu ufira balleese AABBO Waaqa ch'alla kad'ate.

⁵Duuba Samuelini waan jed'e worra Israeli ch'ufa Mispati wolti naa yaama, Duuba anini achiti AABBO Waaqa isani kad'ad'a.

⁶Mispati wolwoldaani jennaani bisaani woraabani ammalle aka d'ibaayu AABBO Waaqa lafati naqani, guyya suni ch'ufa agabuuni oolaani waan jed'ani, Nu yayu AABBO Waaqati ch'ubbamne. (Fulla Mispa suniti Samuelini dubbi worra Israeli qore.)

⁷Worri Filisti aka worri Israeli Mispati wolwoldae d'agaye jennaani, hayyooti Filisti worra had'u d'ufte. Worri Israeli dubbi suni d'agaye sodaate,

⁸waan Samuelini jed'ani, AABBO Waaqa keenna nuu kad'ad'i, illakisini, aka inni harka worra Filisti duraa nu baasu.

⁹Samuelini elemo diqaaya toko fuud'e, gube, sorio AABBO Waaqa baase. Jennaani worra Israeliti jed'e, AABBO Waaqa kad'ate, AABBO Waaqi kad'acha isa suni d'agayeefi.

¹⁰Ato Samuelini sorio suni qalu jiru worri Filisti ka worra had'uu yau worrati d'iaate; ammo hojuma suni AABBO Waaqi gubbaa worrati mandie, worra mudamsiise baqachise.

¹¹Worri Israeli dira Mispa keesaa bahe worra Filisti reebe, karaati hobase haga Beth-Karitini gahe.

¹²Jennaani Samuelini d'akha toko fuud'e, jiddu Mispatifi Sheni old'abe waan jed'e, Haga kana ch'ufa, AABBO Waaqi yayu nu qarqaare — duuba inni d'akha suni Eben-Zeri maqa baase, akasi jechaani d'akha qarqaarsa jecha.

¹³Duuba akanaani worra Filisti dabsatani haga Samuelini jiru ch'ufa. AABBO Waaqi worra lafa Israeli had'u d'owe.

¹⁴Dira worri Filisti qabate ka Ekronifi Gathi jiddu jiru ch'ufa gosa Israeliti deebisani, duuba akanaani worri Israeli lafa ufi ch'ufa argate. Ammalle jiddu worra Israelitiifi worra Kanaanile lafti nagaya taate.

¹⁵Samuelini haga lafa gubba jiru ch'ufa jaallaba Israeliti tahe, worra mohate.

¹⁶Ganna ch'ufa inni imaltu lafa mare, Betheli, Gilgali, Mispa d'aqe, lafa suni ch'ufa keesa dubbi qore, nama wolti nagaya tolche,

¹⁷duuba eege worra ufi ka Rama jiruti gale achileti dubbi qore, Rama keesati inni fulla sorio iti qalani AABBO Waaqaa jaare.