Read BORANA BIBLE – KITAABA WAAQA 1 Samueli 8 Bible Online

1 Samueli 8 - BORANA BIBLE – KITAABA WAAQA bible

1 Samueli 8

¹Samuelini jaare jennaani ilmaani isaa jaallaboota Israeli tolche.

²Ilmi isaa ka angafa maqaani Yoeli, maand'icha maqaani Abiya; ilmaani tunini lamaani jaallaba Beersheba taate.

³Ammo ilmaani tunini kara abba isii gula iyyaane, guddo beese jaalate gula yaate, gumbo nama iraa fud'ate d'uga gula dubbi qoru didde.

⁴Jennaani jaaroleeni Israeli ch'ufti wolti baate gara Samueli ka Rama jiru d'at'e,

⁵waan jetteeni, Atini amma ya jaarte, ilmaani tante kara kanke gula yauti injirtu. Tanaafi hayyu nu dura deemu nu tolchi, aka nuleeni aka gosa d'ibi hayyu qabaanu.

⁶Qonqooni worri hayyu nuu kenni jed'e isa kad'ate sunini Samueli ingammachimne; tanaafi inni AABBO Waaqa kad'ate,

⁷AABBO Waaqi waan jed'eeni, Waan biyyiti siini jettu ch'ufa jalaa qabi, guuti worri si indinne ammo ana, ka hayyu worraa, dide.

⁸Haguma lafa Misiri keesaa bahe worri na lakise waaqa d'ibi kad'ate; worri amma woma qara na tolche si tolchu jira.

⁹Tanaafi duuba amma atini worra ch'aqasi, ammo worra gorsi, waan hayyooti sunini worra tolchitu hubachisi.

¹⁰Samuelini waan AABBO Waaqi jed'eeni ch'ufa biyya hayyu isa kad'ate suni ch'ufati hime,

¹¹waan jed'eeni, Wonti hayyuuni keesani isani tolchu tana. Inni ilmaani teesani guure askarti tolcha; ta gari gaari fardi hirkisuni hojatti, ta gari yaabatu fardati, ta gari farda dura oriti.

¹²Inni ta gari fuud'e gudda nama kumtoko tolcha, ta gari gudda nama shantama tolcha. Ilmaani teesani oobru isaa qote fach'aafte haamti ammo ta gari miha lolaatifi ka gaari suni mid'aasiti.

¹³Dubriti teesani qayya isaa mid'aasite qit'afi sagalele d'aabdifi.

¹⁴Inni oobru teesani dadansa ta mid'aanitifi ta zabibutifi ta ejersa fuud'e hojatu ufiti qooda.

¹⁵Inni mid'aani keesanifi zabibu teesani qooda kud'ani keesa toko guure hojatu isaa gugurdofi didiqole qooda.

¹⁶Inni hojatu teesani ta d'iiratifi ta dubraatifi looni keesani dandansafi harreele teesanile fuud'e hojachifata.

¹⁷Ammalle ree teesani kurnya ch'ufa toko keesaa fud'ate isanile tisse tolfata.

¹⁸Hojja guyyaani suni gahe isani hayyu isani ufumaani fohatani guddo iraa bootani, ammo AABBO Waaqi boha teesani suni inch'aqasu.

¹⁹Biyyiti waan Samuelini iti hime suni ch'aqasu didde waan jetteeni, Dubbi suni lakisi, nu hayyu keenna ka nu fide, duula nu geese nyaapa keenna nura d'owu feena,

²⁰aka akasiini gosa d'ibiini wolfakaanu.

²¹Samuelini waan worri jed'e ch'ufa ch'aqase, AABBO Waaqati hime.

²²AABBO Waaqi waan jed'eeni, Dubbi worraa ch'aqasi, waan worri fed'u tolchifi, hayyu kennifi. Jennaani Samuelini worra Israeli ch'ufaani, beena worra keesaniti gala jed'e.