Read Babanki Matìyò 11 Bible Online

Matìyò 11 - Babanki bible

Matìyò 11

¹Andìʼ ando Yesò mwètə̀ əziʼi ndzɨ̀mtə̀sə bàm wen shì njʉ̀sə̀ bò, ghə̀ lù fa tsu sə shə̀ʼtə̀ kənyʉ̀ kə Nyìngòŋ be tyɨftə dyʉ̀ nə̀ viʼi a ntə̀ʼsə sətsensə a Galìlì.

²Andìʼ a zhʉ a Joyn wù ku à mù nzhʉ diʼ a mfɨŋ nyʉ̀ a wìʼ yì a Nyìngòŋ ntsuʼ li ə̀ ghʉ ə̀ nè, ghə̀ tɨm ndzɨ̀mtə̀sə bàm wen. Vəwenə dyʉ̀ ə bèm à wen la,

³“A dìʼ wù yì a wù ndiʼi lu vì lì mu yès diʼi nkə̀ʼə̀ wù kədyàŋ lo”?

⁴Yesò bwènsə̀ gàʼ à Vəwenə la, “Ghə̀ŋ bwènə̀ dyʉ̀ ə shə̀ʼtə̀ a Joyn nyʉ̀ a ghə̀ŋ zhʉ be yenə.

⁵Nfyɨ̀f bwènsə̀ yenə shi, və ngesə̀ fwen jèʼè tò a nkàyn, viʼi kənsòtə̀ to, mpfʉ sə tʉ sə zhʉ shi, və bwènsə̀ lùsə̀ viʼi vəpfʉkəvə, be shə̀ʼtə̀ ntɨm jùŋ a viʼi a və femə.

⁶Ghə̀ŋ be shə̀ʼtə̀ à Joyn la mbwaʼmə dìʼ a wìʼ yì a ghə̀ ko màʼà byɨmə wen yi a ghə̀ kiʼi à mò.”

⁷Ando ndzɨ̀mtə̀sə bàm Joyn sə mbwènə̀ dyʉ̀, Yesò zìtə̀ sə gàʼà a nòyn viʼi vyi byìʼì Joyn, bèmə̀ la,“Ghə̀ŋ nlù dyʉ̀ a nse zɨm əyen ghò? Ghə̀ŋ nlù dyʉ̀ əyen ə fʉ kəgəŋ a fwof chò nə̀ʼə̀ mu?

⁸Ghə̀ŋ nlu ədyʉ̀ yen no ghò? Əyen wìʼ a ghə̀ laf ə laf jùŋ ghə̀ mu? Jòʼ! Ghə̀ŋ kɨ la viʼi a və laf nkì laf ayi lu ntsi tò a ntuʼ.

⁹Ghə̀ŋ shə̀ʼtə̀ li a mò la ghə̀ŋ nkəŋ dyʉ̀ ənè ghò lo, əyen nshə̀ʼtə̀ ghoʼ mu? Kə diʼ tò a lì. Mà gàʼ à ghə̀ŋ la ghə̀ŋ ndyʉ̀ li yen wìʼ ghə̀ chò te nshə̀ʼtə̀ ghoʼo.

¹⁰Joyn diʼ alə̀ a dìʼ wìʼ yì a və ə nyòʼo byìʼì wen a ŋwàʼlə̀ Nyìngòŋ la, Yen a, ma lu tɨm wù ntɨm mò ghə̀ dyʉ̀ à wù a mbì ə shɨ̀tə̀ jì à wù.

¹¹Mà gàʼà ghə̀ŋ nəmwèʼè la wìʼ ko təmə diʼ a nse a ghə̀ chò Joyn wù ku à Amù, alì wìʼ yì a ghə̀ diʼ bàm a soʼo Fòyn Nyìngòŋ ə chò wen.

¹²Soʼ Fòyn Nyìngòŋ kwi dyʉ̀ tò nə̀ mbì nə̀ kədyòʼ fa chʉʼ a Joyn wù ku à mù nzìtə̀ shyèʼ wen, viʼi kədyòʼ sòʼò wenə ghə̀.

¹³Nshə̀ʼtə̀sə ghoʼkəsə no sətsèm nə̀ soʼo Mosìs ə ngaʼà li byìʼì soʼ Fòyn Nyìngòŋ mibu chʉʼ Joyn wù ku à mù sə vì.

¹⁴Ghə̀ŋ sətsèn kòŋ əbyɨmə, ghə̀ŋ kɨ la Joyn ghèn dìʼ Elijà yì a və nlù gàʼ la ghə̀ a vì.

¹⁵No ndò a ghə̀ kiʼi ə tiʼitiʼi, ghə̀ tùʼù zhʉtə.

¹⁶“Ma lè zì mà shəʼmə viʼi mbyi layn ghèn no nə̀ ghò? Vəwenə diʼ tò nə̀ vunə a və demə a shi woŋ, vətsenəvə ŋwʉʼ dzàŋə̀ gàʼà à vəwenə la,

¹⁷‘Yès zhɨm li ndzàŋsə fwòməsə la ghə̀ŋ ben, kò ghə̀ŋ lə̀ ben, mbè zhɨm ndzàŋsə pfʉ la ghə̀ŋ di, kò ghə̀ŋ lə̀ dì.’

¹⁸Mà gàʼà a lì byìʼàndo Joyn wù ku à mù mvì sə zhɨ tetə̀, və gàʼ tò vətsèm la, Ghə̀ kìʼ kəzhwì kə byɨkə.

¹⁹Wàyn Wìʼ nvi sə zhɨ bè nyʉ, və ngàʼ la ghə̀ yi a ghə̀ zhɨ chò, nyʉ chò be diʼ ndoŋ wenə̀ viʼi tinə kənsè bènə̀ viʼi və byɨvə vətsenvə! tè a lì tof Nyìngòŋ dìʼì la ghə̀ diʼ nəmwèʼè à viʼi a və dzɨ̀mtə̀ wenə ghə̀.”

²⁰Viʼi ntə̀ʼ shìsə a Yesò ə nè nghoʼ nyʉ̀ kaynəvə tsu tyen la vəwenə kò kaʼsə tətyɨm tə vəwenə, Yesò mù sə ghàmə̀ vəwenə gàʼà la,

²¹“Ngəʼ ghoʼo lu ndiʼ à ghə̀ŋ, viʼi Kòlazìn bènə̀ ghə̀ŋ viʼi Bèsaydà! A tu ndiʼ la nyʉ̀ kaynəvə a və nè a ghə̀ŋ lə̀ la və nè a viʼi Tayle nə̀ viʼi Sidòn, mu tʉʼʉ bwen a vəwenə pfʉʼʉ̀ kəbʉ kəchɨ à vəwenə təwen ə̀ mòʼ fənchì ə̀ kaʼsə tətyɨm tə vəwenə fa vəwenə a mbyɨsə.

²²Mà gàʼà à ghə̀ŋ la à lu ndiʼ a kətsi kə nsoʼ Nyìngòŋ, ngəʼ ndiʼ à ghə̀ŋ chò ando ghə̀ lu ndiʼ a viʼi Tayle bènə̀ Sidòn.

²³A ghə̀ŋ viʼi Kabanùm, ghə̀ŋ ə kwòʼtə̀ la Nyìngòŋ lu kuʼsə ghə̀ŋ, ə ghə̀ŋ kuʼ zaʼa a kàŋ mu? Kə ko diʼ a lì. Ghə̀ lu mòʼ ghə̀ŋ a sem zhìʼ byɨghə. A tu ndiʼ la nyʉ̀ kaynə venə a mà nè à ghə̀ŋ lə, la mà ə nè à viʼi ntə̀ʼ Sodòm, mu vəwenə bù dìʼ əzaʼa fa layn.

²⁴Mà gàʼà ghə̀ŋ la, a lu ndiʼ a kətsi kə nsoʼ, Nyìngòŋ dìʼ kusə nshinsə a viʼi Sodòm chò ando ghə̀ lu dìʼ a ghə̀ŋ.”

²⁵A zhʉ ayì Yesò lù ə̀ jɨ̀m à Tìʼ wen la, “Tìʼ ghom, Bobo a wù soʼo kaŋ nə̀ nse, mà ku kəzòŋ à wù byìʼàndo wu lyomtə li nyʉ̀ venə fa viʼi vyì a vəwenə kwòʼtə la vəwenə tofə alì ə dìʼ à viʼi a və dìʼì anə̀ vunə və bwaʼvə.

²⁶Nəmwèʼè a Tìʼ, àdìʼ byìʼì bòŋ tyɨm ə wù a wù kòŋ ənè alə̀.”

²⁷Yesò bè gàʼ à viʼi la, “Tìʼ ghom ə ku li tofə nyʉ̀ tsèm à mò. Wìʼ zì kò ghə̀ lə̀ kɨ̀ wàyn à bwen tò tìʼ wen, kò a ndiʼ la wìʼ zì ghə̀ kɨ tìʼ a bwen tò wàyn bènə̀ viʼi vyi a wàyn kòŋə̀ ə shə̀ʼtə̀ à vəwenə.

²⁸“Ghə̀ŋ vi a ghə̀ŋ byèʼè ngəʼsə be shyèʼ mbwaʼkə, ghə̀ŋ vi à mò a mà ne ghə̀ŋ zhʉ̀tə.

²⁹Ghə̀ŋ lyɨ jì shomsə, bè ziʼi ntsìnə̀ ghom byìʼàndo mà bwaʼmə be kiʼi shiʼsə wèn. Ghə̀ŋ sətsèn nè a lì, ghə̀ŋ a kiʼi nzhʉ̀tə à ghə̀ŋ a tətyɨm.

³⁰Ji shomsə bwaʼmə ə ghə̀ŋ ghaʼ. Kəfo kì a ma ku la ghə̀ŋ byèʼè ko dìʼì.”