Read Babanki Matìyò 12 Bible Online

Matìyò 12 - Babanki bible

Matìyò 12

¹Tʉʼ layn a kətsi kəzhʉtəkə kətsenkə, Yesò wenə̀ ndzɨ̀mtə̀sə bàm wen sə nchò fa sɨm ə asaŋ dyə tsenghə jɨ̀ŋ sə zafə ndzɨ̀mtə̀sə bàm wen, vəwenə sə kwàʼtə̀ tʉ asaŋ vi pfiʼi ashɨ yi.

²Və Falàsi vətsenvə nè yen sə gàʼà à Yesò la, “Yen kənyʉ̀ a ndzɨ̀mtə̀sə bàm wù sə nè a kətsi kəzhʉtəkə a, soʼo yes ə ko byɨmə a lì.”

³Yesò bèm à vəwenə la, “Ghə̀ŋ ko təmə̀ dzàŋ əzhʉ kənyʉ̀ kì a fòyn Devìt ə ne ando jɨ̀ŋ nzafə wen wenə viʼi wenə?

⁴Ghə̀ ndyʉ̀ kwèn a ngə̀ŋ Nyìngòŋ wenə̀ viʼi wen vi ə̀ lyɨ̀ kəbayn a və moʼò Nyìngòŋ tsu ə̀ zhɨ, à diʼ mu soʼ ndìʼ la à zhɨ tò vəpfèm və ngə̀ŋ Nyìngòŋ.

⁵Ghə̀ŋ ko dzàŋ əzhʉ ando soʼ Mosìs bè gàʼà la no kətsi kəzhʉtəkə kə kò a kə mvì, vəpfèm və ngə̀ŋ Nyìngòŋ sə shyèʼè kwaʼa soʼ yi a ghə̀ kùmə̀ kətsi akì, alì kò kə ndiʼ la vəwenə ne li kənyʉ̀ kə byɨkə kətsenkə.

⁶Mà gàʼà à ghə̀ŋ la, kənyʉ̀ kə diʼ a shèn a kə ghoʼo chò kənyʉ̀ kə ngə̀ŋ Nyìngòŋ ghoʼo.

⁷Ghə̀ŋ tu kɨ kənyʉ̀ a kəshi kə ŋwàʼlə̀ Nyìngòŋ kènkə gàʼà la, Mà kòŋ la ghə̀ŋ nkusə nshinsə à viʼi chò nyamsə a ghə̀ŋ shələ̀ à mò. Mu ghə̀ŋ ko gàʼà la viʼi ne li kənyʉ̀ kə byɨkə ko ndiʼ la vəwenə ne li.

⁸Wàyn wìʼ kìʼ àdyoʼ əgàʼ kənyʉ̀ a və zì və ne a kətsi kəzhʉtəkə.”

⁹Yesò nè gàʼ mwètə̀ a lì ə̀ lù fa kəshi ayì ə̀ dyʉ̀ kwèn a ngə̀ŋ ntsèntə̀ vəwenə tsen,

¹⁰wutsen diʼ tsu mu kwoŋ wen tsenghə pfʉ li. Viʼi vətsenvə sə kəŋ jì ə ghàm Yesò mù bèm à wen la, “Soʼ lè byɨmə la və chʉʼ wìʼ a kətsi kəzhʉtəkə mu ghə̀ ko byɨmə lo?”

¹¹Yesò bwènsə̀ bèm à vəwenə la, “Wìʼ fa ghə̀ŋ lè yi nkiʼ byi wen, ghə̀ fəŋ a nkwòŋ a kətsi kəzhʉtəkə ghə̀ à faŋ ke shìsə̀ fa tsu a?.

¹²Wìʼ chò byi. Kə lə dìʼì la soʼ vəghəŋ byɨmə la wìʼ ne njùŋ a kətsi kəzhʉtəkə.”

¹³Yesò mù gàʼ à wìʼ ayì la,“Nàʼsə kwoŋ wu.” Wìʼ ayì nàʼtə̀, no a zhʉ̀ kò, kwoŋ ayi to bè sə diʼ to nə̀ tsenghə yi.

¹⁴Və Falàsi vi lù fʉ̀kə̀ mù dyʉ̀ sə baʼtə̀ jisə əzhwi Yesò.

¹⁵Yesò nè kɨ̀ kənyʉ̀ a viʼi Falàsi mbaʼtə̀ ənè nə̀ wen, ə̀ lù fa kəshi ayì. Ngwàʼà wìʼ boʼsə wen, ghə̀ chʉʼ viʼi a və nkwaʼkə̀ fà vəwenə a ntìntìn no vətsèm,

¹⁶ə̀ tènsə a vəwenə la kə vəwenə à shə̀ʼtə̀ kənyʉ̀ byìʼì yì a wìʼ.

¹⁷Ghə̀ ə̀ nè a lì ndi nè la kənyʉ̀ a Nyìngòŋ ngaʼà chòsə̀ fà nshə̀ʼtə̀ Azayà ndiʼ nəmwèʼè la,

¹⁸“Ghèn dìʼ wìʼ yì a mà tsuʼ li la ghə̀ shyèʼ à mò. Mà kòŋ wen, ghə̀ nè mà saŋlə̀. Mà a ku kəzhwì kom à wen ə ghə̀ nshə̀ʼtə̀ à viʼi tɨm ando mà a soʼ viʼi a ji tɨmə.

¹⁹Ghə̀ ko lə soʼtə̀ kənyʉ̀ wenə̀ wìʼ ko kəŋkə̀ wìʼ, wìʼ ko lə zhʉ gɨ̀ wen a nfò jì.

²⁰Ghə̀ lu nlutə̀ nə̀ viʼi a və bwaʼa kò a ndiʼ la ghə̀ lu ə nyàblə̀ nə̀ viʼi a və ko kiʼ ngyàmtə̀. Ghə̀ a ə nè tò a lì əzaʼa fa zhʉ a ghə̀ a temə ghoŋ wenə̀ mbi ə zhɨ ə mu ghʉ soʼ tɨməghə.

²¹Viʼi təloʼ tə mbi no tətsèm lu nki tò wen la ghə̀ bwòŋsə vəwenə.”

²²Viʼi vətsenvə mù vì nə̀ wìʼ à Yesò mu kəzhwì kə byɨkə ne li kò ghə̀ lù ə nyenə shi kènla ghə̀ gàʼà. Yesò chʉʼ wìʼ ayì ghə̀ sə̀ bwènsə̀ yenə shi be gàʼà.

²³No viʼi vətsèm a və ndiʼì tsu sə diʼ nə̀ kaynə ə̀ bèm la, “Wù lè gaʼa ghèn ko diʼ wàyn fòyn Devìt a vəghəŋ tə nkə̀ʼtə̀ lì a?.”

²⁴Viʼi Falàsi zhʉ kənyʉ̀ akì mù sə gàʼà la, “A ku fòyn zhwì byɨvə a dìʼì Belzibùl ku kədyòʼ à wen la ghə̀ ndzɨ̀mə̀ shìsə̀ zhwi byɨvə avenə.”

²⁵Yesò kɨ kwoʼtə vəwenə mù gàʼ à vəwenə la, “No loʼ kò a viʼi vi kiʼ kəngə̀sə̀ à vəwenə a ntìntìn be soynə təwen tə vəwenə mu loʼ ayi a fəŋ. A be ndiʼ viʼi ntə̀ʼ ko kò viʼi ngwaʼa ngə̀ŋ ko a vəwenə kiʼ kəngə̀sə̀ à vəwenə a ntìntìn be soynə təwen tə vəwenə mu ntə̀ʼ ayì ko ngwaʼa ngə̀ŋ ayi ne fəŋ.

²⁶Satan lè mù sətsèn ndzɨ̀mə̀ shìsə̀ tò wù wen mu kə lì dìʼ la ghə̀ soynə tò wenə wen, soʼo fòn wen ke à tɨ̀mə ale?.

²⁷La mà lè sətsèn ndzɨ̀mə̀ shìsə̀ zhwì byɨvə nə̀ kədyòʼ mu à kù Belzibùl à mò, viʼi vəŋə sə dzɨ̀mə̀ shìsə̀ mu à kù ndo ku àdyoʼ à vəwenə a? A ne dìʼ tò viʼi vəŋə avenə la ghə̀ŋ ə le li kənyʉ̀.

²⁸A bòŋsə̀ ku kəzhwì kə Nyìngòŋ ku kədyòʼ la mà ndzɨ̀mə̀ shìsə̀ zhwì byɨvə avenə. Kə lì dìʼì la soʼo Nyìngòŋ vi li à ghə̀ŋ.

²⁹“Ghə̀ŋ diʼi kwòʼtə̀ la, wìʼ zì ghə̀ kwen a ngə̀ŋ wù kədyòʼ ə̀ ghaʼa shi fo wen, à bwen la ghə̀ ghaʼ li wù kədyòʼ ayì ə nkwiʼ a mbì mi lo? Ghə̀ diʼi nè a lì, ə mu tsòŋ ngə̀ŋ wen.

³⁰“Ghə̀ŋ kɨ la, wìʼ a ghə̀ ko diʼ à mò a bàm, ə lì soynə mò. Wìʼ a ghə̀ fàŋ ke ngyàmtə̀ mò ə tsèntə̀ mu ghə̀ lì sàsə̀ sàsə̀.

³¹A dìʼ byìʼì alə̀ a ma gàʼà à ghə̀ŋ la, Nyìngòŋ zì ghə̀ maʼa no tè mbyɨ kò a wìʼ ne à wutsen kò a ghə̀ ne à Nyìngòŋ, alì mu no ndò sətsèn nè mbyɨ à kəzhwì kəŋwoʼəkə, kò Nyìngòŋ lù màʼà mbyɨ wen ayì.

³²No ndò a ghə̀ gàʼà kənyʉ̀ kə byɨkə byìʼì Wàyn Wìʼ, mu Nyìngòŋ zì ghə̀ maʼa mbyɨ wen ayì alì mu wìʼ sətsèn gàʼ kənyʉ̀ kə byɨkə byìʼì kəzhwì kəŋwoʼəkə, kò Nyìngòŋ lù bè màʼà mbyɨ wen no tè a kəlyɨŋ kèn kò a kəlyɨŋ a kə lu vì.”

³³Yesò bè ziʼì la, “Wù sətsèn lyɨ̀ la ashɨ fəkòʼ diʼ à jùŋə ghə̀ mu wù diʼi be lyɨ̀ la fəkòʼ a fìfə diʼ fə jùŋfə, ə̀ lyɨ̀ la ashɨ fəkòʼ diʼ à byɨghə mu wù diʼi be lyɨ̀ la fəkòʼ a fìfə diʼ fə byɨfə, byìʼàndo və nə̀ nkɨ fəkòʼ tò fà yì ashɨ.

³⁴Ghə̀ŋ zhusə byɨsə sènsə, kənyʉ̀ kə jùŋkə ko zì kə fʉ̀ fà ghə̀ŋ a chʉ̀ byìʼàndo ghə̀ŋ dìʼ viʼi və byɨvə. Gɨ̀ chʉ̀ dìʼ alə̀ gàʼà tò kənyʉ̀ a kə fʉ̀ fa tyɨm mu ghə̀ lwin li nə̀ nki nyʉ̀ a vyi.

³⁵Wu jùŋ ə̀ fʉ̀sə̀ tò njùŋ fa tì nyʉ̀ jùŋ və vi a ghə̀ baʼtə̀ ə̀ ghʉ à wen a tyɨm. Wu byɨ fʉ̀sə̀ tò mbyɨ fa tì mbyɨsə shì a sə diʼ mu ghə̀ baʼtə li ə ghʉ à wen a tyɨm.

³⁶“Mà gàʼà à ghə̀ŋ la, à lu ndiʼ a kətsi kə nsoʼ Nyìngòŋ, no ndò lu shə̀ʼtə̀ chʉ wen byìʼì no məghò a ghə̀ ntɨmə li gàʼ a ghə̀ nko diʼ gàʼ.

³⁷Ghə̀ŋ lu zhɨ nsoʼ ko bvʉ̀ nsoʼ tò fa kənyʉ̀ a ghə̀ŋ lu gàʼ.”

³⁸Ndìʼsə̀sə təsoʼ sətsensə bènə̀ viʼi Falàsi vətsenvə gàʼ à Yesò la, “Ndìʼsə̀, dìʼi nchwi à yès ədìʼ la wù lù fà Nyìngòŋ.”

³⁹Yesò bwènsə̀ gàʼ la, “viʼi mbyi layn ə nè nyʉ̀ byɨvə kò və lə̀ nghʉ tətyɨm tə vəwenə à Nyìngòŋ mù sə bèmə̀ nchwi. Ghə̀ŋ ko a yen ə nchwi tsen a bwen tò nchwi nshə̀ʼtə̀ ə Jonà.

⁴⁰Ando Jonà ntsi mətsi ntaʼ a bèmə̀ shʉ̀, a dìʼi ndə̀ŋndəŋ ando Wàyn Wìʼ ne pfʉ ə tsi mətsi ntaʼ a tì nse mibu lù.

⁴¹A lu ndiʼ a kətsi kə nsoʼ, viʼi Nenivè tɨmə a kəshi kə nsoʼ Nyìngòŋ nghàmə̀ viʼi kəlyɨŋ kènkə byìʼàndo vəwenə nzhʉ li ziʼi Jonà ə̀ kaʼsə tətyɨm tə vəwenə fà vəwenə a mbyɨsə. Kəlyɨŋ kènkə sə kiʼ wù luwèn, ghə̀ chò Jonà alì kò ghə̀ŋ lù nkaʼsə̀ tətyɨm təŋtə fà ghə̀ŋ a mbyɨsə.

⁴²A lu ndiʼ a kətsi kə nsoʼ Nyìngòŋ, fòn ə wùwì a ghə̀ nsoʼ li shə təloʼ tèn, lu tɨmə ə ghàm viʼi kəlyɨŋ kə luwèn byìʼàndo ghə̀ nlu fà wen a loʼ ə̀ jèʼ kəghaf kə mbi əvì zhʉtə ziʼi tof fòyn Sòlomùyn, alì wìʼ dìʼ a shə̀ luwèn a ghə̀ chò fòyn Sòlomùyn, kò ghə̀ŋ lù zhʉtə ziʼi wen.”

⁴³“A nə̀ ndiʼ a zhʉ a kəzhwì kə byɨkə fʉ fà wìʼ a wèn, kə dyʉ̀ sə jèʼè fa nse zɨm no tsèm kəŋ kəshi əzhʉ̀tə̀ tsu ə sətsèn kə faŋ ke yen,

⁴⁴kə bwènə̀ gàʼ à wen a wèn la, ‘Mà a bwènə̀ dyʉ̀ tò a mo a ngə̀ŋ yì a mà tə̀ fʉ̀ fa tsu lì.’ A sətsèn kə nè gàʼ a lì sə bwènə̀ dyʉ̀ ə̀ yen ngə̀ŋ ayì ghə̀ ndiʼ tò zɨm mu və zhèsə̀ li ə̀ nshɨtə,

⁴⁵kə bwènə̀ dyʉ̀ lyɨ̀ zhwì byɨvə tsenəvə sòmbo, və fàynsə̀ chò kəwenkə, və tsèntə̀ vì sə tsi a wèn wìʼ ayì. Kə nè lyɨ̀ kəshi a lì, wìʼ ayì sə fàynsə̀ chò ando ghə̀ tə ndiʼ fa mbì. A dìʼ tò alə̀ a kə lə ndiʼ à viʼi və byɨvə kəlyɨŋ kə luwèn.”

⁴⁶Yesò mbu gàʼà à tənòyn tə viʼi a vyi a tə njèʼè fa wen a bàm, lì wen bènə̀ vəlèmə̀ və wen vì ə̀ tɨmə a kəbəŋ sə kəŋ jì əgàʼ à wen.

⁴⁷Wutsen fa ntìntìn nòyn ayì gàʼ à wen la, “Lì wù wenə̀ vəlèmə̀ vyə ti a kəbəŋ kəŋ gàʼ à wù.”

⁴⁸Yesò bèm à wen la, “Lì ghom dìʼ ndò, vəlèmə̀ vwomə diʼ vəndo?”

⁴⁹Ghə̀ bèm a lì ə sùʼ ndzɨ̀mtə̀sə bàm wen ə̀ gàʼ la, “Lì ghom bènə̀ vəlèmə̀ vwomə diʼ viʼi venə.

⁵⁰No ndò a ghə̀ nè kənyʉ̀ kì a Tìʼ ghom a kàŋ kəŋə mu ghə̀ dìʼ lèmə̀ ghom wùlɨm, diʼ lèmə̀ ghom wùwì be diʼ lì ghom.”