Read Babanki Matìyò 14 Bible Online

Matìyò 14 - Babanki bible

Matìyò 14

¹Andìʼ a tʉʼ a Helòd a ghə̀ nsoʼo shə Galìlì nzhʉ̀ soʼgho byìʼì nyʉ̀ a Yesò ə̀ nè,

²ghə̀ gàʼ à viʼi shyèʼ wen la,“Ghèn lutə̀ dìʼ tò Joyn wù ku à mù a ghə̀ bwenə li nlu fa pfʉ. A lè kənyʉ̀ a kə nè ghə̀ sə kiʼ kədyòʼ ənè nyʉ̀ venə alə̀.”

³A nsə ndiʼ a lì mu à ngàʼa tò wen la və ghaʼ Joyn wù ku à mù kwiʼ wen ə̀ mòʼ a mfɨŋ. Ghə̀ nè a lì ando wen Helòd nghaʼ shì Helodiyas wì lèmə̀ wen Filib, Joyn mù sə̀ taŋmə̀.

⁴Ngəʼ yi ndìʼ la, Helòd nlu li làm Helodiyas alì Joyn fàŋ sə kùmtə̀ tò kùmtə̀ à wen la, “Wù ne li kənyʉ̀ kə byɨkə, soʼ ko byɨmə la wù lam wùwì ghèn a diʼì wì lèmə̀ wù.”

⁵Helòd nkəŋ əzhwi Joyn alì sə fànə̀ viʼi byìʼàndo vəwenə nlyɨ̀ Joyn anə̀ nshə̀ʼtə̀ ghoʼo Nyìngòŋ.

⁶A lù sə ndiʼ ando və nzhɨ kətsi kə bwi Helòd, wàyn wùwì Helodiyas vì sə benə fa shɨ viʼi, kənyʉ̀ ki sə fwomə a wèn Helòd no nànto.

⁷Helòd mù ghʉ̀ wenə̀ wàyn wùwì a yì a mə kàyn gàʼà la,“Mà a ku no ghò yì a wu bèmə a mò.”

⁸Lì wàyn a ghèn nyoʼ ŋàmtə wen ə̀ gàʼ la ghə̀ gàʼ tò la ghə̀ kəŋ la və ku kətʉ kə Joyn wù ku à mù à yì a kyeʼ tyetə tò a zhʉ ayì.

⁹Fòn Helòd sə sheʼkə̀ no nànto alì ə̀ gàʼ la və tin kətʉ kə Joyn wù ku à mù vì nə̀ kəwenkə kù a wàyn wùwì ayì. Ghə̀ nè a lì byìʼàndo ghə̀ nsə̀ diʼ mu ghə̀ zhɨ li məkàyn a shɨ viʼi ghayn wen.

¹⁰Ghə̀ gàʼ və dyʉ̀ a ngə̀ŋ mfɨŋ tin kətʉ kə Joyn,

¹¹bwènə̀ vì nə̀ kəwenkə a tì kyeʼ tyetə kù a wen ghə̀ dyʉ̀ kù à lì wen.

¹²Ndzɨ̀mtə̀sə bàm Joyn dyʉ̀ lyɨ̀ bvenə wen dyʉ̀ bvɨ̀mə̀ mù dyʉ̀ shə̀ʼtə̀ kənyʉ̀ akì à Yesò.

¹³Yesò nè zhʉ̀ kənyʉ̀ a və ne à Joyn wù ku à mù lyɨ̀ nkànuʼ wenə̀ ndzɨ̀mtə̀sə bàm wen sə lù dyʉ̀ a kəshi ko wìʼ dìʼ tsu. Viʼi nè zhʉ̀ la ghə̀ lù lì ə fʉ̀kə̀ fà vəwenə a ntə̀ʼsə no vəghoʼo sə dzɨ̀mtə̀ dyʉ̀ nə̀ wen to a kəghʉ̀.

¹⁴Andìʼ a zhʉ a Yesò mfʉ a wèn à mù ghə̀ yèn nòyn viʼi no ghoʼo ə̀ kusə nshinsə à vəwenə mù sə̀ chʉʼʉ viʼi vəkwaʼkəvə a və ndiʼì à vəwenə a ntìntìn.

¹⁵A nè sə ndiʼ a zhʉ mpfwomə, ndzɨ̀mtə̀sə bàm wen sə vì gàʼ à wen la, “Zhʉ dyʉ̀ li no alə̀ kènla kəshi kèn kə boʼsə a ntə̀ʼ tsen, kə bòŋ la wù gàʼ à viʼi venə vəwenə bwenə dyʉ̀ a tì ntə̀ʼsə ə zèn fozhɨvə fa tsu ə̀ zhɨ.”

¹⁶Yesò bwènsə̀ gàʼ la “Vəwenə ko diʼi pfwo, no nkàntə̀ ghə̀ŋ ku kəfo vəwenə zhɨ.”

¹⁷Vəwenə gàʼ à wen la “Yès kìʼ tò təghɨf tə kəbayn kə məka tə tàyn nə̀ shʉsə sə bò.”

¹⁸Yesò gàʼ la “Ghə̀ŋ vi nə̀ wen və à mò.”

¹⁹Ghə̀ mù gàʼ à nòyn viʼi vi la vəwenə ŋwʉʼtə dyʉ̀ a agəŋ. Ghə̀ bè mù shì təghɨf tə kəbayn kə məka tì tə tàyn bènə̀ shʉsə shì sə bò ə̀ ki kùʼsə nə̀ kaŋ kù kəzòŋ a Nyìngòŋ, byə̀ʼ kəbàyn akì tsèntə̀ kù a ndzɨ̀mtə̀sə bàm wen la sə gətə à viʼi a vyi.

²⁰Vəwenə zhɨ kwìʼ no vətsèm. Ndzɨ̀mtə̀sə bàm wen sə boŋtə byəʼ vi a və mfaŋə̀ və lwin a nkyèsə njʉ̀sə̀ bò.

²¹Viʼi a və nzhɨ fozhɨvə a vyi nzàʼà dyʉ̀ a nkamsə tàyn. Və ko ntàŋ vunə bènə̀ ki.

²²Viʼi vi nè zhɨ mwètə̀ no a zhʉ̀ kò Yesò gàʼ à ndzɨ̀mtə̀sə bàm wen la sə kwen a nkànuʼ ə̀ tɨm ə̀ dyʉ̀ à ndzèn à mù tsen yì, ghə̀ fàŋ a bàm nè la viʼi mpfwo.

²³Ando ghə̀ ngàʼà viʼi sə mpfwo, ghə̀ lù kuʼ a kwi pfen tò wen nyɨŋ əjɨ̀m. Tʉʼ sə njɨ vì ghə̀ diʼ tsu tò wen nyɨŋ.

²⁴A ndìʼ a zhʉ ayì mu nkanuʼ yì a ndzɨ̀mtə̀sə bàm wen sə nkwen tsu lì sə̀ diʼ mu ghə̀ dyʉ̀ li no kəghaf a tì à mù. Mu sə nə̀ʼə̀ nkanuʼ ayì no nànto byìʼàndo fwof mbòŋsə vì fà vəwenə a mbì.

²⁵A ne sə ndiʼ a nlaynə ətʉ̀ʼ, Yesò lù sə jèʼè dyʉ̀ a kwi à mù ədyʉ̀ yen ndzɨ̀mtə̀sə bàm wen.

²⁶Vəwenə nè yèn ando ghə̀ jèʼè vì a kwi à mù. Vəwenə sə diʼ nə̀ fàynə no nànto ə mù sə zɨmə dì gàʼà la “A diʼi mpfʉ nse.”

²⁷No a zhʉ̀ kò Yesò gàʼ à vəwenə la, “Ghə̀ŋ ghaʼa tətyɨm təŋtə! à diʼ mo,kə ghə̀ŋ à fwàyn.”

²⁸Bità mù gàʼ a wen la, “Bobo! a zhʉ a diʼi wù nəmwèʼè, wu gàʼa mà jèʼ a kwi à mù vì yèn wù.”

²⁹Yesò gàʼ la, “vi” Bità fʉ fa tì nkanuʼ yì sə̀ jèʼè dyʉ̀ a mbyɨ̀ Yesò tò a kwi à mù.

³⁰A sə ndiʼ ando ghə̀ nyènə̀ ando fwof nchò nə̀ʼə̀ mu fwàyn vì à wen, ghə̀ zìtə̀ sə shwemə shiʼi a tì à mù. Ghə̀ mù zɨ̀mə dì la, “Bobo, bwòŋsə mo.”

³¹No a zhʉ̀ kò Yesò naʼsə̀ kəvu ə̀ ghaʼa wen ə̀ bèm à wen la, “Byɨmə wu tyetə no nànto. Byìʼì ghò a wù yì momə̀ mò a?”

³²Vəwenə bwènə̀ kwèn a nkanuʼ, no a zhʉ̀ kò fwof yi bwaʼ.

³³Ndzɨ̀mtə̀sə bàm wen shìsə a sə ndiʼ a nkanuʼ mù sə gumlə wen gàʼà la,“Nəmwèʼè, wù diʼ wàyn Nyìngòŋ.”

³⁴Vəwenə tɨm mu ə̀ zaʼa a ntə̀ʼ Gènesalèt,

³⁵viʼi yèn Yesò ə̀ kɨ wen tsu ə̀ tɨm ə̀ shə̀ʼtə̀ a viʼi no vətsèm a tì loʼ ayì la viʼi lyɨ̀ viʼi vəkwaʼkəvə ə̀ vì nə̀ vəwenə a wen no vətsèm.

³⁶Vəwenə sensə wen la ghə̀ ghʉsə viʼi vəkwaʼkəvə vi və nkùmsə̀ tò su ndisə wen. Ghə̀ kye no məndo a ghə̀ nkùmsə̀ su ndisə wen to.