Read Babanki Matìyò 15 Bible Online

Matìyò 15 - Babanki bible

Matìyò 15

¹Viʼi Falàsi bènə̀ ndìʼsə̀sə təsoʼ sətsensə lù fa Jelusalèm ə vì yèn Yesò ə bèm à wen la,

²“Byìʼì ghò a ndzɨ̀mtə̀sə bàm wù sə ko tsi ntsìnə̀ vətìʼ və vəghəŋ a? Vəwenə nə̀ mbʉʼsə nzhɨ kò vəwenə lə shʉ̀ avu vəwenə.”

³Yesò bwènsə̀ bèm à vəwenə la, “Byìʼì ghò a ghə̀ŋ kwàʼà soʼ Nyìngòŋ byìʼì ntsìnə̀ loʼ vəghəŋ a?

⁴Nyìngòŋ ngaʼà li la, Zhʉ gɨ̀ tìʼ wù wenə̀ lì wù! bè gàʼ la, No ndò a ghə̀ te tìʼ wen ko lì wen, və diʼi zhwi wen.

⁵Ghə̀ŋ sə bòŋsə̀ ziʼi la, wìʼ zì ghə̀ tyen kəfo fà tìʼ wen ko lì wen a ghə̀ yi ndiʼ gyàmtə̀ wen tsu tò byìʼàndo ghə̀ nghʉ li la yì a ku kəfo akì à Nyìngòŋ.

⁶Ghə̀ŋ dìʼ ji a ghə̀ŋ əchò fa tsu ko ghə̀ŋ ə dìʼì gumlə a tìʼ ghə̀ŋ ko lì ghə̀ŋ. A diʼ a ji aghèn a ghə̀ŋ tyenə kənyʉ̀ kə Nyìngòŋ tsu byìʼì ntsìnə̀ loʼ ghə̀ŋ.

⁷Ghə̀ŋ viʼi kəmbɨ̀lə̀ venə Nshə̀ʼtə̀ Azayà ngàʼa tò nəmwèʼè ando ghə̀ nshə̀ʼtə̀ ntɨm Nyìngòŋ byìʼì ghə̀ŋ la,

⁸Viʼi venə ghoʼsə̀ mò tò nə̀ chʉ, alì tətyɨm tə vəwenə tə diʼ kəghaf fà mò.

⁹Vəwenə ghoʼsə̀ mò tò kədyàŋ kədyàŋ byìʼàndo vəwenə dìʼsə̀ təsoʼ mu a shɨ̀tə̀ viʼi ə ghʉ la à dìʼ təsoʼ tyomtə?”

¹⁰Yesò gàʼ a lì ə̀ dzàŋtə̀ nòyn viʼi vi, vəwenə vì, ghə̀ gàʼ à vəwenə la, “Ghə̀ŋ zhʉtə nkɨ.

¹¹A ko diʼ kəfo kì a kə kwenə à wìʼ a chʉ̀ a kə nè la kə wìʼ ndiʼ wu laynə a ashɨ Nyìngòŋ, à bòŋsə̀ dìʼ nyʉ̀ vyi a və fʉ̀ fà wen a chʉ̀.”

¹²Ndzɨ̀mtə̀sə bàm wen sə nè gàʼ a wen la, “Wù yì gàʼ a lì viʼi Falàsi sə fwisə tin.”

¹³Yesò bwènsə̀ a gàʼà shəʼə ghə̀ a vəwenə la, “Və ne tsuʼ no ghò a ghə̀ kwi kuʼu kènla a wè Tìʼ ghom a kàŋ.

¹⁴Ghə̀ŋ ghʉsə vəwenə tò a lì, vəwenə diʼ mfyɨ̀f alì kəŋ ndìʼì jì a vətsenvə. Kənfyɨf kə sətsèn ə ndìʼì jì a kətsenkə, vəwenə à tsèntə̀ fəŋkə a nkwòŋ no vətsèm.”

¹⁵Bità gàʼ à wen la, “Shə̀ʼtə̀ kənyʉ̀ a ngàyn ghèn ziʼi à yès.”

¹⁶Yesò bèm à vəwenə la, “La mbo tə tofə təŋtə bò bu bwaʼa tò nə̀ tə viʼi vətsenvə mu?

¹⁷Ghə̀ŋ ko yenə la no ghò a wìʼ zhɨ ə shiʼì à wen a bèm kə be chò fʉ fà wen a wèn,

¹⁸alì nyʉ̀ vyi a və fʉ̀ fa wìʼ a chʉ̀ dìʼ mu və lù fà wen a tyɨm, à diʼ nyʉ̀ a vyi a və nè la kə wìʼ ndiʼ wu laynə.

¹⁹Kwòʼtə byɨghə fʉ̀ tò fà wìʼ a tyɨm nə̀ nyʉ̀ byɨvə tsenəvə anə̀ ə zhwi, ə ntsi nə̀ wùwì ko wùlɨm a ko diʼ yə̀ nə̀ dzɨ̀mtə̀ ki, nə̀ tsoŋə, ə ndiʼ wùkəwam à wìʼ a kətʉ be gàʼà nyʉ̀ byɨvə tsenəvə byìʼì wìʼ.

²⁰A le nyʉ̀ vyi a və nè kò wìʼ ndiʼ wu laynə ashɨ Nyìngòŋ, a ko diʼ a zhʉ a wìʼ zhɨ kènla ghə̀ shʉ̀ li avu wen ando ntsìnə̀ loʼ vəghəŋ ə kəŋ.”

²¹Yesò gàʼ a lì ə̀ lù fa tsu ə dyʉ̀ a shə loʼ yì a ntə̀ʼ Tilè nə̀ Sidòn ndìʼ tsu.

²²Wùwì Kanà tsen a ghə̀ ntsi boʼsə tsu vi à Yesò mù sə zɨmə dì gàʼà la,“Kusə nshinsə à mò a Bobo, wàyn fòyn Devìt! Wàyn ghom wùwì yenə ngəʼ no nànto byìʼàndo ghə̀ kiʼi kəzhwì kəbyɨkə.”

²³Kò Yesò lù gàʼ kənyʉ̀ a wen. Ndzɨ̀mtə̀sə bàm wen sə vì a wen mù sə sensə̀ wen gàʼà la, “Dzɨ̀mə̀ wen fa vəghəŋ a bàm. Ghə̀ jèʼè zɨmə alə̀ chiʼsə̀ tiʼitiʼi viʼi.”

²⁴Yesò gàʼ à wùwì ayì la, “Nyìngòŋ tɨm mo tò à viʼi Islel vi a və diʼì tò nə̀ byisə vənjɨ̀ sə lekəsə.”

²⁵Wùwì ayì kwentə vì gwʉ̀ʼtə alwi wen a nse ə̀ gàʼ la “Bobo gyamtə mo.”

²⁶Yesò gàʼ à wen la, “Kə ko bòŋ la və lyɨ fozhɨvə vunə ə̀ mòʼ à bʉsə.”

²⁷Wùwì ayì byɨmə ə̀ gàʼ la, “Bobo, mà kɨ li a lì, alì tì ngə̀ŋ nə̀ nzhɨ, byèʼ fo fəŋkə bʉsə sə boŋtə zhɨ.”

²⁸Yesò mù gàʼ à wen la, “Wù dìʼ wùwì a byɨmə wu to, Nyìngòŋ a nè kənyʉ̀ a wù kəŋ.” Yesò gàʼ a lì wàyn wen yì to tò a zhʉ ayì.

²⁹Yesò lù fa kəshi ayì sə jèʼè dyʉ̀ fa mbyɨ̀ mo Galìlì, ə dyʉ̀ kuʼ a kwi pfen mù shiʼi ŋwʉʼʉ a nse.

³⁰Ngwàʼà viʼi sə vì a wen. Vəwenə mvì nə̀ viʼi və kwaʼkəvə vəwenə, və ngesə̀ fwen, mfyɨ̀f, viʼi kənkwàʼkə̀, və bɨbɨ̀ bènə̀ viʼi a və nkwaʼa nə̀ tənkì tə təkwaʼa no tətsèm. Vəwenə ə̀ mvì nə̀ vəwenə a lì ghʉ ashɨ Yesò la ghə̀ chʉʼ vəwenə.

³¹Viʼi vi sə diʼ nə̀ kaynə ando və nyenə la bɨbɨ̀ sə bwènsə̀ gàʼà, və ngesə̀ fwen nə̀ viʼi kənkwàʼkə̀ be bwènsə̀ jèʼè tò a nkayn, bènə̀ la nshɨ̀f nsə̀ bwènsə̀ yenə shi. Vəwenə yen a lì sə̀ ghoʼsə̀ Nyìngòŋ viʼi Islel.

³²Yesò mù dzàŋ ndzɨ̀mtə̀sə bàm wen ə̀ gàʼ à vəwenə la, “Nshinsə ku mò à viʼi venə. Vəwenə tsi li vəghəŋ vəwenə a mətsi ntaʼ luwèn, alì kènla vəwenə təmə̀ zhɨ̀ kəfo. Ma ko kòŋ əgàʼ la vəwenə bwènə̀ mpfwo nə̀ jɨ̀ŋ. Wìʼ zì ghə̀ fʉ bwaʼ, ashɨ wen fen ghə̀ fəŋ a ji.”

³³Ndzɨ̀mtə̀sə bàm wen sə bèm à wen la, “Vəghəŋ lè zì vəghəŋ lyɨ fozhɨvə fa fe a shə̀, kəshi kèn kə diʼ a bàm ə və kwʉʼ ə zhis ghèn nòyn viʼi tsu a?.”

³⁴Yesò bè bèm à vəwenə la, “Ghə̀ŋ kìʼ təghɨf tə kəbayn tə məka təshə̀ʼ?.” Vəwenə gàʼ la, “Yès kìʼ təghɨf la sòmbo nə̀ məshʉ̀tə tò nshə̀ʼ alə̀.”

³⁵Yesò mù gàʼ à viʼi vi la vəwenə ŋwʉʼtə a nse.

³⁶Vəwenə nè ŋwʉʼtə, Yesò shi təghɨf tə kəbayn tə məka titə sòmbo nə̀ məshʉ̀tə mì ə̀ kù kəzòŋ à Nyìngòŋ mù byəʼə̀ kù à ndzɨ̀mtə̀sə bàm wen, vəwenə mù gə̀tə̀ dyʉ̀ à viʼi vi.

³⁷No ndò zhɨ kwiʼ. Ndzɨ̀mtə̀sə bàm wen sə boŋtə byəʼ a və mfəŋkə və lwin a nkyèsə sòmbo.

³⁸Viʼi a və nzhɨ ndìʼ lʉmə nkamsə kàʼ mibu ki nə̀ vunə a və ndiʼì tsu.

³⁹Yesò gàʼ viʼi a vyi sə mpfwo ghə̀ kwen a ti nkànuʼ ə dyʉ̀ a shyə loʼ Magadan.