Read Babanki Matìyò 16 Bible Online

Matìyò 16 - Babanki bible

Matìyò 16

¹Viʼi Falàsi bènə̀ Vəsadùsis vətsenvə vì à Yesò sə kəŋə jì əghaʼ wen fa tsu mù gàʼ la ghə̀ ne kənyʉ̀ kə kaynə kə kətsen kə ədìʼ kəchwitə la kədyòʼ kə wen kə lù fà Nyìngòŋ.

²Yesò gàʼ à vəwenə la, “Chʉzhʉ nə̀ mbʉsə nshwè kaŋ sə bàŋə̀, ghə̀ŋ ə gàʼa la shi lə bòŋ a boʼòngə̀ŋ.

³A sətsèn tʉʼʉ layn shi nghwʉ̀ʼʉ̀, ghə̀ŋ gàʼa la ghʉ a vì layn. Ghə̀ŋ kɨ ki kəbəŋ, ghə̀ŋ shə̀ʼtə kənyʉ̀ a kə a fʉ̀, alì ko andiʼ la ghə̀ŋ zì ghə̀ŋ kɨ la chwitə a və fʉ̀ luwèn ə shə̀ʼtə̀ la ghò lo.

⁴A dìʼ tò kəlyɨŋ kə byɨkə anə̀ kènkə a kə ko ghʉ tyɨm wen à Nyìngòŋ a kə zì kə mbèmə̀ kəchwitə. Ghə̀ŋ ko a yen kəchwitə kətsenkə əchò tò nchwi Jonà.” Ghə̀ gàʼ a lì ə lù mòʼtə̀ vəwenə.

⁵Yesò wenə̀ ndzɨ̀mtə̀sə bàm wen nè sə dyàŋ a ndzèn mo tsen yì, ndzɨ̀mtə̀sə bàm wen sə lyèsə̀ əlyɨ̀ kəbayn kəməka,

⁶nè dyàŋ zaʼa tsu, Yesò gàʼ à vəwenə la, “Ghə̀ŋ tuʼmə kùmə̀ fəshɨ̀ŋ fə viʼi Falàsi bènə̀ Vəsadùsis.”

⁷Ndzɨ̀mtə̀sə bàm wen shìsə sə̀ bèsə̀ kənyʉ̀ akì à vəwenə a ntìntìn gàʼà la, “Ghə̀ gàʼà alə̀ byìʼàndo vəghəŋ yì lyèsə̀ əlyɨ̀ kəbayn kəməka.”

⁸Yesò kɨ kənyʉ̀ a vəwenə mbèsə̀ à vəwenə a ntìntìn mù bèm à vəwenə la, “Byɨmə ghə̀ŋ bwaʼ ghò alə̀ a, byìʼì ghò a ghə̀ŋ ə gàʼ à la à diʼ byìʼàndo ghə̀ŋ ko kiʼ kəbayn a?

⁹Kə lè dìʼ la ghə̀ŋ ko təmə kɨ̀ kənyʉ̀ mu? Ghə̀ŋ ko bè kwòʼtə̀ ando mà nzhisə̀ viʼi vi nkamsə sə tàyn nə̀ təghɨf tə kəbayn tə məka tə tàyn? Ghə̀ŋ mboŋtə byəʼ vi a və mfaŋə̀ və lwin a nkyèsə sə shə̀ʼ lì?

¹⁰Ghə̀ŋ lyesə li viʼi vi nkamsə sə kàʼ a ma nzhisə̀ nə̀ təghɨf tə kəbayn ti sòmbo? Ghə̀ŋ mbòŋtə byèʼ vi a və nfaŋə̀ və lwin a nkyèsə sə shə̀ʼ lì.

¹¹A nè ghò a ghə̀ŋ ko kɨ̀ la mà ko yi ngàʼà à ghə̀ŋ byìʼì kəbayn a? Ghə̀ŋ tuʼmə kùmə̀ fəshɨ̀ŋ fə viʼi Falàsi bènə̀ Vəsadùsis.”

¹²Ghə̀ gàʼ a lì ndzɨ̀mtə̀sə bàm wen sə mù kɨ̀ la ghə̀ ko yi ngàʼà byìʼì fəshɨ̀ŋ fə kəbayn alì la ghə̀ ngàʼà kùmə̀ ziʼi viʼi Falàsi bènə̀ Vəsadùsis.

¹³Yesò lù dyʉ̀ a shə loʼ tsenghə a ntə̀ʼ Sìsalìyà, Filibày ndiʼì tsu wenə̀ ndzɨ̀mtə̀sə bàm wen mù bèm à vəwenə la, “Viʼi gàʼ à la Wàyn Wìʼ dìʼ ndo?”

¹⁴Vəwenə bwènsə̀ gàʼ la, “Viʼi vətsenvə gàʼà la wù dìʼ Joyn wù ku à mù, viʼi və tsenəvə gàʼà la wù dìʼ nshə̀ʼtə̀ Elijà, vətsenvə be gàʼà la wù dìʼ nshyə̀ʼtə̀ Jèlimayà ko nshyə̀ʼtə̀ ghoʼo tsen.”

¹⁵Yesò bèm à vəwenə la, “Nkàntə̀ ghə̀ŋ gàʼà la ma dìʼ ndo?”

¹⁶Simon Bità bwènsə̀ la, “Adìʼ ə wìʼ yì a Nyìngòŋ ntsuʼ li ə̀ ghʉ, wàyn Nyìngòŋ yì a ghə̀ faŋə̀ tò ghan mùʼ lì.”

¹⁷Yesò mù gàʼ la, “Mbwaʼmə̀ dìʼ à wù a Simon wàyn Jonà, byìʼàndo a ko shə̀ʼtə̀ Wùmə̀nsòŋ nshyə̀ʼtə̀ kənyʉ̀ kènkə la wu gàʼ a lì, à dìʼ Tìʼ ghom ə Nyìngòŋ yì a ghə̀ diʼì a kàŋ.

¹⁸Mà sə gàʼà à wù a Bità la zhiʼi wu diʼ ə nguʼ, à diʼ a kwi nguʼ ayì a mà ne bwom ngə̀ŋ ntsèntə̀ ghom. Kədyòʼ kə pfʉ kə ko lə to chò ngə̀ŋ ayì.

¹⁹Ma ku nzàs kə soʼo fòyn Nyìngòŋ à wù. No ghò a wù byɨmə a kwi nse mu Nyìngòŋ a byɨmə a kàŋ, wù be tyen no ghò a kwi nse mu Nyìngòŋ be a tyen a kàŋ.”

²⁰Yesò gàʼ a lì mù tyɨftə ndzɨ̀mtə̀sə bàm wen la kə vəwenə lə shə̀ʼtə̀ à wìʼ la yì dìʼ Wìʼ yì a Nyìngòŋ ntsuʼ li ə̀ ghʉ.

²¹Yesò zìtə̀ tò a zhʉ ayì sə̀ shə̀ʼtə̀ a ndzɨ̀mtə̀sə bàm wen la, “Yì diʼi dyʉ̀ a Jelusalèm ə yen ngəʼ ghoʼo fa avu vəchəʼ, tʉtʉ vəpfèm və ngə̀ŋ Nyìngòŋ bènə̀ ndìʼsə̀sə təsoʼ, və zhwi wen à nè sə ndiʼ mətsi ntaʼ, Nyìngòŋ lusə wen fa pfʉ.”

²²Bità gùftə̀ wen a bàm sə̀ ghàmə̀ wen gàʼà la, “Nyìngòŋ bʉʼsə la kə nki kənyʉ̀ alə̀ lə̀ fʉ à wù a Bobo.”

²³Yesò fuʼtə gàʼ à Bità la, “Bwènə̀ fà mò a bàm a Satan, wù tàʼsə̀ mò. Wù ko kiʼ kwoʼtə Nyìngòŋ. Wù kwòʼtə̀ to nə̀ wìʼ.”

²⁴Yesò gàʼ a lì mù gàʼ à ndzɨ̀mtə̀sə bàm wen la, “No ndò a ghə̀ kòŋ ə ndzɨ̀mtə̀ mò diʼi tyen wenə wen, bwèʼè kəntò kə wen ə dzɨ̀mtə̀ mò.

²⁵No ndò a ghə̀ mwòmsə̀ ə ntsɨ̀ŋ sò kətʉ wen mu ghə̀ a lè, no ndò a ghə̀ le sò kətʉ wen byìʼì mò a bwòŋ.

²⁶Wìʼ lè zì ghə̀ se no ghò a zhʉ a ghə̀ kiʼì mbi ghèn no tsèm, alì kəzhwì kə wen kə le a? Wìʼ lè zì ghə̀ zen sò kətʉ wen no nə̀ ghò?

²⁷Mà gàʼ alə̀ byìʼàndo Wàyn Wìʼ sə̀ laʼtə bwènə̀ vì a tì baynə ghoʼ ghə̀ tìʼ wen wenə ntsɨ̀ŋsə wen ndi ku no moʼtə ndo ando ghə̀ tə nshwèʼè.

²⁸Mà gàʼà à ghə̀ŋ nəmwèʼè la viʼi vətsenvə diʼ a shèn luwèn a vəwenə ko lə pfʉ no a mpfen əzaʼa fa tʉʼ a vəwenə lu yen Wàyn Wìʼ ghə̀ bwènə̀ vì anə̀ fòyn.”