Read Babanki Matìyò 17 Bible Online

Matìyò 17 - Babanki bible

Matìyò 17

¹A sə ndiʼ a bàm mətsi ntʉfə, Yesò lyɨ̀ Bità nə̀ lèmə̀ wen ə Jems nə̀ Joyn wenə̀ vəwenə kuʼ a kwi pfen dyèfə a wìʼ ko ndiʼ tsu.

²Vəwenə nè kuʼ zaʼa tsu kə̀ʼ ə Yesò bvʉ̀tə̀ kwìtə sə̀ baynə to nə̀ chʉzhʉ. Ndisə wen sə kaʼsə sə̀ fəfə alə̀ ŋwàŋtə̀.

³Tò a zhʉ ayì Mosìs wenə̀ Elijà fʉ̀ à vəwenə a kə̀ʼ sə̀ gàʼà wenə və Yesò.

⁴Bità mù gàʼ à Yesò la, “Kə boŋə li a Bobo ando vəghəŋ dìʼ a shèn. A zhʉ a wu kòŋə, mà bwòm təto tə taʼ, wu nkiʼi mùʼ, Mosìs kiʼi mùʼ, Elijà be kiʼi tsenghə.”

⁵Ando ghə̀ mbu gàʼà mbòʼ fəfə tsen shiʼi chìʼ vəwenə. Gɨ̀ fʉ̀ fa tsu ə̀ gàʼ la, “Ghèn dìʼ wàyn kòŋ mò. Mà saŋlə̀ byìʼì wen no a nkàyn. Ghə̀ŋ ə nzhʉ fà wen.”

⁶Ndzɨ̀mtə̀sə bàm Yesò sə nè zhʉ̀ gɨ̀ a ghèn sə̀ fàynə̀ no nànto, fəŋkə a nse apfʉ̀ʼapfʉʼ.

⁷Yesò vì kùm vəwenə ə̀ gàʼ la, “Ghə̀ŋ lukə, kə ghə̀ŋ be fàyn.”

⁸Vəwenə tsòʼsə̀ ashɨ vəwenə sə ki mu Yesò sə diʼ to wen nyɨŋ.

⁹Vəwenə nè sə mbwènə̀ shiʼì fa kwi pfen yì Yesò tyɨftə vəwenə la, “Kə ghə̀ŋ à shə̀ʼtə̀ kənyʉ̀ kèn a ghə̀ŋ yenə lə̀ à wìʼ əzaʼa fa tʉʼ a Wàyn Wìʼ lə pfʉ və lusə wen fa pfʉ.”

¹⁰Ndzɨ̀mtə̀sə bàm wen sə bèm à wen la, “Byìʼì ghò a ndìʼsə̀sə təsoʼ sə gàʼà la à diʼ ne vì Elijà a mbì wìʼ yì a Nyìngòŋ ntsuʼ li ə̀ ghʉ lì a?”

¹¹Yesò gàʼ à vəwenə la “A dìʼ nəmwèʼè la Elijà a vì a mbì ə shɨ̀tə no nyʉ̀ tsèm.

¹²Mà gàʼà à ghə̀ŋ nəmwèʼè la Elijà nsə̀ diʼ mu ghə̀ vi li, viʼi yen wen alì kò vəwenə lù kɨ. Vəwenə mù sə kwe no ghò və ne à wen. A dìʼ tò ndə̀ŋndəŋ ando Wàyn Wìʼ lə yenə ngəʼ fà vəwenə avu.”

¹³Ghə̀ gàʼ a lì ndzɨ̀mtə̀sə bàm wen sə mù kɨ̀ la ghə̀ yì ngàʼà byìʼì Joyn wù ku à mù.

¹⁴Yesò nè bwènə̀ shiʼi fa kwi pfen wenə̀ ndzɨ̀mtə̀sə bàm wen shì sətaʼ vì kwʉ̀ʼ nòyn viʼi tsenghə. Wùlɨm tsen fʉ̀ fa tì nòyn a yì gwʉ̀ʼtə alwi wen a shɨ Yesò

¹⁵ə̀ gàʼ la, “Bobo kusə nshinsə à wàyn wùlɨm ghom ghèn. Ghə̀ nkwaʼa nə̀ kəmbvʉ̀ kə. Kə zhuŋsə̀ wen no nànto nè ghə̀ fəŋə nghoʼo məzhʉ̀ a zhìʼ ko à mù.

¹⁶Ma tə mvi nə̀ wen à ndzɨ̀mtə̀sə bàm wù ghə̀ ghoʼ vəwenə a məchʉʼ.”

¹⁷Yesò bwènsə̀ la, “Venə diʼ viʼi nki kəlyɨŋ kə kò a və chiʼi kətʉ ken la vəwenə ghʉ tətyɨm tə vəwenə à Nyìngòŋ a? Mà a ndiʼ vəghəŋ əzaʼa fa ze? Mà ghaʼa tyɨm ə ghom əzaʼa fa ze?” Ghə̀ gàʼ a lì mù gàʼ à wìʼ ayì la,“Vi nə̀ wàyn ayì a shèn à mò.”

¹⁸Ghə̀ vì nə̀ wen, Yesò kàyntə̀ nyʉ̀ à kəzhwì kə byɨkə akì kə fʉ̀ fa wèn wàyn ayì ghə̀ to tò a zhʉ ayì.

¹⁹Ndzɨ̀mtə̀sə bàm Yesò sə mù nyòʼtə vì bèm à wen la, “Byìʼì ghò a kə nto ghoʼo yès ə yès shisə kəzhwì kə byɨkə a kèn kə a?”

²⁰Yesò bwènsə̀ à vəwenə la, “A dìʼ byìʼàndo byɨmə ghə̀ŋ ə bwaʼa. Mà gàʼà à ghə̀ŋ nəmwèʼè la ghə̀ŋ sətsèn nkiʼ byɨmə ghə̀ tyetə to nə̀ shɨ ngwàʼ mostàd mu ghə̀ŋ zì ghə̀ŋ gàʼ à pfèn ghèn la ghə̀ lu fa kəshi ghèn dyʉ̀ no kəghaf, ghə̀ à dyʉ̀ tò a lì. Ghə̀ŋ tu nkiʼ byɨmə mu kənyʉ̀ kə ko to chò ghə̀ŋ. [

²¹Wìʼ zì ghə̀ dzɨ̀mə̀ shisə̀ nki kəzhwì kə byɨkə anə̀ kèn tò a zhʉ a ghə̀ jɨ̀mə̀ be bamə chʉ̀.”]

²²Yesò wenə̀ ndzɨ̀mtə̀sə bàm wen nè dyʉ̀ zaʼa a Galìlì ghə̀ bè gàʼ à ndzɨ̀mtə̀sə bàm wen la, “Və a ku Wàyn Wìʼ a avu viʼi,

²³və zhwi wen a sə ndiʼ a mətsi ntaʼ Nyìngòŋ lusə wen fa pfʉ. Kənyʉ̀ akì sə̀ ku ngəʼ a ndzɨ̀mtə̀sə bàm wen no nànto.”

²⁴Yesò wenə̀ ndzɨ̀mtə̀sə bàm wen nè jèʼ dyʉ̀ zaʼa a ntə̀ʼ Kabenùm viʼi vyi a və shi ko kənsè a ngə̀ŋ Nyìngòŋ vì bèm a Bità la, “Ndìʼsə̀ ghə̀ŋ mòʼò kənsè a ngə̀ŋ Nyìngòŋ?”

²⁵Ghə̀ byɨmə ə̀ gàʼ la ghə̀ mòʼò. Bità nè kwèn a ngə̀ŋ, Yesò zìtə̀ ə gàʼ a mbì bèmə̀ à wen la, “Wù kwòʼtə̀ la ghò a Simon, la təfòyn tə mbi tə nshi ko kənsè fà viʼi vəwenə mu fà viʼi və vi və lo?”

²⁶Ghə̀ gàʼ la, “Vəwenə shi fà viʼi və vi və.” Yesò mù gàʼ la, “Kə lì dìʼ la viʼi təloʼ a vyi ko diʼ lòʼ kənsè à təfòyn tə vəwenə atì.

²⁷Kə diʼ tò no a lì, alì kə ko bòŋ la yowù ne vəwenə mfwisə̀ tin à yowù. Dyʉ̀ a benə̀ mo ə̀ mòʼ nsoʼ, no shʉ̀ ko a ghə̀ lyɨ tsu a mbì wu gùfə̀ shisə̀ ə̀ bòʼtə̀ chʉ̀ wen a wù a yen ko kəkas tsu. Shìsə̀ dyʉ̀ lòʼ ko kənsè yowù tsu à vəwenə.”