Read Babanki Matìyò 18 Bible Online

Matìyò 18 - Babanki bible

Matìyò 18

¹Tò a zhʉ a yì ndzɨ̀mtə̀sə bàm Yesò sə vì bèm à wen la,“A chò ndò chò wutsen a soʼ Fòyn Nyìngòŋ a?”

²No a zhʉ̀ kò Yesò dzàŋ wàyn tyetə ə̀ gàʼ la ghə̀ vi tɨ̀mə à vəwenə a shɨ,

³mù gàʼ la “Mà gàʼà à ghə̀ŋ nəmwèʼè la ghə̀ŋ sətsèn fàŋ ke kwitə ə ndiʼ to nə̀ vunə və bwaʼvə mu ghə̀ŋ ko lə kwen a soʼ Fòyn Nyìngòŋ.

⁴Wìʼ a ghə̀ chò wutsen a soʼ Fòyn Nyìngòŋ dìʼ wìʼ a ghə̀ shiʼsə wenə wen to nə̀ wàyn ghèn.

⁵No ndò a ghə̀ shisə wàyndyə anə̀ ghèn byìʼì mò mu ghə̀ shisə li mò.”

⁶No ndò a ghə̀ sətsèn nè la wàyn muʼ fa ntìntìn vunə venə a və byɨmə li à mò ne mbyɨ mu kə bòŋ la və chuŋ ti à wen a ŋwì ədyʉ̀ mòʼ wen à mù mə nghoʼomə̀ ndi ghə̀ pfʉ.

⁷Ngəʼ ghoʼo diʼ a mbi byìʼì nyʉ̀ vyi a və nè la viʼi ə nè mbyɨ. Nyʉ̀ avenə diʼ ne nlyɨ̀ kəshi alì ngəʼ ghoʼo diʼ à wìʼ yì a ghə̀ nè la nyʉ̀ avenə nlyɨ̀ kəshi.

⁸Kəvu kə̀ ko kəghʉ kə̀ sətsèn nè la wù ne mbyɨ wu tin ə̀ màʼà. Kə bòŋ la wù kiʼi bwòŋ yi a ghə̀ ko lə mè kènə̀ kəvu kə mùʼ ko kəghʉ kə mùʼ əchò la wù kiʼi wen wu no tsèm və moʼ wù a zhìʼ a ghə̀ ko lə mè.

⁹A sətsèn shɨ wu ne la wù ne mbyɨ wu tòŋ shìsə̀ ə̀ màʼà. Kə bòŋ la wù kiʼi bwòŋ tò nə̀ shɨ mùʼ əchò la wù nkiʼ ashɨ wu no à tsèm və moʼ wù a zhìʼ byɨghə.

¹⁰Ghə̀ŋ tuʼmə la kə wìʼ lə̀ chàs wàyn muʼ fa ntìntìn vunə və tyetəvə venə. Mà gàʼà à ghə̀ŋ nəmwèʼè la ntsɨ̀ŋsə vəwenə a sə diʼ a kàŋ ə kaʼa tò fà mbyɨ̀ Tìʼ ghom.

¹¹[“Byèʼè Wàyn Wìʼ mvi ə bwòŋsə viʼi və levə”].

¹²Ghə̀ŋ kwòʼtə̀ la wìʼ sətsèn nkiʼ byisə vənjɨ̀ ghɨ ghə̀ muʼ mu lè, ghə̀ à nè ale? Kə sətsèn chò a lì, ghə̀ à ghʉ̀sə sətsensə shì njʉ̀sə̀ abʉ̀muʼ a məwum abʉ̀muʼ sə sə nzhɨ a kwi pfen ghə̀ njèʼè kəŋə ghətsen yì a ghə̀ le lì.

¹³Mà gàʼà à ghə̀ŋ nəmwèʼè la, ghə̀ sətsèn kəŋ ə̀ yen, ghə̀ sə saŋlə̀ no a nkàyn byìʼì byi ayì mùʼ chò ando ghə̀ saŋlə̀ byìʼì sətsèn shi njʉ̀sə̀ abʉ̀muʼ a məwum abʉ̀muʼ a sə ko lè lì.

¹⁴Kə diʼ tò ndə̀ŋndəŋ ando Tìʼ ghə̀ŋ a kàŋ ko kòŋ la wàyn muʼ fa ntìntìn vunə venə le.

¹⁵Yesò bè gàʼ la “Lèmə̀ wù sətsèn nè mbyɨ à wù, wu dyʉ̀ yenə wen ə̀ shə̀ʼtə̀ kənyʉ̀ akì à wen a ghə̀ byɨsə̀. Wù nè sə ngàʼà andìʼ tò wenə̀ wen və bò. A sətsèn ghə̀ zhʉtə, mu kə diʼ la wù bwensə̀ li nkiʼi wen.

¹⁶Wù dyʉ̀ gàʼ ghə̀ diʼ ke zhʉ, wu bwènə̀ dyʉ̀ lyɨ̀ wutsen ko viʼi vəbò wen vəwenə dyʉ̀ gàʼ à wen ndi a kənyʉ̀ ayì, viʼi və yenəvə ndiʼ vəbò ko vətaʼ ndə̀ŋndəŋ ando ŋwàʼlə̀ Nyìngòŋ gàʼà.

¹⁷Ghə̀ŋ sətsèn dyʉ̀ tsèntə̀ gàʼ à wen, ghə̀ be tyèn tò tyenə la ghə̀ ko a zhʉtə, wu lyɨ kənyʉ̀ akì dyʉ̀ nə̀ kəwenkə a ntsèntə̀ viʼi vəbyɨməvə. Ghə̀ sətsèn bè tyen tò tyenə la ghə̀ ko a zhʉtə kənyʉ̀ a ntsèntə̀ gàʼà, wu ghʉ̀ la ghə̀ sə diʼ à wù to nə̀ wù kətɨm ko wù tinə kənsè.”

¹⁸Mà mù sə gàʼà à ghə̀ŋ nəmwèʼè la, “No ghò a ghə̀ŋ byɨmə a nse mu Nyìngòŋ a byɨmə a kàŋ. Ghə̀ŋ be tensə no ghò a nse mu Nyìngòŋ be a tensə a kàŋ.”

¹⁹Ma be sə gàʼà kwʉ̀ʼsə̀ à ghə̀ŋ la, “No a zhʉ̀ kò a ghə̀ŋ diʼì a nse a shèn ghə̀ŋ və bò, njɨ̀mə̀ bèmə̀ no ghò a chʉ̀ mùʼ, Tìʼ ghom a kàŋ ne nè à ghə̀ŋ.

²⁰Byìʼàndo viʼi sətsèn ŋwʉʼʉ tè fe əzaʼa vəbò ko vətaʼ à mò à zhiʼ mu mà dìʼ yo vəwenə.”

²¹Bità mù fʉ̀tə̀ vì ə̀ bèm a Yesò la “Bobo, lèmə̀ ghom lè mù sətsèn ə nè mbyɨ à mò tò ne, mà màʼà mbyɨsə wen aghayn à shə̀ʼ? Mà màʼà nyʉ̀ byɨvə wen ədyʉ̀ zaʼa aghayn sòmbo mu?”

²²Yesò bwènsə̀ gàʼ à wen la, “Jòʼ! à ko diʼ tò aghayn sòmbo. Wù diʼi màʼà nyʉ̀ byɨvə wen aghayn njʉ̀sə̀ sòmbo a məwum sòmbo.

²³Mà gàʼà alə̀ byìʼàndo soʼ Fòyn Nyìngòŋ diʼ tò nə̀ fòyn tsen a ghə̀ nkəŋə əyen la viʼi shwèʼ wen ghʉ ko wen ale lo.

²⁴Andìʼ ando ghə̀ nzìtə̀, və vì nə̀ wù shwèʼ wen tsen ghə̀ kiʼ ko əlòʼ à wen a vəmalàn.

²⁵Fòyn ayì gàʼ la və baʼlə wen nə̀ wì wen bènə̀ vunə wen a kòs boʼsə nə̀ ghò no tsèm a ghə̀ nkiʼi ə̀ lyɨ̀ ko yi lòʼ.

²⁶Wù shwèʼ ayì shiʼi à wen alwi ashɨ tìʼ shwèʼ wen mù sə̀ sensə̀ wen gàʼà la, Ghə̀ ghaʼa tyɨm wen tò fəshitə̀ alə̀ a yì bwènsə̀ lòʼ ko wen no tsèm.”

²⁷Fòyn ayì kusə nshinsə à wen ə̀ gàʼ la, kə ghə̀ be à bwènsə̀ lòʼ ko ayi mù ghʉsə wen ghə̀ lù.

²⁸“Wìʼ ayì lù sə ndyʉ̀ yen wìʼ tsen a wenə̀ wen nshwèʼè, ghə̀ kiʼ tò fəkotə̀ alə̀ əlòʼ à wen. Wìʼ ayì ghàʼ wen fà wen a kəndòŋ tò a zhʉ ayì ə̀ gàʼ la ghə̀ loʼ ko yi.

²⁹Wìʼ ayì shiʼi à wen a nchiʼsə alwi a nse mù sə sensə̀ wen la, Ghaʼa tyɨm wu tò fəshitə̀ alə̀ a ma lòʼ ko wù.

³⁰Ghə̀ tyen bòŋsə̀ nè və ghaʼ wen shwìn gàʼà la, ghə̀ a faŋ tò tsu əzaʼa fa zhʉ a ghə̀ a lòʼ ko ayi.

³¹Viʼi shwèʼ vətsenvə vi nè yèn kənyʉ̀ akì kò kə lù bòŋ à vəwenə no a mpfen. Vəwenə bwènə̀ dyʉ̀ shə̀ʼtə̀ à fòyn yì a vəwenə nshwèʼè à wen lì.

³²Fòyn dzàŋ wù shwèʼ ayì a tì ngə̀ŋ ə̀ gàʼ à wen la, Wù dìʼ no wù shwèʼ byɨ! Wù tə sènsə mò mà ghʉsə wù, wù dyʉ̀ nə̀ ko yi a wù tə nkiʼ əlòʼ à mò,

³³a tə ne ghò la kə nkàntə̀ wù à kusə nshinsə à wìʼ ghèn a wenə̀ vəwenə shwèʼè a muʼu ndə̀ŋndəŋ ando mà tə kusə nshinsə à wù a?

³⁴Tin fòyn ayì fwi ghə̀ lyɨ̀ wen kù à viʼi vyi a və shwìnə̀ viʼi la və shwìn ə wen bè nyàblə̀ nə̀ wen əzaʼa fa zhʉ a ghə̀ lu lòʼ ko wen yi no tsèm.

³⁵Yesò mò ngàyn ayì mwètə̀ mù gàʼ la, A lè ando Tìʼ ghom a kàŋ lu nè no tè à ndo à ghə̀ŋ a ntìntìn a zhʉ a ghə̀ fàŋ ke lyèsə̀ ə ku lèmə̀ wen fà wen a tyɨm.”