Read Babanki Matìyò 19 Bible Online

Matìyò 19 - Babanki bible

Matìyò 19

¹Ando Yesò ngaʼà nyʉ̀ venə mwètə̀ ghə̀ lù fa Galìlì dyàŋ dyʉ̀ a shə Judiyà tsenghə a ghə̀ ndiʼì a ndzèn à mù mə Jodàn.

²Viʼi no və ghoʼo dzɨ̀mtə̀ tɨ̀m nə̀ wen tsu ghə̀ chʉʼ viʼi a və nkwaʼkə̀ fà vəwenə a ntìntìn.

³Və Falàsi vətsenvə vì ə zhʉtə chʉ wen mù bèm à wen la, “No kənyʉ̀ kətsenkə bè dìʼ à vəghəŋ a soʼ a kə gàʼà la wìʼ zì ghə̀ dzɨ̀m wì wen tsu ando ghə̀ kòŋə̀?”

⁴Yesò bwènsə̀ gàʼ à vəwenə la, “Ghə̀ŋ be ko dzàŋ ə zhʉ kənyʉ̀ a ŋwàʼlə̀ Nyìngòŋ gàʼà? Ghə̀ gàʼà la, andìʼ a kənzìtə̀ kə mbi Nyìngòŋ shɨ̀tə̀ wùlɨm bènə̀ wùwì,

⁵mù gàʼ la, ‘Byìʼì a lə̀ wùlɨm lə nlù fa mbyɨ̀ tìʼ wen bènə̀ lì wen, ghə̀ dyʉ̀ tsèntə wenə̀ wì wen, vəwenə vəbò sə diʼ kənyʉ̀ kə mùʼ.’

⁶Vəwenə ko bè diʼ anə̀ viʼi və bò alì sə̀ diʼ to nə̀ wìʼ muʼ ashɨ Nyìngòŋ kə mù sə diʼ la, no ghò a Nyìngòŋ kwiʼ li, wìʼ ko be diʼi zàs.”

⁷Vəwenə bwènsə̀ bèm à wen la, “A zhʉ a kə diʼ ando wu gaʼà, byìʼì ghò a Mosìs ngàʼa la wùlɨm zì ghə̀ nyoʼ ŋwàʼlə̀ ə̀ kù à wì wen a ghə̀ dìʼì la ghə̀ dzɨ̀mə̀ li wen a?”

⁸Yesò gàʼà vəwenə la, “Mosìs nlù byɨmə la ghə̀ŋ zì ghə̀ŋ dzɨ̀mə̀ ki vəŋə byìʼàndo tʉ vəŋə nchiʼi ə ghə̀ŋ ziʼi ə̀ kɨ̀ kənyʉ̀. A bwen a lì a Nyìngòŋ nghʉ byìʼì lam fa kənzìtə̀.

⁹Mà gàʼà à ghə̀ŋ la no ndò a ghə̀ sətsèn dzɨ̀m wì wen à bwen tò la wùwì ayì tsi li wenə wùlɨm tsen, bè dyʉ̀ lam wùwì tsen, mu ghə̀ lì kwaʼà li soʼ lam.”

¹⁰Ndzɨ̀mtə̀sə bàm wen mù gàʼ à wen la,“Ghèn sətsèn ndiʼ ntsìnə̀ a wùlɨm diʼ ntsi wenə wì wen mu kə bòŋ la kə wìʼ à làm nə̀ mpfen.”

¹¹Yesò gàʼ à vəwenə la, “A ko diʼ viʼi vətsèm a və zì və tsi ando ziʼi ghenə gàʼà, à zì à tsi tò viʼi vi a Nyìngòŋ ku li kədyòʼ la vəwenə tsi a ji aghèn.

¹²Nyʉ̀ diʼ no ghoʼo a və zì və ne la kə wìʼ à lam. Vətsenvə diʼ kò və lù nlamə mu və bwi vəwenə anə̀ əkànə. Vətsenvə diʼ mu à nè viʼi la vəwenə ndiʼ əkàn. Andiʼ a tʉʼ Yesò viʼi təloʼ tə tsenəvə diʼ mu və tyen lam byìʼì soʼo Fòyn Nyìngòŋ. No ndò a ghə̀ zì ghə̀ byɨmə ə ntsi ando nyʉ̀ venə gàʼà ghə̀ tuʼù zhʉ̀tə.”

¹³Viʼi vətsenvə lyɨ̀ vunə və tyetəvə vì nə̀ vəwenə la Yesò ghʉ avu wen à vəwenə a tʉ ə̀ jɨ̀m à vəwenə, alì ndzɨ̀mtə̀sə bàm wen sə sə̀ kəŋkə̀ viʼi a vyi la kə vəwenə be zhuŋsə wen.

¹⁴Yesò mù gàʼ à ndzɨ̀mtə̀sə bàm wen la, “Ghə̀ŋ ghʉsə vunə vi və vi à mò, kə ghə̀ŋ be à tàm vəwenə byìʼàndo soʼo Fòyn Nyìngòŋ diʼ à viʼi vyi a və diʼi to nə̀ vəwenə.”

¹⁵Ghə̀ gàʼ a lì ghʉ̀ avu wen à vəwenə a tʉ bwaʼsə vəwenə mù lù sə̀ jèʼè dyʉ̀.

¹⁶Wutsen nlù vì bèm à Yesò la, “Ndìʼsə̀, ma lè zì mà ne no ghò jùŋə ndi lu kiʼi bwòŋ a?”

¹⁷Yesò bèm à wen la, “Byìʼì ghò a wu bèmə̀ kənyʉ̀ kə jùŋ kə kì a wù zì wù ne à mò a? A bòŋ nkwʉʼ tò Nyìngòŋ. Wù sətsèn kòŋ əkiʼi bwòŋ wu zhʉ̀ kənyʉ̀ kì a təsoʼ tə wen tə gàʼà.”

¹⁸Wìʼ a yì bèm à Yesò la, “Wù gàʼà təsoʼ tə kò.?” Yesò gàʼ la “Mà gàʼà tì a tə gàʼà la, kə wìʼ zhwi; kə wìʼ tsi nə̀ wì wìʼ ko nə̀ lɨm wìʼ, kə wìʼ tsoŋ; kə wìʼ zhò ndzɨ̀ŋ byìʼì wutsen.

¹⁹Nzhʉ gɨ̀ tìʼ wù bènə̀ lì wù, kòŋə lèmə̀ wù tò ndə̀ŋndəŋ ando wù kòŋə̀ wen wu.”

²⁰Wàyn wùlɨm ayì bwènsə̀ gàʼ à wen la,“Mà ghʉ li təsoʼ tèntə no tətsèm. A bè fàŋ ghò tsen mà ne a?”

²¹Yesò bwènsə̀ à wen la, “A zhʉ a wù kəŋə kwʉ̀ʼʉ̀ mè, wu dyʉ̀ bàʼlə fo vyə no tsèm ə̀ ku ko yi à viʼi kənfem ndi lu kiʼi ghoʼ a kàŋ. Wù ne nè a lì wù vì dzɨ̀mtə̀ mò.”

²²Andìʼ a zhʉ a wàyn wùlɨm a yì nzhʉ, kənyʉ̀ akì ghə̀ lù kò ghə̀ be nsaŋlə̀ byìʼàndo ghə̀ nkìʼ ghoʼ no ghoʼo.

²³Yesò mù gàʼ à ndzɨ̀mtə̀sə bàm wen la, “Mà gàʼà à ghə̀ŋ nəmwèʼè la kə lu nto no nànto wu ghoʼo kwen a soʼ Fòyn Nyìngòŋ.

²⁴Mà be shə̀ʼtə̀ kənyʉ̀ à ghə̀ŋ, kə bwaʼmə à fəmbwèʼè fo fə chò fa kəbʉ̀ʼ kə nsoʼ chò la wu ghoʼo kwen a sòʼ Fòyn Nyìngòŋ.”

²⁵Ndzɨ̀mtə̀sə bàm wen sə nè zhʉ̀ kənyʉ̀ a kènkə sə̀ diʼ nə̀ kaynə, mù bèm a wen la, “Kə lè yi ndiʼ a lì à lə̀ bwòŋ ndò?”

²⁶Yesò ki vəwenə tò fəchìʼ, mù gàʼ la, “kənyʉ̀ a kènkə to chò tò wìʼ, alì nyʉ̀ tsèm bwaʼmə à Nyìngòŋ.”

²⁷Bità mù bèm la, “Gaʼa kò wù yen li la yès moʼtə̀ li no ghò a yes tə nè sə̀ boʼsə wù. Yès lu se gho?”

²⁸Yesò gàʼ à vəwenə la, “Mà gàʼà à ghə̀ŋ nəmwèʼè la a lu ndiʼ a mbi fi, a zhʉ a Wàyn Wìʼ ŋwʉʼʉ li à wen a kəfwoyn nə̀ ghoʼo wen, a dìʼ a zhʉ ayì a ghə̀ŋ vi njʉ̀sə̀ bò a ŋwʉʼʉ a fwoyn njʉ̀sə̀ bò ə nsoʼo ngwàʼsə loʼ Islel shì njʉ̀sə̀ bò.

²⁹Adìʼ tè ndò a ghə̀ moʼtə̀ li kəbəŋ kə wen ko vəlèmə və wen lʉmə, ko vəlemə və wen ki, ko tìʼ wen ko lì wen ko vunə wen ko təsɨm tə wen byìʼì mò mu ghə̀ lu bwènsə̀ kiʼi viʼi bènə̀ fo aghayn ghɨ. Ghə̀ be lə kiʼi bwoŋ a ghə̀ lu faŋə̀ tò ghayn ə mùʼ.

³⁰Kənyʉ̀ a ghə̀ŋ diʼi be kɨ dìʼ la, nghoʼo viʼi a və diʼì luwèn a mbì lu ndiʼ a bàm, nghoʼo viʼi a və diʼ a bàm luwèn lu ndiʼ a mbì.”