Read Babanki Matìyò 2 Bible Online

Matìyò 2 - Babanki bible

Matìyò 2

¹Və mbwi Yesò a ntə̀ʼ Bètelehèm a loʼ Judiyà, a tʉʼʉ fòyn Helòd. A sətsèn viʼi və tofə və vətsen və lù fa loʼ a shə a chʉzhʉ saʼa fa tsu ə vì a Jelusalèm, ə bèm

²La,“Wàyn yì ye a və bwi, a ghə̀ lu ndiʼ fòyn və Jus lì lo? Yès yenli fədzɨ̀ŋ fə wen à yès a loʼ mù sə vì ə gumlə wen,”

³A ndiʼ ando Helòd nzhʉ kənyʉ̀ a kènkə, kə sə̀ ku ngəʼ à wen be ku ngəʼ à viʼi Jelusalèm no vətsèm.

⁴Ghə̀ dzàŋtə̀ tʉtʉ vəpfèm və ngə̀ŋ Nyìngòŋ və ghoʼkə və bènə̀ ndìʼsə̀sə təsoʼ ə bèm à vəwenə la və tə ndiʼ ne bwi Klistò yi fe lo.

⁵Vəwenə gàʼ à wen la, “Və tə ndiʼ ne bwi wen a ntə̀ʼ Bètelehèm a loʼ Judiyà”. Nshə̀ʼtə̀ ghoʼo nyòʼ li la,

⁶“A ghə̀ŋ a viʼi Bètelehèm, a loʼ Judiyà, Ghə̀ŋ kɨ la ntə̀ʼ ghə̀ŋ ko diʼ ntə̀ʼ tyetə no fa mpfen, ntə̀ʼ ghə̀ŋ sə diʼ ntə̀ʼ ghoʼo a Judiyà, byiʼàndo wìʼ a lù fà ghə̀ŋ a ntìntìn a ghə̀ lu tuʼmə nə̀ viʼi Islel no vətsèm nə̀ mò,”

⁷No a zhʉ kò a Helòd nyoʼtə dzàŋtə̀ viʼi ghayn vyi ə bèm à vəwenə la,“Fədzɨ̀ŋ a fì tə̀ lutə̀ sù fʉ a zhʉ kò?”

⁸Vəwenə shə̀ʼtə̀ a wen, ghə̀ mù tɨm vəwenə a Bètelehèm gàʼà la,“Ghə̀ŋ tuʼlə̀ kəŋ wàyn ayì ə nè kəŋ ə yen ghə̀ŋ bwènə̀ vì ə shə̀ʼtə̀ à mò ndi no nkàyntə̀ mò boŋ ə dyʉ̀ gumlə wen”

⁹Vəwenə zhʉ ntɨm ayì mù lù fʉ ə zaʼa ji bè yen tò ndə̀ŋndəŋ fədzɨ̀ŋ fìfə a vəwenə n-yenə à vəwenə shə loʼ lì. Ando vəwenə n-yenə alì sə saŋlə no ŋàŋ. Fədzɨ̀ŋ a fìfə dyʉ̀ fà vəwenə ashɨ ə dyʉ̀ tɨmə tò a kətʉ kə kəshi yì a wàyn a ghèn ndiʼi tsu.

¹¹Vəwenə kwen a ngə̀ŋ ə yen wàyn ayì wenə lò wen Mèli, ə gwʉ̀ʼtə alwi vəwenə à wen ashɨ ə kuʼsə wen, ə bòʼtə̀ mbò vəwenə ə shìsə kəku fa tsu a ndiʼi gul, nə̀ silva bènə̀ məzhiʼ mə tsen a və ndzàŋ nə̀ miyif ə ku à wen.

¹²Vəwenə nè fʉ a məpfwo, pfwo fa jì kədyàŋ ando Nyìngòŋ ntyɨftəli wen a jòm la kə vəwenə be a bwènə̀ dyʉ̀ a Helòd.

¹³A ndiʼ ando viʼi və tofə və nbwenə li vì ntsɨ̀ŋ Bobo vì à Josèf a jòm ə gàʼà wen la,“Lu ə lyɨ̀ wàyn ghèn wenə lì wen fa shə̀ ə nyɨ̀ŋ dyʉ̀ a Ijìb byiʼàndo Helòd kəŋə wàyn a ghèn əzhwi. Ghə̀ŋ dyʉ̀ ghə̀ŋ fàŋ tò tsu əzaʼa fa a zhʉ a ma a gàʼ la ghə̀ŋ bwènə̀ ə vì.”

¹⁴No a zhʉ̀ kò Josèf lù ə lyɨ̀ wàyn wenə lì wen fa tsu vəwenə nyɨ̀ŋ dyʉ̀ a Ijìb tò nəntʉʼʉ ayì,

¹⁵ə dyʉ̀ fàŋ tò tsu əzaʼa fa tʉʼ a Helòd mpfʉ. Nyʉ̀ venə nlyɨ̀ kəshi ndi lwinsə kənyʉ̀ kì a Nyìngòŋ nlù gàʼ ə chòsə̀ fà nshə̀ʼtə̀ ghoʼo wen “Ma dzàŋli wyè ghom fa Ijìb la ghə̀ vì.”

¹⁶Helòd nè yen la viʼi və tofə və vyi lobtə̀li yì, kənyʉ̀ a kèn kə zaf wen no nə̀ ŋàŋ. Ghə̀ chòsə̀ soʼ la və zhwilə vunə lyʉmə a Bètelehèm nə̀ vunə a və sə̀ diʼ ngwʉ̀ʼsə bò byìʼì zhʉ a viʼi və tofəvə vyì nshə̀ʼtə̀ la fədzɨ̀ŋ fìfə nfʉ tsu.

¹⁷A lè ncho tò kənyʉ̀ kì a Jèlimayà a ndiʼi nshə̀ʼtə̀ ghoʼo nlu gàʼ la,

¹⁸“Və lù li zhʉ ando wì dìʼ fa ntə̀ʼ Lamà, no nə̀ ŋàŋ, kò ghə̀ lə̀ kòŋ la wìʼ chɨmsə wen, a diʼ alì à dì Lachèl dì vunə wen ando və zhwilə.”

¹⁹Helòd lù pfʉ ntsɨ̀ŋ Bobo fʉ a kə̀, Josèf a jòm a loʼ Ijìb ə gàʼ la,

²⁰“Lù li lyɨ̀ wàyn wenə lì wen ghə̀ŋ vəwenə bwènə̀ pfwo a loʼ Islel byìʼì ando viʼi vyì a və nkəŋ zhwi wen pfʉkə li.”

²¹No a zhʉ kò Josèf lù ə lyɨ̀ wàyn wenə lì wen, vəwenə bwènə̀ pfwo a loʼ Islel.

²²A ndiʼ ando Josèf nzhʉ la à sə soʼo Akelùs a kəshi tìʼ wen a Judiyà, ghə̀ sə̀ fàynə̀ no ŋàŋ əŋwʉʼə tsu. Ntsɨŋ Nyìngòŋ be vì ə tyɨftə wen a jòm la ghə̀ nyɨŋ ə dyʉ̀ a shə loʼ Galìlì.

²³Ghə̀ lù ə dyʉ̀ a shə loʼ sə̀ tsi a ntə̀ʼ tsen a və ndzàŋ nə̀ Nazalèt. Ghə̀ ne alì ndi lwinsə kənyʉ̀ kì a nshə̀ʼtə̀ sə ghoʼkə sə ngàʼa. Sə nlù gàʼ la,“Və lu dzàŋ wen nə̀ wyè wù Nazalèt”.