Read Babanki Matìyò 21 Bible Online

Matìyò 21 - Babanki bible

Matìyò 21

¹Ando Yesò wenə̀ ndzɨ̀mtə̀sə bàm wen njèʼè dyʉ̀ boʼsə a Jelusalèm, ə̀ dyʉ̀ a ntə̀ʼ Bephag a ghə̀ ndiʼì a shə wenə pfèn olìf tsenghə. Ghə̀ mù tɨm ndzɨ̀mtə̀sə bàm wen səbò

²gàʼà à vəwenə la, “Ghə̀ŋ kwen dyʉ̀ a tì ntə̀ʼ ghèn a ghə̀ŋ a shɨ. Ghə̀ŋ ne sə nkwenə dyʉ̀ ə yen fəmbyèʼè fo a və chuŋə̀ nə̀ wàyn wen à wen a mbyɨ̀. Ghə̀ŋ nè yen ghə̀ŋ zàsə vì nə̀ wen à mò boʼsə nə̀ wàyn wen.

³Ghə̀ŋ sətsèn nzàsə̀ wìʼ bèm kənyʉ̀ à ghə̀ŋ, ghə̀ŋ gàʼa la, Bobo kiʼ kənyʉ̀ ənè nə̀ səwensə diʼ be a bwènsə̀ tɨm tò luwèn.”

⁴Kənyʉ̀ a kènkə nlyɨ kəshi ndi ne la kənyʉ̀ a Nyìngòŋ nlù gàʼ chòsə̀ fà nshə̀ʼtə̀ wen ghoʼo ndiʼ nəmwèʼè la,

⁵“Gaʼa viʼi ntə̀ʼ Zayòn la, ghə̀ŋ yen a, fòyn ghə̀ŋ vì à ghə̀ŋ, ghə̀ bwaʼmə, vì a kwi wàyn fəmbyèʼè fo.”

⁶Ndzɨ̀mtə̀sə bàm wen ashì mù lù dyʉ̀ nè ando ghə̀ yì gàʼ,

⁷bwènə̀ vì nə̀ fəmbyèʼè fo a fì bènə̀ wàyn wen ə̀ làfsə vəwenə nə̀ vədàlə və vəwenə, Yesò kuʼ ŋwʉʼʉ à yì a kətʉ.

⁸Viʼi no ghoʼo tsuʼtə vədàlə və vəwenə mòʼ a ji ghə̀ chò fà yì a kətʉ. Vətsenvə kwàʼtə̀ təntam tə nkòʼ mòʼ a ji.

⁹Nòyn viʼi vi a ghə̀ ndyʉ̀ fa shɨ Yesò nə̀ yi a ghə̀ mvì fà wen a bàm zìtə̀ sə̀ zɨmə gàʼà la, “Ghoʼsə dìʼ à wàyn fòyn Devìt! Nyìngòŋ bwaʼsə wìʼ yì a ghə̀ vi a zhiʼ nə̀ Bobo! Ghoʼsə diʼ à Nyìngòŋ a ghə̀ diʼ a kàŋ.”

¹⁰Yesò nè kwen mwètə̀ a Jelusalèm, ntə̀ʼ a yì nə̀ʼkə̀ no tsèm. Viʼi mù sə̀ bèmə̀ la, “Ghèn dìʼ ndo?”

¹¹Viʼi vi bwènsə̀ la, “A dìʼ Yesò nshə̀ʼtə̀ ghoʼo yì a ghə̀ lù fa ntə̀ʼ Nazalèt a loʼ Galìlì.”

¹²Yesò dyʉ̀ kwen a tì ngə̀ŋ Nyìngòŋ ghoʼo sə̀ dzɨ̀mə̀ viʼi vyi a və mbaʼlə̀ be zenə tsu no vətsèm. Ghə̀ tenlə chiʼ vi a viʼi nkwitə ko à yì a yi kətʉ be tenlə kɨ a viʼi mbaʼlə̀ làto tsu mòʼlə̀ a nse,

¹³gàʼà à viʼi a vyi la, “Və nyòʼò li a ŋwàʼlə̀ Nyìngòŋ la, viʼi lu dzàŋ ngə̀ŋ ghom la à dìʼ ngə̀ŋ jɨ̀m, alì ghə̀ŋ nkaʼsə luwèn à sə diʼ kəshi a vətsoŋ lyòmtə̀ tsu.”

¹⁴Viʼi kənshɨ̀f wenə̀ viʼi kənkwàʼkə̀ vì yèn wen tsu ghə̀ chʉʼ vəwenə.

¹⁵Tʉtʉ vəpfèm və ngə̀ŋ Nyìngòŋ bènə̀ ndìʼsə̀sə təsoʼ sə̀ fwisə̀ tin ando vəwenə nyèn nyʉ̀ kanəvə vi a ghə̀ nè bè zhʉ̀ ando vunə nzɨmə gàʼà tsu la, “Ghoʼsə diʼ à wàyn fòyn Devìt.”

¹⁶Vəwenə mù bèm à Yesò la, “Wu lə̀ zhʉ kənyʉ̀ kèn a vunə venə gàʼà lə a?” Yesò byɨmə ə̀ bwènsə̀ gàʼ à vəwenə la və nyoʼ li a ŋwàʼlə̀ Nyìngòŋ la, “Nyìngòŋ shɨ̀tə̀ li təchʉ̀ tə vunə vəbwaʼvə a və bu nyoŋə la və nghoʼsə wen. Ghə̀ŋ be ko təmə dzàŋ kəshi akì.”

¹⁷Yesò gàʼ a lì lù fa tsu fʉ̀ fa Jelusalèm dyʉ̀ tsì a ntə̀ʼ Betanì.

¹⁸Tʉʼ nè layn, Yesò lù tò boʼòngə̀ŋ sə mbwènə̀ dyʉ̀ a Jelusalèm jɨ̀ŋ sə̀ zafə wen.

¹⁹Ghə̀ yen fəkòʼ fə figs a wenə ji, kwen dyʉ̀ à yì a ti alì kò ghə̀ lù yèn kəfo à yì a kətʉ əchò tò təfʉ ti. Ghə̀ mù gàʼ à fəkòʼ a fìfə la, “Wù ko lu be kumə ashɨ!” No a zhʉ kò fəkòʼ a fìfə zɨm.

²⁰Ndzɨ̀mtə̀sə bàm wen nè yèn kənyʉ̀ a kènkə sə̀ diʼ nə̀ kaynə, mù bèm à Yesò la,“Fəkòʼ fènfə nè ale nzɨm tò fa zhʉ alə̀ a?”

²¹Yesò bwènsə̀ gàʼ à vəwenə la, “Mà gàʼà à ghə̀ŋ nəmwèʼè la, ghə̀ŋ sətsèn nkiʼ byɨmə, kye momə̀ mwòmsə mu ghə̀ŋ zì ghə̀ŋ ne kənyʉ̀ kèn a ma ə ne à fəkòʼ fènfə lə̀, bè gàʼ no tè à pfèn ghoʼo ghèn la, Tsuʼmə dyʉ̀ tsòʼ à mù mə nghoʼomə̀, ghə̀ be à nè tò a lì.

²²Ghə̀ŋ sətsèn njɨ̀mə̀ bèmə̀ no ghò à Nyìngòŋ ghə̀ à kù à ghə̀ŋ a zhʉ a ghə̀ŋ kiʼi byɨmə.”

²³Yesò bwènə̀ dyʉ̀ kwen a ngə̀ŋ Nyìngòŋ mù sə nziʼi viʼi tsu, tʉtʉ vəpfèm və ngə̀ŋ Nyìngòŋ bènə̀ vəchəʼ və loʼ vì bèm à wen la, “Wù nè nyʉ̀ venə nə̀ kədyòʼ kə mu kə lù fa fe? A ku ndò ku kədyòʼ a kènkə à wù a?”

²⁴Yesò bwènsə̀ gàʼ à vəwenə la, “Nkàyntə̀ mò be a bèm kənyʉ̀ kə mùʼ à ghə̀ŋ, ghə̀ŋ sətsèn bwènsə̀, mà mu à shə̀ʼtə̀ wìʼ yì a ghə̀ŋ a ghə̀ ku kədyòʼ la mà nè nyʉ̀ venə tsu.

²⁵Joyn wù ku à mù nlyɨ̀ kədyòʼ fa fe əku mu a? A nku Nyìngòŋ ku kədyòʼ à wen mu à nku viʼi lo? Vəwenə zìtə̀ sə̀ bèsə̀ à vəwenə a ntìntìn gàʼà la ‘Vəghəŋ sətsèn gàʼ la à nku Nyìngòŋ ku kədyòʼ à wen ghə̀ à bèm la ghə̀ŋ be tə mfaŋ ke byɨmə kənyʉ̀ a ghə̀ ngàʼà byìʼì ghò?’

²⁶Vəghəŋ sətsèn gàʼ la à nkù viʼi kù kədyòʼ à wen mu viʼi zì və mwom kənyʉ̀ à vəghəŋ a təwen byìʼàndo no vəwenə vətsèm ə̀ nlyɨ̀ la Joyn ndiʼ nshə̀ʼtə̀ ghoʼo.”

²⁷Vəwenə kwòʼtə̀ a lì mù gàʼ à Yesò la, “Yès ko kɨ.” Yesò mù gàʼ à vəwenə la, “No nkàntə̀ mò li ko a shə̀ʼtə̀ kəshi kì a ma lyɨ̀ kədyòʼ fa tsu bu sə nè nyʉ̀ venə.”

²⁸Yesò bè gàʼ à viʼi a vyi la vəwenə kwoʼtə kənyʉ̀ kùmə̀ ngàyn a ghə̀ nkəŋə mò mù gàʼ la, “Wutsen ndìʼ kiʼ vunə lʉmə wen vəbò. Ghə̀ dyʉ̀ gàʼ à wù mbì la, Fʉ̀ shwèʼ a sɨm lamsə̀ layn a wàyn ghom.”

²⁹Wàyn ayì gàʼ la, “Mà ko a fʉ̀, alì nè bwènsə̀ kwòʼtə̀ to fa wen a ngəŋ la kə bòŋ la yì fʉ ə mù fʉ̀.

³⁰Tìʼ wen bè dyʉ̀ à kənkùmtə̀ kə wàyn wen ə̀ gàʼ tò ndə̀ŋndəŋ kənyʉ̀ a ghə̀ yì gàʼ à wù mbì. Ghə̀ zàŋsə̀ byɨmə alì kènla ghə̀ fʉ li.”

³¹Yesò mù bèm à vəwenə la, “A lè ne wàyn ko fa ntìntìn vunə vi vəbò nè kənyʉ̀ kì a tìʼ vəwenə nkəŋə a? Vəwenə bwènsə̀ la. ‘A ne wù mbì.’ Yesò mù gàʼ la, ‘Mà gàʼà a ghə̀ŋ’ nəmwèʼè la, viʼi vyi a və tinə kənsè bènə̀ njèʼtə̀sə lu kwen a soʼ Fòyn Nyìngòŋ à ghə̀ŋ a mbì.”

³²Mà gàʼà alə̀ byìʼàndo Joyn wù ku à mù mvi li sə̀ dìʼì jì ntsìnə̀ tɨmə a ghə̀ŋ la ghə̀ŋ njèʼè fa tsu a shɨ Nyìngòŋ, alì kò ghə̀ŋ lù byɨmə wen. Viʼi vi a və tinə kənsè bènə̀ njèʼtə̀sə bòŋsə̀ byɨmə wen. Ghə̀ŋ yen nyʉ̀ venə no tsèm bè tyen tò tyenə la ghə̀ŋ ko a kwitə tətyɨm təŋtə byɨmə kənyʉ̀ kì a ghə̀ ngàʼà.

³³Yesò bè gàʼ à viʼi vi la vəwenə bè zhʉ̀tə ngàyn tsen. “Tì sɨ̀m tsen nlù bòʼ sɨm lamsə̀ lwi wen, kwìʼi mbàyn kaʼsə wen sɨm ayi, tyùŋə nkwòŋ yì a və ne nwìʼì lamsə̀ ayì tsu mu shɨ̀tə məlyʉ̀ʼ bè bwòm kəmbaŋ kə ngə̀ŋ ntsɨ̀ŋ a kəntìntìn kə sɨm ayì mù kù sɨm ayi la viʼi nshwèʼè gə̀tə̀ ku yì nə̀ fo vi a və fʉ̀ fa tsu. Ghə̀ ku a lì lù dyʉ̀ a jèʼ a loʼ tsenghə.

³⁴Zhʉ məkwòŋ nè kwʉ̀ʼ ghə̀ tɨm viʼi shwèʼ wen vətsenvə la və dyʉ̀ gàʼ à viʼi vi a ghə̀ tə ku sɨm ayi à vəwenə la vəwenə ku və wen vəlamsə̀.

³⁵Viʼi a və nshwèʼè sɨm ayi ghaʼ viʼi shwèʼ tì sɨm vi a ghə̀ yì tɨm lì ghòm ghə̀ mùʼ, ə̀ zhwì kənkùmtə̀ kə wen be temlə ghətsen nə̀ ngùʼsə.

³⁶Tì sɨ̀m ayì bè tɨ̀m viʼi shwèʼ vətsenvə və ghoʼo chò vi a ghə̀ yì tɨ̀m a mbì lì. Viʼi sɨm vi bè nè tò ndə̀ŋndəŋ kənyʉ̀ a və yì nè a və mbì vi à vəwenə.

³⁷A kəmwetə ghə̀ tɨm wàyn wen à vəwenə kwòʼtə̀ fà wen ngə̀ŋ la vəwenə ne dyʉ̀ fàyn wàyn ghom.

³⁸Viʼi shwèʼè sɨ̀m a vyi nè dyʉ̀ yen wàyn yì tò yenə, kwòʼtə̀ à vəwenə ngəŋsə la, Ghèn dìʼi ne ndiʼ njɨ̀ngə̀ŋ tì sɨ̀m ghèn. Vəghəŋ ghaʼ wen zhwi ndi lyɨ fo vi a ghə̀ tə ndiʼ ne lyɨ̀ lì.

³⁹Vəwenə gàʼ a lì mù ghaʼ wen fʉ̀ nə̀ wen fa sɨm ayì dyʉ̀ zhwi.”

⁴⁰Yesò mù bèm à vəwenə la, “kə lè yì chò alə̀ tì sɨ̀m a ghèn à bwènə̀ vì nè ale nə̀ viʼi vi a ghə̀ tə kù sɨm la vəwenə nshwèʼè lì?”

⁴¹Vəwenə bwènsə̀ à wen la, “Kə sətsèn chò a lì, tì sɨ̀m ayì a zhwilə viʼi və byɨvə avenə, ə̀ kù sɨm ayi à viʼi kədyàŋ vəwenə nshwèʼè ku və wen fo tò a zhʉ.”

⁴²Yesò bwènsə̀ gàʼ à vəwenə la, Ŋwàʼlə̀ Nyìngòŋ ə gàʼ à la, Ngùʼ yì a viʼi shwèʼ tə màʼà lì kaʼsə li sə diʼ ngùʼ bʉ ngə̀ŋ. A dìʼ shwèʼè Bobo alə̀, à diʼ kənyʉ̀ kə mesəkə à vəghəŋ?

⁴³Ghə̀ŋ be ko təmə̀ ndzàŋ kəshi akènkə? Byìʼì ntsìnə̀ ghə̀ŋ aghèn, “Mà gàʼà a ghə̀ŋ la və lu shi soʼ Fòyn Nyìngòŋ fa ghə̀ŋ, ə ku a viʼi vyi a və kumə ashɨ.

⁴⁴[No ndò a ghə̀ kòntə a wèn ngùʼ bʉ ngə̀ŋ aghèn, ghə̀ à fə̀ŋ tìnkə a ntemə a ntemə, mu ngùʼ aghèn bè sətsèn fə̀ŋ a kətʉ no ndò ghə̀ à bvusə̀ wen a kəbyìʼ”]

⁴⁵Tʉtʉ vəpfèm və ngə̀ŋ Nyìngòŋ vi bènə̀ viʼi Falàsi vi nè zhʉ̀ ngàynsə Yesò a sènsə kɨ̀ tò kɨ la ghə̀ gàʼà byìʼì vəwenə,

⁴⁶vəwenə mù sə̀ kəŋə jì əghaʼ wen alì sə fàynə̀ nòyn viʼi yì a ghə̀ ndiʼì tsu byìʼàndo nòyn ayi nlyɨ̀ wen anə̀ nshə̀ʼtə̀ ghoʼo.