Read Babanki Matìyò 22 Bible Online

Matìyò 22 - Babanki bible

Matìyò 22

¹Yesò bè mò ngàyn tsen à vəwenə gàʼà la,

²“Və zì və shəʼmə Fòyn Nyìngòŋ nə̀ fətitì fə fòyn tsen a ghə̀ nlù baʼtə kəzhɨ kə lam wàyn wen wùlɨm.

³Ghə̀ nè bàʼtə myètə̀ ə̀ tɨ̀m viʼi shwèʼ wen la və dyʉ̀ dzàŋtə̀ viʼi vi a ghə̀ tə làʼà, alì viʼi a vyi tyen la vəwenə ko a vì.

⁴Ghə̀ bè tɨm ə̀ kwʉ̀ʼsə̀ viʼi shwèʼ wen vətsenvə la və dyʉ̀ gàʼà à viʼi a vyi la və baʼtə li kəzhɨ kì mwetə. Və bvaʼa li vəmbòŋ bènə̀ nyamsə sətsensə. No ghò sə̀ diʼ və nzhɨ tò zhɨ, la vəwenə vi lì a kəshi kə kəzhɨ.

⁵Vəwenə dyʉ̀ làʼà, kò wìʼ lù ghʉ̀ kətʉ a kənyʉ̀ a yì. No ndò bòŋsə̀ sə̀ dyʉ̀ tò a wen a kəshi. Wutsen lù fʉ̀ à wen a sɨm, wutsen bòŋsə̀ lù dyʉ̀ à wen a mbàʼànkùm.

⁶Viʼi ntɨm fòyn a vyi dyʉ̀ a vətsenvə vəwenə ghaʼ viʼi ntɨm a vyi nyàblə̀ nə̀ vəwenə ə̀ zhwilə.

⁷Fòyn nè zhʉ̀ kənyʉ̀ akì kə zaf wen no nə̀ ŋàŋ, ghə̀ tɨm vəsugyèʼ və wen və dyʉ̀ zhwilə viʼi vyi a və nzhwilə̀ viʼi shyèʼ wen lì bè nyùʼ ntə̀ʼ vəwenə.

⁸Ghə̀ mù gàʼ à viʼi shwèʼ wen vətsenvə la və baʼtə li kəzhɨ kə lam kèn kə mwetə alì viʼi vi a ma tə̀ làʼà lì ko kwʉ̀ʼ əvì.

⁹Ghə̀ŋ fʉ dyʉ̀ a fàfə jisə làʼà no məndò yì a ghə̀ŋ yenə.

¹⁰Viʼi shwèʼ a vyi fʉ̀ dyʉ̀ dzàŋtə̀ no məndò a vəwenə nyenə, viʼi və byɨvə nə̀ və jùŋvə vì lwin a ngə̀ŋ lam ayì.”

¹¹Fòyn vì ətoŋtə viʼi ə̀ yèn wìʼ kènla ghə̀ shɨtə̀ li nlaf.

¹²Bèm à wen la, “Wù jèʼ ale sə diʼ a shèn a awèn kə̀ʼə̀ alə̀ a?” Wìʼ ayì chɨmə tò la kùʼ.

¹³Fòyn mù gàʼ à viʼi shwèʼ wen la, “Ghə̀ŋ kwiʼ akwoŋ wen bènə̀ afwen wen shìsə̀ wen mòʼò dyʉ̀ a kəbəŋ kə fenəkə a kəshi a ghə̀ a nlyuŋlyuŋ dì tsu be pfiʼi asoŋ wen.”

¹⁴Yesò sə mwètə̀ ə̀ gàʼ la və dzàŋə̀ viʼi no vəghoʼo alì diʼi tetə tò viʼi və tyetə və.

¹⁵Və Falàsi vətsenvə lù dyʉ̀ zhùŋtə̀ sə baʼtə̀ jì ndi nè la Yesò gàʼ shwè və ghaʼ wen,

¹⁶vəwenə mù tɨm ndzɨ̀mtə̀sə bàm vəwenə sətsensə bènə̀ viʼi shwèʼ Helòd vətsenvə gàʼà la vəwenə dyʉ̀ gàʼà Yesò la, “Ndìʼsə̀, yès kɨ la wù gàʼà tò nəmwèʼè, ziʼi tò kənyʉ̀ à diʼ tò kənyʉ̀ kə nəmwèʼè byìʼì Nyìngòŋ, kènla wù fwaynə təkwòʼtə̀ tə viʼi byìʼàndo à dìʼ à wù viʼi vətsèm diʼ tò ndə̀ŋndəŋ.

¹⁷Shə̀ʼtə̀ lì à yès la à wù a kwòʼtə̀ soʼo vəghəŋ lè byɨmə la və loʼ kənsè à Kaysa andiʼì fòyn ghoʼo a loʼ Lum mu ghə̀ ko byɨmə à?”

¹⁸Yesò kɨ mənàŋ mì a vəwenə nkwiʼi mù gàʼ à vəwenə la, “Ghə̀ŋ viʼi kəmbɨ̀lə̀ venə! ghə̀ŋ zhʉtə̀ chʉ̀ ghomə byìʼì ghò?

¹⁹Ghə̀ŋ diʼi ko kəkas ayi a və mòʼò kənsè tsu lì à mò.” No a zhʉ kò və vì nə̀ ko kəkas ayi à wen.

²⁰Ghə̀ mù bèm à vəwenə la, “A dìʼ kəndemndem kə kə̀ʼ ndò bènə̀ zhiʼ ndo tsu lə̀?”

²¹Vəwenə gàʼ la, “A dìʼ kəʼə Kaysa nə̀ zhiʼi wen tsu.” Yesò mù gàʼ à vəwenə la,“Kə ndiʼ a lì ghə̀ŋ kù fo Kaysa a Kaysa, bè kù fo Nyìngòŋ à Nyìngòŋ.”

²²Vəwenə nè zhʉ̀ ando ghə̀ bwènsə̀ a lì mù sə diʼ nə̀ kanə ə̀ lù fà wen a mbyɨ̀.

²³Tò a kətsi ayì Vəsadùsis vətsenvə lù vì à Yesò, adiʼ viʼi vyi a və ko mbyɨmə la wìʼ zì ghə̀ lu fa pfʉ, bèm à wen la,

²⁴“Ndìʼsə̀ Mosìs nlù gàʼ à yès la, Lèmə wìʼ sətsèn pfʉ kiʼ wùwì alì kènla ghə̀ kìʼ vunə, lèmə̀ wu pfʉ ayì dìʼi nyòŋsə̀ wùwì mpfʉ ayì ndi wenə wen bwi vunə lèmə wen.

²⁵Vəlèmə̀ vətsenvə ndìʼ sòmbo, wù mbì dyʉ̀ làm wùwì pfʉ mòʼtə̀ wen kènə̀ wàyn, ghʉ̀sə wì wen a yì à lèmə̀ wen.

²⁶Lèmə̀ wen bè pfʉ ghʉ̀sə wì wen ayì tò a lì. Kənkùmtə̀ kə bè lyɨ̀ bè pfʉ tò ndə̀ŋndəŋ. Vəlèmə̀ və wen vətsenvə vi bè nè lyɨ̀ bè pfʉkə tò a lì dyʉ̀ mè.

²⁷Fa yì a bàm, wùwì ayì bè pfʉ.

²⁸A lè lu ndiʼ a kətsi a viʼi lùkə̀ fa pfʉ, wùwì ayì ndiʼ wì ndò ando wùwì ayì nlam li vəlèmə̀ a vyi no vətsèm a?”

²⁹Yesò mù gàʼ à vəwenə la, “Ghə̀ŋ ə shwe li kənyʉ̀ byìʼàndo ghə̀ŋ ko kɨ̀ kənyʉ̀ kì a ŋwàʼlə̀ Nyìngòŋ gàʼà ko kənyʉ̀ kì a Nyìngòŋ zì ghə̀ ne.

³⁰A lu ndiʼ a tʉʼ a viʼi lù li fa pfʉ və ko lə nlamə. Viʼi lu ndiʼ ando ntsɨ̀ŋsə ngə̀ŋ Nyìngòŋ sə dìʼ a kàŋ.

³¹Anə̀ kənyʉ̀ kùmə̀ məlù fa pfʉ a viʼi və pfʉkəvə lu nlù, kə diʼ la ghə̀ŋ ko təmə̀ dzàŋ əzhʉ kənyʉ̀ kì a Nyìngòŋ gàʼà mu? Nyìngòŋ nlù gàʼ la,

³²Mà dìʼ Nyìngòŋ Ablaham, diʼ Nyìngòŋ Izìk, dìʼ Nyìngòŋ Jàkob. Viʼi avenə diʼ vəto. Na kènkə diʼì la ghə̀ dìʼ Nyìngòŋ viʼi a və diʼì və to a ko diʼ Nyìngòŋ viʼi və pfʉkəvə.”

³³Nòyn yi nè zhʉ̀ ziʼi aghenə sə̀ diʼ nə̀ kanə.

³⁴Andìʼ ando viʼi Falàsi nzhʉ̀ la Yesò chiʼi li təchʉ̀ tə Vəsadùsis vəwenə tsèntə̀.

³⁵Wìʼ muʼ fà vəwenə a ntìntìn, andìʼ ndìʼsə̀ soʼ mwòmsə̀ Yesò bèm à wen la,

³⁶“Ndìʼsə̀, àdìʼ soʼo kò fa tì təsoʼ tə Mosìs a ghə̀ to chò tətsentə a?”

³⁷Yesò bwènsə̀ gàʼ la, “A dìʼ yi a ghə̀ gàʼ à la, Wù diʼ kòŋ Bobo Nyìngòŋ wù nə̀ tyɨm wu no tsèm, nə̀ kəzhwì kə̀ no kə tsèm, bènə̀ kwòʼtə̀ wu no tsèm.

³⁸A lè soʼ yi a ghə̀ to chò no təsoʼ tətsèm.

³⁹Kənkùmtə̀ ki kə diʼ la, Wù kòŋ lèmə̀ wu tò ndə̀ŋndəŋ ando wù kòŋə̀ wen wu.

⁴⁰Təsoʼ tə Mosìs tì no tətsèm bènə̀ ziʼi nshə̀ʼtə̀sə sə ghoʼkəsə no tətsèm əti tò a wen təsoʼ tèn tə bò.”

⁴¹Və Falàsi vi mbò mbu tò a nòyn mùʼ. Yesò mù bèm à vəwenə la,

⁴²“Ghə̀ŋ kwòʼtə̀ la ghò byìʼì Wìʼ yì a Nyìngòŋ ntsuʼ li ə̀ ghʉ a? Ghə̀ŋ kɨ la ghə̀ dìʼ wàyn ndò?” Vəwenə gàʼ la ghə̀ dìʼ wàyn Devìt.

⁴³Yesò bèm à vəwenə la, “A zhʉ a kə diʼ a lì byìʼì ghò a kəzhwì kə ŋwoʼəkə ne la ghə̀ dzàŋ wàyn wen aghèn la Bobo a? Mà bèm alə̀ byìʼàndo Devìt nlù gàʼ la,

⁴⁴Bobo Nyìngòŋ ngàʼa à Bobo ghom la ŋwʉʼmə a shyə kwoŋ toghə mò zaʼa fa zhʉ a ma ghʉ viʼi kəbàyn wù a mò a ti aghʉ̀.

⁴⁵Devìt sətsèn ndzàŋə̀ wen la Bobo ghə̀ be a ndiʼ wàyn wen ale?”

⁴⁶No wìʼ nko mwòm ə bwènsə̀ kənyʉ̀ akì. Əzìtə̀ fa kətsi ayì wìʼ nko bè mwòmsə̀ əbèm kənyʉ̀ à wen.