Read Babanki Matìyò 23 Bible Online

Matìyò 23 - Babanki bible

Matìyò 23

¹Yesò mù gàʼà nòyn viʼi bènə̀ ndzɨ̀mtə̀sə bàm wen la,

²“Ndìʼsə̀sə təsoʼ bènə̀ viʼi Falàsi dìʼ viʼi vyi a və kiʼi àdyoʼ ə chòsə̀ soʼ Mosìs.

³Ghə̀ŋ lì diʼi nè no ghò yì a vəwenə gàʼà la ghə̀ŋ ne, alì kə ghə̀ŋ a nshyəmə̀ vəwenə byìʼàndo vəwenə ko nè nyʉ̀ vyi a vəwenə dìʼsə̀.

⁴Vəwenə ku kəbwèʼè la viʼi bwèʼè a kə dìʼì chò vəwenə alì kò vəwenə ndìʼsə̀sə təsoʼ bènə̀ viʼi Falàsi nkòŋə̀ gyàmtə̀ no a mpfen.

⁵Vəwenə nè no mə ghò tò la və yen vəwenə. Vəwenə nè məmbòtə mə jɨm mə vəwenə a vəwenə kwiʼi à vəwenə à tʉ bènə̀ à vəwenə a kwoŋ nànkwè mə ghoʼkə̀. Vəwenə be nè mbwin vi a vəwenə chətə̀ à vəwenə a təsoŋ tə ndisə və dyə̀fkə̀ no nànto.

⁶Vəwenə dyʉ̀ a kəshi kə kəzhɨ vəwenə sə kòŋ əkuʼ ŋwʉʼʉ tò a shì ŋaŋtəvə, dyʉ̀ a aloʼ ntsèntə̀sə və kuʼu ŋwʉʼtə tò a mbì.

⁷A lə̀ ndiʼ a zhʉ a vəwenə dyʉ̀ a shi mənsàm vəwenə sə kəŋə la viʼi nyɨŋə vì toŋtə vəwenə nə̀ gumləghə be kəŋə la viʼi ndzàŋə̀ vəwenə nə̀ ndìʼsə̀sə.

⁸Anə̀ ghə̀ŋ, ghə̀ŋ dìʼ tò vəlèmə̀ no vətsèm kiʼ tò ndìʼsə̀ muʼ. Kə ghə̀ŋ nè nkəŋə la və ndzàŋə̀ wìʼ fà ghə̀ŋ nə̀ ndìʼsə̀.

⁹Kə ghə̀ŋ lù tòŋtə wìʼ fa nse a shèn la Tìʼ byìʼàndo ghə̀ŋ kìʼ tò Tìʼ muʼ, ghə̀ diʼ a kàŋ.

¹⁰Kə ghə̀ŋ nkəŋə la və dzàŋ wìʼ fà ghə̀ŋ la kətʉ byìʼàndo kətʉ kə diʼ tò kə mùʼ à diʼ mo Klistò.

¹¹Wìʼ yì a ghə̀ diʼi kətʉ à ghə̀ŋ a ntìntìn diʼ ndiʼ wù shwèʼ ghə̀ŋ.

¹²No məndò a ghə̀ kuʼsə̀ wenə wen Nyìngòŋ nè a shìʼsə wen, no məndò a ghə̀ gumlə̀, Nyìngòŋ ne kuʼsə wen.”

¹³Yesò bwènsə̀ sə̀ gàʼà à ndìʼsə̀sə təsoʼ wenə viʼi Falàsi la, “Ngəʼ ghoʼo lu ndiʼ à ghə̀ŋ ndìʼsə̀sə təsoʼ wenə viʼi Falàsi byìʼì jì a ghə̀ŋ bɨ̀lə̀ ashɨ viʼi fa tsu. Ghə̀ŋ shwìnə̀ jì la kə viʼi kwen a soʼo Fòyn Nyìngòŋ. Ghə̀ŋ ko kòŋ əkwen tsu be tàmə̀ viʼi vətsenvə a və kòŋ əkwen.

¹⁴[Ngəʼ ghoʼo dìʼ a ghə̀ŋ viʼi Falàsi bènə̀ ndìʼsə̀sə təsoʼ byìʼì kəmbɨ̀lə̀ kə ashɨ. Ghə̀ŋ lobtə̀ ki mpfʉ shi məbəŋ mə vəwenə be bɨ̀lə̀ ashɨ viʼi nə̀ təjɨ̀m tə dyə̀fkətə. Byìʼì nyʉ̀ avenə no tsèm ngəʼ ghə̀ŋ lu mbyɨfə chòsə̀.”]

¹⁵Ngəʼ ghoʼo diʼ à ghə̀ŋ ndìʼsə̀sə təsoʼ wenə̀ viʼi Falàsi, ghə̀ŋ viʼi kənbɨ̀lə̀ kə ashɨ. Ghə̀ŋ jèʼè kəghaf be təmə mu mə ntomə̀ to ndi nè la wìʼ muʼ zhʉ byɨmə kənyʉ̀ a ghə̀ŋ dìʼsə̀. No a zhʉ̀ kò a ghə̀ŋ nè ghə̀ byɨmə, ghə̀ŋ sə shyèʼè wenə̀ vəwenə ənè la ghə̀ kwʉʼ ədyʉ̀ a zhìʼ chò tè ghə̀ŋ.

¹⁶“Ngəʼ ghoʼo diʼ à ghə̀ŋ viʼi kənshɨ̀f a və tensə viʼi. Ghə̀ŋ dìʼsə̀ la, Wìʼ sətsèn kàn a zhiʼ ngə̀ŋ Nyìngòŋ ghoʼo ə̀ fàŋ ke nè kənyʉ̀ akì kò ngəʼ tsen à ndiʼ, alì mu ghə̀ sətsèn bòŋsə̀ kàn a zhiʼ fo vi a və shɨ̀tə nə̀ tyanə a və diʼì a ngə̀ŋ Nyìngòŋ mu ghə̀ŋ diʼi nè kənyʉ̀ akì.

¹⁷Ngu fo a və fyɨ̀fə li! A chò fo vi a və ti a və nghʉ a ngə̀ŋ Nyìngòŋ mu à chò ngə̀ŋ Nyìngòŋ yì a ghə̀ ne fo a vyi sə ŋwòʼə̀ lo?

¹⁸Ghə̀ŋ bè ziʼi la wìʼ sətsèn nghʉ kənyʉ̀ ənè ə̀ kàn a zhiʼ kəchiʼ kə kəku kò ngəʼ tsen andìʼ a zhʉ a ghə̀ dìʼ ke nè kənyʉ̀ akì, alì mu ghə̀ ghʉ̀ kənyʉ̀ bòŋsə̀ kàn a zhiʼ kəku kì a kwi kəchiʼ mu ghə̀ diʼi ne kənyʉ̀ akì.

¹⁹Ghə̀ŋ fyɨ̀f ghò alə̀ a? A chò kəku mu a chò kəchiʼ kì a kə nè la kəku kì ndiʼ kə laynə lo?

²⁰Kə bòŋsə dìʼ la wìʼ sətsèn kàyn a zhiʼ kəchiʼ kə kəku mu ghə̀ kaynə boʼsə wenə̀ fo vi a və diʼì a yì a kətʉ.

²¹Kə be dìʼì la wìʼ sətsèn nkànə̀ a ti ngə̀ŋ Nyìngòŋ mu ghə̀ lì kàynə̀ boʼsə wenə̀ Nyìngòŋ yì a ghə̀ dìʼ tsu.

²²Wìʼ be sətsèn nkànə̀ a kaŋə mu ghə̀ kàynə̀ li a kəfwoyn kə Nyìngòŋ boʼsə nə̀ wìʼ a ghə̀ ŋwʉʼ tsu.”

²³Ngəʼ ghoʼo diʼ à ghə̀ŋ ndìʼsə̀sə təsoʼ bènə̀ viʼi Falàsi. Ghə̀ŋ viʼi kəmbɨ̀lə̀ kə ashɨ, ghə̀ŋ lyɨ̀ məfotə̀ mə lèmtəmə̀ a və we a tì fozhɨvə ghə̀ŋ gə̀tə̀ shi wum, ghə̀ŋ kù kəmùʼ à Nyìngòŋ ando soʼo Mosìs ndiʼ alì chasə nyʉ̀ tovə vi a və diʼ a soʼ a diʼ nə̀, ənè nyʉ̀ tɨməvə, nkusə nshinsə à viʼi be mbyɨmə̀ tò à Nyìngòŋ. Ghə̀ŋ kɨ la ghə̀ŋ diʼ nè nyʉ̀ venə no tsèm kènla ghə̀ŋ chasə tsenəvə.

²⁴Ghə̀ŋ viʼi kənshɨ̀f venə a və dìʼì jì a viʼi ghə̀ŋ kyèsə fənjìnjì fà ghə̀ŋ a tì məlyʉ̀ʼ alì bòŋsə̀ nyʉ fəmbwèʼè fo.

²⁵Ngəʼ ghoʼo diʼ à ghə̀ŋ ndìʼsə̀sə təsoʼ bènə̀ viʼi Falàsi. Ghə̀ŋ viʼi kəmbɨ̀lə̀ kə ashɨ venə! Ghə̀ŋ lyɨ̀ kaŋ vəŋə nə̀ ndoŋsə shəŋsə ghə̀ŋ tùʼù shʉ̀ tò dzemsə shisə alì tin shisə diʼ mu sə lwin li tò nə̀ kəmɨ̀ŋ kə fo a ghə̀ŋ ghaʼ nshi byìʼì kəmbàŋ mbàŋ.

²⁶Nshɨ̀fə viʼi Falàsi venə! Ghə̀ŋ ə nshʉ̀ tinsə kaŋ, bènə̀ tinsə ndoŋsə shəŋsə, ndi dzem shisə be lan.

²⁷Ngəʼ ghoʼo diʼ à ghə̀ŋ ndìʼsə̀sə təsoʼ bènə̀ viʼi Falàsi. Ghə̀ŋ viʼi kəmbɨ̀lə̀ kə ashɨ ghə̀ŋ diʼ to nə̀ təsè a zhʉ a və shɨtə̀ mbwom nzuʼ tə sə fəfə fəfə bòŋə̀ tò fa kəbəŋ alì adiʼ tò kwoŋ ə viʼi a yì a tin bènə̀ kənfwè.

²⁸A dìʼ tò ndə̀ŋndəŋ jì a ghə̀ŋ bòŋə̀ tò fa kə̀ʼ, alì diʼ fa tin mu ghə̀ŋ lwin li tò nə̀ kəmbɨ̀lə̀ kə ashɨ kə bènə̀ nyʉ̀ byɨvə tsenəvə.

²⁹Ngəʼ ghoʼo diʼ à ghə̀ŋ ndìʼsə̀sə təsoʼ bènə̀ viʼi Falàsi. Ghə̀ŋ viʼi kəmbɨ̀lə̀ kə ashɨ! Ghə̀ŋ bwomə təsè tə jùŋə tə à nshə̀ʼtə̀sə ghoʼkəsə bènə̀ à viʼi a və nlù sə tsi ntsìnə̀ jùŋ,

³⁰gàʼà la, “A tu ndiʼ la yès ndìʼ a tʉʼ vətìʼ vyesə mu yès nko boʼsə vəwenə la və zhwilə nshə̀ʼtə̀sə sə ghoʼkəsə a sènsə.

³¹Kə lì dìʼì la ghə̀ŋ byɨmə mbyɨ ghə̀ŋ nəmwèʼè ando ghə̀ŋ byɨmə li la ghə̀ŋ dìʼ ngwaʼa ngə̀ŋ viʼi vyi a və nzhwilə̀ nshə̀ʼtə̀sə sə ghoʼkəsə a shì.

³²Ghə̀ŋ dyʉ̀ li tò nə̀ mbì mwètə̀ shwèʼ yi a vətìʼ vəŋə nzìtə̀ lì.

³³Zhusə sə byɨsə sènsə ghə̀ŋ le lu nè no ghò la kə Nyìngòŋ lù soʼ ghə̀ŋ tɨ̀m ghə̀ŋ a kəshi kə zhìʼ byɨghə a?

³⁴Mà mù sə gàʼà à ghə̀ŋ la mà ne tɨm nshə̀ʼtə̀sə nə̀ viʼi və tofəvə bènə̀ ndìʼsə̀sə kɨ la ghə̀ŋ ne a zhwilə vətsenvə ə bantə vətsenvə a kəntò be ghom vətsenvə fà ghə̀ŋ a aloʼ ntsèntə̀sə, be ndzɨ̀mə̀ vətsenvə no fa ntə̀ʼ ko a vəwenə dyʉ̀ tsu.

³⁵Ma tɨm vəwenə ghə̀ŋ ne alə̀ ndi mənlyuŋ mə viʼi kənyʉ̀ kə tɨməkə vi no vətsèm a və nzhwilə̀ a nse lì mə faŋ à ghə̀ŋ a kətʉ əzìtə̀ fà Abèl a və nlù zhwi kènla ghə̀ byɨsə li kənyʉ̀ kə tsenkə kuʼ zaʼa à Zakaliya wàyn Balachà yì a ghə̀ŋ nlù zhwi a kəntìntìn kə kəshi a və dzàŋə̀ nə̀ kəshi kəŋwoʼəkə bènə̀ kəchiʼ kə kəku.

³⁶Mà gàʼà à ghə̀ŋ nəmwèʼè la ngəʼ yì a ghə̀ lu vì byìʼì nyʉ̀ byɨvə avenə no tsèm lu shiʼi tò a kətʉ viʼi kəlyɨŋ venə.”

³⁷Yesò ne gàʼà myètə̀ mù zìtə̀ sə sheʼkə̀ gàʼà la,“Wemey, ghə̀ŋ viʼi Jelusalèm a ghə̀ŋ nzhwilə̀ nshə̀ʼtə̀sə sə ghoʼkəsə bè tèmlə viʼi vyi a və ntɨmə̀ à ghə̀ŋ ə̀ zhwilə lə̀! A dìʼ à ghan à shə̀ʼ a ma mwòmsə̀ li əpfʉtə ghə̀ŋ ando mpfì mbvʉ lə mpfʉ̀tə vunə wen à wen a ti alì ghə̀ŋ nyɨŋ tò nyɨŋ a?

³⁸Luwèn lə̀ Nyìngòŋ a kyemə ntə̀ʼ ghə̀ŋ ə ghə̀ ne ndiʼ tò zɨm.

³⁹‘Mà gàʼà à ghə̀ŋ la əlù fa luwèn ghə̀ŋ ko be lu yen mo à bwen tò la kətsi kì kə vi a ghə̀ŋ lu gàʼ la mbwaʼmə̀ dìʼ à wèn yì a ghə̀ vì a zhiʼ Bobo.’”