Read Babanki Matìyò 24 Bible Online

Matìyò 24 - Babanki bible

Matìyò 24

¹Yesò fʉ̀ fa ngə̀ŋ ntsentə Nyìngòŋ sə ndyʉ̀, ndzɨ̀mtə̀sə bàm wen sə boʼsə vì nə̀ wen, ə̀ gàʼ a wen la, gaʼa kò ghə̀ yen li jì a və bwomə kəbəŋ kə Nyìngòŋ fa tsu lo.?

²Ghə̀ gàʼ à vəwenə la,“Ghə̀ŋ yenə kəbəŋ kènkə alə̀, mà gàʼà a ghə̀ŋ nəmwèʼè la zhʉ boʼsə vì, a və ne bèytə̀ aloʼ aghenə, kènla no ngùʼ muʼ ne faŋ a kətʉ ghətsen.”

³Yesò ne kuʼ dyʉ̀ ə̀ ŋwʉʼʉ a kwi pfen Olìf, ndzɨ̀mtə̀sə bàm wen sə vì ə̀ ŋwʉʼʉ à wen a mbyɨ̀ mù nyoʼtə gàʼ à wen la, “Shə̀ʼtə̀ à yes la nyʉ̀ venə lu lyɨ̀ kəshi a tʉʼʉ kò lo, kəchwitə kə lu ndiʼ ghò ədiʼ la wù sə bwènə̀ vì a? Və lu kɨ fa gho la mbi sə mè a?”

⁴Yesò gàʼ à vəwenə la,“Ghə̀ŋ tuʼmə la kə wìʼ lù lobtə ghə̀ŋ.

⁵Viʼi lu Mvì no və ghoʼo lyɨ̀ zhiʼ ghomə gàʼà la, à diʼ mò yì a və ntsuʼ li ə̀ ghʉ lì ə lobtə nghoʼo viʼi a ji a ghèn.”

⁶Ghə̀ŋ lu zhʉ ando və temə ghoŋ a mboʼsə be nzhʉ nyʉ̀ byìʼì təghoŋ a kəghaf. Ghə̀ŋ zhʉ a lì kə tətyɨm təŋtə a lɨ̀mə̀ byìʼàndo nyʉ̀ avenə dìʼi lyɨ̀ kəshi mibu mbi lù sə mè.

⁷Təloʼ tə lu nsoynə tətsentə, təfòyn tə soynə tətsen tə, nse lu nə̀ʼə̀ ə jɨŋ be ku tò shì tsèm.

⁸Nyʉ̀ avenə lu nlyɨ̀ kəshi alə̀ a bò bu tò kənzìtə̀ kə ngəʼ ghoʼo a ghə̀ lu vì.

⁹Viʼi lu ghaʼtə ghə̀ŋ ə ku la və ku ngəʼ à ghə̀ŋ, be zhwilə ghə̀ŋ. Viʼi təloʼ tətsèm lu bàyn ghə̀ŋ tò byìʼì mò.

¹⁰Nghoʼo viʼi ko be lu nchoʼsə̀ à Nyìngòŋ a zhʉ a ghèn; ə bàynə̀ vəlemə və vəwenə be baʼlə̀ vəwenə.

¹¹Nshə̀ʼtə̀sə kənlobtə lu tu fʉ̀ no sə ghoʼo ə lobtə nghoʼo viʼi.

¹²Nyʉ̀ byɨvə lu nlyɨ̀ kəshi tò a shi no ghoʼo əzaʼa a nsəʼ tsen a viʼi ko be lə ntùʼù kòŋə̀ vətsenvə.

¹³No ndò a ghə̀ sətsèn lù wensə nyʉ̀ avenə əzaʼa kəmwètə lu bwoŋ.

¹⁴Və lu shə̀ʼtə̀ ntɨm jùŋə byìʼì soʼ Fòyn Nyìngòŋ a mbi ghèn no tsèm ndi viʼi təloʼ no tətsèm kɨ nəmwèʼè fa yi a bàm zhʉ mu kwʉ̀ʼ ə mbi me.

¹⁵“Zhʉ a ghə̀ŋ a yen kəfo kə faynsə kì a kə fwàʼlə̀ a nshə̀ʼtə̀ Danye ngaʼà byìʼì kəwenkə, ti a kəshi kə laynə kə, (wìʼ a ghə̀ dzàŋə̀ diʼi kɨ).

¹⁶A zhʉ aghèn no məndò a Judiyà nyɨŋ kuʼ a pfensə.

¹⁷A zhʉ ayì, wìʼ ndiʼ tè a kətʉ kə ngə̀ŋ, kə ghə̀ bè a shiʼì əlyɨ̀ fo wen fa ngə̀ŋ.

¹⁸Wìʼ ndiʼ tè a sɨm, kə ghə̀ à bwènə̀ pfwo əlyɨ̀ ndisə wen fa ngə̀ŋ.

¹⁹Mətsi a mì lu mfàynsə̀ nəkwoŋ a ki və gufkəvə bènə̀ a ki a və lì vunə.

²⁰Ghə̀ŋ njɨ̀mə̀ la kə kə lu sə ndiʼ la ghə̀ŋ nyɨŋ a ndiʼ a kəntìntìn byɨ̀ŋ kò a kətsi kəzhʉtəkə,

²¹byìʼàndo tʉʼ ayi lu vì ngəʼ yi mfàynsə̀ chò ngəʼsə no sətsèm; kèn la wìʼ ntəmə yen fa tʉʼ a mbi nzìtə əzaʼa fa tʉʼ a ghə̀ lu mè.

²²Kə diʼ tò la Nyìngòŋ mfaftə̀ li mətsi mə ngəʼ a mèn a bwen alə̀ mu wìʼ ko zi ghə̀ lə̀ bwòŋ. Ghə̀ mfàftə mətsi a mì tò byìʼì viʼi wen vi a və ndiʼ mu ghə̀ tsuʼ li ə̀ ghʉ.”

²³A ne sə ndiʼ a mətsì a mì, wìʼ gàʼ à ghə̀ŋ la ghə̀ŋ yen Wìʼ yì a Nyìngòŋ ntsuʼ li ə̀ ghʉ lì a shə̀ a, ko ghə̀ŋ yenə wen a fàʼà a! ke ghə̀ŋ à byɨmə,

²⁴byìʼàndo viʼi vi a Nyìngòŋ ntsuʼ li ə̀ ghʉ və kənlobtə nə̀ nshə̀ʼtə̀sə kənlobtə lu fʉ̀ a tʉʼ ayì, ə nè chwitə fàynsə və be mwòmə̀ nyʉ̀ kaynəvə mwòmsə tò la vəwenə lè zì və lobtə viʼi vi a Nyìngòŋ sə diʼ mu ghə̀ tsuʼ li əbwòŋsə̀ lì lo.

²⁵Ghə̀ŋ tùʼù zhʉtə! mà chò li mbì nshə̀ʼtə̀ nyʉ̀ avenə a ghə̀ŋ mibu və lu sə mfʉ̀.

²⁶A lù sətsèn a gàʼ tè ndò à ghə̀ŋ la, “Ghə̀ yi a nse zɨm, kə wìʼ à fʉ̀ ədyʉ̀ tsu, ko wìʼ gàʼ la, ‘Ghə̀ ghèn a tì ngə̀ŋ a shə̀ kə wìʼ a byɨmə.’

²⁷Wàyn Wìʼ lu vì tò a ndayn ando ghʉ nə̀ mwànə̀ ghə̀ bàŋə a kàŋ no tsèm.”

²⁸Wàyn Wìʼ lu sə mvì, no ndò kɨ ndə̀ŋndəŋ ando kəfo kə pfʉkə nə̀ ndiʼ tè fe, ŋoŋo kɨ ə̀ pfʉ̀tə tsu.

²⁹Ngəʼ mətsi ayì lu sə ə mè dyʉ̀, chʉzhʉ lu fen vì kènla sàŋ be a mbanə, mədzɨ̀ŋ mfəŋkə fa kàŋ. No fo tsèm a kàŋ nə̀ʼkə̀.

³⁰Fa yi a bàm, chwitə məvì Wàyn Wìʼ fʉ a kàŋ. Viʼi təloʼ tə mbi no tətsèm nlyuŋlyuŋ dì. A zhʉ aghèn vəwenə mu yèn Wàyn Wìʼ shiʼi vì a tì mboʼsə kiʼ kədyòʼ nə̀ baynə ghoʼoghə.

³¹Və lu toŋə soŋ no nəmwèʼè-mwèʼè, ghə̀ mu tɨmə ntsɨŋsə wen a təshə tə mbi ghèn tə kàʼ, vəwenə pfʉtə viʼi vi a Nyìngòŋ tsuʼ li ə bwòŋsə̀ no vətsèm.

³²“Ghə̀ŋ ziʼi kənyʉ̀ fa fəkòʼ fə kəbvèm. Ghə̀ŋ nyenə no a zhʉ̀ kò a fə sə zhʉ̀ vì, ghə̀ŋ kɨ̀ la byɨ̀ŋ sə boʼsə chʉ̀.

³³Kə diʼ tò ndə̀ŋndəŋ ando ghə̀ŋ sətsèn yènə nyʉ̀ venə no ntsèm və mfʉ̀, ghə̀ŋ kɨ̀ la zhʉ məvì Wàyn Wìʼ boʼsə li.

³⁴Ma gàʼà à ghə̀ŋ nəmwèʼè la viʼi mbyi venə luwèn zì kò və lu pfʉkə mè kènla nyʉ̀ avenə lyɨ̀ li kəshi no tsèm.

³⁵Kàŋ wenə̀ nse lu chò alì kènla no kənyʉ̀ kə mùʼ fa tì nyʉ̀ venə a ma gàʼà lə̀ lu kwitə.”

³⁶No wìʼ muʼ ko kɨ̀ kətsi ko zhʉ a nyʉ̀ avenə lu fʉ̀, no tè ntsɨ̀ŋsə ngə̀ŋ Nyìngòŋ a kàŋ ko kɨ kò andìʼ la wàyn kɨ li, əchò tò Tìʼ.

³⁷Wàyn Wìʼ lu sə mvì, nyʉ̀ mfʉ̀ ando və mfʉ̀ a tʉʼʉ Nuwà.

³⁸A ndiʼ a mətsi mibu kənkuŋ kə nsə vì a mbi, viʼi nzhɨ, nyʉ, lamə be ku vunə a və lɨmə, əkuʼ zaʼa a kətsi a Nuwà nkwen a kəbaŋ.

³⁹Vəwenə ənè a lì kènla vəwenə kɨ kənyʉ̀ kì a kə diʼ ne fʉ̀ əzaʼa fa kətsi yì a kənkuŋ kə nkì vì ə̀ zhwi vəwenə no vətsèm. A lu ndiʼ a tʉʼ a Wàyn Wìʼ vì, nyʉ̀ be nlyɨ̀ kəshi tò ndə̀ŋndəŋ.

⁴⁰A lu ndiʼ a tʉʼ ayì, lʉmə nshyèʼè a sɨm vəbò, və vi ə̀ lyɨ̀ ghə̀ muʼ ə̀ mòʼtə̀ ghə̀ muʼ.

⁴¹Ki lu mbvù kəbayn a ti vəbò, və vi ə̀ lyɨ̀ ghə̀ muʼ ə̀ mòʼtə̀ ghə̀ tsen.

⁴²Ando kə diʼì a lì, ghə̀ŋ ŋwʉʼ bvʉ̀tə̀ byìʼàndo ghə̀ŋ ko kɨ̀ kətsi kì a Bobo ghə̀ŋ ə lu vì.

⁴³A tu ndiʼ la tì ngə̀ŋ kɨ zhʉ a tsòŋ diʼi vì a wen a ngə̀ŋ, mu ghə̀ ko zì ghə̀ mbʉnə̀, ghə̀ a ŋwʉʼʉ ə mbvʉ̀tə̀ kò ghə̀ à ghʉsə la və kwaʼ ngə̀ŋ wen.

⁴⁴Kə lì diʼ la nkàyntə̀ ghə̀ŋ diʼi ŋwʉʼ bvʉ̀tə̀ byìʼàndo Wàyn Wìʼ ne vì a zhʉ a ghə̀ŋ ko kwòʼtə̀ la ghə̀ zì ghə̀ vi.

⁴⁵Yesò bè mù bèm la, “Wù shyèʼ yì a ghə̀ zhʉ ti shyèʼ wen be tofə li diʼ ghə̀ ko lo? A diʼi yì a ti shyèʼ wen bʉʼsə ndyʉ̀ a jèʼ ghə̀ ghʉ wen a mbì be kù kədyòʼ a wen la ghə̀ ə ntùʼmə̀ nə̀ ngə̀ŋ wen be ku fozhɨvə a viʼi shyèʼ vətsenvə vi a zhʉ a vəwenə kəŋə.

⁴⁶Nyʉ̀ nə̀ bòŋə̀ à wù shyèʼ ayì a zhʉ a tì shyèʼ wen sə bwènə̀ pfwo ə̀ yènə wen ghə̀ nè nyʉ̀ a vyi a ghə̀ yì gàʼ.

⁴⁷Mà gàʼà a ghə̀ŋ nəmwèʼè la, kə yì diʼ a lì tì shyèʼ ayì à ghʉ wen la ghə̀ ntùʼmə̀ nə̀ fo wen no tsèm.

⁴⁸Mu wù shyèʼ ayì sətsèn ndiʼ ghə̀ byɨ, ghə̀ à kwòʼtə̀ tò fa wen ngə̀ŋ la tì shyèʼ ko a zàŋsə pfwo,

⁴⁹mù zìtə̀ nyàblə̀ nə̀ viʼi shyèʼ vətsenvə vi tò nyàblə̀, zhɨ be nyʉ məlyʉ̀ʼ wenə̀ viʼi məlyʉ̀ʼʉ.

⁵⁰Tì shyèʼ wen nè bwènə̀ vì a kətsi kətsenkə a zhʉ a ghə̀ ko yì nkwòʼtə̀ la ghə̀ zì ghə̀ bwènə̀ vì,

⁵¹ə̀ lyomsə wen no a ji byɨ ə̀ we wen a nòyn viʼi vyi a və bɨ̀lə̀ ashɨ viʼi nə̀ nè nyʉ̀, wenə̀ vəwenə nlyuŋlyuŋ dì be pfiʼi asoŋ.”