Read Babanki Matìyò 25 Bible Online

Matìyò 25 - Babanki bible

Matìyò 25

¹Yesò bè mò ngàyn ə tsen gàʼà la, “Wàyn Wìʼ lu sə mbwènə̀ vì, soʼo Fòyn Nyìngòŋ ndiʼ tò nə̀ fətitì fə ngòynsə ki sətsensə ə̀ wum, a sə nlù dyʉ̀ sə kə̀ʼtə̀ wùlɨm lam a ghə̀ ndiʼi vì. Vəwenə sə ndyʉ̀ no ndò lyɨ̀ kənkàʼtə̀ kəwen.

²Vəwenə vətsenvə vətàyn ə̀ ntofə, vətàyn ə dzɨ̀ŋtə̀.

³Və dzɨ̀ŋtəvə vi sə nlyɨ̀ nkàʼtə̀ vəwenə kò vəwenə lə̀ lyɨ̀ mənzhiʼ məghoʼtə,

⁴və tofəvə vi lyɨ̀ vəsùʼ wè mənzhiʼ tsu əbwètə.

⁵Lɨm wùwì ayì tàŋ a məvì, ngòynsə ki shì zìtə̀ sə myə̀ʼə̀ nə̀ mbəynsə.

⁶Ghə̀ nè sə mvì mu à sə̀ diʼ ntìntìn nəntʉʼʉ, və mù sə dzàŋə gàʼà la, Lɨm wùwì sə vì, ghə̀ŋ vi shìsə wen!

⁷Ngòynsə ki shì lù no sətsèm kùʼsə nkàʼtə̀ vəwenə.

⁸Ngòynsə ki sə dzɨŋtə sə shì mù gàʼ à vətofəvə vi la, Ghə̀ŋ ku yes fà ghə̀ŋ mənzhiʼ yì byìʼè nkàʼtə̀ vyesə sə lɨmə̀ dyʉ̀.

⁹Vətofəvə vi tensə ə̀ gàʼ la, Jòʼ! mənzhiʼ a mì ko a kwʉ̀ʼ à vəghəŋ və tsèm, ghə̀ŋ boŋsə dyʉ̀ a kəshi kə baʼlə̀ fo ə̀ zèn ə̀ məŋə fa tsu.

¹⁰Vəwenə sə ndyʉ̀, lɨm wùwì ayì vì wenə viʼi a və ndiʼì dyʉ̀ kwèn a ngə̀ŋ yì a və ndiʼi ne zhɨ lam tsu və chiʼ chʉ ngə̀ŋ.

¹¹Ngòynsə ki sətsèn shìsə nè dyʉ̀ zèn mənzhiʼ mì bwènə̀ vì mù sə̀ dzàŋə̀ gàʼà la, ‘Bobo, Bobo, bòʼò chʉ ngə̀ŋ à yès.’

¹²Lɨm wùwì yì bwènsə̀ gàʼ la, Mà gàʼà à ghə̀ŋ nəmwèʼè la, mà ko kɨ̀ ghə̀ŋ.

¹³Yesò gàʼ a lì mù gàʼ la, Ghə̀ŋ sə ŋwʉʼ lì, ghə̀ŋ ntsi kə̀ʼə̀ byìʼàndo ghə̀ŋ ko kɨ̀ kətsi ko zhʉ yi a Wàyn Wìʼ lu bwènə̀ vì.”

¹⁴Yesò bè mò ngàyn tsen gàʼà la, “Soʼo fòyn Nyìngòŋ lu ndiʼ to nə̀ fətitì fə wutsen a ghə̀ nlù sə ndyʉ̀ a jèʼ ə̀ dzàŋtə̀ viʼi shwèʼ wen kù fo wen ə̀ la vəwenə zhʉsə ntùʼmə̀ nə̀ wenəvə.

¹⁵Ghə̀ nku mbo ko ətàyn à wìʼ muʼ, kù mbo bò à kənkùmtə̀ bè kù kəmbò kə ko kə mùʼ à wutsen, Ghə̀ nkù a no mə ndò tò a ji a ghə̀ nyenə la ghə̀ zì ghə̀ tuʼmə nə̀ wen ghə̀. Ghə̀ ku a lì mù lù dyʉ̀ a jèʼ.

¹⁶No a zhʉ kò, wù shwèʼ yì a ghə̀ nku mbo ko tàyn à wen lì dyʉ̀ sə̀ nè mbaʼlə̀ ə̀ se mbo ko tàyn.

¹⁷Yì a və nku mbo ko bò à wen lì shwèʼ nə̀ wenə ghə̀ ə̀ se mbo ko bò à yì a kətʉ.

¹⁸Wù shwèʼ yì a və nku kəmbò kə ko à wen lì dyʉ̀ tyùŋə nkwòŋ lyòmtə̀ kəmbò kə ko tì shwèʼ wen kì tsu.”

¹⁹Tì shwèʼ ayì tsi no alə̀, lù bwènə̀ pfwo dzàŋtə̀ vəwenə ndi zhʉ la vəwenə tə zhʉsə shwèʼ nə̀ ko wen yi ale lo.

²⁰Wìʼ yì a və nku mbo ko tàyn a wen, ando ghə̀ mvì ə bwènsə̀, ghə̀ boʼsə mbò ko tàyn vi a ghə̀ nse a kətʉ kə ko ayì ə̀ gàʼ la, Tìʼ, yen a! wù tə ku mbo ko tàyn à mò mà be nse mbo ko tàyn à yì a kətʉ.

²¹Tì shwèʼ wen ayì gàʼ à wen la, Wù ne li no a nkàyn. Wù dìʼ no wù shwè jùŋə be tùʼmə̀ no a nkàyn. Wù tuʼmə̀ li nə̀ kəfo kətyətəkə, luwen ma ghʉ wù ə wu ntùʼmə̀ nə̀ fo ghoʼvə kwen vì yowù nsaŋlə̀ a muʼu!

²²Wù shwèʼè yì a və nku mbo ko bò à wen lì bè vì gàʼ la, Wù tə ku mbo ko bò à mò, yen a mà kiʼi li se à yì a kətʉ mbo ko bò.

²³Tì shwèʼ wen ayì gàʼ à wen la, Wù ne li no a nkàyn. Wù dìʼ no wù shwèʼ jùŋə be tùʼmə̀ no a nkàyn. Wù tuʼmə̀ li no nkàyn nə̀ kəfo kətyətəkə. Luwen ma ghʉ wù, wu ntùʼmə̀ nə̀ fo ghoʼvə kwen vì yowù nsaŋlə̀ a muʼu.

²⁴“Wìʼ yì a və nku kəmbò kə ko à wen lì vì gàʼ la, ‘Tì, mà kɨ la wù dìʼ alə̀ fànsə̀. Wù kɨ əzhɨ kènla wù tə shwèʼ be kɨ əkəŋ fo kò andiʼ la wù tə we.’

²⁵A diʼ kənyʉ̀ a kə tə nè mà fàyn wù ə̀ lyɨ̀ kəmbò kə ko wù kì ə tyùŋə kəshi lyòmtə tsu. Bwènsə̀ ghàʼa ko wu.”

²⁶Tì shwèʼ wen yì gàʼ la, Wù dìʼ wù shwèʼ byɨ be diʼ no zhɨ kədyàŋ! Wù tə kɨ no a nkàyn la mà zhɨ kèn la mà ko shwèʼ be kəŋə fo fa kəshi a mà ko we,

²⁷a tə ne ghò la kə wù ghʉ ko ghomə ghenə a ngə̀ŋ ko ndi mà nə̀ sə nlyɨ̀, lyɨ̀ boʼsə wenə̀ se yì a?

²⁸Ghə̀ gàʼ alə̀ mù gàʼ à viʼi shwèʼ wen vətsenvə vi la, Ghə̀ŋ shi kəmbò kə ko kì fà wen ku kwʉ̀ʼsə̀ à wìʼ yì a ghə̀ kiʼ mbo ko wum lì.

²⁹Ghə̀ŋ kɨ la no ndò a ghə̀ kiʼì kəfo və a ku kwʉ̀ʼsə̀ à wen ndi ghə̀ ntùʼtə̀ kiʼ alì no ndò a ghə̀ ko kiʼ kəfo və a shì tè kətyetə kì a ghə̀ kiʼì lì.

³⁰Ghə̀ŋ shisə wù shwèʼ byɨ ghèn, tem a kəbəŋ kə fenəkə, a kəshi a ghə̀ a nlyuŋlyuŋ dì tsu be pfiʼi asoŋ wen.

³¹“A lu ndiʼ a tʉʼ a Wàyn Wìʼ vì nə̀ ghoʼo fòyn wen wenə̀ ntɨŋsə ngə̀ŋ Nyìngòŋ no sətsèm ghə̀ lu ŋwʉʼʉ à wen a kəfwoyn nə̀ adɨŋə ghoʼ ghə̀ wen.

³²Viʼi təloʼ tə mbi vi tsèntə̀ à wen a shɨ no vətsèm, ghə̀ gə̀sə̀ vəwenə a tənòyn təbò ando ntsɨ̀ŋ byisə lə nè ghə̀ gə̀sə̀ byisə vənjɨ̀ fa byisə vəndoŋ.

³³Ghə̀ lu ghʉ viʼi vəjùŋvə à wen a shyə kwoŋ toghə ə ghʉ viʼi nyʉ̀ byɨvə à wen a shyə kwoŋ nànkwè.

³⁴A dìʼ a zhʉ a yì a fòyn a gàʼ à viʼi kənyʉ̀ kə tɨmə kə vi a və ti à wen a shyə kwoŋ toghə la, ‘Ghə̀ŋ venə a Tìʼ ghomə bwaʼsə li lə̀, ghə̀ŋ kwen vì ə̀ nzhɨ njùŋ yì a ghə̀ nshɨtə li ghʉ̀ a ghə̀ŋ fa kənzìtə̀ kə mbi,

³⁵byìʼàndo jɨ̀ŋ nzafə mò ghə̀ŋ ku fo zhɨvə à mò, toŋ à mù nzhɨmə mò ghə̀ŋ ku mu mà nyʉ. Mà ndìʼ wu fi a kəshi ghə̀ŋ shisə mo à ghə̀ŋ a aloʼ,

³⁶ndìʼ kənàʼ kə à ntsuʼ, ghə̀ŋ ku ndisə mà mòʼ. Mà nkwaʼa ghə̀ŋ tùʼmə̀ nə̀ mò və shwin mò a mfɨŋ ghə̀ŋ vì ghayntə mò.’

³⁷A diʼ a zhʉ a yì a viʼi kənyʉ̀ kətɨməkə vi nè mbèmə̀ la, ‘Bobo, yès nyèn wù fe jɨ̀ŋ zafə wù yès kù fozhɨvə la wù zhɨ a, be yèn wù fe toŋ à mù zɨmə wù yès ku mu la wù nyʉ a?’

³⁸Wù ndìʼ wu fi fe yès shisə wù à yès a aloʼ a, ko sə diʼ nə̀ kənàʼ ntsuʼ fe yès ku ndisə la wù moʼ a?

³⁹Wù nkwaʼa fe yès vì sə tùʼmə̀ nə̀ wù a ko wù ndìʼ a ngə̀ŋ mfɨŋ fe yès vì ghayntə wù a?

⁴⁰Fòn mu gàʼ la, ‘Mà gàʼà à ghə̀ŋ nəmwèʼè la no ghò a ghə̀ŋ nè a wù muʼ a ghə̀ ndìʼi əbam a ntìntìn vəlèmə̀ vwomə venə dìʼ mu ghə̀ŋ nè à mò.’”

⁴¹“Fòyn ne gàʼ a lì mu gàʼ à viʼi nyʉ̀ byɨvə vi à wen a kwoŋ nànkwè la, ‘Ghə̀ŋ lukə fà mo a mbyɨ̀, ghə̀ŋ venə a Nyìngòŋ moʼò li kòyn à ghə̀ŋ lə̀. Ghə̀ŋ dyʉ̀ kwen a zhìʼ yì a ghə̀ ko lə lɨmə lì a və nshɨ̀tə̀ à Satan wenə̀ ntsɨ̀ŋsə wen.

⁴²A ndìʼ a zhʉ a jɨ̀ŋ nzafə mò ghə̀ŋ tyen la ghə̀ŋ ko a ku kəfo mà zhɨ, toŋ à mù zɨmə mò ghə̀ŋ tyen la ghə̀ŋ ko ku mu mà nyʉ.

⁴³Mà ə̀ ndìʼ wu fi alì ghə̀ŋ tyen la ghə̀ŋ ko shisə mo à ghə̀ŋ a aloʼ, diʼ kənàʼ ntsuʼ ghə̀ŋ tyen la ghə̀ŋ ko a ku ndisə mà moʼ. Mà nkwaʼa, ghə̀ŋ tyen la ghə̀ŋ ko tùʼmə̀ nə̀ mò, və shwinə̀ mò a mfɨŋ ghə̀ŋ tyen la ghə̀ŋ ko vi əghayntə mo.’”

⁴⁴Viʼi nyʉ̀ byɨvə a vyi mu mbèmə̀ a zhʉ ayì la, Bobo, yès nyèn wù fe jɨ̀ŋ zafə wù, toŋ à mù zɨmə wù, wù diʼ wu fi, diʼ nə̀ kənàʼ ntsuʼ, kwaʼà, diʼ a ngə̀ŋ mfɨŋ, kènla yès gyamtə li wù a?

⁴⁵Fòn mu gàʼ à vəwenə la, Mà gàʼà à ghə̀ŋ nəmwèʼè la no ghò a ghə̀ŋ ntyenə ənè a wìʼ muʼ a ghə̀ ndiʼ a bàm fa ntìntìn vəlèmə̀ vwomə venə dìʼ mu ghə̀ŋ ntyen la ghə̀ŋ ko a nè à mò.

⁴⁶Fòn ne gàʼ a lì mu tɨm vəwenə, vəwenə lu dyʉ̀ kwen a tì ngəʼ yì a ghə̀ ko lə mè, viʼi kənyʉ̀ kətɨməkə vi kiʼi bwòŋ yi a ghə̀ faŋə̀ tò ghayn mùʼ.