Read Babanki Matìyò 26 Bible Online

Matìyò 26 - Babanki bible

Matìyò 26

¹Andìʼ a zhʉ a Yesò nziʼi li nyʉ̀ venə no tsèm, ghə̀ gàʼ à ndzɨ̀mtə̀sə bàm wen la,

²“Ghə̀ŋ kɨ la à fàŋ tò mətsì mbò luwèn və zìtə̀ əzhɨ kətsi kə məzaʼsə̀. A dìʼ zhʉ a və ne ghaʼ Wàyn Wìʼ ku və bantə wen a kəntò.”

³Tò a zhʉ ayì tʉtʉ vəpfèm və ngə̀ŋ Nyìngòŋ bènə̀ vəchəʼ və loʼ ghaʼ ntsèntə̀ vəwenə a kəbəŋ ə̀ kətʉ kə tʉtʉ vəpfèm və ngə̀ŋ Nyìngòŋ a və ndzàŋə̀ wen nə̀ Kayifàs,

⁴ndi shɨ̀tə ji nyoʼtə ghaʼ Yesò əzhwi.

⁵Vəwenə gàʼ à vəwenə a ntìntìn la,“Kə vəghəŋ à ghaʼ wen a məzaʼsə̀ ghèn byìʼì ko viʼi à lùsə soyn.”

⁶Yesò dyʉ̀ a Betanì sə diʼ a ngə̀ŋ wìʼ tsen a ghə̀ nkwaʼa nə̀ kənsòtə̀ kə a zhiʼ wen ə̀ ndìʼ Simon.

⁷Wùwì tsen vì kwen tsu nə̀ fəshoʼ fə a və nshɨ̀tə̀ nə̀ ngùʼ tsen a və ndzàŋə̀ nə̀ alàbàstà. Mənzhiʼ mə lèmtə mə̀ diʼ tsu a ko yi nto no nànto. Ghə̀ lyɨ̀ fəshoʼ a fì ə̀ shʉ̀ʼtə̀ a kətʉ Yesò ghə̀ ŋwʉʼ zhɨ zhɨ.

⁸Ndzɨ̀mtə̀sə bàm Yesò sə yen a lì kənyʉ̀ ki kə zafə vəwenə, vəwenə mù bèm la, byìʼì ghò a ghə̀ byɨsə mənzhiʼ mèn mə alə a?

⁹Və yì zì və baʼlə mənzhiʼ menmə no a ko ghoʼ ghə̀ ə̀ ku ko yi à viʼi kənfem.

¹⁰Yesò kɨ kənyʉ̀ a vəwenə nkwòʼtə̀ mù gàʼ à vəwenə la, “Ghə̀ŋ ku ngəʼ ghò à wùwì ghèn a?” A dìʼ no kənyʉ̀ kə jùŋkə a ghə̀ ne à mò.

¹¹Viʼi kənfem lu ndiʼ tò diʼi à ghə̀ŋ a ntìntìn alì mà ko diʼ ne faŋ vəghəŋ.

¹²Ghə̀ shʉ̀ʼtə̀ mənzhiʼ mèn à mò wèn ndi shɨ̀tə mo a məbvɨ̀mə̀.

¹³Mà gàʼà à ghə̀ŋ nəmwèʼè la no fe a və lu nshə̀ʼtə̀ ntɨm jùŋ a ti mbi, və lu be nshə̀ʼtə̀ kənyʉ̀ kèn a wùwì ghèn ne lə̀ ndi viʼi nkwòʼtə̀ wen.

¹⁴Wìʼ muʼ fa ntìntìn ndzɨ̀mtə̀sə bàm Yesò shì njʉ̀sə̀ bò a və ndzàŋə̀ nə̀ Judàs Iskalìyòt lù dyʉ̀ yèn tʉtʉ vəpfèm və ngə̀ŋ Nyìngòŋ,

¹⁵ə̀ bèm à vəwenə la, “Mà lè sətsèn gyàmtə̀ ghə̀ŋ əkù Yesò à ghə̀ŋ, ghə̀ŋ à kù gho à mò a?” Vəwenə taŋtə ko kəkas məwum ntaʼ ə̀ kù à wen.

¹⁶Judàs mù zìtə̀ tò a zhʉ ayì sə kəŋə jisə əbaʼlə Yesò.

¹⁷A sə ndiʼ a mbì kətsi a mətsi yì a və ndiʼ zhɨ kəbayn kə məka kè nə̀ fəshɨŋfə tsu ndzɨ̀mtə̀sə bàm Yesò sə vì bèm à wen la, “Wù kəŋ la yès dyʉ̀ shɨ̀tə̀ fozhɨvə kəzhɨ kə məzaʼsə̀ fe à wù a?”

¹⁸Ghə̀ bwènsə̀ à vəwenə la, “Ghə̀ŋ kwen dyʉ̀ a tì ntə̀ʼ à wutsen ə̀ gàʼ à wen la, ‘Ndìʼsə̀ gàʼ la zhʉ yi kwʉʼʉ li, ə wenə ndzɨ̀mtə̀sə bàm yì sə a zhɨ kətsi kə məzaʼsə̀ kèn à wù a ngə̀ŋ.’”

¹⁹Ndzɨ̀mtə̀sə bàm Yesò shìsə nè ando ghə̀ ngàʼà, kwen dyʉ̀ a tì ntə̀ʼ ə̀ shɨ̀tə̀ fozhɨvə məzaʼsə̀ vi tsu.

²⁰A sə ndiʼ a kəlyɨŋ kə mpfwomə, Yesò wenə̀ ndzɨ̀mtə̀sə bàm wen shì njʉ̀sə̀ bò ŋwʉʼʉ əzhɨ,

²¹Və sə nzhɨ ghə̀ gàʼ à vəwenə la, “Mà gàʼà à ghə̀ŋ nəmwèʼè la wìʼ muʼ fà ghə̀ŋ a ntìntìn diʼi ne baʼlə mo.”

²²Kənyʉ̀ akì sə ku ngəʼ à ndzɨ̀mtə̀sə bàm wen no nànto vəwenə mù zìtə̀ sə bèmə̀ à wen tò mùʼ mùʼ la, “Bobo, à bè diʼ mo?”

²³Ghə̀ gàʼ la, “A dìʼ wìʼ yì a kəvu kə yo wen kə bumtə li a kəkaŋ a ghə̀ a baʼlə mo.

²⁴Wàyn wìʼ ne pfʉ ando və ə̀ nyòʼò li a ŋwàʼlə̀ Nyìngòŋ. Alì ngəʼ ghoʼo ne ndiʼ à wìʼ yì a ghə̀ baʼlə wen! kə mbòŋsə̀ ə̀ nzì kə mbòŋtə̀ a zhʉ a və nko bwì wìʼ ayì no nə̀ mpfen.”

²⁵Tè Judàs yì a ghə̀ ndiʼi ne baʼlə wen bè gàʼ la, “Ndìʼsə̀, à dìʼ mo mu?” Yesò bwènsə̀ la, “Kə diʼ ando wu gaʼà.”

²⁶Vəwenə sə mbu zhɨ Yesò lyɨ̀ kəbayn kə məka ə̀ kù kəzòŋ à Nyìngòŋ mù bwəʼ ə̀ kù à ndzɨ̀mtə̀sə bàm wen gàʼà la, “Ghə̀ŋ ghaʼ ə̀ zhɨ. Ghenə diʼ wen ə ghomə.”

²⁷Ghə̀ bè lyɨ̀ ndoŋ məlyʉ̀ʼ ə̀ kù kəzòŋ a Nyìngòŋ mù gàʼ la, “Ghə̀ŋ ghaʼ ə̀ nyʉ̀ no ghə̀ŋ vətsèm.

²⁸A dìʼ mənlyuŋ mwomə̀ a mə chiʼtə̀ məkàyn mə Nyìngòŋ a ma shʉ̀ʼ ndi Nyìngòŋ maʼa mbyɨsə viʼi.

²⁹Mà gàʼà à ghə̀ŋ la mà ko lu be nyʉ məlyʉ̀ʼ mèn əzaʼa fa tʉʼ a mà lu nyʉ məlyʉ̀ʼ məmfimə̀ vəghəŋ a kəshi kə fòyn Tìʼ ghom.”

³⁰Vəwenə zhɨ mwètə̀ zhɨmə ndzàŋ mù fʉ̀ kùʼ a kwi pfèn Olìf.

³¹Yesò mù gàʼ à ndzɨ̀mtə̀sə bàm wen la, “A ne ndiʼ nəntʉʼʉ lan no ghə̀ŋ vətsèm nyɨŋkə ə̀ kyè mo ando və diʼ mu və ə̀ nyòʼò li a tì ŋwàʼlə̀ Nyìngòŋ la, ‘Mà ne zhwi ntsɨ̀ŋ byisə ə byisə saykə.’

³²A ne ndiʼ a zhʉ a və lusə̀ mo fa pfʉ mà dyʉ̀ a Galìlì à ghə̀ŋ a mbì.”

³³Bità gàʼ la, “Və ne sə nyɨŋ wù no vətsèm kò ma lə̀ nyɨŋə fa tsu.”

³⁴Yesò bwènsə̀ gàʼ à wen la “nkə̀ʼ ne sə toŋ nəntʉʼʉ lan mu wù tyen li mò aghayn à taʼ.”

³⁵Bità bè gàʼ à wen la, “A dìʼ tè pfʉ mà à pfʉ yowù. Ma ko lə mo wù.” Ndzɨ̀mtə̀sə bàm wen no sətsèm sə bè gàʼ tò ndə̀ŋndəŋ.

³⁶Yesò mù lù wenə̀ ndzɨ̀mtə̀sə bàm wen ə̀ dyʉ̀ zaʼa a kəshi kətsenkə a və ndzàŋə̀ nə̀ Gethsèmane a wenə pfen olìf ə̀ gàʼ à vəwenə tsu la, “Ghə̀ŋ ŋwʉʼʉ a shèn mà dyʉ̀ jɨ̀m a fàʼà.”

³⁷Ghə̀ gàʼ a lì sə ndyʉ̀ lyɨ̀ Bità wenə̀ vunə Zebedì vəbò; nyʉ zìtə̀ sə ku ngəʼ à wen, ghə̀ be zìtə̀ sə kwòʼtə̀ no nànto.

³⁸Ghə̀ mù gàʼà vəwenə la, “Nyʉ̀ tsenəvə ku ngəʼ à mò à kwòʼtə̀ no nànto mu və zì və zhwi mo. Ghə̀ŋ ŋwʉʼʉ to a shèn mbvʉ̀tə̀ mà vi.”

³⁹Ghə̀ kwentə dyʉ̀tə̀ a mbì nyòŋmə̀ dyʉ̀ a nse apfʉ̀ʼapfʉʼ mù sə̀ jɨ̀mə̀ gàʼà la, “Tìʼ ghom, jì sətsèn ndiʼ wu shi ndoŋ ngəʼ ghèn fà mò alì ne tò kənyʉ̀ a kə kwʉʼʉ̀ à wù kə a nè kənyʉ̀ a kòŋə̀ mò.”

⁴⁰Ghə̀ nè jɨ̀m mwètə̀ sə bwènə̀ vì ə̀ yèn mu ndzɨ̀mtə̀sə bàm wen shì sətaʼ sə beynkə li. Ghə̀ bèm à Bità la,“Ghə̀ŋ yì zì kò ghə̀ŋ lù bvʉ̀tə̀ vəghəŋ tò a fəshitə̀ fə zhʉ?

⁴¹Ghə̀ŋ ntsi kə̀ʼə̀ be jɨ̀mə̀ ndi la kə mwòmsə̀ à vì à ghə̀ŋ. Mà kɨ la tətyɨm təŋtə kòŋə̀ ənè kənyʉ̀ a mà gàʼà alì təwen təŋtə bwaʼa.”

⁴²Yesò bè bwènə̀ dyʉ̀ sə̀ jɨ̀mə̀ gàʼà la,“Tìʼ ghom a zhʉ a wù ko a shi ndoŋ ngəʼ ghèn fà mò chò la mà nyʉ, wu ə ne ando wù kòŋə̀.”

⁴³Ghə̀ jɨ̀m mè bè sə bwènə̀ vì bè yèn vəwenə və bu bʉnə̀ tò bʉ̀nə byìʼàndo mbəynsə nsù dìʼ à vəwenə a ashɨ.

⁴⁴Yesò bè bwènə̀ dyʉ̀ əjɨ̀m à ndiʼ aghayn à taʼ gàʼà tò nyʉ̀ vyi a ghə̀ yi ngàʼà a mbì.

⁴⁵Ghə̀ nè jɨ̀m mwètə̀ bwènə̀ dyʉ̀ bèm à vəwenə la, “Ghə̀ŋ bù bʉnə̀ tò bʉnə zhʉ̀tə̀. Ghə̀ŋ yen a, zhʉ kwʉʼʉ̀ li və sə kəŋə ku Wàyn Wìʼ à viʼi və byɨvə.

⁴⁶Ghə̀ŋ lu vəghəŋ ndyʉ̀. Ghə̀ŋ yen a, wìʼ yì a ghə̀ baʼlə̀ mò sə vì.”

⁴⁷Yesò mbu gàʼà, Judàs a ndiʼì wìʼ muʼ fa ntìntìn ndzɨ̀mtə̀sə bàm wen shì njʉ̀sə̀ səbò kuʼu vì wenə̀ nòyn ə viʼi no ghoʼo. Vəwenə nkiʼ nyisə nə̀ mbàŋsə. A ntɨ̀m tʉtʉ vəpfèm və ngə̀ŋ Nyìngòŋ bènə̀ vəchəʼ və loʼ tɨ̀m vəwenə.

⁴⁸Vəwenə nsə mvì a lì mu wìʼ a ghə̀ mbaʼlə̀ Yesò ku li nchwi à vəwenə gàʼà la, “Mà nè bwamtə no ndò ghə̀ŋ kɨ̀ la àdìʼ wìʼ yì a ghə̀ŋ kəŋə, ghə̀ŋ ghaʼ wen.”

⁴⁹Judàs ne vì no a zhʉ kò ə̀ dyʉ̀ tò fəchìʼ à Yesò gàʼà la, “Mà toŋtə̀ a ndìʼsə̀.” No a zhʉ kò ə̀ bwamtə wen tò bwamtə.

⁵⁰Yesò bwènsə̀ gàʼ à wen la, “Ne tò kənyʉ̀ kì a wù yì vì ənè a awèn ndòŋ.” No a zhʉ kò viʼi a vyi mù vì ghaʼa wen tò ghaʼa.

⁵¹Ndzɨ̀mtə̀ bàm ə Yesò tsen tsuʼ nyì wen ə̀ koʼ tin kətiʼitiʼi kə wù shwèʼ kətʉ kə Tʉtʉ vəpfèm və ngə̀ŋ Nyìngòŋ.

⁵²Yesò gàʼ à wen la, “Bwènsə̀ wè nyi wù à yì a kwʉ. No ndò a ghə̀ soynə nə̀ nyi lu pfʉ tò nə̀ nyì.

⁵³Ghə̀ŋ ko kɨ̀ la à tu yi ndiʼ soyn mu mà zì mà sensə Tìʼ ghom ghə̀ ku ntsɨ̀ŋsə ngə̀ŋ wen nkamsə no sə ghoʼo la sə soyn à mò.

⁵⁴Mà sətsèn mù nè a lì mu kənyʉ̀ kì a və ə̀ nyòʼò li a ŋwàʼlə̀ Nyìngòŋ byìʼì mò ko a lyɨ kəshi.”

⁵⁵Yesò mù gàʼ à nòyn yi la, “Ghə̀ŋ fʉ sə vì nə̀ nyisə bènə̀ mbàŋsə əvì ghaʼ mo sə mà dìʼ tsoŋ ale? Gaʼa kò mà tə nzhʉsə̀ tò vəghəŋ à tì ngə̀ŋ Nyìngòŋ ghoʼo dìʼsə̀ kò ghə̀ŋ lu nghaʼa mò byìʼì ghò?

⁵⁶Nyʉ̀ venə diʼi fʉ̀ alə̀ ndi nè la nyʉ̀ vyi a Nyìngòŋ ngaʼà chòsə̀ fà nshə̀ʼtə̀sə wen la və lyɨ kəshi.” No a zhʉ̀ kò ndzɨ̀mtə̀sə bàm wen sə nyɨŋkə no sə tsèm mòʼtə̀ wen.

⁵⁷Viʼi vi a və nghaʼa Yesò lì lyɨ̀ wen ə̀ dyʉ̀ nə̀ wen a kəbəŋ ə̀ Kayifàs a ndiʼì kətʉ kə Tʉtʉ vəpfèm və ngə̀ŋ Nyìngòŋ. Andìʼ a lì mu ndìʼsə̀sə təsoʼ bènə̀ vəchəʼ və loʼ tsentə̀ li tsu.

⁵⁸Və sə ndyʉ̀ Bità sə dzɨ̀mtə̀ dyʉ̀ nə̀ vəwenə fa kəghaf, dyʉ̀ kwèn a kəbəŋ ayì ə̀ ŋwʉʼʉ wenə ntsɨ̀ŋsə shì a sə nshwèʼè a kəbəŋ a yì ndi əyen kənyʉ̀ a kə a chò nə̀ Yesò.

⁵⁹Tʉtʉ vəpfèm və ngə̀ŋ Nyìngòŋ bènə̀ ntsèntə̀ viʼi nsoʼsə ayì no tsèm mù sə kəŋə viʼi la və vi gàʼ nyʉ ndzɨ̀ŋsə byìʼì Yesò ndi və zhwi wen,

⁶⁰alì kò vəwenə lù yèn no kənyʉ̀ kə mùʼ. Viʼi mfʉ̀ no və ghoʼo və mù sə zhò ndzɨ̀ŋsə alì kò sə lə̀ nghaʼa mu. Viʼi vətsenvə vəbò nè kaʼà fʉ̀

⁶¹mù gàʼ la, “Wìʼ ghèn tə̀ gàʼ la yì zì yì bətə ngə̀ŋ Nyìngòŋ ə̀ bwènsə̀ bwòm tò a mətsi ntaʼ.”

⁶²Kətʉ kə Tʉtʉ vəpfèm və ngə̀ŋ Nyìngòŋ lù bèm à Yesò la, “Wù bè ko gàʼà? Wù ko kiʼ kənyʉ̀ əgàʼ kùmə̀ nyʉ̀ venə a və ghàmə̀ wù tsu lə̀?”

⁶³Yesò chiʼ tò la a kùʼ, kətʉ akì mù gàʼ à wen la, “Mà gaʼà à wù la wù gàʼ tò nəmwèʼè a zhiʼ Nyìngòŋ a ghə̀ faŋə̀ tò ghàyn mùʼ. Shə̀ʼtə à yès la wù dìʼ Wìʼ yì a Nyìngòŋ ntsuʼ li ə̀ ghʉ ə wàyn Nyìngòŋ yì mu lo?”

⁶⁴Yesò gàʼ la, “Kə diʼ ando wu gaʼà. Alì mà gàʼà à ghə̀ŋ vətsèm la əlù fa luwèn ghə̀ŋ a yen Wàyn Wìʼ ghə̀ ŋwʉʼ a kwoŋ toghə Nyìngòŋ a ghə̀ kiʼi adyòʼ à tsèm be shiʼì vì a tì mbòʼsə a kàŋ.”

⁶⁵Kətʉ akì ghaʼ bàs ndisə wen tò fa wen a ngə̀ŋ gàʼà la,“Ghə̀ telə li Nyìngòŋ! Vəghəŋ be kəŋə əzhʉ fa chʉ̀ ndò? Gaʼa kò ghə̀ŋ zhʉ li nyʉ̀ byɨvə kùmə̀ Nyìngòŋ a ghə̀ gaʼà fà wen a chʉ̀.

⁶⁶Nkàntə̀ ghə̀ŋ kwòʼtə̀ la ghò kùmə̀ wen a? Vəwenə gàʼ tò vətsèm la, Ghə̀ diʼi pfʉ.”

⁶⁷Ando vəwenə ngàʼà a lì, vəwenə mù sə chʉlə̀ mənte à wen a kə̀ʼ be ghòmə̀ wen vətsenvə pfènlə̀ wen,

⁶⁸gàʼà la, “Shə̀ʼtə lì à yès a Wìʼ ghèn a Nyìngòŋ ntsuʼ li ə̀ ghʉ la à ghòm ndò wù lo?”

⁶⁹Bità ŋwʉʼʉ a fətin fə kəbəŋ akì wàyn wùwì shwèʼ kətʉ kə tʉtʉ vəpfèm və ngə̀ŋ Nyìngòŋ vì gàʼ à wen la, “Wù tə njèʼè fa bàm Yesò ə, wù Galìlì ghèn.”

⁷⁰Bità mo tò a shɨ vəwenə no vətsèm gàʼà la, “Mà ko kɨ̀ kənyʉ̀ a wu gàʼà kəwenkə.”

⁷¹Ghə̀ gàʼ a lì lù fʉ̀ sə dyʉ̀ a ji a ghə̀ kwenə a kəbəŋ ayì, wàyn wùwì shwèʼ tsen yen wen sə gàʼà a viʼi a və nti boʼsə tsu la, “Wìʼ ghèn tə njèʼè wenə̀ Yesò wu Nazalèt.”

⁷²Bità bè tènsə gàʼà la “Mà gàʼà nəmwèʼè la mà ko kɨ̀ wìʼ ayì.”

⁷³A bè sə laʼtə tò a loʼ viʼi vyi a və nti tsu lì dyʉ̀ gàʼ à Bità la, “Kə diʼ no nəmwèʼè la wù dìʼ wìʼ muʼ fa nòyn Yesò byìʼàndo wù lofə gàʼà tò nə̀ wù Nazalèt.”

⁷⁴Bità mù kàyn la, “Nyìngòŋ ku ngəʼ à mò a zhʉ a mà wamə wamə. Mà ko kɨ̀ wìʼ a ghèn.” Ando ghə̀ mbu gàʼà nkə̀ʼ toŋ tò a zhʉ a yì.

⁷⁵Ghə̀ mù bwènsə̀ kwòʼtə̀ ando Yesò ngàʼà à wen la “Nkə̀ʼ ne sə toŋ mu wù mo li mò aghayn la a taʼ.” No a zhʉ kò Bità fʉ̀ dyʉ̀ a kəbəŋ ə dì tsu no mwèʼè mwèʼè.