Read Babanki Matìyò 27 Bible Online

Matìyò 27 - Babanki bible

Matìyò 27

¹Tʉʼ lan tò a boʼòngə̀ŋ Tʉtʉ vəpfèm və ngə̀ŋ Nyìngòŋ bènə̀ vəchəʼ və loʼ no vətsèm shɨ̀tə̀ jì əzhwi Yesò,

²kwìʼi wen ə lyɨ̀ wen dyʉ̀ kù à Bilate a fòyn Lum nghʉ̀ la ghə̀ nsoʼo shə Judiyà.

³Judàs a ghə̀ mbaʼlə̀ Yesò nè zhʉ̀ la və diʼi zhwi wen kənyʉ̀ ki kwen à wen a wèn no nànto ghə̀ lyɨ̀ ko yì a və nku à wen lì bwènə̀ dyʉ̀ kù à Tʉtʉ vəpfèm və ngə̀ŋ Nyìngòŋ bènə̀ vəchəʼ və loʼ,

⁴gàʼà la, “Mà ne li mbyɨ byìʼàndo mà baʼlə li wìʼ və sə diʼi zhwi wen kènla ghə̀ ne li no kənyʉ̀ kə byɨkə.” Vəwenə bwènsə̀ gàʼ à wen la, “Yès pfʉ̀ gho tsu a? A diʼi nsoʼo wù.”

⁵No a zhʉ̀ kò Judàs mòʼ ko ayi atì ngə̀ŋ Nyìngòŋ ə̀ dyʉ̀ sɨŋ.

⁶Tʉtʉ vəpfèm və ngə̀ŋ Nyìngòŋ vi boŋtə ko ayì gaʼà la, “Ghenə diʼ ko mənlyuŋ. Soʼ vəghəŋ ko byɨmə la vəghəŋ we a kəmbò kə ngə̀ŋ Nyìngòŋ.”

⁷Vəwenə mù ghʉ̀ la vəwenə a lyɨ ko ayi dyʉ̀ zen kəshi kə nse fà wù bwomə̀ vəntòyn ə mbvɨ̀mə̀ tɨm tsu.

⁸A dìʼ kənyʉ̀ a kə ne bu sə dzàŋə̀ kəshi akì nə̀ sɨm mənlyuŋ əzaʼa fa lan.

⁹Kə nlyɨ kəshi a lì ndi nè la kənyʉ̀ a Nyìngòŋ ngaʼà chòsə̀ fà nshə̀ʼtə̀ wen Jèlimayà la və lyɨ kəshi la, “Və nlyɨ ko kəkas yi məwum ntaʼ a viʼi Islel mbyɨmə la və a zen Yesò tsu,

¹⁰zèn kəshi kə nse tsu fà wù bwomə̀ vəntòyn, ando Bobo ngaʼà à mò la mà ne.”

¹¹Andìʼ ando və nlyɨ Yesò dyʉ̀ nə̀ wen à Bilate ghə̀ bèm à wen la, “Wù dìʼ fòyn Vəjew mu?” Yesò gàʼ à wen la, “Kə diʼ ando wu gaʼà.”

¹²Tʉtʉ vəpfèm və ngə̀ŋ Nyìngòŋ bènə̀ vəchəʼ və loʼ nzuʼu nyʉ̀ à wen a wèn alì ghə̀ tyen la ghə̀ ko gàʼ kənyʉ̀.

¹³Bilate mù bèm à wen la, “Wu ko zhʉ ngwàʼà nyʉ̀ venə a və ghàmə̀ wù tsu lə̀.”

¹⁴Yesò tyen la yì ko a bwènsə̀ no kənyʉ̀ kə mùʼ fa ntìntìn nyʉ̀ a vyi, kənyʉ̀ akì sə fànsə̀ à Bilate.

¹⁵No zhʉ kəzhɨ kə məzaʼsə̀ kə kò mvi kwʉ̀ʼʉ̀ kətʉ kə Lum kə gàʼa à viʼi la vəwenə tsu wìʼ a vəwenə kòŋə̀ la və shìsə fa mfɨŋ, ghə̀ shìsə.

¹⁶Andìʼ a zhʉ a ghèn wutsen diʼ a mfɨŋ a və ndzàŋə̀ wen nə̀ Jisòs Bàlabàs. Viʼi nkɨ wen no nkàyn.

¹⁷Viʼi ne vì zhùŋtə̀ tsu ndiʼ tsu wìʼ yì a və ndiʼi ne shisə̀ fa mfɨŋ, Bilate mù bèm à vəwenə la, “Ghə̀ŋ kòŋ la mà shisə̀ ndo à ghə̀ŋ a? Bàlabàs mu Yesò ghèn a və dzàŋə̀ nə̀ Wìʼ yì a Nyìngòŋ ntsuʼ li ə̀ ghʉ lə̀ lo?”

¹⁸Ghə̀ mbèmə̀ a lì byìʼàndo ghə̀ nkɨ la à ne tò kənghə̀ʼ la və ghaʼ Yesò vì nə̀ wèn à wen.

¹⁹Bilate mbù bù a ngə̀ŋ soʼo nsoʼ Yesò, wì wen tɨm ntɨm à wen gàʼà la, “Kə a we kəvu kə̀ a wèn wìʼ ghèn a və kəŋə zhwi wen tò kədyàŋ lə̀, byìʼàndo mà tə yèn ngəʼ no nànto a jòmsə nəntʉʼʉ lan byìʼì wen.”

²⁰Tʉtʉ vəpfèm və ngə̀ŋ Nyìngòŋ bènə̀ vəchəʼ və loʼ twəs viʼi la vəwenə gàʼ à Bilate tò la ghə̀ shisə Bàlabàs, bòŋsə̀ kù Yesò vəwenə zhwi.

²¹Bilate bè bèm à vəwenə la, “Ghə̀ŋ kòŋ la mà shisə ndo fa ntìntìn viʼi venə və bò lo?” Vəwenə gàʼ tò la shìsə “Bàlabàs.”

²²Bilate mù bè bèm a vəwenə la, “Ghə̀ŋ ke kəŋə la mà shisə̀ wen ə nè ale nə̀ Yesò ghèn a və dzàŋə̀ nə̀ Wìʼ yì a Nyìngòŋ ntsuʼ li ə̀ ghʉ lə a?” Vəwenə bwènsə̀ tò vətsèm la, “Bantə wen a kəntò.”

²³Bilate bè bèm la, “Byìʼì ghò? Ghə̀ byɨsə no ghò?” Vəwenə be zɨ̀mə tò ntàŋ muʼ la, “Və bantə wen a kəntò!”

²⁴Bilate nè yèn la ghə̀ yènə ngəʼ tò kədyàŋ mu soyn zi ghə̀ be fʉ̀, ghə̀ lyɨ̀ mu ə shʉ̀ avu wen tsu tò vəwenə a shɨ gàʼà la, “mà ko kiʼ kəvu a pfʉ wìʼ ghèn. Nsoʼ ghə̀ŋ.”

²⁵Vəwenə bwènsə̀ tò vətsèm la, “Ghʉsə mənlyuŋ mə wen ndiʼ à yès bènə̀ à vunə vyesə.”

²⁶Bilate mù shìsə Bàlabàs fa mfɨŋ ando vəwenə kəŋə ə kù Yesò la və ghom mi bu dyʉ̀ bantə wen a kəntò.

²⁷Vəsugyèʼ və Bilate lyɨ̀ Yesò kwèn nə̀ wen ati ntuʼ. No vəsugyèʼ vətsèm vì ntsèntə̀ à wen a mbyɨ̀.

²⁸Vəwenə tsuʼtə ndisə wen ə mò dàlə bo à wen a wèn.

²⁹Vəwenə bo sòʼ ndzoŋsə ə chìʼ à wen a kətʉ ə zəʼə mbàŋ nyamə à wen a kəvu mù sə vì laŋtə̀ a wen a shɨ gàʼà la, “səʼ fòyn Vəjew!”

³⁰A sə laʼtə vəwenə sə chʉ mənte à wen a wèn be bwènsə̀ shi mbàŋ yì sə ghòmə̀ wen tsu tò fa kətʉ.

³¹Vəwenə nè chəʼə wen mwètə̀ ə tsuʼ dàlə bo yì fà wen a wèn bwènsə̀ mòʼ ndisə wen mi bu lyɨ wen fʉ̀ ədyʉ̀ bantə a kəntò.

³²Vəwenə nè sə ndyʉ̀ ə̀ yèn wù Klen tsen a zhiʼ wen ndìʼ Simon ə̀ kàn la ghə̀ bwèʼè kəntò kə Yesò.

³³Vəwenə ne dyʉ̀ zaʼa a kəshi a və ndzàŋə̀ nə̀ Golgotà andìʼ Kəshi a kə ndiʼì tò anə̀ Kəwuʼlə kə Kətʉ,

³⁴kù məlyʉ̀ʼ à wen mu və we li gwʉ̀ tsu la ghə̀ nyʉ. Ghə̀ mwòm tò mwomə ə̀ tyen la ghə̀ ko a nyʉ.

³⁵Vəwenə nè bàntə wen mwètə̀ ghʉ ndisə wen sə temə bàʼ ndi yen wìʼ a ghə̀ a zhɨ sə wen sə.

³⁶Ne mwètə̀ ə̀ ŋwʉʼʉ tsu sə̀ tsɨ̀ŋə̀ wen.

³⁷Vəwenə nyòʼ kənyʉ̀ kì a vəwenə ngàʼà la ghə̀ mbyɨ̀sə lì a kəbàŋ kə fəkòʼ vì bàntə a wen a kətʉ kə kəntò. Və nyoʼo la, “GHÈN DIʼ YESÒ FÒN VƏJEW”

³⁸Və mbè bàntə vətsoŋ vətsenvə vəbò a mbyɨ̀ Yesò. Və mbantə ghə̀ muʼ a kəntò a kwoŋ toghə Yesò bè bàntə ghə̀ tsen à wen a kwoŋ nànkwè.

³⁹Viʼi mù sə chò fa ji mèsə̀ tʉ vəwenə tè wèn gàʼà la,

⁴⁰“Gaʼa kò wù tə ngàʼà la wù zì wù bətə ngə̀ŋ Nyìngòŋ bwènsə̀ bwòm a məntsi ntaʼ? Bwoŋsə lì wen wu luwèn! A zhʉ a wù diʼi wàyn Nyìngòŋ wu shìʼi fa kəntò a fì yès yen.”

⁴¹Tʉtʉ vəpfèm və ngə̀ŋ Nyìngòŋ nè ndìʼsə̀sə təsoʼ bènə̀ vəchəʼ və loʼ be sə chəʼə wen tò ndə̀ŋndəŋ,

⁴²gàʼà la, “Ghə̀ lə mbwòŋsə̀ tò viʼi, luwèn sə diʼ kènla ghə̀ zì ghə̀ bwoŋsə wen wenə. Ghə̀ tə ngàʼà la ghə̀ dìʼ fòyn viʼi Islel, ghə̀ shiʼi lì luwèn fa kəntò a shèn ndi yès byɨmə wen.

⁴³Ghə̀ choʼsə̀ à Nyìngòŋ be gàʼà la ghə̀ dìʼ wàyn wen. Vəghəŋ yen lì la Nyìngòŋ la gyàmtə̀ wen luwèn lo.”

⁴⁴Tè vətsoŋ vi a və mbantə wenə vəwenə lì bè sə telə̀ wen.

⁴⁵A sə ndiʼ a ntìntìn nə̀nchwì shi bwènsə̀ fèn no tsèm əzaʼa fa bwaʼa kəbə̀ŋ.

⁴⁶A sə ndiʼ a kəlyɨŋ kə təzhʉ tə taʼ a bwaʼa kəbə̀ŋ Yesò zɨmə a gɨ to la, “Eli Eli Lama Sabatani” andiʼ la “Nyìngòŋ! Nyìngòŋ ghom byìʼì ghò a wu maʼa mo a?”

⁴⁷Viʼi vətsenvə a və nti tsu zhʉ a lì sə gàʼà la, “Ghə̀ ye ghə̀ dzàŋə̀ Elijà”

⁴⁸No a zhʉ kò, wutsen fa vəwenə a ntìntìn nyɨŋ dyʉ̀ lyɨ̀ kuncha chʉ̀ a kəmbas kə məlyʉ̀ʼ sù a kətyɨ mù sə ku la ghə̀ nyʉ̀.

⁴⁹Viʼi vətsenvə gàʼ à wìʼ ayì la, “Kə̀ʼtə̀ vəghəŋ yen la Elijà la vì bwòŋsə wen lo.”

⁵⁰Yesò bè dì no A gɨ to mù ghʉsə kəzhwì kə wen kə kuʼu fʉ̀.

⁵¹Tò a zhʉ ayì ndisə a və nghàŋsə la sə gə̀sə̀ ngə̀ŋ Nyìngòŋ ghoʼo aghayn a bò bàymə̀ wàŋə̀ bò əzìtə̀ fa kwi shiʼi fʉ̀ a ten, shi sə tsɨŋtə̀ ngùʼsə bàykə̀,

⁵²təsè a və mbvɨ̀mə̀ viʼi tsu sə shenkə̀ bòʼkə̀, viʼi Nyìngòŋ no və ghoʼo bwènsə̀ lù fa pfʉ.

⁵³Yesò lə̀ bwènsə̀ lù fa pfʉ, vəwenə kwen a ntə̀ʼ Nyìngòŋ andiʼì Jelusalèm, dyʉ̀ sə dìʼì təwen tə vəwenə à viʼi no və ghoʼo.

⁵⁴Kətʉ kə vəsugyèʼ kì a kə ntsɨ̀ŋə̀ Yesò lì wenə̀ vəsugyèʼ və tsenəvə nè yèn ando shi ntsɨ̀ŋtə̀ bènə̀ nyʉ̀ kanəvə tsenəvə vi a və mfʉ̀ faynə ə ghaʼ vəwenə, vəwenə mù gàʼ la, “Nəmwèʼè wìʼ ghèn tə ndiʼ wàyn Nyìngòŋ.”

⁵⁵Ki vətsenvə no vəghoʼo nti no kəghaf lyè nyʉ̀ avenə. Vəwenə mvi fa Galìlì wenə̀ və Yesò jèʼè gyàmtə̀ vì nə̀ wen.

⁵⁶Viʼi vətsenvə a və ndìʼì a ntìntìn ki a vi ndìʼ Mèli andiʼì wù Magdala, Mèli lì Jems wenə Josèf bènə̀ lì vunə Zebedì.

⁵⁷A sə ndiʼ a zhʉ mpfwomə, wutsen dyʉ̀ ə̀ gàʼ à Bilate la ghə̀ kəŋ əlyɨ bvenə Yesò dyʉ̀ bvɨ̀mə̀. Zhiʼ wìʼ aghèn ndìʼ Josèf, ghə̀ diʼ wù ntə̀ʼ Alimàtya, ghə̀ mbè dìʼ ndzɨ̀mtə̀ bàm ə Yesò. Bilate byɨmə la və ku à wen.

⁵⁸

⁵⁹Və ku bvenə Yesò à wen ghə̀ lyɨ̀ ə̀ lemtə nə̀ kəbàs kə ndisə kə fi kə,

⁶⁰dyʉ̀ bvɨ̀mə̀ wen a sè fighə tsenghə a ghə̀ ntsəfə a wu sə ghʉ la və lu bvɨ̀mə̀ yì tsu. Ghə̀ bvɨ̀mə̀ a lì bùŋsə ngùʼ ghoʼo ə chiʼi chʉ̀ yi tsu, mibu lù.

⁶¹Mèli wù Magdala bènə̀ Mèli tsen yì ŋwʉʼʉ sə ki dyʉ̀sə̀ nə̀ sè ayi.

⁶²Tʉʼ lan andiʼ kətsi kə zhʉ̀təkə, Tʉtʉ vəpfèm və ngə̀ŋ Nyìngòŋ bènə̀ viʼi Falàsi dyʉ̀ a Bilate,

⁶³ə gàʼ à wen la, “Tìʼ, yès bò kwòʼtə̀ la à tə ndiʼ ando wù ndzɨ̀ŋsə ghèn mbu to ghə̀ gàʼ la, ‘Mà lu pfʉ bwènsə̀ lù a mətsi ntaʼ.’

⁶⁴Ando kə diʼì a lì, tɨm və dyʉ̀ ntsɨ̀ŋə̀ se wen a mətsi ntaʼ a bwen a lì mu ndzɨ̀mtə̀sə bàm wen a dyʉ̀ tsoŋ bvenə wen njèʼè wamə dyʉ̀ à viʼi la Nyìngòŋ lusə̀ li wen fa pfʉ. Vəwenə sətsèn zhò nki ndzɨ̀ŋ a ghenə viʼi byɨmə mu kənyʉ̀ akì a mfànsə̀ chò tè kə mbì kə.”

⁶⁵Bilate gàʼ à vəwenə la, “Ghə̀ŋ lyɨ vəsugyèʼ dyʉ̀ ghʉ̀ a ji ndi vəwenə nshɨ̀tə̀ tsɨŋ ə sè ayi.”

⁶⁶Vəwenə dyʉ̀ tòm kəlàŋ a ngùʼ chʉ sè ayì bè mù ghʉ vəsugyèʼ la və ntsɨ̀ŋə̀ sè ayi.