Read Babanki Matìyò 28 Bible Online

Matìyò 28 - Babanki bible

Matìyò 28

¹Və zhʉsə ə̀ zhɨ kətsi kə zhʉ̀təkə, tʉʼ lan a mbì kətsì a tì ngàm Vəjew, Mèli ə wù Magdala wenə Mèli tsen bwènə̀ dyʉ̀ a chʉ̀ sè Yesò.

²A sə tsèn ntsɨ̀ŋ Bobo shiʼi vì fa kàŋ shi nə̀ʼ no ŋàŋ. Ghə̀ dyʉ̀ a chʉ sè Yesò bùŋsə ngùʼ yì fa tsu lyisə kuʼ ŋwʉʼʉ à yi kətʉ.

³Kəʼ ntsɨ̀ŋ Bobo ayì mbanə to nə̀ ghʉ mwanəghə, ndisə wen sə be baynə to nə̀ awoŋə.

⁴Fanə ghaʼ vəsugyèʼ vì a və ntsɨ̀ŋə̀ sè ayì vəwenə fəŋkə a nse sə diʼ to nə̀ mpfʉ viʼi.

⁵Ntsɨŋ a yì mù gàʼà ki vi la, “Kə ghə̀ŋ à fàyn mà kɨ lè la ghə̀ŋ kəŋə. Yesò yì a və tə bàntə a kəntò lì.

⁶Ghə̀ ko diʼ a shèn. Ghə̀ lu li fa pfʉ ando ghə̀ ngaʼa. Ghə̀ŋ vi kwen yèn kəshi a ghə̀ tə nyoŋ tsu.

⁷Ghə̀ŋ zaŋsə lì dyʉ̀ shə̀ʼtə̀ à ndzɨ̀mtə̀sə bàm wen la ghə̀ lu li fa pfʉ, sə shiʼi dyʉ̀ a vəwenə a mbì a Galìlì. La vəwenə dyʉ̀ yèn wen tsu. Gaʼa kò ghə̀ŋ zhʉ li kənyʉ̀ a ma gaʼà.”

⁸Ki vi zàŋsə̀ lù fa benə sè yì nə̀ fanə alì saŋlə̀ no nànto mù nyɨŋ ədyʉ̀ shə̀ʼtə̀ à ndzɨ̀mtə̀sə bàm Yesò.

⁹A sə tsen Yesò bùmtə̀ vəwenə ə tòŋtə vəwenə gàʼà la,“Mbwaʼmə̀ dìʼ à ghə̀ŋ”, vəwenə dyʉ̀ ghàʼ aghʉ wen sə gumlə̀ wen.

¹⁰Yesò mù gàʼà vəwenə la, “Kə ghə̀ŋ be fwàyn. Ghə̀ŋ dyʉ̀ gàʼà vəlèmə̀ vwomə la vəwenə dyʉ̀ a Galìlì a vəwenə a yen mo tsu.”

¹¹Ki vi lù sə njèʼè dyʉ̀ a ji vəsugyèʼ vətsenvə fa tì vi a və ntsɨŋə̀ sè Yesò lì kwen dyʉ̀ a tì ntə̀ʼ ə shə̀ʼtə̀ no ghò a ghə̀ yì chò a tʉtʉ vəpfèm və ngə̀ŋ Nyìngòŋ.

¹²Tʉtʉ vəpfèm a vi ghaʼ ntsèntə̀ wenə vəchəʼ və loʼ ə baʼtə kənyʉ̀ a vəwenə a gàʼ mù ku ko à vəsugyèʼ vi no ghoʼo,

¹³gàʼà la, “Ghə̀ŋ ngàʼà viʼi tò la ‘A tə ndiʼ nəntʉʼʉ ndzɨ̀mtə̀sə bàm wen sə vì yès bʉnə bʉ̀nə vəwenə tsoŋ kəmpfʉ kə wen lù nə̀ kəwenkə.’

¹⁴Gumnà sə tsèn zhʉ̀ kənyʉ̀ akì yès a kɨ̀ ji tomsə shə̀ʼtə̀ à wen ndi chiʼi wen kə ghə̀ŋ à kwen a ngəʼ”

¹⁵Vəsugyèʼ a vyi shi ko ayi mù nè ando vəwenə ngàʼà. Ndzɨ̀ŋsə a sènsə a vəwenə mbwomə̀ lə̀ saykə̀ a loʼ ayì no tsèm. Vəjew mu sə tsi kɨ tò la və ntsòŋ kəmpfʉ kə Yesò tsoŋə əzaʼa fa lan.

¹⁶Ndzɨ̀mtə̀sə bàm Yesò shì njʉ̀mùʼ zhʉ ntɨm wen ə dyʉ̀ zaʼa à Galìlì kùʼ a kwi pfen tsen a kəshi a ghə̀ ngàʼà vəwenə dyʉ̀ tsu.

¹⁷Vəwenə dyʉ̀ zaʼa tsu yèn wen mù sə̀ gumlə̀ wen, a lì vətsenvə bù momə̀ tò mwòmsə la wù lə̀ gàʼà la adiʼ wen lo.

¹⁸Yesò vìtə̀ boʼsə vəwenə mù gàʼ la “Nyìngòŋ ku li adyòʼ à mò no tsèm a kàŋ bènə̀ a nse la mà nsoʼo viʼi.

¹⁹Ghə̀ŋ dyʉ̀ lì à viʼi no a təloʼ tətsèm shəʼtə̀ ntɨm jùŋə ghom à vəwenə ndi vəwenə byɨmə ə̀ dzɨ̀mtə̀ mò, ghə̀ŋ ku mu à vəwenə a zhiʼ Tìʼ nə̀ wàyn bènə̀ kəzhwì kə ŋwoʼkə,

²⁰ghə̀ŋ nziʼì vəwenə la vəwenə nghʉ nyʉ̀ vyi no tsèm a mà tə̀ gàʼ la ghə̀ŋ nè. Ghə̀ŋ nkɨ la mà ndiʼ vəghəŋ no məzhʉ̀ ntsèm.”