Read Babanki Matìyò 3 Bible Online

Matìyò 3 - Babanki bible

Matìyò 3

¹A be ndiʼ tò mətsi ayì, Joyn wù ku à mù zìtə̀ sə shə̀ʼtə̀ kənyʉ̀ kə Nyìngòŋ a viʼi a nsè zɨm yì a ghə̀ ndiʼ a Judiyà, gàʼà la,

²“Ghə̀ŋ kwitə tətyɨm təŋtə fà a ghə̀ŋ a mbyɨsə byìʼàndo soʼ fòyn Nyìngòŋ boʼsə li”

³Joyn ghèn diʼ wen yì a nshə̀ʼtə̀ Isayà nlù gàʼ kùmə̀ wen la,“Wutsen zɨmə gàʼà a nse zɨm la,‘Ghə̀ŋ shɨtə jì Bobo, ghə̀ŋ ne məjìtə mə wen mə nàyn’”

⁴A ndiʼ alì mu Joyn mòʼ ndisə mu və bo nə̀ nyɨŋsə nyàm tsen a və dzàŋə̀ nə̀ Kàmel, ə kwiʼ kətəŋ mu və shɨ̀tə̀ nə̀ gwʉ̀ nyàm, fozhɨvə wen ndiʼ tò ngùməsə nə̀ fədyom fə.

⁵Joyn vì sə nziʼi, Viʼi vyì à wen mu və lù fa Jelusalèm bènə̀ fa məshə̀ tsèm a loʼ Judiyà, vətsen və vì mu və lù fa mbyì mo Jodàn.

⁶Vəwenə nvì alì əbyɨmə mbyɨsə vəwenə à wen, ghə̀ ku mu a vəwenə a mù mə Jodàn.

⁷Joyn ne yen ando viʼi Falàsi nə̀ viʼi Sadùsi mbe vì no və ghoʼo la ghə̀ ku mu à vəwenə kèn la vəwenə kwitə li tətyɨm tə vəwenə, ghə̀ mù gàʼ à vəwenə la,“Zhusə byɨ sènsə, a tofsə ndò ghə̀ŋ, ghə̀ŋ sə kəŋ nyɨŋ ngəʼ yì a Nyìngòŋ kəŋ tɨm a ghə̀ŋ a?

⁸Ghə̀ŋ nè nyʉ a və diʼi la ghə̀ŋ kwitə li tətyɨm təŋtə fa mbyɨsə.

⁹Kə ghə̀ŋ ne kwòʼtə la ghə̀ŋ zì ghə̀ŋ nyɨŋ ngəʼ Nyìngòŋ ayì tò byiʼàndo ghə̀ŋ gàʼ à la ghə̀ŋ diʼ vu vunə Ablaham. Ma shə̀ʼtə̀ a ghə̀ŋ la Nyìngòŋ zì ghə̀ nè ngùʼ sènsə sə kaʼkə a vunə ghə̀ ku a Ablaham.

¹⁰Ghə̀ŋ kɨ la ndzam ti a tì nkòʼ luwen, mu a faŋ tə fəkòʼ fə ko ke kumə ashɨ jùŋ ghə̀ mu və a bvaʼ ə mòʼ a zhìʼ.

¹¹Mà ku mu à ghə̀ŋ tò nə̀ mu mə Amù ədiʼ la ghə̀ŋ kwitə li tətyɨm təŋtə fà ghə̀ŋ a mbyɨsə, alì wìʼ yì a ghə̀ vì fa mò a bàm, chò mò, a mà ko kwʉ̀ʼ no fa mpfen əshyèʼ a wen a nə̀ kəkòs kə byèʼè gwʉsə aghʉ wen. Ghə̀ ne ku mu à ghə̀ŋ nə̀ kəzhwì kə ŋwoʼkə be chòsə̀ viʼi vətsen və a zhìʼ.

¹²A zhʉ a ghèn, ghə̀ a kiʼi kyeʼ lyelə wen a wenə kəvu, əfwoftə asaŋ ə ghʉ a wenə kàŋ, ali və nyùʼ yabyabsə shi nè zhiʼ a ghə̀ ko lə lɨmə no fa mpfen”.

¹³A ndiʼ tò mətsi a yì, Yesò lù fa Galìlì ə vì yen Joyn la ghə̀ ku mu à wen a mù.

¹⁴Joyn sə̀ mwòmsə ətensə kənyʉ̀ akì mù gàʼ la,“A yì ndiʼ ku wù ku mu à mò, wu bòŋsə nvì la mà ku mu à wù ale?”

¹⁵Yesò gàʼ à wen la,“Yowù nè tò alə̀ luwèn ku tò ku byiʼàndo à diʼ tò a ji a ghèn a vəghəŋ diʼi nè nyʉ̀ vyi a Nyìngòŋ kəŋ.” Joyn mù byɨmə əku.

¹⁶Yesò shi mu ə sə fʉ kuʼ tò kuʼu fa mù alə̀, kaŋ boʼmə̀, ghə̀ yen kəzhwì kə Nyìngòŋ, kə shiʼi vì ə bvʉ̀ à wen kətʉ diʼ tò nə̀ kəlàto.

¹⁷Tò a zhʉ a ghèn, gɨ fʉ vì fa kàŋ ə gàʼ la,“Ghèn diʼ wàyn kòŋ mò, mà saŋlə byìʼì wen nə̀ kwoŋ.”