Read Babanki Matìyò 4 Bible Online

Matìyò 4 - Babanki bible

Matìyò 4

¹Kəzhwì kəŋwoʼkə mù lyɨ̀ Yesò ə dyʉ̀ nə̀ wen a nsè zɨm ndi Deblə̀ mwòmsə wen tsu.

²Ghə̀ dyʉ̀ ə zaʼa tsu ə tsi mətsi məwum nkàʼ kò ghə̀ lə zhɨ kəfo. Fa bàm a tsu, jɨ̀ŋ mù sə zafə wen.

³Deblə̀ mù vì ə gàʼ a wen la,“A zhʉ a wu diʼi wàyn Nyìngòŋ, gàʼ li nguʼ sensə kaʼkə a kəfo kəzhɨkə, wù zhɨ.”

⁴Yesò bwènsə̀ gàʼ a wen la,“Və nyòʼ li a ŋwàʼlə̀ Nyìngòŋ la,‘Wìʼ’ ko zì ghə̀ tsi tò byìʼì kəfo kəzhɨkə, alì tsi byìʼì no kənyʉ̀ kə kò a Nyìngòŋ gàʼà.”

⁵Deblə̀ bè lyɨ̀ Yesò ə dyʉ̀ nə̀ wen a Jelusalèm à diʼ ntə̀ʼ ŋwoʼə, ə kuʼ tom ə wen a fədzuʼudzuʼu fə ngə̀ŋ Nyìngòŋ ghoʼo.

⁶Ə gàʼ à wen la, “Ando wù diʼ no wàyn Nyìngòŋ lə̀, tsoʼo a nsè byiʼàndo və nyòʼ li a ŋwàʼlə̀ Nyìngòŋ la Ghə̀ ne tɨmə ntsɨŋsə wen à wù a bàm, la sə ntsɨ̀ŋə̀ wù. Sə ne ghàʼ wù ə jèʼsə a kaŋ ndi nè la kə wù a tem kəghʉ kyèkə a nguʼ”

⁷Yesò bwènsə̀ gàʼ a wen la, “Və be nyòʼ a ŋwàʼlə̀ Nyìngòŋ la ‘Kə wù lə mwòmsə̀ Bobo Nyìngòŋ wù.’”

⁸Deblə̀ bè lyɨ̀ Yesò fa tsu ə kuʼ nə̀ wen a kətʉ kə pfen kə dyə̀fə kə ə dìʼ təloʼ tə mbi tèn no tətsèm à wen nə̀ ghoʼo yi a ghə̀ diʼì tsu.

⁹Ə mù gàʼ a wen la,“Ma ku fo a venə à wù no tsèm a zhʉ a wù gwʉtə alwi wu à mò ashɨ ə kuʼsə mò.”

¹⁰Yesò gàʼ à wen la,“Bwènə̀ fa mò a bàm a Satan! Və nyòʼ li a ŋwàʼlə̀ Nyìngòŋ la,‘Wù diʼi ə gumlə tò Bobo Nyìngòŋ wù bè shyèʼ tò a wen.’”

¹¹Deblə̀ lù fà a wen a mbyɨ̀ no a zhʉ kò, ntsɨ̀ŋsə Nyìngòŋ sə vì mù sə lyè wen.

¹²Yesò nè zhʉ la və shwin nə̀ li Joyn a mfɨŋ, ghə̀ bwenə dyʉ̀ a Galìlì,

¹³ə dyʉ̀ kèn la ghə̀ ŋwʉʼli fàŋ a Nazalèt. Ghə̀ boŋsə̀ dyʉ̀ sə̀ tsi a ntə̀ʼ Kàbanùm a ben mo Galìlì a shə loʼ zebulùn nə̀ Naftalì.

¹⁴Kə ncho alì ndi lwinsə kənyʉ̀ kì a nshə̀ʼ tə̀ ghoʼo Nyìngòŋ Isayà nlù nyoʼ la,

¹⁵“A ghə̀ŋ viʼi Zebulùn nə̀ ghə̀ŋ viʼi Naftalì, à ghə̀ŋ vyi a ghə̀ŋ tsi a jì shə ndzèn mu Jodàn. A ghə̀ŋ viʼi ntɨm a Galìlì, ghə̀ŋ kɨ la,

¹⁶Viʼi vyi a və ntsi a kəbəŋ kə fenə̀ kə, lu yen bayn ghoʼ ghə̀, bayn vili a kətʉ viʼi vyi a və tsi ashə a kəndemndem kəpfʉ kə jèʼè tsu.”

¹⁷Əzìtə̀ fa mətsi ayì ədyʉ̀ nə̀ mbì, Yesò mù shə̀ʼtə̀ ntɨm Nyìngòŋ gàʼ à la,“Ghə̀ŋ kwetə tətyɨm təŋtə fa ghə̀ŋ a mbyɨsə byiʼàndo soʼ fòyn Nyìngòŋ boʼsə li.”

¹⁸Yesò sə jèʼè fa mbyɨ̀ mu Galìlì a kətsi kətsen kə ə yen vəlemə vətsen və bò, à diʼ Simùn yì a və be dzàŋ nə̀ Bità wenə Andɨ̀lò, vəwenə mòʼò dyʉ̀ nə̀ məlàm mə vəwenə mù kutə̀ shʉsə à mù diʼ shwèʼ vəwenə.

¹⁹Yesò gàʼ à vəwenə la,“Ghə̀ŋ vi ə dzɨ̀mtə̀ mò, mà ziʼi ghə̀ŋ, ghə̀ŋ mbòŋsə̀ kutə̀ viʼi.”

²⁰No a zhʉ̀ kò, vəwenə ghʉsə məlàm mə vəwenə tsu ə dzɨ̀mtə̀ Yesò.

²¹Wenə vəwenə sə ndyʉ̀, Yesò bè yen vəlemə vətsen və bò, à diʼ Jems wenə Joyn, vunə Zebedì, vəwenə ŋwʉʼ a ngùʼ wenə tiʼi vəwenə temə məlàm mə vəwenə ghə̀ dzàŋ vəwenə.

²²No a zhʉ kò, vəwenə lù fa ngùʼ ayì ə ghʉsə kanuʼ nə̀ tiʼi vəwenə ə dzɨ̀mtə̀ dyʉ̀ nə̀ Yesò.

²³Yesò sə̀ jèʼè fa loʼ Galìlì no tsèm ziʼi a aloʼ ntsèntə̀ vəwenə, shə̀ʼtə̀ ntɨm jùŋə byìʼì soʼo fòyn Nyìngòŋ, be chʉʼʉ no nkì kwaʼa kò a viʼi nkiʼi.

²⁴Soʼo gho kùmə̀ shwèʼ wen dyʉ̀ a loʼ Sylia no tsèm, viʼi mù sə̀ lyɨ̀ viʼi nə̀ tə nkì tə kwaʼa vì nə̀ vəwenə à Yesò. Və sə̀ vì nə̀ viʼi a və nzhʉ lɨ̀m njòsə wen no ŋàŋ, vì nə̀ vətsen və a və nkiʼi zhwì byɨvə bènə̀ viʼi kembvʉ bènə̀ viʼi mu və kwàʼkəli, Yesò chʉʼ vəwenə no vətsèm.

²⁵Nòyn viʼi fʉ no ghoʼo, fa Galìlì, fʉ fa ntə̀ʼsə̀ wum, ə fʉ fa Jelusalèm, ə fʉ fa Judiyà nə̀ fa shə loʼ yi a ghə̀ ndiʼ a ndzèn mu mə Jodàn sə dzɨ̀mtə̀ Yesò.