Read Babanki Matìyò 5 Bible Online

Matìyò 5 - Babanki bible

Matìyò 5

¹Yesò n-yèn tənòyn tə viʼi ando tə vì, ghə̀ kùʼ a kwi pfen ə shiʼi ŋwʉʼʉ a nsè. Ndzɨ̀mtə̀sə bàm wen sə vì tsèntə̀ a wen a mbyɨ̀.

²Ghə̀ mù sə ziʼì vəwenə gàʼà la,

³“Mbwaʼmə diʼ à viʼi vyi a və zhəʼtə̀ tò a wenə Nyìngòŋ byiʼàndo soʼo fòyn Nyìngòŋ lu ndiʼ à vəwenə.

⁴Mbwaʼmə dìʼ à viʼi vyi a və dì byiʼàndo Nyìngòŋ lu chɨmsə vəwenə.

⁵Mbwaʼmə dìʼ a viʼi vyi a və bwaʼmə byiʼàndo vəwenə lu kiʼi fo vyi a Nyìngòŋ ghʉ li.

⁶Mbwaʼmə dìʼ a viʼi vyi a və ŋwʉʼ jɨŋsə zafə vəwenə, ndòŋ vəwenə be zɨmtə̀ tò la vəwenə ne kənyʉ̀ kì a Nyìngòŋ kəŋə byiʼàndo Nyìngòŋ lu ku kədyòʼ à vəwenə la vəwenə ne nyʉ̀ a vyi.

⁷Mbwaʼmə dìʼ a viʼi vyi a və kusə̀ nshinsə à viʼi və tsenəvə byiʼàndo Nyìngòŋ lu kusə̀ nshinsə à vəwenə.

⁸Mbwaʼmə dìʼ a viʼi vyi a tətyɨm tə vəwenə tə laynə byiʼàndo vəwenə lu yen Nyìngòŋ.

⁹Mbwaʼmə dìʼ a viʼi vyi a və shyə̀ʼ əghʉ mbwaʼmə a viʼi a ntìntìn byiʼàndo və lu dzàŋ vəwenə nə̀ vunə Nyìngòŋ.

¹⁰Mbwaʼmə dìʼ a viʼi vyi a və tsuʼu aghʉ vəwenə byiʼàndo vəwenə nè ando Nyìngòŋ kəŋə byiʼàndo soʼo fòyn Nyìngòŋ lu diʼ à vəwenə.

¹¹Mbwaʼmə dìʼ a ghə̀ŋ a viʼi telə ghə̀ŋ tsuʼ aghʉ ghəŋə be zhò tənkyì tə ndzɨ̀ŋsə tò tətsèm byìʼì ghə̀ŋ tò byiʼàndo ghə̀ŋ diʼi viʼi vwomə.

¹²Və sə nè nyʉ̀ a venə, ghə̀ŋ saŋlə tò saŋlə byiʼàndo mòʼtə̀ ghoʼo ghə̀ kə̀ʼtə̀ ghə̀ŋ a kàŋ. A ndiʼ tò alì a və ntsuʼ aghʉ nshə̀ʼtə̀ sə ghoʼkəsə sə mbìsə.

¹³“Ghə̀ŋ dìʼ tò nə̀ fəmbvaŋ à viʼi mbyì. A sətsèn fəmbvaŋ fə faŋ ke be lyìmə̀, və à nè ghò tsu la fə be mbwènsə̀ lyìmə̀ a? Kə a ndiʼ tò la və chʉtə maʼa, viʼi ntuʼlə.

¹⁴Ghə̀ŋ dìʼ tò nə̀ baynə à viʼi mbyì. Ntə̀ʼ a ghə̀ diʼi a kwi pfen zì kò ghə̀ lu lyòmtə̀.

¹⁵Wìʼ zì kò ghə̀ lə dyàyn kənkàʼtə̀ ə pfʉsə a tyì nkyè. Ghə̀ diʼi dyàyn ə tom a kəshi kə ŋaŋtə kə ndi kə baynə a ngə̀ŋ no tsèm.

¹⁶A diʼ tò ndə̀ŋndəŋ ando ghə̀ŋ diʼi baynə a viʼi ndi viʼi yen nyʉ̀ jùŋ və vyi a ghə̀ŋ nè mù nkuʼsə tiʼi ghə̀ŋ yi a ghə̀ diʼi a kàŋ.”

¹⁷“Kə ghə̀ a nkwòʼtə̀ la mà vì ə tsəʼsə soʼ yi a Mosìs nlù kù bènə̀ nyʉ̀ vyi a nshə̀ʼtə̀ sə ghoʼkə sə nlù nyòʼ. Mà ko tə vì ə tsəʼsə nyʉ̀ avyi, mà bòŋsə vì ənè la nyʉ̀ avyi ndiʼ nəmwèʼè.

¹⁸Mà gàʼ à ghə̀ŋ nəmwèʼè la kaŋ wenə nsè lu sə mè kenla wìʼ a tsəʼsə tè fənyʉ̀tə̀ fa tyì soʼ ayì. Ghə̀ ko lù chò əzaʼa fa tʉʼ a nyʉ̀ a venə no tsèm lu kwʉ̀ʼ.

¹⁹A sətsèn a kwàʼ no ndò kwàʼa soʼ fa ntìntìn təsòʼ a tèn, tè bè tyetə ghə̀, ə bè ziʼi viʼi la və be kwaʼà tò alì, ghə̀ lu ndiʼ wu tyetə a kəshi kə fòyn Nyìngòŋ. A ghʉ no məndo ghʉ soʼ ayi, be ziʼi viʼi vətsen və la və nghʉ tò alì, ghə̀ lə ndiʼ wu ghoʼo a kəshi kə fòyn Nyìngòŋ.

²⁰Ma mù sə gàʼà à ghə̀ŋ la ntsìnə̀ shəŋsə sətsèn dìʼ ke nti a nkàyn ando Nyìngòŋ kəŋə chò sə ndìʼsə̀sə təsoʼ bènə̀ sə viʼi Falàsi, kò ghə̀ŋ lù kwèn a soʼo fòyn Nyìngòŋ.”

²¹“Ghə̀ŋ zhʉ li la à ndìʼ a mbi və gàʼ à viʼi la kə wìʼ à zhwi. Və lu soʼ no ndo yì a ghə̀ zhwì.

²²Ma be sə gàʼà à ghə̀ŋ luwen la no ndò a ghə̀ fwisə̀ tyin à lèmə̀ wen və le sòʼ wen, à te no ndò tè lèmə̀ wen la, ‘Kəfo kə maʼa kènkə!’ mu və lu dyʉ̀ nə̀ wen a shɨ ntsèntə̀ viʼi nsoʼ. A be tè no mə ndò tè lèmə̀ wen la, ‘Kəndzɨ̀ŋtə̀ kə kəfo kènkə!’ mu ghə̀ zì ghə̀ pfʉ̀ a zhìʼ byɨ ghə̀.

²³Kə mu sə diʼ la wù sətsèn ndyʉ̀ əku kəku a kəbaŋ kə kəku ə kwòʼtə̀ a ji la lèmə̀ wù fwisə̀ tyin à wù,

²⁴wu ghʉsə kəku a kì tò a kəshi ayì bwènə̀ dyʉ̀ shɨ̀tə̀ nyʉ̀ ve wen mibu bwènə̀ vi ku kəku kə a kì à Nyìngòŋ.

²⁵Wìʼ sətsèn nkiʼ kənyʉ̀ wenə wù lyɨ̀ wù dyʉ̀ nə̀ wù a nsoʼ wu zàŋsə̀ shɨ̀tə̀ nyʉ̀ ghə̀ wen ghə̀ŋ bu dyʉ̀ a jì, à bwen alì mu ghə̀ a dyʉ̀ ə ku wù à wù soʼo nsoʼsə ghə̀ chòsə̀ kù wù à wìʼ yi a ghə̀ shwìnə̀ viʼi, ghə̀ wye wù a ngə̀ŋ mfɨŋ.

²⁶Mà gàʼà ghə̀ŋ nəmwèʼè la kə sə tsèn chò alì wù à fàŋ tò a ngə̀ŋ mfɨŋ a yi əzaʼa fa tʉʼ a wù a lòʼ ko wìʼ a yì no tsèm.”

²⁷Ma zhʉ li ando və nlù gàʼ la,“Kə wìʼ à tsì nə̀ wi wìʼ ko nə̀ lɨm wìʼ.”

²⁸Ma sə gàʼà à ghə̀ŋ luwen la no ndò a ghə̀ ki wi wìʼ shə̀mtə dìʼ mu ghə̀ tsili nəwen à wen a kwòʼtə̀.

²⁹Shɨ kwoŋ toghə wù sə tsen nè la wù ne mbyɨ, wu tòŋ shìsə̀ màʼà. Kə bòŋ la wù gho shə wèn wù tsen ghə̀ mùʼ əchò la və mòʼ wen wu no tsèm a zhìʼ byɨ ghə̀.

³⁰Kəvu kə kwoŋ toghə wù sə tsen nè la wù nè mbyɨ wù tyin màʼà kə boŋ la wù gho shə wen wù tsen ghə̀ mùʼ əchò la və mòʼ wen wu no tsèm a tì zhìʼ byɨghə.

³¹Və be nlù gàʼ la,“No ndò sə tsèn dzɨ̀m wì wen, ghə̀ diʼ ku ŋwàʼlə̀ à wen a ghə̀ dìʼì la ghə̀ dzɨ̀mə̀ li wen.”

³²Ma be sə gàʼà à ghə̀ŋ luwen la no ndò a ghə̀ sə tsèn dzɨ̀m wì wen à bwen tò la wùwì a yì jèʼtə̀, wùwì ayì be dyʉ̀ làm kədyàŋ mu wùlɨm mbì yì ne li la wùwì ayì kwàʼ soʼ lam, bè nè la wìʼ a ghə̀ lamə wùwì ayì tsili nə̀ wì wìʼ.

³³“Ghə̀ŋ be zhʉ ando à ndiʼ a mbì və gàʼ à viʼi la, ‘Wù ghʉ kənyʉ̀ ghə̀ Nyìngòŋ kə wù à fàŋ ke nè.’

³⁴Alì mà gàʼ à ghə̀ŋ luwen la, kə wìʼ à kàyn a zhʉ a ghə̀ ghʉ kənyʉ̀ no fa mpfen. Kə wìʼ à kàyn a zhiʼi Nyìngòŋ a kàŋ byiʼàndo kàŋə diʼ kəfoyn kə fòyn Nyìngòŋ.

³⁵Kə wìʼ à kàyn a nsè byiʼàndo à kiʼ kəshi kì a Nyìngòŋ tomtə̀ aghʉ wen tsu. Kə wìʼ lu kàyn a Jelusalèm byiʼàndo à diʼ ntə̀ʼ Nyìngòŋ a diʼì fòyn ghoʼo,

³⁶Kə wìʼ à kàyn tè bè a kətʉ kə wen byiʼàndo ghə̀ zì kò ghə̀ lə nè la nyɨ̀ŋ muʼ fa tsu fɨf kò la ghə̀ fen.

³⁷Kənyʉ̀ kə ndiʼ wù byɨmə, wù byɨmə tò byɨmə, ndiʼ wù tènsə, wù tènsə tò tènsə. A sətsèn wu be nkwʉʼsə kənyʉ̀ à yì a kətʉ mu kə lù fà Deblə̀.”

³⁸“Ghə̀ŋ be nzhʉ̀ ando və bè gàʼà la, ‘Wìʼ tòs ə shɨ wu, wù bè tòs ghə̀ wenə, ghə̀ tsuʼu soŋ wu, wù boŋ tsuʼ ghə̀ wenə.’

³⁹Alì mà sə gàʼ à ghə̀ŋ luwen la, Kə wìʼ lù shəmə kənyʉ̀ a wìʼ nè shwe à wù. Wìʼ ghòm kəgə̀ʼ kə kwoŋ toghə wù, wu bwènsə̀ diʼ kə kwoŋ nànkwè ghə̀ be ghòm.”

⁴⁰Wìʼ kəŋə somə wù əshi ndisə shì a wù mòʼò a tyin, wù ku boʼsə wenə kəgwʉ̀nə̀ kə̀ʼ.

⁴¹Wìʼ ghaʼ wù a kədyòʼ la wù byèʼè kəmbò kə wen ə jèʼ mal muʼ, wù byèʼè wu jèʼè və mal və bò.

⁴²Wìʼ loyn kəfo fà wù, wù ku, kò ghə̀ choʼo tè choʼo wù ku tò ku.

⁴³“Ghə̀ŋ be nzhʉ̀ ando və nlù gàʼ la ‘Kòŋə viʼi ndoŋsə wù ə bàyn viʼi kəbàyn wù.’

⁴⁴Alì mà gàʼà ghə̀ŋ luwen la ghə̀ŋ kòŋ viʼi kəbàyn ghə̀ŋ ə jɨ̀m à viʼi vyi a və tsuʼu aghʉ ghəŋə.

⁴⁵Ghə̀ŋ nè tò alì ndi ne ndiʼ vunə Tìʼ ghə̀ŋ yì a ghə̀ diʼì a kaŋ byiʼàndo ghə̀ŋ nè chwìchwì baynə a kətʉ viʼi və byɨvə bènə̀ viʼi və jùŋ və be nè ghʉ vì a kətʉ viʼi a və nè njùŋ be vì a kətʉ viʼi a və nè mbyɨ.

⁴⁶Ghə̀ŋ sətsèn kòŋə̀ tò viʼi vyi a və kòŋə̀ ghə̀ŋ, Nyìngòŋ lu ku mòʼtə̀ jùŋ ghə̀ à ghə̀ŋ byìʼì ghò? Gàʼ a kò viʼi vyi a və tinə kənsè nè tò ndə̀ŋndəŋ?

⁴⁷Ghə̀ŋ sətsèn toŋtə̀ tò ndoŋ shəŋsə, nə̀ nkwoŋ tsu à ndiʼ ghò? Gàʼ a kò tè viʼi vyi a və ko kɨ Nyìngòŋ be nè tò ndə̀ŋndəŋ kənyʉ̀?

⁴⁸Ntsìnə̀ shəŋsə diʼ ŋwòʼə̀ ando ntsìnə̀ Tiʼi ghə̀ŋ a kàŋ ŋwòʼə̀.”