Read Babanki Luk 10 Bible Online

Luk 10 - Babanki bible

Luk 10

¹A sə ndiʼ a bàm nyʉ̀ a venə, Bobo tsuʼ viʼi vətsenvə njʉ̀sə̀bò a məwum sòmbo ə tɨm vəwenə, və bò və bò la və dyʉ̀ a mbì a ntə̀ʼ sətsèm nə̀ a shi a nkàyntə wen ndiʼ dyʉ̀ tsu,

²Ghə̀ bè gàʼ à vəwenə la, “Fozhɨvə dìʼ no ghoʼ a mə kəŋ alì viʼi və kəŋvə diʼ tò və tyetə. Ghə̀ŋ jɨ̀m à Nyìngòŋ a diʼì Tì sɨm, ghə̀ tɨm viʼi shyèʼ, kwʉ̀ʼsə̀ və fʉ̀ ə kəŋ ə pfwo nə̀ wen və.

³Ghə̀ŋ dyʉ̀. Ghə̀ŋ sə ndyʉ̀, ghə̀ŋ kɨ la ma təmə ghə̀ŋ a nə̀ vunə byisə njɨ̀ a ntìntìn nyamsə bo.

⁴Kə ghə̀ŋ à lyɨ̀ ko kò mbò wafəvə. Kə ghə̀ŋ à lyɨ̀ gwʉsə aghʉ wù sə tsensə. Kə ghə̀ŋ à lyɨ̀ zhʉ ətoŋtə wìʼ a ji.

⁵Ghə̀ŋ nè dyʉ̀ kwen no kəbəŋ kə kò, ghə̀ŋ chò mbì əgàʼ la, ‘Nyìngòŋ ku mbwaʼmə a ghə̀ŋ vətsèm a kəbəŋ a shə̀.’

⁶Wìʼ sətsèn ndiʼ a kəbəŋ ayì a ghə̀ kòŋ mbwaʼmə, mbwaʼmə ayì à dyʉ̀ à wen. Wìʼ sətsèn faŋ ke ndiʼ, mbwaʼmə ayì bwènə̀ vì à ghə̀ŋ.

⁷Ghə̀ŋ kwen, ghə̀ŋ faŋ tò kəbəŋ ayì ə zhɨ bè nyʉ no ghò a və ku à ghə̀ŋ byiʼàndo wù shyèʼ diʼi kiʼ lòʼ wen. Kə ghə̀ŋ à dyàŋtə məbəŋ.

⁸Ghə̀ŋ nè kwen no ntə̀ʼ ko və shisə ghə̀ŋ tsu, ghə̀ŋ zhɨ no ghò a və ku à ghə̀ŋ.

⁹Ghə̀ŋ kwen a ntə̀ʼ ayì ə chʉʼ viʼi və kwaʼkə və a və diʼì tsu ə shə̀ʼtə̀ à vəwenə la soʼ fòyn Nyìngòŋ boʼsə li vəwenə.

¹⁰Alì ghə̀ŋ sətsèn kwen a ntə̀ʼ, və faŋ ke shisə ghə̀ŋ, ghə̀ŋ fʉ̀ dyʉ̀ a nfòsə jisə ə gàʼ à viʼi a vyì la,

¹¹‘Tè kəbyìʼ kə ntə̀ʼ ghə̀ŋ a kə kuʼ à yès aghʉ yès zhès fà yès aghʉ ədìʼ kəchwitə la ngəʼ faŋli à ghə̀ŋ. Alì ghə̀ŋ kɨ la soʼ fòyn Nyìngòŋ boʼsə li à ghə̀ŋ.’

¹²Mà gàʼ à ghə̀ŋ nəmwèʼè la à lu ndiʼ a kətsi kə nsoʼ Nyìngòŋ, ngəʼ ndiʼ à viʼi ntə̀ʼ a vyi əcho ando ghə̀ ndiʼì à viʼi Sodòm.

¹³“Ngəʼ ghoʼo lu ndiʼ à ghə̀ŋ viʼi Kòlazìn bènə̀ ghə̀ŋ viʼi Bèsaydà! A tu ndiʼ la nyʉ̀ kaynəvə venə a ve nè a ghə̀ŋ lə̀ la və nè a viʼi Tayà nə̀ viʼi Sidòn, mu tʉʼ bwen a vəwenə ə ŋwʉʼ kəbʉ a kəchɨ bè moʼ mənchì ndi dìʼ la vəwenə bwènsə̀ nkwitə tətyɨm tə vəwenə fà vəwenə mbyɨsə.

¹⁴A lu ndiʼ a kətsi kə nsoʼ Nyìngòŋ, ngəʼ lu ndiʼ à ghə̀ŋ chò ando ghə̀ lu ndiʼ à viʼi Tayà bènə̀ viʼi Sodòn.

¹⁵Ando ghə̀ŋ viʼi Kabanùm tə nkəŋ nkuʼsə təwen təŋtə a kàŋ lì, və a moʼ ghə̀ŋ a zhìʼ a ghə̀ ko lù mè.”

¹⁶Ghə̀ gàʼ alì mù gàʼ à viʼi ntɨm vyi la,“No məndò a ghə̀ tyen əzhʉ ghə̀ŋ mu ghə̀ tyenli əzhʉ mò. No məndò a ghə̀ tyen mo mu ghə̀ tyenli wìʼ a ghə̀ tɨmə mo.”

¹⁷Viʼi vyi njʉ̀sə̀bò a məwum sòmbo njèʼè dyʉ̀ ə bwènə̀ pfwo nə̀ saŋlə ghə̀ mù gàʼ à Yesò la,“Bobo, tè zhwì byɨvə tə nzhʉ fà yès ando yès tə kənkə̀ vəwenə à wù a zhiʼ.”

¹⁸Yesò gàʼ à vəwenə la,“Mà tə yen ando Satan lù fa kàŋ ə fəŋ tò nə̀ ghʉ a ghə̀ mwànə̀.

¹⁹Ghə̀ŋ kɨ la mà kuli adyòʼ à ghə̀ŋ a ghə̀ŋ zì ghə̀ŋ tùʼlə̀ zhusə nə̀ təŋam be nku kədyòʼ la ghə̀ŋ to chò viʼi kəbàyn, ghə̀ŋ no a jisə tsèm, kò no kəfo kə a lyomsə ghə̀ŋ.

²⁰Alì kə ghə̀ŋ à nsaŋlə̀ la zhwì byɨvə zhʉ fà ghə̀ŋ, ghə̀ŋ mbòŋsə saŋlə la və nyoʼli təzhiʼ təŋtə a ŋwàʼlə̀ Nyìngòŋ a kàŋ.”

²¹Tò a zhʉ ayì, kəzhwì kəŋwoʼəkə nè Yesò sə saŋlə mù jɨ̀m la,“Tìʼ ghom, Bobo yì a ghə̀ soʼo kaŋ bènə̀ nse, mà ku kəzòŋ à wù byìʼàndo wù lyomtəli nyʉ̀ venə fà viʼi a və kwòʼtə̀ la vəwenə tofə ə ndìʼ à ndzɨ̀ŋtə. Nəmwèʼè a Tìʼ, à tə kòŋ tò wù ənè alə̀.”

²²Ando Yesò ngàʼ alì, ghə̀ mù gàʼ à ndzɨ̀mtə̀sə bàm wen la,“Tìʼ ghom kuli fo tsèm à mò. Wìʼ ko zì ghə̀ lə̀ kɨ wìʼ a wàyn diʼi wen a bwen tò tìʼ wen. Wìʼ ko zì ghə̀ kɨ wìʼ a tìʼ diʼ wen bwen tò wàyn, nə̀ viʼi vyi a wàyn tsuʼli ə dìʼ tìʼ wen à vəwenə.”

²³Ghə̀ gàʼ alì mù fuʼtə wen wèn ə nyoʼtə gàʼ à ndzɨ̀mtə̀sə bàm wen la,“Mbwaʼmə dìʼ à viʼi vyi a və yen nyʉ̀ vyi a ghə̀ŋ yenə.

²⁴Ma gàʼ à ghə̀ŋ la, nshə̀ʼtə̀sə bènə̀ təfòyntə tò kədə̀ŋ nkoŋli yen nyʉ̀ vyi a ghə̀ŋ yenə alì kò vəwenə lə̀ yenə bè kòŋ əzhʉ nyʉ̀ vyi a ghə̀ŋ zhʉ alì kò vəwenə lə zhʉ.”

²⁵Ndìʼsə̀ soʼ tsen tɨmə a kàŋ sə mwòmsə Yesò ə̀ bèm la,“Ndìʼsə̀, ma nè no ghò ndi kiʼi bwòŋ yi a ghə̀ ko lu mè lì?”

²⁶Yesò bwènsə̀ bèm a wen la,“Və nyòʼ la ghò a ŋwàʼlə̀ soʼ Mosìs a? Wù dzàŋ ə zhʉ la ghò fa tsu a?”

²⁷Wìʼ ayì bwènsə̀ la “Wù diʼi kòŋ Bobo Nyìngòŋ wù nə̀ tyɨmə wu no tsèm, nə̀ kəzhwì kyè no kə tsèm, nə̀ kədyòʼ kyè no kə tsèm nə̀ kwòʼtə̀ wu no tsèm, bè kòŋə lèmə̀ wù tò ndə̀ŋndəŋ ando wù kòŋə̀ wenə wu.”

²⁸Yesò gàʼ à wen la “Wù bwènsə̀li tò nkàyn. Dyʉ̀ nə̀ tò alì a wu lu kiʼi bwòŋ.”

²⁹Ndìʼsə̀ soʼ a ghèn sə mwòmsə ədìʼ la kənyʉ̀ a yi bèmə̀ dìʼ kənyʉ̀ kətɨməkə, mù bèm a Yesò la “Lèmə̀ ghom dìʼ ndo?”

³⁰Yesò bwènsə̀ gàʼ la “Wìʼ nlu fa Jelusalèm sə shiʼi dyʉ̀ a Jèlikò, və tsoŋ ghaʼ wen ə tsuʼtə ndisə fà wen a wèn, ə ghòm wen ghə̀ sə diʼi tò mə pfʉ.

³¹Kə fʉ̀ la pfèm Nyìngòŋ tsen nshiʼi fa ji ayì ə yen ando wìʼ ayì nyoŋ, ghə̀ kwoʼtə chò fa shə ji tsen yi.

³²Wutsen bè sə nchò tò fa jì ayì, à diʼ wù shyèʼ a ngə̀ŋ Nyìngòŋ mu ghə̀ lù fa ngwàʼ ngə̀ŋ Levì ə yen ando ghə̀ nyoŋ, ghə̀ bè kwòʼtə̀ chò.

³³Alì wù loʼ Sàmalitàn tsen sə ndyʉ̀ a jèʼ fa ji a ghèn, vì fʉ̀ à wenə a wèn sə kiʼi kusə nshinsə à wen.

³⁴Ghə̀ shʉ̀ shi wen ə zuʼtə nə̀ kəfʉ̀kə mù kwìʼ nə̀ basə ndisə ə lyɨ̀ wen ə kuʼsə à wen kwi nyàm ə dyʉ̀ nə̀ wen a ngə̀ŋ a viʼi jèʼ tsi tsu sə tuʼmə nə̀ wen.

³⁵Tʉʼ layn ghə̀ shìsə ko fa wen kəmbò ə ku à wìʼ yì a ghə̀ shyèʼè a ngə̀ŋ ayì, ə gàʼ la ‘Tuʼmə nə̀ wìʼ ghèn. Wù sətsen kwʉʼsə tè ghò a kwi ko a shə̀, ma nè bwènə̀ vì ə lòʼ à wù.’”

³⁶Yesò gàʼ myètə mù bèm à ndìʼsə̀ soʼ yì la “A wù a kwòʼtə̀ à diʼ wìʼ ko fa ntìntìn viʼi venə və taʼ a ghə̀ ndiʼi a nə̀ lèmə à wìʼ ghèn a vətsoŋ ghaʼ lə̀ a?”

³⁷Ghə̀ bwènsə̀ la, “A dìʼ wìʼ yì a ghə̀ ndìʼi kusə nshinsə à wen lì.” Yesò mù gàʼà wen la, “Dyʉ̀ be nè tò ndə̀ŋndəŋ.”

³⁸Yesò wenə ndzɨ̀mtə̀sə bàm wen mù sə̀ jèʼè dyʉ̀ ə dyʉ̀ kwen a ntə̀ʼ tsen, wùwì tsen diʼ tsu a və ndzàŋ nə̀ Matà. Yesò kwen à wen ngə̀ŋ, Matà shisə wen no nkàyn.

³⁹A ndiʼ alì Matà kiʼ lèmə̀ wen tsen a zhiʼ wen ndiʼ Mèli. Mèli nvì ŋwʉʼ no mənzhʉ̀ tsèm a shɨ Bobo zhʉtə ziʼi wen.

⁴⁰Matà nsə̀ femə nə̀ shyèʼ ando ghə̀ nghoʼo mù vì a Yesò ə gàʼ la,“Bobo, wù ko yen la lèmə̀ ghom ghʉsəli mò mà sə dzɨŋ nə̀ shyèʼè tò mo nyɨ̀ŋ a? Gàʼ à wen ghə̀ vì ə gyàmtə̀ mò.”

⁴¹Bobo toŋtə wen ə gàʼ la “Matà, Matà, nyʉ̀ sə̀ ku ngəʼ à wù no ghoʼo.

⁴²A diʼ tò kənyʉ̀ kə mùʼ a və kəŋ. Mèli tsuʼli kənyʉ̀ kə jùŋ kə a kì a və ko zì və be shi fà wen.”