Read Babanki Luk 8 Bible Online

Luk 8 - Babanki bible

Luk 8

¹Fa bàm a tsu Yesò sə jèʼè shə̀ʼtə̀ ntɨm jùŋ byìʼì soʼ fòyn Nyìngòŋ a ntə̀ʼ sə ghoʼkə sə nə̀ sə tyetəsə. A ndiʼ alì ndzɨ̀mtə̀sə bàm wen shì njʉ̀sə̀ bò diʼ wenə vəwenə,

²boʼsə nə̀ kyi vətsenvə vyi a ghə̀ ndzɨ̀mə̀ zhwì byɨvə fà vəwenə təwèn. A ndiʼ Mèli wu Magdala yì a Yesò nlù dzɨ̀m zhwì byɨvə la sòmbo a və nku ngəʼ à wen.

³A ndiʼ Jowanà, wì wù shyèʼ Helòd yì a və ndzàŋ nə̀ Chuzà, nə̀ Sùsana bènə̀ kyi vətsenvə no və ghoʼo. Vəwenə ngyàmtə̀ tuʼmə nə̀ Yesò wen ndzɨ̀mtə̀sə bàm wen.

⁴Viʼi sə fʉ̀ vì fa ntə̀ʼ a ntə̀ʼ, nòyn vi no ghoʼo. Yesò mù mò ngàyn ghèn a vəwenə la:

⁵“Wùtsen nlù fʉ̀ əmoʼ ngwaʼ wen ə sə moʼò, ghətsen fəŋkə a kəghʉ̀ kə ji ando ghə̀ nchò fa sɨm, viʼi tuʼlə, mənyin be vì tsɨbtə ə pfiʼ no tsèm.

⁶Ghətsen nfəŋkə a təwu, ə fʉ̀, alì bwènsə̀ zɨm byìʼàndo nse zhʉtə nko diʼ.

⁷Ghətsen nfəŋkə a toʼ kəzòyn, ghə̀ fʉ̀ wenə̀ kəzòyn tò ghayn mùʼ. Kəzòyn kə taʼsə.

⁸Ghətsen nfəŋkə a nse jùŋ, ə̀ fʉ̀ ə kuʼ ə fosə ə bi, və sə fʉ̀ pfì. No kətʉ kə asaŋ kə kò sə ku ashɨ asaŋ, ghə̀ ghoʼo zaʼa a ghɨ.” Yesò gàʼ alì ə be mù gàʼ no a gɨ̀ to la, “No məndo a ghə̀ tofə, ghə̀ tùʼù zhʉtə.”

⁹Ndzɨ̀mtə̀sə bàm Yesò mù sə bèmə̀ a wen la, “Ngàyn a ghèn ə ku kwòʼtə̀ la ghò lo?”

¹⁰Yesò bwènsə̀ la, “Nyìngòŋ kuli tof à ghə̀ŋ la ghə̀ŋ nzhʉ be kɨ nyʉ̀ lyomtəvə vyi a və diʼì kùmə̀ soʼ fòyn Nyìngòŋ, alì a viʼi vətsen və, mà gàʼà tò ngàynsə ndi vəwenə nki shi alì kò vəwenə lə yenə kəfo, bè zhʉ nyʉ̀ kò vəwenə lə kɨ la və gàʼà la ghò lo.

¹¹“Kènkə diʼ kənyʉ̀ a ngàyn ghèn ziʼì. Ngwaʼ ayì diʼ tò nə̀ kənyʉ̀ kə Nyìngòŋ.

¹²Ngwàʼ yì a ghə̀ nfəŋkə a ji diʼ tò nə̀ viʼi vyi a və zhʉ kənyʉ̀ kə Nyìngòŋ, Deblə̀ vì shisə fà vəwenə tətyɨm la kə vəwenə byɨmə ə bwòŋ.

¹³Ayi a ghə̀ nfəŋkə a təghu diʼ tò nə̀ viʼi vyi a və zhʉ kənyʉ̀ akì, və zaŋsə byɨmə tò a fəshitə̀ fə zhʉ alə̀, mwòmsə vi, vəwenə nfɨŋ tò fa zhʉ.

¹⁴Sətsensə shì a sə nfəŋkə a kəzòyn diʼ tò nə̀ viʼi vyi a və zhʉ kənyʉ̀ akì, sə tsitə tò alə̀, ashɨ vəwenə boʼtə, vəwenə sə kəŋ ghoʼ, nyɨŋ fa bàmə fo nse, nyʉ̀ kaynə və taʼsə la kə vəwenə tɨmə a vəwenə tyì byɨmə.

¹⁵Sətsensə shì a sə nfəŋkə a nse jùŋ diʼ tò nə̀ viʼi vyi a və zhʉ kənyʉ̀ kə Nyìngòŋ, ə ghaʼ no nəmwèʼè nə̀ tətyɨm tə jùŋtə, sə mwòmsə̀ əzaʼa fa zhʉ a ghə̀ a kumə ashɨ a vəwenə ntsìnə̀sə.

¹⁶“Wìʼ ko zì ghə̀ dyàyn kənkàʼtə̀ ə chiʼtə nə̀ kəfo kò tom a ti kwen, alì ghə̀ diʼi dyàyn ə tom a kəshi kə ŋaŋtəkə ndi no məndo a ghə̀ kwenə n-yenə bayn yi.

¹⁷“No ghò a və sətsèn nlyòmtə̀, və lù kəŋ ə vì nə̀ wen a ndayn, a nlyòmtə̀ tè kənyʉ̀ kə kò, kò kə lə faŋ ke fʉ̀ a ndayn.

¹⁸“Ghə̀ŋ tùʼmə̀ li nə̀ jì a ghə̀ŋ zhʉtə fa tsu byìʼì no məndo, a ghə̀ kiʼi, və a ku kwùʼsə̀ a wen, no məndo, a ghə̀ ko kiʼ və a shi tè kətyetə kyì a ghə̀ kwòʼtə̀ la ghə̀ kiʼi.”

¹⁹Tò a zhʉ ayì, lì Yesò wenə̀ vəlèmə və wen vì əyen wen. Jì nko ndiʼ byìʼì nòyn viʼi a və ndiʼ tsu.

²⁰Wutsen shə̀ʼtə̀ a wen la, “Lì wu wenə vəlèmə vyə ti a kəbəŋ kəŋ əyen wù.”

²¹Yesò gàʼ à vəwenə la, “Lì ghom bènə̀ vəlèmə vwomə diʼ viʼi a və zhʉ kənyʉ̀ kə Nyìngòŋ, nè ando ghə̀ gàʼà.”

²²A sə ndìʼ kətsi kətsen kə, Yesò kwen a nkanuʼ wenə ndzɨ̀mtə̀sə bàm wen ə gàʼ à vəwenə la, “Vəghəŋ dyàŋ dyʉ̀ a ndzèn mo tsen yì.” Vəwenə lù mù sə dyʉ̀.

²³Ando vəwenə ndyaŋə̀ dyʉ̀, Yesò sə bʉnə. Fwof toghə zìtə̀ sə chò, mu sə nə̀ʼə̀, bè mù kwen a tyì nkanuʼ yì. Nkanuʼ ayì mù sə kəŋ shwemə.

²⁴Vəwenə dyʉ̀ ə zhòmə wen gàʼà la, “Tìʼ, Tìʼ, lu, yès dìʼ a mə pfʉ!” Ghə̀ lù ə kənkə fwof bènə̀ mu a myì, ghə̀ tyinə ə shi chɨmə la moŋ.

²⁵Yesò mù bèm à vəwenə la, “Byìʼì ghò a ghə̀ŋ ko kiʼi byɨmə a?” Vəwenə mù sə dìʼ nə̀ kàynə bè fàynə, sə bèmə à vəwenə a ntìntìn la, “Ghèn lè diʼ no ndò lo? Ghə̀ kənkə fwof nə̀ mu, və zhʉ wen a?”

²⁶Fa bàm a tsu, Yesò wen ndzɨ̀mtə̀sə bàm wen dyàŋ dyʉ̀ a loʼ Gelasenes ghə̀ diʼi a dyàŋsə Galìlì.

²⁷Yesò ne sə fʉ̀ vì a mbyɨ̀ àmù ə bùmtə̀ wen nə̀ wìʼ mu ghə̀ lù fa ntə̀ʼ tsen tsu. Wìʼ ayì kiʼ zhwì byɨvə mu və ntsi li no kəghaf, kò ghə̀ mòʼ kəfo a wenə a wèn kènla ghə̀ tsi a ngə̀ŋ, tsi tò a mbvɨməsə.

²⁸Ando ghə̀ n-yenə Yesò ghə̀ ku nkəʼ dì ə fəŋ a wen ashɨ ə zɨmə no gɨ to gàʼà la, “Wù kəŋ ghò fa mò a Yesò, Wàyn Nyìngòŋ ghoʼo? Mà sensə̀ wù la kə wù a ku ngəʼ à mò.”

²⁹Ghə̀ ngàʼa alì byìʼàndo Yesò sə nkəŋkə kəzhwì kəbyɨkə kyì la kə fʉ̀ fa wenə a wèn. Kəzhwì akyì nku ngəʼ a wen tò mənzhʉ̀ a mənzhʉ̀. No a zhʉ̀ kò a kə nku ngəʼ à wen, və ghaʼ kwìʼ akwoŋ wen bènə̀ afwen wen nə̀ mpfɨŋsə ə ghʉ wen a kəshi. Və nè ghʉ alì, ghə̀ tyintə mpfɨŋsə ashì tò tyintə, kəzhwì kə byɨkə akyì lyɨ̀ wen ə dyʉ̀ nə̀ wen a nse zɨm.

³⁰Yesò mù bèm à wìʼ ayì la, “Zhiʼi wu diʼ ndo?” Ghə̀ bwènsə̀ la, “Zhiʼi ghomə diʼ ‘Tənòyn’,” byìʼàndo zhwì byɨvə ndiʼ mu və kwenli a wen a wèn no ghoʼo.

³¹Zhwì byɨvə a vyi sensə Yesò la kə ghə̀ à dzɨ̀mə̀ shìsə̀ vəwenə ə nè la vəwenə tsoʼkə a tyì nkwòŋ a ghə̀ shwemə shiʼi.

³²A ndiʼ alì nòyn və ankwʉnyàm ghoʼo tsen ghə̀ zhɨ a we pfen. Zhwì byɨvə a vyi sensə Yesò la ghə̀ ghʉsə vəwenə dyʉ̀ kwen a təwèn və ankwʉnyàm a vyi. Yesò mù ghʉsə.

³³Zhwì byɨvə a vyi fʉ̀ fa wèn wìʼ ayì ə dyʉ̀ kwen a təwèn və ankwʉnyàm a vyi, vəwenə nyɨŋ shiʼi fa bàm ayì ə tsòʼkə a mù ə pfʉkə.

³⁴Viʼi vyì a və nkiʼi və ankwʉnyàm a vyi ne yen kənyʉ̀ a ke ncho,vəwenə nyɨŋ pfwo dyʉ̀ shə̀ʼtə̀ soʼgho ayì a ntə̀ʼ be jèʼè shə̀ʼtə̀ a tyì loʼ no tsèm.

³⁵Viʼi zhʉ alì ə fʉ̀ ədyʉ̀ yen kənyʉ̀ a ke nchò. Vəwenə vì yen Yesò bè yen wìʼ yì a zhwì byɨvə nfʉ fa wenə a wèn, ghə̀ ŋwʉʼ a wen ashɨ, mu ghə̀ moʼli ndisə bè dìʼ a wenə tof. Viʼi a vyì yen alì sə diʼ nə̀ fàynə.

³⁶Viʼi a və n-yenə kənyʉ̀ kyì ando kə yì nchò, shə̀ʼtə̀ a vəwenə ando və chʉʼ wìʼ ayì.

³⁷Viʼi və tsèm a mbyɨ̀ loʼ Gelasenes gàʼ à Yesò la ghə̀ lu fa vəwenə a ntìntìn byìʼàndo vəwenə fàynə no nànto. Yesò kwen a nkanuʼ mù sə kəŋ lù.

³⁸Wìʼ yì a zhwì byɨvə yì fʉ̀ fa wenə a wèn dyʉ̀ sensə Yesò ədyʉ̀ wenə wen. Alì Yesò tensə ə gàʼ à wen la,

³⁹“Bwènə̀ pfwo ə shə̀ʼtə̀ nyʉ̀ vyi a Nyìngòŋ nèli a wù.” Wìʼ ayì lù pfwo sə jèʼè kaʼa a ntə̀ʼ sətsèm, shə̀ʼtə̀ kənyʉ̀ kyì a Yesò nèli à wen.

⁴⁰Ando Yesò bwènə̀ dyàŋ a shə̀ lò yì a ghə̀ nlu fa tsu, nòyn viʼi shisə wen byìʼàndo vəwenə sə nkə̀ʼtə̀ wen.

⁴¹Wulɨm tsen, a ndiʼì kətʉ kə ngə̀ŋ ntsèntə̀, zhiʼ wen diʼ Jailùs, vì fəŋ ashɨ Yesò ə sensə wen la ghə̀ vì à wen a ngə̀ŋ,

⁴²byìʼàndo ghə̀ nkiʼ wàyn wùwì wen tò mùʼ, ghə̀ diʼ ngwʉ̀ʼsə njʉ̀sə̀bò, mu ghə̀ sə pfʉ. Ando Yesò nlu sə dyʉ̀ wenə wen, nòyn viʼi sə fosə wen.

⁴³A ndiʼ a ntìntìn nòyn ayì, wùwì tsen diʼ tsu, a ghə̀ nlaʼtə tò alə̀ yenə zhʉ wen, kwaʼa ayì ndiʼ mu ghə̀ tsili a wenə a wèn a ngwʉ̀ʼsə njʉ̀sə̀bò, kènla no wù kəfʉ̀ muʼ diʼ a ghə̀ zì ghə̀ chʉʼ wen, ghə̀ to.

⁴⁴Wùwì a ghèn fosə dyʉ̀ jì fa bàm Yesò ə kùmsə̀ su ndisə wen, no a zhʉ kò, zhʉ wen yì tyinə la kəŋ.

⁴⁵Yesò bèm la, “A kùm ndo mò a?” No məndo sə tensə la yì ko kùm. Bità mù gàʼ a wen la, “Tìʼ, gaʼa ko viʼi kaʼli wù sə zəʼtə̀ wù?”

⁴⁶Alì Yesò gàʼ la, “Wìʼ kùmsə̀li mò byìʼàndo ma zhʉli la kədyòʼ kə fʉ̀li fa mò a wen.”

⁴⁷Wùwì a ghèn yen la və kɨli la a kùmsə̀ yì, ghə̀ fʉ̀ tsəŋtə vì fəŋ ashɨ Yesò ə shə̀ʼtə̀ kənyʉ̀ kì a kə yì nè la ghə̀ kùmsə̀ Yesò. Viʼi vətsèm zhʉ. Ghə̀ be gàʼ la yì kùmsə̀ wen no a zhʉ kò ə nto tò fa zhʉ.

⁴⁸Yesò mù gàʼ à wen la, “Wàyn ghom, byɨmə wu nèli, wù nto. Pfwo tò nə̀ mbwaʼmə.”

⁴⁹Ando Yesò mbu gàʼà, wìʼ vì mu ghə̀ lù fa ngə̀ŋ kətʉ kə ngə̀ŋ ntsèntə̀ kì ə gàʼ à wen la, “Wàyn wù yì pfʉ li kə be a ku ngəʼ à ndìʼsə̀.”

⁵⁰Yesò zhʉ alì ə gàʼ à Jailùs la, “Kə a fàynə, ghaʼ tò byɨmə wu ndi ghə̀ to.”

⁵¹Yesò dyʉ̀ zaʼa a ngə̀ŋ ayì sə kwen tsu ə̀ kàyn la kə wìʼ à kwen a ngə̀ŋ əchò Bità nə̀ Joyn nə̀ Jems nə̀ tìʼ bènə̀ lì wàyn ayì.

⁵²Viʼi və tsèm a və ndiʼ tsu nkusə nshinsə byìʼì wàyn a ghèn. Yesò gàʼ à vəwenə la, “Ghə̀ŋ chɨmə, kə ghə̀ŋ be dì. Ghə̀ ko pfʉ pfʉ, ghə̀ bʉnə bʉnə.”

⁵³Vəwenə zhʉ mù sə chəʼə wen tò chəʼə, lyɨ̀ wen a kəndzɨ̀ŋtə̀, byìʼàndo vəwenə sə nkɨ la wàyn ayì pfʉli.

⁵⁴Yesò mù kwen ə ghaʼ kəvu kə wen ə gàʼ no a gɨ̀ to la, “Wàyn, lu!”

⁵⁵Kəzhwì kə wen ke bwènə̀ vì tò a zhʉ ayì, ghə̀ lù, Yesò gàʼ la və kəŋ kəfo ə ku ghə̀ zhɨ.

⁵⁶Tìʼ wàyn ayì wenə lì wen sə diʼ nə̀ kàynə, alì Yesò tensə la kə vəwenə à shə̀ʼtə̀ kənyʉ̀ a kə yì chò à wìʼ.