Read Babanki Shwèʼ 1 Bible Online

Shwèʼ 1 - Babanki bible

Shwèʼ 1

¹Tì kəbəŋ Tiyophilus, andìʼ à mo a mbì ŋwàʼlə̀ à wù, mà nyòʼ no nyʉ̀ tsèm a Yesò nzìtə̀ sə̀ nè be ziʼì,

²əzaʼa fà zhʉ a Nyìngòŋ nlyɨ wen ə̀ kùʼsə a kàŋ. Mibu və sə lyɨ wen əkuʼsə a kàŋ mu kəzhwì kə ŋwoʼəkə ku li kədyòʼ, ghə̀ ziʼi nyʉ̀ vyi a viʼi ntɨm wen vi a ghə̀ ntsuʼù lì ndiʼi ne nè.

³Andìʼ ando Yesò yènə ngəʼ ghoʼo ə̀ pfʉ bè bwènsə̀ lù fa pfʉ, ghə̀ dìʼ wenə wen à viʼi ntɨm wen la yì lu li fa pfʉ nəmwèʼè. Ghə̀ ne a lì tò a jisə a jisə no aghayn à ghoʼoghə a tì mətsi məwum nkàʼ bè gàʼ à vəwenə kùmə soʼ fòyn Nyìngòŋ.

⁴Ando Yesò mbu wenə̀ vəwenə, kətsi kətsenkə vəwenə sə nzhɨ, ghə̀ chòsə̀ soʼ a vəwenə la, “Kə ghə̀ŋ à lù fa Jelusalèm luwèn. Ghə̀ŋ nkəʼtə̀ kəku kì a mà nshə̀ʼtə̀ à ghə̀ŋ la Tìʼ ghom nghʉ li la ghə̀ a ku à ghə̀ŋ.

⁵Joyn tə nku mu à viʼi tò nə̀ nkàntə̀ à mù alì luwèn à sə̀ diʼ mu, à fàŋ tò mətsì nshə̀ʼ alə̀ və nku mu à ghə̀ŋ nə̀ kəzhwì kə ŋwoʼəkə.”

⁶Kətsi kətsenkə vəwenə be ŋwʉʼʉ a ntsèntə̀, viʼi ntɨm wen mù sə̀ bèmə̀ à wen la, “Bobo, zhʉ kwʉʼʉ̀ li ə wù bwensə̀ kù soʼ fòyn à viʼi Islel mu?”

⁷Yesò bwènsə̀ gàʼ à vəwenə la, “A ko diʼ kəshi kəŋkə̀ ə ghə̀ŋ kɨ kətsi kì ko zhʉ yi a Tìʼ ghom tə ghʉ̀ nə̀ kədyòʼ kə wen kə.

⁸Ghə̀ŋ kɨ tò la, ghə̀ŋ na kiʼi kədyòʼ a zhʉ a kəzhwì kə ŋwoʼəkə vi li à ghə̀ŋ ə nshə̀ʼtə̀ dyʉ̀ nə̀ ntɨm jùŋ ghòm a Jelusalèm nə̀ a Judiyà no tsèm nə̀ Samalìyà bènə̀ a təshyə tə mbi tèn no tətsèm.”

⁹Ando ghə̀ ngaʼà nyʉ̀ a venə ə mwètə̀, Nyìngòŋ lyɨ̀ wen ə̀ kuʼsə a kàŋ vəwenə yenə ando ghə̀ kuʼu. Ghə̀ kuʼ alə̀ ə̀ lè a tì mbòʼsə.

¹⁰Ando vəwenə mbu ki ando ghə̀ kuʼu dyʉ̀, à sətsèn lyʉmə vətsenvə tɨmə à vəwenə a mbyɨ̀ la vəbò mu və mòʼò ndisə sə fəfə la bʉ,

¹¹ə̀ bèm à viʼi ntɨm Yesò vi la, “viʼi Galìlì, byìʼì ghò a ghə̀ŋ tɨmə̀ sə ki kuʼsə̀ nə̀ kaŋə alə̀ a? Yesò ghèn a və lyɨ̀ fà ghə̀ŋ a ntìntìn ghə̀ nkuʼ a kàŋ lə̀ lu be bwènə̀ vì tò a ji a ghə̀ŋ yì yen ghə̀ ndyʉ̀ fa tsu.”

¹²Viʼi ntɨm Yesò vi lù fa pfen Olìf ə̀ bwènə̀ shiʼi a Jelusalèm a kəghaf ki ndiʼ tò kətemə kə mal.

¹³Vəwenə nè kwèn a Jelusalèm ə kwen ə̀ kuʼu dyʉ̀ a tì lùmə ngə̀ŋ kàŋ yì a vəwenə ntsi tsu. A ndiʼ Bità, nè Joyn nə̀ Jems nə̀ Andɨ̀lò, a diʼ Filib nə̀ Tomòs, à diʼ Bàtòlòmiyà nə̀ Matìyò nə̀ Jems wàyn Alphùyùs, nə̀ Simon ə wù kənsɨ̀mtə̀, à be diʼ Judàs wàyn Jems.

¹⁴A ndìʼ a lì, vəwenə nghoʼo zhùŋtə̀ əjɨ̀m a ntsèntə̀ wenə̀ ki vətsenvə nə̀ Mèli ə lì Yesò bènə̀ vəlèmə̀ və wen.

¹⁵Mətsi chò tò nshə̀ʼ alə̀, viʼi və byɨməvə ə zaʼa ghɨ nə̀ məwum mbò be sə ŋwʉʼ tò kəshi kə mùʼ, Bità lù tɨmə əgàʼ à vəwenə ə̀ gàʼ la,

¹⁶“Vəlèmə̀ vwomə, nyʉ̀ venə a və chò kùmə̀ Judàs tə ndiʼ chò ndi lwinsə kənyʉ̀ kì a kəzhwì kə ŋwoʼəkə ə̀ nè Foyn Devìt gàʼ və bè nyòʼ a ŋwàʼlə̀ Nyìngòŋ byìʼì Judàs a ghə̀ tə sùʼ Yesò la ntsɨ̀ŋsə ngə̀ŋ Nyìngòŋ sə ghaʼ.

¹⁷Judàs tə ndiʼ wù nòyn yès byìʼàndo Bobo tə ndiʼ mu ghə̀ tsuʼ li wen la yo vəwenə ntsèntə̀ shyèʼè a muʼu.”

¹⁸Andìʼ a lì mu Judàs lyɨ li ko yi a və nlòʼò wen tsu byìʼì kənyʉ̀ kə fansə kə kì a ghə̀ ne lì ə̀ zèn kəshi kə nse tsu. Ghə̀ nè a lì ə̀ fə̀ŋ tsu ə̀ pfʉ, bèm ə wen tuʼmə, məntu mə̀ wen fʉ̀ a bàm no ntsèm.

¹⁹Viʼi Jelusalèm no vətsèm zhʉ kənyʉ̀ akì mù sə̀ dzàŋə̀ kəshi kə nse akì à vəwenə a gaʼa loʼ la, “Akeldama” à diʼ la, “Sɨm ə mənlyuŋ.”

²⁰“Byìʼè və nyoʼo li a ŋwàʼlə̀ Salms la, ‘Ngə̀ŋ wen faŋ tò zɨm, kə wìʼ lu ntsi tsu,’ bè nyòʼ la, ‘Wù kədyàŋ lyɨ kəshi kə wen nshwèʼè.’”

²¹Bità shə̀ʼtə̀ a lì mù bè gàʼ la, “Kə lì dìʼì la yès diʼ tsuʼ wìʼ muʼ ghə̀ tsèntə̀ nòyn yes ə nshə̀ʼtə̀ dyʉ̀ a viʼi la Yesò lu li fa pfʉ. A diʼ ndiʼ wì fa ntìntìn viʼi vi a yo vəwenə tə njèʼè kuʼu shiʼì fa bàm Yesò a muʼu əlù fa tʉʼ a Joyn nzìtə̀ sə̀ ku mu à viʼi əkuʼ əzaʼa a kətsi a Nyìngòŋ nlyɨ Yesò fà yès a ntìntìn ə̀ kùʼsə a kàŋ.”

²³Vəwenə kwòʼtə̀ təzhiʼ tə viʼi vəbò, andiʼ Josèf, a təzhiʼ tə wen tətsentə ndìʼ Balabas nə̀ Justus bènə̀ Matiyàs.

²⁴Vəwenə nè a lì mù jɨ̀m gàʼà la, “Bobo, wù kɨ tətyɨm tə viʼi no vətsèm. Diʼi wìʼ yì a wù tsuʼu fa ntìntìn viʼi venə vəbò,

²⁵ndi ghə̀ lyɨ kəshi kə wù ntɨm wù ə nè shwèʼ yi a Judàs tə mòʼtə̀ ə̀ dyʉ̀ à wen a kəshi kə ngə̀ŋ.”

²⁶Vəwenə gàʼ a lì mù nyòʼ təzhiʼ tə viʼi a venə a bàŋə fo ə̀ mòʼ a tì ntòyn sə̀ nə̀ʼə̀, zhiʼi Matiyàs fʉ̀ kùʼ a mbì. Və mù boʼsə wen a nòyn viʼi ntɨm vi njʉ̀mùʼ.