Read Babanki Shwèʼ 10 Bible Online

Shwèʼ 10 - Babanki bible

Shwèʼ 10

¹Wutsen ndìʼ a ntə̀ʼ ghoʼo yì a və ndzàŋə̀ nə̀ Sisalìyà a zhiʼ wen ndìʼ Kòneliyòs. Ghə̀ ndìʼ kətʉ kə nòyn ə vəsugyèʼ a və mvì fa Italì.

²Ghə̀ ndìʼ wu jùŋ, gumlə̀ Nyìngòŋ wenə̀ ngwàʼa ngə̀ŋ wen no tsèm nə̀ viʼi a və nshwèʼè à wen. Kòneliyòs nku gyàmtə̀ à viʼi kəmfem, be jɨ̀mə̀ à Nyìngòŋ no məzhʉ tsèm.

³A sə ndiʼ kətsi kətsenkə, a təzhʉ tə taʼ a mbwaʼà kəbə̀ŋ, ntsɨ̀ŋ ngə̀ŋ Nyìngòŋ fʉ̀ à wen a kə̀ʼ sə à tsi jòm tsi wen, ghə̀ yen ando ghə̀ kwenə mvi ntoŋtə wen la, “Kòneliyòs.”

⁴Ghə̀ ki dyʉ̀sə̀ nə̀ ntsɨ̀ŋ ngə̀ŋ Nyìngòŋ ayì nə̀ faynə ə̀ bèm la, “A dìʼ gho a Bobo?” Ntsɨ̀ŋ ngə̀ŋ Nyìngòŋ ayì bwènsə̀ la, “Nyìngòŋ zhʉ li jɨ̀m wu be yen gyàmtə̀ yi a wu ku à viʼi kəmfem.

⁵Tɨm viʼi vətsenvə luwèn, vəwenə dyʉ̀ a ntə̀ʼ Joba ə dzàŋ wìʼ yì a zhiʼ wen diʼ Simon Bità.

⁶Ghə̀ tsi wenə̀ wìʼ tsen a ghə̀ tùʼmə̀ nə̀ gwʉsə nyamsə, zhiʼ wen diʼ Simon, ghə̀ tsi boʼsə a mbyɨ̀ à mù mə ghoʼomə.”

⁷Ntsɨ̀ŋ ngə̀ŋ Nyìngòŋ ayì nè gàʼ mwètə̀ ə̀ lù. Kòneliyòs dzàŋtə̀ viʼi shwèʼ wen vəbò, ə boʼsə nə̀ sugyèʼ tsen, mùʼ a ghə̀ mbe fànə̀ Nyìngòŋ,

⁸ə shə̀ʼtə̀ nyʉ̀ vyi no tsèm a ntsɨ̀ŋ ngə̀ŋ Nyìngòŋ yì gàʼ à vəwenə mù tɨ̀m vəwenə la vəwenə dyʉ̀ a Joba.

⁹Tʉʼ layn, vəwenə jèʼ nè sə mboʼsə̀ dyʉ̀ a ntə̀ʼ ayì mu chwìchwì bayn li nto, Bità nkuʼ a kətʉ kə ngə̀ŋ əjɨ̀m,

¹⁰Ghə̀ sə njɨ̀mə̀, jɨ̀ŋ sə zafə wen, alì və bo shɨ̀tə̀ fozhɨvə shɨtə. Kənyʉ̀ kə fʉ̀ à wen a kə̀ʼ sə à tsi jòm tsi wen,

¹¹ghə̀ yen ando kàŋ boʼmə̀, və sə shiʼsə̀ vì nə̀ kəfo a nse to nə̀ kəbàs kə ndisə kə ghoʼokə, mu və ghaŋsə fa yì təsoŋ.

¹²Andìʼ a tì ndisə ayì, nyamsə diʼ tsu tò tənkì tətsèm,nə̀ fo ŋaŋləvə bènə̀ mənyinə

¹³Gɨ̀ tsen vì a wen gàʼà la, “Bità, lù zhwilə fo venə ə̀ pfiʼ.”

¹⁴Bità bwènsə̀ gàʼ la, “Mà zì ko ma lə mwòm a Bobo, byìʼàndo ma ko təmə̀ zhɨ kəfo a soʼ loʼ yès ko byɨmə.”

¹⁵Gɨ̀ ayì bè gìsə̀ gàʼ à wen la, “Ma sətsèn ghʉ̀ la kəfo kə laynə wù ko diʼi gàʼ la soʼ loʼ ghə̀ŋ ko byɨmə.”

¹⁶Gɨ̀ ayì gàʼ tò a lì aghayn a taʼ, və bwènsə̀ lyɨ̀ kəbàs kə kəfo akì ə̀ kùʼsə a kàŋ.

¹⁷Bità sə kayntə̀ la, Nyìngòŋ ə kəŋə əziʼi la ghò à yì byìʼì kənyʉ̀ kènkə a kə fʉ̀ à yì a kə̀ʼ lə lo. Ando ghə̀ mbu kantə̀ mu viʼi vi a Kòneliyòs yì tɨmə lì bèmtə̀ li ə̀ nkɨ ngə̀ŋ Simon ə̀ vì tɨ̀mə à yì a chʉ mbàyn,

¹⁸ə̀ dzàŋ ə̀ bèm la, “Wìʼ bè tsi a shə̀ a zhiʼ wen diʼ Simon Bità lo?”

¹⁹Ando Bità mbu kwòʼò tò kwoʼ la kənyʉ̀ kikə a kə yì fʉ̀ à yì a kə̀ʼ lì ə dìʼì la ghò lo, Kəzhwì kə ŋwòʼəkə gàʼ à wen la, “zhʉtə a Bità, viʼi diʼ a kəbə̀ŋ vətaʼ, kəŋə əyen wù.

²⁰Lù shìʼi, wenə̀ vəwenə lu. Kə a kə̀ʼtə̀ byìʼàndo à tɨ̀m mo ə̀ ntɨm vəwenə a shèn.”

²¹No a zhʉ kò, Bità shiʼi dyʉ̀ gàʼ à vəwenə la, “Mà dìʼ wìʼ yì a ghə̀ŋ kəŋə lì. Ghə̀ŋ vì ənè gho?”

²²Viʼi vi gàʼ la, “Yès diʼ a shèn mù à tɨ̀m Kòneliyòs, kətʉ kə vəsugyèʼ ntɨmə yes. Ghə̀ dìʼ wù kənyʉ̀ kə tɨməkə, fànə̀ Nyìngòŋ, no Vəjew no vətsèm be gumlə̀ wen. Ntsɨ̀ŋ ngə̀ŋ Nyìngòŋ ŋwoʼo tsen tə gàʼ à wen la, ghə̀ tɨm ntɨm ə̀ dzàŋ wù wu vi à wen a ngə̀ŋ ə̀ shə̀ʼtə̀ kənyʉ̀ à wen.”

²³Bità zhʉ a lì, ə̀ gàʼ à vəwenə la, vəwenə kwen ə̀ vì wenə̀ vəwenə tsi. Tʉʼ layn, Bità lù wenə̀ vəwenə bènə̀ viʼi vəbyɨməvə vətsenvə fa Joba,

²⁴ə̀ jèʼ dyʉ̀ kwèn a Sisalìyà a kənkùmtə̀ kə kətsi. Andìʼ a lì Kòneliyòs kə̀ʼtə̀ wenə̀ viʼi ngwàʼa ngə̀ŋ wen bènə̀ ndoŋsə wen a ghə̀ nlaʼà və vì.

²⁵Bità sə nkwenə vì tò kwenə a kəbəŋ ayì, Kòneliyòs dyʉ̀ tòŋtə wen ə̀ shìʼi à wen alwi ə̀ ghoʼsə wen.

²⁶Bità ghaʼ kwoŋ wen gàʼà la, “Lù tɨmə. Nkàntə̀ mò diʼ tò wìʼ.”

²⁷Ando Bità ngàʼà kwenə dyʉ̀ a ngə̀ŋ wenə̀ Kòneliyòs, ə̀ sə kwen ə dyʉ̀ ə̀ yen mu viʼi zhùŋtə̀ li tsu, no vəghoʼo.

²⁸Ghə̀ gàʼ à vəwenə la, “Ghə̀ŋ ə kɨ no a nkàyn la soʼ Vəjew ko byɨmə la yès nghayntə viʼi tɨm à vəwenə aloʼ, kò ghə̀ lu mbyɨmə la yès ə njèʼè yo tɨmə a vyi; alì luwèn Nyìngòŋ diʼì li à mò la kə ma dzàŋ wìʼ la ghə̀ ko diʼ wu laynə a jì a ntsìnə̀ lòʼ kəŋ.

²⁹A lè kənyʉ̀ kì a Kòneliyòs yì tɨm ə̀ ndzàŋ mò, ko a ndiʼ la ma bèmə li kənyʉ̀ no mpfen, alì mvi tò vi. Shə̀ʼtə lì a mò a Kòneliyòs la, wù yì tɨm ə̀ ndzàŋ mò a gho lo?”

³⁰Kòneliyòs bwènsə̀ gàʼ la, “A sə diʼ mətsi nkàʼ luwèn ndo mà tə njɨ̀mə̀ a mò a ngə̀ŋ a shèn a təzhʉ tə taʼ a mbwaʼa kəbə̀ŋ, à sə laʼtə mà yen ando wìʼ ə ti a mò a shɨ mu ghə̀ moʼ ndisə, sə fəfə fəfə be ŋwàŋtə̀,

³¹ə̀ gàʼ à mò la, ‘Kòneliyòs, Nyìngòŋ zhʉ li jɨ̀mə̀ wu be nyen gyàmtə̀ yi a wù ku à viʼi kəmfem lì.

³²Tɨm viʼi a Joba, vəwenə dyʉ̀ dzàŋ wìʼ yì a zhiʼ wen diʼ Simon Bità. Ghə̀ tsi a ngə̀ŋ Simon, adiʼ wìʼ, a ghə̀ tùʼmə̀ nə̀ gwʉsə nyamsə, tsi boʼsə a mbyɨ̀ à mù mə ghoʼomə.’

³³Mà mù tɨm ntɨm tò a zhʉ ayì, wù be sə kiʼ tyɨm jùŋghə be mvi tò vi. Luwèn lə̀, vəghəŋ sə tsèntə diʼ a shɨ Nyìngòŋ, kə̀ʼtə̀ əzhʉ nyʉ̀ tsèm a Bobo gaʼà la wù shə̀ʼtə̀ à yès.”

³⁴Bità gàʼ la, “Ma kɨ li nəmwèʼè luwèn la Nyìngòŋ ə lyɨ̀ viʼi vətsèm tò ndə̀ŋndəŋ;

³⁵mu wù yì fʉ̀ tè fa loʼ kò, ə̀ ngumlə̀ wen be nè nyʉ̀ vyi a ghə̀ kəŋə ghə̀ ne nkòŋə̀ wù.

³⁶Ghə̀ŋ kɨ li kənyʉ̀ byìʼì ntɨm yi a Nyìngòŋ tɨmə̀ à viʼi Islel, adiʼ ntɨm jùŋ yì a ghə̀ vì nə̀ mbwaʼmə̀ əchò fà Yesò Klistò. Yesò aghèn dìʼ Bobo viʼi vətsèm.

³⁷Ghə̀ŋ ə̀ kɨ kənyʉ̀ kə kaynəkə kì a kə nchò a tì loʼ Islel no tsèm zìtə̀ fa Galìlì, fà tʉʼ ando Joyn nziʼì la viʼi diʼi shi mu.

³⁸Ghə̀ŋ ə be kɨ ando Nyìngòŋ nlù tsuʼ ə̀ ghʉ̀ Yesò ə wù Nazalèt ə̀ kù Kəzhwì kə ŋwòʼəkə à wen nə̀ kədyòʼ kə, be kɨ ando ghə̀ njèʼè kaʼa fa shì tsèm, nè nyʉ̀ jùŋvə be chʉʼʉ viʼi vi a zhwì byɨvə nku ngəʼ à vəwenə byìʼàndo Nyìngòŋ ndìʼ wenə̀ wen.

³⁹Yès dìʼ viʼi vəyenəvə a nyʉ̀ tsèm a ghə̀ ə̀ nè a Jelusalèm bènə̀ shì tsenəvə a loʼ Islel. Və bantə wen a kəntò ghə̀ pfʉ;

⁴⁰à sə ndiʼ a mətsi ntaʼ, Nyìngòŋ nè ghə̀ lù fa pfʉ ə̀ dìʼ wen ə wen à viʼi.

⁴¹Ghə̀ nko dìʼi wen ə wen à viʼi vətsèm, ghə̀ ndìʼi tò à yès vi a Nyìngòŋ ntsuʼ li ə̀ ghʉ la yès dìʼ viʼi vəyenəvə a nyʉ̀ avenə. Yo vəwenə nzhɨ li be nyʉ ando ghə̀ mbwènsə̀ lù fà pfʉ.

⁴²Ghə̀ ku a soʼ la yès shə̀ʼtə̀ ntɨm jùŋ ə̀ dìʼ nəmwèʼè la ghə̀ dìʼ wìʼ yì a Nyìngòŋ ntsuʼ li ə̀ ghʉ la ghə̀ nsoʼo viʼi a və diʼì və to nə̀ vi a və pfʉkə li.

⁴³A dìʼ byìʼì wen a nshə̀ʼtə̀sə ghoʼkəsə no sətsèm nlù gàʼ la, à byɨmə tè ndò à wen, Nyìngòŋ a lyesə nyʉ̀ byɨvə wen byìʼì Yesò.”

⁴⁴Ando Bità mbu gàʼà, Kəzhwì kə ŋwòʼəkə vì à no ndò a ghə̀ nzhʉtə gaʼa wen.

⁴⁵Vəjew vəbyɨməvə vi a wenə̀ və Bità mvi fa Joba a muʼu lì ndìʼ nə̀ kaynə ando Nyìngòŋ nku Kəzhwì kə ŋwòʼəkə à viʼi tɨm,

⁴⁶byìʼàndo Vəjew avenə nzhʉ li ando viʼi tɨm a vyi ngàʼà təgàʼ tə loʼ kədyàŋ, ghoʼsə̀ Nyìngòŋ byìʼì nyʉ̀ kanəvə vi a ghə̀ nè. Bità mù gàʼ la,

⁴⁷“Viʼi venə diʼ mu Kəzhwì kə ŋwòʼəkə vì li à vəwenə ando kə mvi à yès. A lè zì à be tàʼsə̀ ghò la kə vəwenə shi mu a?”

⁴⁸Ghə̀ gàʼ a lì mù gàʼ la və ku mu à vəwenə à zhiʼ Yesò Klistò. Vəwenə gàʼ à Bità la ghə̀ tsìtə wenə vəwenə a mətsi nshəʼ alə̀.