Read Babanki Shwèʼ 16 Bible Online

Shwèʼ 16 - Babanki bible

Shwèʼ 16

¹Bol wenə̀ Silàs jèʼ ə̀ dyʉ̀ zaʼa Delbə̀ nə̀ Lista. Wu byɨmə tsen ntsi tsu, zhiʼ wen diʼ Timotì, lì wen be diʼ wu byɨmə, a ndìʼ Jus, alì tìʼ wen diʼ wu Glis.

²Viʼi vəbyɨməvə a və ndìʼ a Lista bènə̀ a Ikonùm nkɨ la Timotì kìʼ ntsìnə̀ jùŋə.

³Bol nkəŋə əlyɨ Timotì wenə̀ wen lu, mù nè la və shɨtə ndyə̀ wen. Ghə̀ ne a lì byìʼàndo Vəjew vi a və ntsi tsu nkɨ la tìʼ Timotì ndìʼ wu Glis.

⁴Vəwenə mù lù sə jèʼè shə̀ʼtə dyʉ̀ no a ntə̀ʼ ko a vəwenə ndyʉ̀ tsu, təsoʼ tì a viʼi vəbyɨməvə bènə̀ vəchəʼ a Jelusalèm ŋwʉʼʉ li ə̀ ghʉ la viʼi vəbyɨməvə nghʉ. Vəwenə gàʼ à viʼi ntə̀ʼsə ashì la vəwenə ə mwòmsə̀ əghʉ təsoʼ atì.

⁵Byìʼì alə̀, byɨmə yi a viʼi nkiʼi no a ntsèntə̀ viʼi vəbyɨməvə a ntə̀ʼ ko sə kwi dyʉ̀ tò nə̀ mbì. Viʼi be byɨmə no vəghoʼo tsèntə nòyn ayi tò mətsi tsèm.

⁶Bol wenə̀ viʼi ndoŋsə wen jèʼ dyʉ̀ a Fligiya bènə̀ Gàlesìyà byìʼàndo Kəzhwì kə ŋwòʼəkə nko ghʉ̀sə la vəwenə shə̀ʼtə̀ ntɨm ə jùŋ a loʼ Asìyà.

⁷Vəwenə nè dyʉ̀ boʼsə a Misìyà sə kəŋə əkuʼ dyʉ̀ ji fa Bitinyà, Kəzhwì kə Yesò kə bè tènsə la kə vəwenə a kùʼ tsu.

⁸Vəwenə mù shìʼi dyʉ̀ chò jì fa Misìyà ə̀ dyʉ̀ zaʼa a ntə̀ʼ Tuwas.

⁹A sə ndiʼ nəntʉʼʉ, kənyʉ̀ kə fʉ̀ vì a kə̀ʼ Bol a nə̀ jòm, ghə̀ yen wìʼ mu ghə̀ lù fa Macedonia, ghə̀ ti a wen a shɨ sensə̀ wen gàʼà la, “Dyaŋ ə̀ vì a Macedonia ə̀ gyàmtə̀ yès.”

¹⁰Fa yì a bàm, yo vəwenə baʼtə̀ tò a zhʉ a yì əlu dyʉ̀ a loʼ Macedonia byìʼàndo yès nyen li la Nyìngòŋ ə kəŋə la yès dyʉ̀ shə̀ʼtə̀ ntɨm jùŋ à loʼ ayì.

¹¹Yès lù fa Tuwas ə̀ kwèn a nkànuʼ ə nàyn tò fəchìʼ a fəloʼtə̀ fə tsenfə a fə ndìʼ a ntìntìn àmù mə ghoʼomə̀ a və ndzàŋə̀ nə̀ Samothlàs. Tʉʼ layn, yès dyʉ̀ a ntə̀ʼ Niyàbolìs,

¹²nè lù fà tsu ə dyʉ̀ a Filibày, a ndiʼì no ntə̀ʼ to a ghə̀ ndiʼì a Macedonia. Nghoʼo viʼi a və ntsi tsu ndìʼ viʼi Lum. Yès tsìtə tsu no mətsi nshəʼ alə̀,

¹³kətsi kəzhʉtə kə Vəjew nè vì, yès lù fʉ̀ fa ntə̀ʼ ayì ə̀ dyʉ̀ a mbyɨ̀ àmù byìʼàndo yès nkɨ la adìʼ kəshi a Vəjew ndyʉ̀ zhùŋtə̀ tsu jɨ̀mə̀. Yès dyʉ̀ ŋwʉʼʉ tsu sə ziʼi ki vi a və mvì tsu.

¹⁴Andìʼ a tì ki avenə a və mvì zhùŋtə̀ və sə zhʉtə̀ ando Bol gàʼà lì, wùwì tsen diʼ tsu, a zhiʼ wen ndìʼ Lydiyà mu ghə̀ lù fa ntə̀ʼ Tatiliyà. Ghə̀ nè mbaʼlə̀ nə̀ ndisə a ko yi nto no nànto, a be diʼ wùwì a ghə̀ ngumlə̀ Nyìngòŋ. Bobo bòʼtə̀ kwòʼtə̀ wen la ghə̀ ntùʼù zhʉtə̀ nyʉ̀ vyi a Bol ngàʼà lì ə̀ byɨmə nyʉ̀ a vyi.

¹⁵Və ku mu à wen bènə̀ à viʼi vi a wenə̀ vəwenə ntsi a muʼu. Ghə̀ mù gàʼ à yès la, “Ghə̀ŋ vi lì ntsi a mò a ngə̀ŋ, ando ghə̀ŋ yen li la mà byɨmə li nəmwèʼè à Bobo lə̀.” Ghə̀ faŋ ə̀ sə̀ sensə̀ yès tò sensə, yès kaʼa dyʉ̀.

¹⁶Tʉʼ layn kətsi kətsenkə, yès bè sə ndyʉ̀ a kəshi kə jɨ̀m ə̀ bùmtə̀ wàyn wùwì tsen a ghə̀ nshyèʼè kəkòs à wìʼ. Ghə̀ nkìʼ Kəzhwì kə byɨkə. Kəzhwì kə byɨkə akì nè ghə̀ shə̀ʼtə nyʉ̀ a və lu fʉ̀ à viʼi. Ghə̀ mpfwo nə̀ ko no ghoʼo fà nyʉ̀ a vyi a ghə̀ nshə̀ʼtə̀ à viʼi lì. Ghə̀ mvi ku kò ayi à viʼi a və nkiʼ wen.

¹⁷Ghə̀ dzɨ̀mtə̀ yo və Bol, zɨmə̀ gàʼà vì tò la, “Viʼi venə diʼ viʼi a və shyèʼè à Nyìngòŋ yì a ghə̀ Ŋaŋtə Chò vənyìngòŋ no vətsèm lì. Vəwenə shə̀ʼtə̀ jì a Nyìngòŋ zì ghə̀ bwoŋsə ghə̀ŋ fa tsu.”

¹⁸Ghə̀ faŋ sə gàʼà tò alə̀ no mətsi nshə̀ʼ alə̀ tin Bol zìtə̀ əfwi. Bol gàʼ à kəzhwì kə byɨkə akì la, “Ma kàynə à wù a kədyòʼ Yesò Klistò la wù cho fʉ̀ fà wen a wèn.” Kəzhwì kə byɨkə akì fʉ̀ fà wen wèn tò a zhʉ ayì.

¹⁹Andìʼ a zhʉ a viʼi vyi a və nkìʼ wàyn wùwì ayì nyen li la ghə̀ ko be a shyèʼ ko à vəwenə, vəwenə ghaʼ Bol wenə̀ Silàs ə̀ gùf dyʉ̀ nə̀ vəwenə a kəshi yì a və soʼo viʼi tsu a woŋ.

²⁰Vəwenə nè vì nə̀ Bol wenə̀ Silàs zaʼa a shɨ viʼi nsoʼ ə̀ gàʼ la, “Viʼi venə diʼ Vəjew a və jèʼè sə̀ʼə̀ ngəʼsə a ntìntìn viʼi ntə̀ʼ vəghəŋ.

²¹Vəwenə ziʼi la vəghəŋ ə nè nyʉ̀ a soʼ vəghəŋ a nə̀ viʼi Lum ko byɨmə la vəghəŋ nè.”

²²Nòyn viʼi vyi a və ndiʼì tsu feŋ a kətʉ Bol wenə̀ Silàs sə̀ ghòmə̀. Viʼi nsoʼ vi gàʼ, və ghaʼ tsùʼtə ndisə fa Bol nə̀ Silàs, ə ghòmə̀ vəwenə nə̀ mbàŋsə.

²³Vəsugyèʼ nè ghòm vəwenə no a nkàyn mù dyʉ̀ wè vəwenə a mfɨŋ. Və be gàʼ à wìʼ yì a ghə̀ shyèʼè a mfɨŋ lì la ghə̀ shɨtə̀ shwìn vəwenə no a nkàyn.

²⁴Wìʼ ayì zhʉ soʼ ayi ə̀ kwen dyʉ̀ shwìn vəwenə no a tì ngə̀ŋ a ngə̀ŋ mfɨŋ ə kùm ghàŋtə̀ afwen vəwenə nə̀ ntemə nkòʼ.

²⁵A nè sə̀ ndiʼ a ntìntìn nəntʉʼʉ, Bol wenə̀ Silàs sə jɨ̀mə̀, zhɨmə̀ ndzàŋsə à Nyìngòŋ, viʼi mfɨŋ vətsenvə sə zhʉtə̀ nyʉ̀ vyi a vəwenə nzhɨmə gàʼà.

²⁶A sə laʼtə, nse nə̀ʼ no nəmwèʼè nəmwèʼè, ngə̀ŋ mfɨŋ yì sə kəŋ feŋ. Təchʉ̀ tə aloʼ tə bòʼkə̀ tò a zhʉ ayì no tətsèm, mfɨŋsə shì a və nkwiʼ afwen viʼi mfɨŋ tsu lì zàykə̀ no sətsèm.

²⁷Wìʼ yì a ghə̀ ntsɨ̀ŋ ngə̀ŋ mfɨŋ ayì shen ə̀ lù yèn mu və bòʼtə̀ li təchʉ̀ tə ngə̀ŋ mfɨŋ yì ə̀ ghʉ̀sə tò təbòʼkə təbòʼkə no tətsèm. Ghə̀ tsuʼ fənyì fə wen sə kəŋ sù wen ə wen tsu kwòʼtə̀ la viʼi ngə̀ŋ mfɨŋ nyɨŋkə li,

²⁸alì Bol zɨmə ə̀ gàʼ la, “Kə a sù wen ə wù, yès diʼ a shə̀ tò vətsèm.”

²⁹Wìʼ ayì dzàŋ ə̀ gàʼ la və vi nə̀ nkɨsə. Və vì nə̀ səwensə, ghə̀ kwen dyʉ̀ fə̀ŋ a shɨ Bol wenə̀ Silàs sə tsɨŋtə̀ fa tsu byìʼàndo fàyn nku ngəʼ à wen.

³⁰Ghə̀ mù lyɨ̀ vəwenə fʉ̀ wenə̀ vəwenə a kəbəŋ ə̀ bèm à vəwenə la, “Vətìʼ, mà lè zì mà nè ghò bu lu kiʼi bwòŋ a?”

³¹Vəwenə gàʼ à wen la, “Byɨmə à Bobo Yesò, a Nyìngòŋ a bwòŋsə wù wenə̀ viʼi ngə̀ŋ wù no vətsèm.”

³²Vəwenə gàʼ a lì mù shə̀ʼtə̀ ntɨm Bobo à wen wenə̀ viʼi vi a wenə̀ vəwenə ntsi a muʼu.

³³Tò a zhʉ ayì, wìʼ aghèn lyɨ̀ və Bol ə̀ shʉ̀ shi vəwenə. Və Bol ku mu tò a zhʉ ayì à wen wenə̀ viʼi vyi a və ntsi à wen a ngə̀ŋ.

³⁴Wìʼ ayì lyɨ̀ Bol wenə̀ Silàs ə̀ dyʉ̀ wenə̀ vəwenə à wen a ngə̀ŋ ə̀ kù kəfo vəwenə zhɨ. Ghə̀ sə saŋlə̀ wenə̀ viʼi wen no nànto byìʼàndo vəwenə nsə̀ diʼ luwèn mu vəwenə byɨmə li à Nyìngòŋ.

³⁵Tʉʼ nè layn, viʼi a və nsoʼo lì tɨm vəsugyèʼ la və dyʉ̀ ə̀ gàʼ à wìʼ yì a ghə̀ ntsɨ̀ŋə̀ ngə̀ŋ mfɨŋ yì la ghə̀ ghʉsə viʼi vi və ndyʉ̀.

³⁶Wìʼ ayì shə̀ʼtə̀ à Bol wenə̀ Silàs la və tɨm li ntɨm gàʼà la yì ghʉsə vəwenə, vəwenə ndyʉ̀. Ghə̀ gàʼ a lì mù gàʼ la, “Ghə̀ŋ fʉ lì mpfwo tò nə̀ mbwaʼmə̀.”

³⁷Bol gàʼ la, “Viʼi a və soʼo ko tə dìʼ la yès byɨsə li kənyʉ̀, alì nè və ghòm yès a shɨ viʼi kò və lə̀ lyɨ̀ la yès dìʼ viʼi Lum! Vəwenə tə nè a lì bè ghàʼ yès ə̀ wè a mfɨŋ,ə sə kəŋə nyoʼtə shìsə̀ luwèn byìʼì ghò? Yès zì ko yès lù fʉ̀. Vəwenə vì tò nkàntə̀ vəwenə ə̀ shìsə̀ yès.”

³⁸Vəsugyèʼ vi bwènə̀ dyʉ̀ shə̀ʼtə̀ nyʉ̀ a vyi à viʼi nsoʼo nsoʼ lì. Vəwenə nè zhʉ la Bol wenə̀ Silàs dìʼ viʼi Lum, fàyn ghoʼghə vì a vəwenə.

³⁹Vəwenə lù dyʉ̀ a mfɨŋ yì ə̀ yèn Bol wenə̀ Silàs ə̀ sènsə vəwenə la vəwenə lyèsə kənyʉ̀ akì, mù gàʼ la vəwenə fʉ̀ fà mfɨŋ ayì ə̀ lù fà a ntə̀ʼ ayì.

⁴⁰Bol wenə̀ Silàs nè fʉ̀ fà mfɨŋ ayì, ə̀ dyʉ̀ a ngə̀ŋ Lydiyà ə yèn viʼi vəbyɨməvə tsu, ə̀ shɨ̀tə̀ gàʼ à vəwenə ndi tomsə vəwenə ə byɨmə vəwenə nto dyʉ̀ tò nə̀ mbì mù lù ə̀ fʉ̀ fa ntə̀ʼ ayì.